SANWUN YOLƐ

1 Zoova flɛli Moizi, kpɛkun ɔ kannin ndɛ kleli i tannin sua mɔ Ɲanmiɛn yi i wun nglo nun’n+ i nun lɔ. Ɔ seli i kɛ: 2 “Kan ndɛ kle Izraɛlifuɛ mun,* se be kɛ: ‘Sɛ amun nun sran kun waan ɔ́ fá klɔ nnɛn yí tɛ mán Zoova’n, maan ɔ fa nannin annzɛ bua annzɛ boli fa man.+

3 “‘Sɛ nannin yɛ i waan ɔ́ fá yí tɛ nga kɛ bé yí’n be yra nnɛn’n i kɔlikɔli’n, maan ɔ fa nnɛn yasua ng’ɔ ti kpa’n,+ ɔ fa man. Maan i klun klo su+ ɔ fa nnɛn’n wɔ Zoova ɲrun tannin sua mɔ Ɲanmiɛn yi i wun nglo nun’n i anuan’n nun lɔ. 4 Ɔ fata kɛ ɔ fɛ i sa fua nnɛn ng’ɔ́ fá yí tɛ nga kɛ bé yí’n be yra nnɛn’n i kɔlikɔli’n i ti’n su. I liɛ’n, Ɲanmiɛn sɔ́ nun klanman kpɛkun ɔ́ yáci i sa tɛ mun cɛ́ i.

5 “‘I sin’n, maan be kpɛ nannin gbanflɛn’n i kɔmin Zoova ɲrun. Maan Aarɔn i mma mɔ be ti Ɲanmiɛn ɲrun jranfuɛ’n,+ be fa mmoja’n be man Ɲanmiɛn, kpɛkun maan be fa mmoja’n be kpɛntɛnkpɛntɛn tɛ yiwlɛ m’ɔ o tannin sua mɔ Ɲanmiɛn yi i wun nglo nun’n i anuan’n nun lɛ’n, i bue kwlaa su.+ 6 Nnɛn nga be fa yi tɛ nga kɛ bé yí’n be yra nnɛn’n i kɔlikɔli’n, maan be yi i kplo’n yɛ maan be kpɛkpɛ i nnɛn’n nun.+ 7 Maan Aarɔn i mma mɔ be ti Ɲanmiɛn ɲrun jranfuɛ’n be gua tɛ yiwlɛ’n i su sin+ yɛ be fa yie be siesie sin’n su. 8 Maan Aarɔn i mma mɔ be ti Ɲanmiɛn ɲrun jranfuɛ’n be siesie nnɛn’n i likalika mun,+ ɔ nin i ti’n nin i lui’n* yie nga be o sin’n su’n be su, tɛ yiwlɛ’n su. 9 Maan be fa nzue salo i aya mun nin i ja’m be wun. Kpɛkun maan Ɲanmiɛn ɲrun jranfuɛ’n yra be kwlaa tɛ yiwlɛ’n su naan i wunsrɛn’n fite. Ɔ ti tɛ kun mɔ kɛ bé yí’n be yra nnɛn’n i kɔlikɔli-ɔ, be yrɛ i sin su naan ɔ bɔn Zoova i bue nun fannin.*+

10 “‘Sɛ bua gbanflɛn annzɛ boli+ yɛ i waan ɔ́ fá yí tɛ nga kɛ bé yí’n be yra nnɛn’n i kɔlikɔli’n, maan ɔ fɛ i yasua ng’ɔ ti kpa’n,+ ɔ fa man. 11 Maan be kpɛ i kɔmin tɛ yiwlɛ’n i nglo lɔ lika’n nun, Zoova ɲrun. Maan Aarɔn i mma mɔ be ti Ɲanmiɛn ɲrun jranfuɛ’n be fɛ i mmoja’n be kpɛntɛnkpɛntɛn tɛ yiwlɛ’n i bue kwlaa su.+ 12 Maan be kpɛkpɛ nun yɛ maan Ɲanmiɛn ɲrun jranfuɛ’n fɛ i likalika mun nin i ti’n nin i lui’n,* naan ɔ siesie be yie nga be o sin’n nun’n be su, tɛ yiwlɛ’n su. 13 Maan be fa nzue wunnzin i aya mun nin i ja mun. Kpɛkun maan Ɲanmiɛn ɲrun jranfuɛ’n fɛ i kwlaa man Ɲanmiɛn yɛ ɔ yrɛ i tɛ yiwlɛ’n su naan i wunsrɛn’n fite. Ɔ ti tɛ kun mɔ kɛ bé yí’n be yra nnɛn’n i kɔlikɔli-ɔ, be yrɛ i sin nun naan ɔ bɔn Zoova i bue nun fannin.*

14 “‘Sanngɛ sɛ anunman yɛ i waan ɔ́ fá yí tɛ nga kɛ bé yí’n be yra nnɛn’n i kɔlikɔli’n ɔ́ fá mán Zoova’n, maan ɔ fa auble annzɛ okunmomo ba+ fa man. 15 Maan Ɲanmiɛn ɲrun jranfuɛ’n fa man Ɲanmiɛn, tɛ yiwlɛ’n su, kpɛkun maan ɔ ti i ti’n i sa bui yɛ ɔ yrɛ i tɛ yiwlɛ’n su naan i wunsrɛn’n fite. Sanngɛ maan be fɛ i mmoja’n guɛ i tɛ yiwlɛ’n i wun. 16 Maan ɔ tu i cenjeku’n yɛ ɔ tutu i ndrɛ’n naan ɔ gua be tɛ yiwlɛ’n i wun lɛ, wia afiliɛ lɔ bue liɛ’n su, kan be gua nzuɛn’n lɔ’n.*+ 17 Maan ɔ kpaci i nun, kan i ndɛwa’m be o lɛ’n, sanngɛ nán maan i nun kpɛ nɲɔn. I sin’n, maan Ɲanmiɛn ɲrun jranfuɛ’n yo maan i wunsrɛn’n fite tɛ yiwlɛ’n su yie nga be o sin’n su’n be su. Ɔ ti tɛ kun mɔ kɛ bé yí’n be yra nnɛn’n i kɔlikɔli-ɔ, be yrɛ i sin nun naan ɔ bɔn Zoova i bue nun fannin.*

2 “‘Sɛ sran kun waan ɔ́ fá ble annzɛ i wunsu like+ mán Zoova’n, maan like ng’ɔ́ fá mán’n ɔ yo sanmlɛn mlɛnnɛnnɛn kpa, maan ɔ gua su ngo, yɛ ɔ fa ansan ufue sie su.+ 2 I sin’n, maan ɔ fa blɛ Aarɔn i mma mɔ be ti Ɲanmiɛn ɲrun jranfuɛ’n, yɛ maan Ɲanmiɛn ɲrun jranfuɛ’n fa sanmlɛn mlɛnnɛnnɛn kpa’n i sa buɛ kun nin ngo’n, ɔ nin i su ansan ufue’n i kwlaa, kpɛkun maan ɔ yrɛ i tɛ yiwlɛ’n su naan i wunsrɛn’n fite. Ɔ ti like nga be su fa man Ɲanmiɛn’n i nzɔliɛ,*+ yɛ be yrɛ i sin nun naan ɔ bɔn Zoova i bue nun fannin.* 3 Ble’n annzɛ i wunsu like nga be fa man Ɲanmiɛn’n i onga’n ɔ ti Aarɔn nin i mma’m be liɛ.+ Ɔ ti like nga be yrɛ i sin nun be man Zoova’n i wie, ɔ ti i liɛ ngunmin yɛ ɔ ti Ɲanmiɛn liɛ klonglo.+

4 “‘Sɛ á fá ble annzɛ i wunsu like mɔ be tɔnnin i fuu nun á mán Ɲanmiɛn’n, fa sanmlɛn mlɛnnɛnnɛn kpa fa yo kpanwun kukluuklu* nga levii nunman be nun’n mɔ be sanngannin be nin ngo’n, annzɛ fa yo kpanwun paplaapla nga levii nunman be nun’n, mɔ be guaguali be su ngo’n.+

5 “‘Sɛ ɔ waan á tɔ́n ble annzɛ i wunsu like puali nun+ naan á fá mán Ɲanmiɛn’n, maan ɔ yo sanmlɛn mlɛnnɛnnɛn kpa mɔ be sɛnngɛnnin i nin ngo’n, mɔ b’a guaman nun kpanwun ayre’n. 6 Bubu nun, kpɛkun gua su ngo.+ Ɔ ti ble annzɛ i wunsu like mɔ be fa man Ɲanmiɛn-ɔn.

7 “‘Sɛ ɔ waan á tɔ́n ble annzɛ i wunsu like puali nun naan á fá mán Ɲanmiɛn’n, fa sanmlɛn mlɛnnɛnnɛn kpa mɔ be sɛnngɛnnin i nin ngo’n. 8 Fa ble annzɛ i wunsu like mɔ be fali ninnge sɔ mun be tɔnnin’n ko man Zoova, maan be fa kle Ɲanmiɛn ɲrun jranfuɛ’n, yɛ i kusu fá kɔ́ tɛ yiwlɛ’n i wun lɔ. 9 Maan Ɲanmiɛn ɲrun jranfuɛ’n fa ble annzɛ i wunsu like mɔ be fa man Ɲanmiɛn’n i bue, ɔ ti like nga be su fa man Ɲanmiɛn’n i nzɔliɛ.*+ Maan ɔ yrɛ i tɛ yiwlɛ’n su naan i wunsrɛn’n fite, maan ɔ yrɛ i sin’n su naan ɔ bɔn Zoova i bue nun fannin.*+ 10 Ble annzɛ i wunsu like mɔ be fa man Ɲanmiɛn’n i onga’n ɔ ti Aarɔn nin i mma’m be liɛ. Ɔ ti like nga be yrɛ i sin su be man Zoova’n i bue, ɔ ti i liɛ ngunmin yɛ ɔ ti Ɲanmiɛn liɛ klonglo.+

11 “‘Nán gua ble annzɛ i wunsu like mɔ á fá mán Zoova’n, i nun levii.+ Afin ɔ fataman kɛ a yra like nga levii o nun’n annzɛ awɛma nzue naan i wunsrɛn’n fite kɛ like mɔ be yrɛ i sin su be man Zoova’n sa.

12 “‘Amun kwla fa ninnge sɔ mun man Zoova kɛ nga be fa ninnge’m be mma klikli mun be man Ɲanmiɛn’n sa.+ Sanngɛ ɔ fataman kɛ amun fa wɔ tɛ yiwlɛ’n su lɔ kɛ ninnge nga be yra be mɔ be bɔn fannin’n* sa.

13 “‘Ble annzɛ i wunsu like nga á fá mán Ɲanmiɛn’n, guɛ i wafa kwlaa nun njin. Nán maan ɔ Ɲanmiɛn’n i aenguɛ’n i njin’n tu ble annzɛ i wunsu like mɔ á fá mán Ɲanmiɛn’n su. Like kwlaa nga á fá mán Ɲanmiɛn’n, sie su njin.+

14 “‘Sɛ á fá ble annzɛ i wunsu like m’ɔ fin ɔ fie’n su ninnge’m be mma klikli mun’n mán Zoova’n, maan ɔ yo i mma uflɛuflɛ* yɛ maan be kɛɛn i sin su, maan ɔ yo like mma mɔ b’a simɛn i kpa’n. Ɔ ninnge’m be mma klikli mɔ á fá mán Ɲanmiɛn’n yɛ ɔ o lɛ-ɔ.+ 15 Gua su ngo, yɛ sie su ansan ufue. Ɔ ti ble annzɛ i wunsu like mɔ be fa man Ɲanmiɛn-ɔn. 16 Maan Ɲanmiɛn ɲrun jranfuɛ’n yrɛ i naan i wunsrɛn’n fite, ɔ ti like nga be su fa man Ɲanmiɛn’n i nzɔliɛ.*+ Be fa like mma mɔ b’a simɛn i kpa’n nin ngo’n nin i su ansan ufue’n i kwlaa, kpɛkun be yrɛ i sin su be man Zoova.

3 “‘Sɛ bo kun yolɛ tɛ*+ yɛ i waan ɔ́ yí’n, sɛ nannin yɛ ɔ́ fá mán’n, maan ɔ yo yasua-o annzɛ bla-o, ɔ fata kɛ ɔ fa nnɛn ng’ɔ ti kpa’n wɔ Zoova ɲrun. 2 Maan ɔ fɛ i sa fua nnɛn nga ɔ́ fá mán’n i ti’n su, yɛ maan be kpɛ nnɛn’n i kɔmin tannin sua mɔ Ɲanmiɛn yi i wun nglo nun’n i anuan’n nun lɛ. Maan Aarɔn i mma mɔ be ti Ɲanmiɛn ɲrun jranfuɛ’n be fa mmoja’n kpɛntɛnkpɛntɛn i tɛ yiwlɛ’n i bue kwlaa su. 3 Maan ɔ yra nnɛn nga be fa yi bo kun yolɛ tɛ’n i bue sin’n su man Zoova:+ I lui+ ng’ɔ kɛtɛ i aya’m be su’n, i aya’m be wun lui’n i kwlaa, 4 i aklɛnzia nɲɔn’n ɔ nin be wun lui’n m’ɔ o i asi’n nun’n. Maan ɔ yi i buɛ’n i wun lui’n nin i aklɛnzia mun likawlɛ.+ 5 Maan Aarɔn i mma mun be yrɛ i tɛ yiwlɛ’n su. Maan be fa sie i tɛ nga kɛ bé yí’n be yra nnɛn’n i kɔlikɔli’n m’ɔ o yie ng’ɔ o sin’n su’n+ i su naan i wunsrɛn’n fite. Ɔ ti tɛ kun mɔ be yrɛ i sin’n su naan ɔ bɔn Zoova i bue nun fannin-ɔn.*+

6 “‘Sɛ bua annzɛ boli yɛ i waan ɔ́ fá yí bo kun yolɛ tɛ mán Zoova’n, maan ɔ fa nnɛn yasua annzɛ i bla ng’ɔ ti kpa’n.+ 7 Sɛ bua gbanflɛn yɛ ɔ́ fá yí tɛ’n, maan ɔ fa wɔ Zoova ɲrun. 8 Maan ɔ fɛ i sa fua nnɛn nga ɔ́ fá mán’n i ti’n su, yɛ maan be kpɛ nnɛn’n i kɔmin tannin sua mɔ Ɲanmiɛn yi i wun nglo nun’n i ɲrun lɛ. Maan Aarɔn i mma’m be fɛ i mmoja’n kpɛntɛnkpɛntɛn i tɛ yiwlɛ’n i bue kwlaa su. 9 Maan ɔ yra bo kun yolɛ tɛ’n i lui’n sin su man Zoova.+ Maan ɔ tu i lua wunmuan’n, maan ɔ tu ju i wi sin owie’n i nuan su lɛ, yɛ maan ɔ yi i lui ng’ɔ kɛtɛ i aya’m be su’n, i aya’m be wun lui’n i kwlaa, 10 i aklɛnzia nɲɔn mun ɔ nin be wun lui’n m’ɔ o i asi’n i wun lɛ’n. Maan ɔ yi i buɛ’n i wun lui’n nin i aklɛnzia mun likawlɛ.+ 11 Maan Ɲanmiɛn ɲrun jranfuɛ’n yo naan i wunsrɛn’n fite tɛ yiwlɛ’n su. Ɔ ti aliɛ* mɔ be yrɛ i sin’n su be man Zoova-ɔ.+

12 “‘Sɛ boli yɛ i waan ɔ́ fá mán’n, maan ɔ fa wɔ Zoova ɲrun. 13 Maan ɔ fɛ i sa fua nnɛn ng’ɔ́ fá mán’n i ti’n su, yɛ maan be kpɛ nnɛn’n i kɔmin tannin sua mɔ Ɲanmiɛn yi i wun nglo nun’n i ɲrun lɛ. Maan Aarɔn i mma’m be fɛ i mmoja’n kpɛntɛnkpɛntɛn i tɛ yiwlɛ’n i bue kwlaa su. 14 I bue ng’ɔ́ fá mán mɔ bé yrɛ́ i sin su bé mán Zoova’n, yɛle i lui ng’ɔ kɛtɛ i aya’m be su’n, ɔ nin i aya’n i wun lui’n kwlaa,+ 15 i aklɛnzia nɲɔn mun ɔ nin be wun lui’n m’ɔ o i asi’n i wun lɛ’n. Maan ɔ yi i buɛ’n i wun lui’n nin i aklɛnzia mun likawlɛ. 16 Maan Ɲanmiɛn ɲrun jranfuɛ’n yra be tɛ yiwlɛ’n su. Ɔ ti aliɛ,* be yrɛ i sin su naan ɔ bɔn fannin.* I lui’n i kwlaa ti Zoova liɛ.+

17 “‘Ɔ ti mmla kun m’ɔ́ ká lɛ tititi-ɔ. Kan kwlaa nga amún trán lɛ’n, amun di su: Nán amun di like wie fi i lui annzɛ like wie fi i mmoja.’”+

4 Zoova seli Moizi ekun kɛ: 2 “Se Izraɛlifuɛ’m be kɛ: ‘Sɛ sran kun yo ninnge nga Zoova seli kɛ nán be yo’n be nun kun naan nɛ́n i ɲinfu’n,+ like ng’ɔ fata kɛ ɔ yo’n yɛ:

3 “‘Sɛ Ɲanmiɛn ɲrun jranfuɛ mɔ Ɲanmiɛn kpɛli i sieli i ngunmin’n+ yo sa tɛ+ naan i sa tɛ’n sa nvlefuɛ mun’n, maan ɔ fa nannin gbanflɛn m’ɔ ti kpa’n wɔ Zoova ɲrun naan ɔ fa yi i sa tɛ’n i ti tɛ.+ 4 Maan ɔ fa nannin tola’n wɔ tannin sua mɔ Ɲanmiɛn yi i wun nglo nun’n i anuan’n nun lɔ+ Zoova ɲrun, yɛ ɔ fɛ i sa fua nannin tola’n i ti’n su. Kpɛkun maan ɔ kpɛ nannin tola’n i kɔmin Zoova ɲrun.+ 5 I sin’n, maan Ɲanmiɛn ɲrun jranfuɛ mɔ Ɲanmiɛn kpɛli i sieli i ngunmin’n,+ ɔ fa nannin tola’n i mmoja’n wie naan ɔ fa wɔ tannin sua mɔ Ɲanmiɛn yi i wun nglo nun’n i nun lɔ. 6 Maan Ɲanmiɛn ɲrun jranfuɛ’n fɛ i sa mma bo mmoja’n nun+ naan ɔ fa wie kpɛnkpɛn i Zoova ɲrun kpɛ nso,+ lika m’ɔ ti Ɲanmiɛn liɛ klonglo’n i rido’n i ɲrun lɛ. 7 Maan Ɲanmiɛn ɲrun jranfuɛ’n fa mmoja’n i wie guɛ i tɛ yiwlɛ mɔ be yra ansan fanninfannin su’n,+ m’ɔ o Zoova i ɲrun lɛ tannin sua mɔ Ɲanmiɛn yi i wun nglo nun’n i nun lɔ’n, i wɛ’m be su. Kpɛkun maan ɔ fa mmoja’n i onga’n i kwlaa guɛ i tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n+ m’ɔ o tannin sua mɔ Ɲanmiɛn yi i wun nglo nun’n i anuan’n nun lɛ’n i bo.

8 “‘Maan ɔ yi nannin tola nga be fa yili sa tɛ’n i ti tɛ’n i lui’n i kwlaa. Maan ɔ yi i lui ng’ɔ kɛtɛ i aya’m be su’n, nin i aya’m be wun lui’n, 9 ɔ nin i aklɛnzia nɲɔn’n nin be wun lui’n m’ɔ o i asi’n i wun lɛ’n. Maan ɔ yi i buɛ’n i wun lui’n nin i aklɛnzia mun likawlɛ.+ 10 Maan ɔ yiyi be kɛ nga ɔ fa yiyili nannin tola nga be fa yi bo kun yolɛ tɛ’n+ i liɛ’n sa. Kpɛkun maan Ɲanmiɛn ɲrun jranfuɛ’n yra be tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n su naan wunsrɛn’n fite.

11 “‘Sanngɛ nannin tola’n i kplo’n nin i nnɛn’n nin i ti’n nin i ja mun nin i aya mun, ɔ nin i aya’n nun ninnge mun’n,+ 12 yɛle kɛ nannin tola’n i onga’n i kwlaa, maan ɔ fa be wɔ nanmue’n i sin lɔ lika sanwun kun nun, kan be gua nzuɛn’n* lɔ’n, naan ɔ fa yie trɔ sin naan ɔ yrɛ i.+ Maan ɔ yrɛ i kan be gua nzuɛn’n lɔ’n.

13 “‘Sɛ Izraɛlifuɛ’m be kwlaa be yo sa tɛ kun naan nán be ɲinfu yɛ be yoli’n,+ sɛ be* siman kɛ b’a yo like wie mɔ Zoova seli kɛ nán be yo’n,+ 14 kɛ be ko wun kɛ b’a yo sa tɛ’n, maan be* fa nannin gbanflɛn kun be yi sa tɛ’n i ti tɛ. Maan be fa nnɛn’n wɔ tannin sua mɔ Ɲanmiɛn yi i wun nglo nun’n i ɲrun lɔ. 15 Maan kpɛnngbɛn’m be kwlaa be fa be sa fua nannin tola’n i ti’n su Zoova ɲrun, yɛ be kpɛ nannin tola’n i kɔmin Zoova ɲrun.

16 “‘Maan Ɲanmiɛn ɲrun jranfuɛ mɔ Ɲanmiɛn kpɛli i sieli i ngunmin’n, ɔ fa nannin tola’n i mmoja’n wie wɔ tannin sua mɔ Ɲanmiɛn yi i wun nglo nun’n i nun lɔ. 17 Maan Ɲanmiɛn ɲrun jranfuɛ’n fɛ i sa mma bo mmoja’n nun naan ɔ fa wie kpɛnkpɛn i Zoova ɲrun kpɛ nso rido’n+ i ɲrun lɛ. 18 Maan Ɲanmiɛn ɲrun jranfuɛ’n fa mmoja’n i wie guɛ i tɛ yiwlɛ+ m’ɔ o Zoova i ɲrun tannin sua mɔ Ɲanmiɛn yi i wun nglo nun’n i nun lɔ’n i wɛ’m be su. Kpɛkun maan ɔ fa mmoja’n i onga’n i kwlaa guɛ i tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n m’ɔ o tannin sua mɔ Ɲanmiɛn yi i wun nglo nun’n i anuan’n nun lɛ’n+ i bo. 19 Maan ɔ yi i lui’n i kwlaa yɛ ɔ yrɛ i tɛ yiwlɛ’n su naan i wunsrɛn’n fite.+ 20 Maan ɔ yo nannin tola’n kɛ nannin tola kun ng’ɔ fa yili sa tɛ’n i ti tɛ’n sa. Wafa ng’ɔ fata kɛ ɔ yo’n yɛ ɔ o lɛ-ɔ. Kpɛkun maan Ɲanmiɛn ɲrun jranfuɛ’n kpata be ti,+ yɛ bé yáci be sa tɛ’n cɛ́ be. 21 Maan ɔ fa nannin tola’n wɔ nanmue’n i sin lɔ naan ɔ yrɛ i kɛ ng’ɔ fa yrali nannin tola klikli’n sa.+ Ɔ ti nvlefuɛ’m be sa tɛ’n i ti tɛ yilɛ.+

22 “‘Sɛ nvle’n nun kpɛn kun+ yo ninnge nga Zoova seli kɛ nán be yo’n be nun kun’n, naan nɛ́n i ɲinfu’n, 23 annzɛ sɛ ɔ wun i wlɛ kɛ w’a fɔn Ɲanmiɛn mmla’n, maan ɔ fa boli gbanflɛn kun m’ɔ ti kpa’n, ɔ fa man. 24 Maan ɔ fɛ i sa fua boli gbanflɛn’n i ti’n su, yɛ ɔ kpɛ i kɔmin, kan be kpɛ nnɛn nga be fa yi tɛ nga kɛ bé yí’n be yra nnɛn’n i kɔlikɔli’n i kɔmin Zoova ɲrun lɛ’n.+ Ɔ ti sa tɛ’n i ti tɛ yilɛ. 25 Maan Ɲanmiɛn ɲrun jranfuɛ’n fɛ i sa mma bo sa tɛ’n i ti tɛ’n i mmoja’n nun naan ɔ fa wie fa guɛ i nnɛn wɛ+ nga be o tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n su’n be su. Kpɛkun maan ɔ fa mmoja’n i onga’n guɛ i tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n, i bo lɛ.+ 26 Maan ɔ yrɛ i lui’n i kwlaa naan i wunsrɛn’n fite tɛ yiwlɛ’n su kɛ nga ɔ fa yrali bo kun yolɛ tɛ’n+ i lui’n sa. Kpɛkun Ɲanmiɛn ɲrun jranfuɛ’n ɔ́ kpɛ́tɛ i sa tɛ’n i ti, yɛ bé yáci i sa tɛ’n cɛ́ i.

27 “‘Sɛ nvle’n i nunfuɛ kun yo ninnge nga Zoova seli kɛ nán be yo’n be nun kun’n naan nɛ́n i ɲinfu’n,+ 28 annzɛ sɛ ɔ wun i wlɛ kɛ w’a yo sa tɛ’n, maan ɔ fa boli ba bla kun m’ɔ ti kpa’n, ɔ fa yi sa tɛ ng’ɔ yoli’n i ti tɛ. 29 Maan ɔ fɛ i sa fuɛ i nnɛn nga bé fá yí sa tɛ’n i ti tɛ’n i ti’n su, yɛ ɔ kpɛ sa tɛ’n i ti tɛ’n i nnɛn’n i kɔmin kan be kpɛ nnɛn nga be fa yi tɛ nga kɛ bé yí’n be yra nnɛn’n i kɔlikɔli’n+ i kɔmin lɛ’n. 30 Maan Ɲanmiɛn ɲrun jranfuɛ’n fɛ i sa mma bo sa tɛ’n i ti tɛ’n i mmoja’n nun, naan ɔ fa wie fa guɛ i nnɛn wɛ nga be o tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n su’n be su. Kpɛkun maan ɔ fa mmoja’n i onga’n i kwlaa guɛ i tɛ yiwlɛ’n i bo lɛ.+ 31 Maan ɔ yi i lui’n+ i kwlaa kɛ nga ɔ fa yili bo kun yolɛ tɛ’n+ i lui’n sa. Kpɛkun maan Ɲanmiɛn ɲrun jranfuɛ’n yo naan i wunsrɛn’n fite tɛ yiwlɛ’n su naan ɔ bɔn Zoova i bue nun fannin.* Kpɛkun Ɲanmiɛn ɲrun jranfuɛ’n ɔ́ kpɛ́tɛ i sa tɛ’n i ti, yɛ bé yáci i sa tɛ’n cɛ́ i.

32 “‘Sɛ bua ba yɛ i waan ɔ́ fá yí sa tɛ’n i ti tɛ’n, maan ɔ fa bua ba bla ng’ɔ ti kpa’n. 33 Maan ɔ fɛ i sa fuɛ i nnɛn nga bé fá yí sa tɛ’n i ti tɛ’n i ti’n su, yɛ ɔ kpɛ sa tɛ’n i ti tɛ’n i nnɛn’n i kɔmin kan be kpɛ nnɛn nga be fa yi tɛ nga kɛ bé yí’n be yra nnɛn’n i kɔlikɔli’n i kɔmin lɛ’n.+ 34 Maan Ɲanmiɛn ɲrun jranfuɛ’n fɛ i sa mma bo sa tɛ’n i ti tɛ’n i mmoja’n nun naan ɔ fa wie guɛ i nnɛn wɛ nga be o tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n+ su’n be su. Kpɛkun maan ɔ fa mmoja’n i onga’n i kwlaa guɛ i tɛ yiwlɛ’n i bo lɛ. 35 Maan ɔ yi i lui’n i kwlaa kɛ nga ɔ fa yili bua gbanflɛn mɔ be fa yili bo kun yolɛ tɛ’n i lui’n sa. Kpɛkun maan Ɲanmiɛn ɲrun jranfuɛ’n fa sie i tɛ nga be yrɛ i sin su be man Zoova’n su naan i wunsrɛn’n fite.+ Kpɛkun Ɲanmiɛn ɲrun jranfuɛ’n ɔ́ kpɛ́tɛ i sa tɛ’n i ti, yɛ bé yáci i sa tɛ’n cɛ́ i.+

5 “‘Sɛ sran kun ti sa kun nun lalofuɛ, annzɛ ɔ wunnin sa kun nun, annzɛ ɔ tili nun naan be bo ndolo sin kɛ be su kunndɛ lalofuɛ’n,*+ sɛ ɔ tili naan w’a kanman’n, nn w’a yo sa tɛ, yɛ ɔ́ wún i sa tɛ’n i su afɛ.

2 “‘Sɛ sran kun kan like kwlaa ng’ɔ ti fiɛn’n, sɛ ɔ wie blo nnɛn ng’ɔ ti fiɛn’n i fuɛn-o, annzɛ klɔ nnɛn ng’ɔ ti fiɛn’n nin-o, annzɛ nnɛn kanngan*+ wie mɔ be ti fiɛn’n nin-o, kannzɛ bɔbɔ ɔ siman sɔ’n, sanngɛ w’a wlu fiɛn nun, yɛ w’a yo sa tɛ. 3 Sɛ sran kun siman nun naan ɔ kan sran wie i wun fiɛn’n,+ yɛle kɛ like wie m’ɔ ti fiɛn m’ɔ kwla yo i fiɛn’n, kannzɛ bɔbɔ kasiɛn su yɛ ɔ wa sili nun’n, ɔ yoli sa tɛ.

4 “‘Sɛ sran kun kpli ta nda kɛ ɔ́ yó like wie’n, sɛ like kpa-o, annzɛ like tɛ-o, sɛ like sɔ’n ti sɛ ti sɛ-o, sɛ w’a bumɛn i sin naan kasiɛn su’n ɔ wun kɛ ɔ kpli tali nda’n, nn w’a yo sa tɛ.*+

5 “‘Sɛ ɔ yoli sa sɔ’m be nun kun’n, maan ɔ di sa tɛ ng’ɔ yoli’n i nanwlɛ.+ 6 Sa tɛ ng’ɔ yoli’n ti’n, maan ɔ yi sa tɛ’n i ti kpatalɛ tɛ man Zoova,+ yɛle kɛ maan ɔ fa bua ba bla kun annzɛ boli ba bla kun, naan ɔ fa yi sa tɛ’n i ti tɛ. I sin’n, Ɲanmiɛn ɲrun jranfuɛ’n kpɛ́tɛ i sa tɛ’n i ti.

7 “‘Sɛ kusu ɔ kwlá toman bua’n, maan ɔ fa auble nɲɔn annzɛ okunmomo ba nɲɔn+ ɔ ko man Zoova naan be fa yi sa tɛ’n i ti kpatalɛ tɛ, sa tɛ m’ɔ yoli’n ti. Maan be fa kun yi sa tɛ’n i ti tɛ, yɛ be fa kun yi tɛ nga kɛ bé yí’n be yra nnɛn’n i kɔlikɔli’n.+ 8 Maan ɔ fa be ko man Ɲanmiɛn ɲrun jranfuɛ’n. Ɲanmiɛn ɲrun jranfuɛ’n dún mmua fá kun yí sa tɛ’n i ti tɛ. Maan ɔ ti i ti’n i sa bui, i kɔmin’n i bo lɛ, sanngɛ nán ɔ tu i ti’n. 9 Maan ɔ fa sa tɛ’n i ti tɛ’n i mmoja’n wie kpɛnkpɛn i tɛ yiwlɛ’n i wun, sanngɛ maan be fa mmoja’n i onga’n guɛ i tɛ yiwlɛ’n i bo lɛ.+ Ɔ ti sa tɛ’n i ti tɛ yilɛ. 10 Maan ɔ fa kun’n yi tɛ nga kɛ bé yí’n be yra nnɛn’n i kɔlikɔli’n kɛ nga be fa yo i titi’n sa.+ Ɲanmiɛn ɲrun jranfuɛ’n kpáta sa tɛ ng’ɔ yoli’n i ti, yɛ bé yáci cɛ́ i.+

11 “‘Sɛ ɔ kwlá toman auble nɲɔn annzɛ okunmomo ba nɲɔn’n, sa tɛ ng’ɔ yoli’n ti’n, maan ɔ fa sanmlɛn mlɛnnɛnnɛn kpa efa kun+ m’ɔ bubuli nun blu’n i bue kun* naan ɔ fa yi i sa tɛ’n i ti tɛ. Nán maan ɔ fa ngo gua nun annzɛ nán ɔ fa ansan ufue sie su, afin ɔ ti sa tɛ’n i ti tɛ yilɛ. 12 Maan ɔ fa ko man Ɲanmiɛn ɲrun jranfuɛ’n, yɛ maan Ɲanmiɛn ɲrun jranfuɛ’n fa sanmlɛn’n i sa buɛ kun. Ɔ ti like nga be su fa man Ɲanmiɛn’n i nzɔliɛ,* yɛ maan ɔ fa sie i tɛ nga be yrɛ i sin su be man Zoova’n i su, naan i wunsrɛn’n fite. Ɔ ti sa tɛ’n i ti tɛ yilɛ. 13 Ɲanmiɛn ɲrun jranfuɛ’n kpáta sa tɛ ng’ɔ yoli’n i ti, sɛ ɔ yoli sa tɛ sɔ’m be nun kun’n, bé yáci cɛ́ i.+ Like nga be fa mannin Ɲanmiɛn’n i onga’n yó Ɲanmiɛn ɲrun jranfuɛ’n i liɛ,+ kɛ ble annzɛ i wunsu like mɔ be fa man Ɲanmiɛn’n sa.’”+

14 Zoova seli Moizi ekun kɛ: 15 “Sɛ sran kun w’a nantiman nanwlɛ su naan ɔ fɔn ninnge nga be ti Zoova liɛ klonglo’m be wun’n+ naan nɛ́n i ɲinfu’n, maan ɔ fa bua ɲin ng’ɔ ti kpa’n, ɔ ko man Zoova naan be fa yi sa tɛ’n i ti kpatalɛ tɛ.+ Maan be fa sika sikli’n* be sunnzun i gua’n, maan be nian Ɲanmiɛn sua’n nun lɔ sikli* liɛ’n+ su be sunnzun. 16 Fɔnlɛ m’ɔ fɔnnin lika m’ɔ ti Ɲanmiɛn liɛ klonglo’n i wun’n ti’n, maan ɔ yi like man. Maan ɔ bu like ng’ɔ fɔnnin i wun’n i gua’n i nun nnun, naan ɔ fɛ i bue kun uka su.+ Yɛ maan ɔ fa man Ɲanmiɛn ɲrun jranfuɛ’n. I liɛ’n, Ɲanmiɛn ɲrun jranfuɛ’n kwla fa bua ɲin’n yi sa tɛ’n i ti kpatalɛ tɛ’n+ ɔ fa kpɛtɛ i ti, yɛ bé yáci i sa tɛ’n cɛ́ i.+

17 “Sɛ sran kun yo ninnge nga Zoova seli kɛ nán be yo’n be nun kun’n, kannzɛ bɔbɔ ɔ siman sɔ’n, sanngɛ w’a yo sa tɛ, yɛ ɔ́ wún i sa tɛ’n i su afɛ.+ 18 Maan ɔ fa bua ɲin kun m’ɔ ti kpa’n, ɔ ko man Ɲanmiɛn ɲrun jranfuɛ’n naan ɔ fa yi sa tɛ’n i ti kpatalɛ tɛ.+ Maan i gua’n ju nga be kleli’n nun. I sin’n, maan Ɲanmiɛn ɲrun jranfuɛ’n kpata sa tɛ sɔ mɔ nán sran’n i ɲinfu yɛ ɔ yoli’n, mɔ kusu ɔ siman nun’n i ti, naan be yaci cɛ i. 19 Ɔ ti sa tɛ’n i ti kpatalɛ tɛ. Afin ɔ fɔnnin Zoova wun sakpa.”

6 Zoova seli Moizi ekun kɛ: 2 “Sɛ sran kun yo sa tɛ naan ɔ diman ndɛ nga Zoova kan’n su’n,+ sɛ ɔ kpɛ i wiengu kun m’ɔ fali like mɛnnin i kɛ ɔ fa sie’n i gblɛ’n,+ annzɛ ɔ kpɛ like nga be wlɛli i aowa i sa nun’n i su gblɛ’n, annzɛ ɔ wua’n, annzɛ ɔ di i wiengu lufle’n, 3 annzɛ sɛ ɔ wunnin like wie m’ɔ mlinnin naan ɔ kpɛ su gblɛ’n, yɛ sɛ ɔ ta sa tɛ sɔ’m be nun wie m’ɔ yoli’n i su ato nda’n,+ like ng’ɔ fata kɛ ɔ yo’n yɛ: 4 Sɛ ɔ yoli sa tɛ’n, maan ɔ fa like ng’ɔ wuali’n annzɛ like ng’ɔ fɛli i wue kekle su’n, annzɛ like ng’ɔ dili nun lufle’n, annzɛ like nga be fa mɛnnin i kɛ ɔ fa sie m’ɔ kpɛli su gblɛ’n, annzɛ like ng’ɔ mlinnin m’ɔ wunnin i’n, ɔ fa sɛ i sin, 5 like kwlaa ng’ɔ tali su ato nda’n, maan ɔ yi i ngba man.+ Yɛ maan be bu like’n i gua’n nun nnun naan ɔ fɛ i bue kun uka su fa man. Cɛn nga be wunnin i wlɛ kɛ i yɛ ɔ fali like’n, cɛn sɔ’n nun yɛ ɔ́ fá like’n mɛ́n i fuɛ’n niɔn. 6 Yɛ maan ɔ fa bua ɲin kun m’ɔ ti kpa’n ko man Ɲanmiɛn ɲrun jranfuɛ’n naan ɔ fa yi sa tɛ’n i ti kpatalɛ tɛ man Zoova. Maan i gua’n ju nga be kleli’n nun naan be fa yi sa tɛ’n i ti kpatalɛ tɛ.+ 7 Ɲanmiɛn ɲrun jranfuɛ’n kɔ́ Zoova ɲrun ɔ́ kó kpɛ́tɛ i ti, yɛ sa tɛ kwlaa ng’ɔ yoli’n bé yáci cɛ́ i.”+

8 Zoova seli Moizi ekun kɛ: 9 “Se Aarɔn nin i mma’m be kɛ: ‘Tɛ nga kɛ bé yí’n be yra nnɛn’n i kɔlikɔli’n i su mmla’n yɛ:+ Maan tɛ nga kɛ bé yí’n be yra nnɛn’n i kɔlikɔli’n ɔ ka sin’n su tɛ yiwlɛ’n su kɔnguɛ lele nglɛmun, yɛ maan sin tran tɛ yiwlɛ’n su titi. 10 Maan Ɲanmiɛn ɲrun jranfuɛ’n wlɛ i junman dilɛ tralɛ mɔ be fali lɛn be yoli’n,+ yɛ maan ɔ wla lɛn cɛkoto’n+ fa kɛtɛ i wunnɛn’n su. I sin’n, maan ɔ tu tɛ nga kɛ bé yí’n be yra nnɛn’n i kɔlikɔli’n mɔ be yrɛli i sin’n su tɛ yiwlɛ’n su’n i nzuɛn’n*+ naan ɔ fa guɛ i tɛ yiwlɛ’n i wun lɛ. 11 I sin’n, maan ɔ yiyi i tralɛ mun,+ yɛ ɔ wla uflɛ naan ɔ fa nzuɛn’n ko guɛ i nanmue’n i sin lɔ lika sanwun kun nun.+ 12 Maan sin tran tɛ yiwlɛ’n su titi. Nán maan ɔ nuan. Maan nglɛmun kwlaa’n Ɲanmiɛn ɲrun jranfuɛ’n gua su yie+ naan ɔ fa tɛ nga kɛ bé yí’n be yra nnɛn’n i kɔlikɔli’n siesie su. Kpɛkun maan ɔ fa bo kun yolɛ tɛ’n i lui’n sie su naan i wunsrɛn’n fite.+ 13 Maan sin tran tɛ yiwlɛ’n su tititi. Nán maan ɔ nuan.

14 “‘Ble annzɛ i wunsu like mɔ be fa man Ɲanmiɛn’n i su mmla’n yɛ:+ Aarɔn i mma yasua mun bé fá kɔ́ Zoova ɲrun tɛ yiwlɛ’n i ɲrun lɔ. 15 Maan be nun kun fa ble annzɛ i wunsu like mɔ be fa man Ɲanmiɛn’n i sanmlɛn mlɛnnɛnnɛn kpa’n i sa buɛ kun. Kpɛkun maan ɔ fa ngo’n wie nin ansan ufue nga be fa sie ble annzɛ i wunsu like mɔ be fa man Ɲanmiɛn’n su’n i kwlaa, yɛ ɔ yo naan i wunsrɛn’n fite tɛ yiwlɛ’n su naan ɔ bɔn fannin,* ɔ ti like nga be su fa man Zoova’n i nzɔliɛ.*+ 16 Maan Aarɔn nin i mma’m be di i onga’n.+ Maan be fa yo kpanwun mɔ levii nunman nun’n naan be di i lika kun m’ɔ ti Ɲanmiɛn liɛ klonglo’n nun. Maan be di i tannin sua mɔ Ɲanmiɛn yi i wun nglo nun’n i awlo klun’n nun lɔ.+ 17 Nán be tɔn i nin like nga levii o nun’n.+ Like nga be fa man min mɔ be yrɛ i sin su’n, i bue nga n fa man be’n yɛ ɔ o lɛ-ɔ.+ Ɔ ti i liɛ ngunmin yɛ ɔ ti Ɲanmiɛn liɛ klonglo+ kɛ sa tɛ’n i ti tɛ’n annzɛ sa tɛ’n i ti kpatalɛ tɛ’n sa. 18 Aarɔn i mma’m be nun yasua’m be kwlaa bé dí.+ Like nga be fa man Zoova mɔ be yrɛ i sin su’n i ng’ɔ ti be liɛ blɛ kwlaa nun’n yɛ ɔ o lɛ-ɔ.+ Like kwlaa ng’ɔ kan be’n,* ɔ́ káci Ɲanmiɛn liɛ klonglo.’”

19 Zoova seli Moizi ekun kɛ: 20 “Cɛn nga bé guá Aarɔn i ti su ngo’n,+ like nga Aarɔn nin i mma’m bé fá mán Zoova’n yɛ: Maan be fa sanmlɛn mlɛnnɛnnɛn kpa efa kun mɔ be bubuli nun blu’n i bue kun*+ be man. Ɔ ti ble annzɛ i wunsu like mɔ be fa man Ɲanmiɛn titi-ɔ.+ Maan be bu nun nɲɔn naan be fɛ i bue kun man nglɛmun, yɛ be fɛ i bue kun man nnɔsua. 21 Maan be tɔn i nin ngo puali nun.+ Sɛnngɛn i kpa nin ngo, kpɛkun ble annzɛ i wunsu like sɔ mɔ w’a be’n, bubu nun naan fa man naan ɔ bɔn Zoova i bue nun fannin.* 22 I mma’m be nun Ɲanmiɛn ɲrun jranfuɛ nga Ɲanmiɛn kpɛli i sieli i ngunmin m’ɔ́ káci i’n,+ ɔ́ yó i kunngba’n. Ɔ ti mmla kun m’ɔ́ ká lɛ titi-ɔ. Maan be yra like nga be man’n i kwlaa naan i wunsrɛn’n fite Zoova ɲrun. 23 Ble annzɛ i wunsu like mɔ Ɲanmiɛn ɲrun jranfuɛ kun fa man Ɲanmiɛn’n, maan be fɛ i wunmuan’n be man. Nán maan be di.”

24 Zoova kannin ndɛ kleli Moizi ekun. Ɔ seli i kɛ: 25 “Se Aarɔn nin i mma’m be kɛ: ‘Sa tɛ’n i ti tɛ’n i su mmla’n yɛ:+ Lika nga be kpɛ tɛ nga kɛ bé yí’n be yra nnɛn’n i kɔlikɔli’n i nnɛn’n i kɔmin lɛ’n,+ lɛ yɛ bé kpɛ́ sa tɛ’n i ti tɛ nnɛn’n i kɔmin Zoova ɲrun-ɔn. Ɔ ti like ngunmin kun m’ɔ ti Ɲanmiɛn liɛ klonglo-ɔ. 26 Maan Ɲanmiɛn ɲrun jranfuɛ ng’ɔ fa nnɛn’n yi sa tɛ’n i ti tɛ’n, ɔ di i nnɛn liɛ’n.+ Maan ɔ di i lika kun m’ɔ ti Ɲanmiɛn liɛ klonglo’n nun, tannin sua mɔ Ɲanmiɛn yi i wun nglo nun’n i awlo klun’n nun.+

27 “‘Like kwlaa ng’ɔ kan tɛ nnɛn’n, ɔ́ káci Ɲanmiɛn liɛ klonglo. Sɛ sran kun fa tɛ nnɛn’n i mmoja’n i wie kpɛntɛnkpɛntɛn i tralɛ’n nun’n, ɔ fata kɛ a kpu like nga mmoja’n kpɛntɛnkpɛntɛnnin su’n lika kun m’ɔ ti Ɲanmiɛn liɛ klonglo’n nun. 28 Maan be bo fa sɛ nga i nun yɛ be tɔnnin tɛ nnɛn’n. Sanngɛ sɛ aaba sɛ nun yɛ be tɔnnin’n, maan be yo nun yɛiin yɛ be fa nzue wunnzin nun.

29 “‘Yasua kwlaa ng’ɔ ti Ɲanmiɛn ɲrun jranfuɛ’n ɔ́ dí i nnɛn liɛ’n.+ Ɔ ti like ngunmin kun m’ɔ ti Ɲanmiɛn liɛ klonglo-ɔ.+ 30 Sanngɛ sɛ be fa sa tɛ’n i ti tɛ’n i mmoja’n wie kɔ tannin sua mɔ Ɲanmiɛn yi i wun nglo nun’n i nun lɔ’n naan be fa kpata sa tɛ’n i ti lika m’ɔ ti Ɲanmiɛn liɛ klonglo’n nun’n,+ nán maan be di tɛ nnɛn’n. Maan be yrɛ i sin su.

7 “‘Sa tɛ’n i ti kpatalɛ tɛ’n i su mmla’n yɛ:+ Ɔ ti like ngunmin kun m’ɔ ti Ɲanmiɛn liɛ klonglo-ɔ. 2 Maan be kpɛ sa tɛ’n i ti kpatalɛ tɛ’n i nnɛn’n i kɔmin kan be kpɛ tɛ nga kɛ bé yí’n be yra nnɛn’n i kɔlikɔli’n i nnɛn’m be kɔmin lɛ’n. Maan be fɛ i mmoja’n+ be kpɛntɛnkpɛntɛn i tɛ yiwlɛ’n i bue kwlaa su.+ 3 Maan ɔ fa nnɛn’n i lui’n i kwlaa.+ Maan ɔ fɛ i lua’n nin i lui ng’ɔ kɛtɛ i aya’m be wun’n wie, 4 ɔ nin i aklɛnzia nɲɔn’n nin be lui m’ɔ o i asi’n nun. Maan ɔ yi i buɛ’n i wun lui’n ɔ nin i aklɛnzia mun likawlɛ.+ 5 Maan Ɲanmiɛn ɲrun jranfuɛ’n yra be sin’n su tɛ yiwlɛ’n su man Zoova naan be wunsrɛn’n fite.+ Ɔ ti sa tɛ’n i ti kpatalɛ tɛ. 6 Maan yasua kwlaa ng’ɔ ti Ɲanmiɛn ɲrun jranfuɛ’n ɔ di.+ Yɛ maan be di i lika kun m’ɔ ti Ɲanmiɛn liɛ klonglo’n nun. Ɔ ti i liɛ ngunmin, yɛ ɔ ti Ɲanmiɛn liɛ klonglo.+ 7 Sa tɛ’n i ti tɛ’n i su mmla’n i kunngba’n yɛle sa tɛ’n i ti kpatalɛ tɛ’n i su mmla’n. Nnɛn’n ti Ɲanmiɛn ɲrun jranfuɛ ng’ɔ fa nnɛn’n kpata Ɲanmiɛn’n i liɛ.+

8 “‘Sɛ Ɲanmiɛn ɲrun jranfuɛ’n yi sran kun i ti tɛ nga kɛ bé yí’n be yra nnɛn’n i kɔlikɔli’n, nnɛn nga bé fá yi tɛ nga kɛ bé yí’n be yra nnɛn’n i kɔlikɔli’n mɔ be fa blɛli Ɲanmiɛn ɲrun jranfuɛ’n, i kplo’n+ ti i liɛ.

9 “‘Ble annzɛ i wunsu like mɔ be fa man Ɲanmiɛn’n i wafa kwlaa nga be tɔn i fuu nun, annzɛ kasrɔ nun, annzɛ puali nun’n,+ ɔ ti Ɲanmiɛn ɲrun jranfuɛ ng’ɔ fa mannin Ɲanmiɛn’n i liɛ. Ɔ́ yó i liɛ.+ 10 Sanngɛ ble annzɛ i wunsu like mɔ be fa man Ɲanmiɛn’n mɔ be sɛnngɛn i nin ngo’n,+ annzɛ m’ɔ ti kee’n,+ ɔ ti Aarɔn i mma yasua’m be kwlaa be liɛ. Maan be cɛ nun sɛsɛ.

11 “‘Bo kun yolɛ tɛ+ nga sran kun kwla yi man Zoova’n i su mmla’n yɛ: 12 Sɛ i waan ɔ́ yí tɛ sɔ’n fá lá Ɲanmiɛn ase’n,+ maan ɔ fa ninnge nga mun sie i ase lalɛ tɛ’n su. Maan ɔ sie su kpanwun kukluuklu* mɔ levii nunman be nun’n, mɔ be sanngannin be nin ngo’n, ɔ nin gato mɔ levii nunman be nun mɔ be guaguali be su ngo’n, ɔ nin kpanwun kukluuklu* mɔ be fali sanmlɛn mlɛnnɛnnɛn kpa be yoli mɔ be sanngannin nun kpa yɛ be fɔtɔli i nin ngo’n. 13 Kɛ ɔ́ wá fá mán’n, maan ɔ fa kpanwun kukluuklu* mɔ levii o be nun’n, ɔ nin bo kun yolɛ tɛ m’ɔ́ fá lá Ɲanmiɛn ase’n, ɔ fa sie su. 14 Ninnge ng’ɔ́ fá mán’n, maan ɔ fa be nun kunngunngun man Zoova. Be ti be liɛ ngunmin. Yɛ bé yó Ɲanmiɛn ɲrun jranfuɛ ng’ɔ́ kpɛ́ntɛnkpɛ́ntɛn bo kun yolɛ tɛ’n+ i nnɛn’m be mmoja’n i liɛ. 15 Cɛn nga ɔ yi bo kun yolɛ tɛ mɔ be fa la Ɲanmiɛn i ase’n, i nun yɛ ɔ fata kɛ be di i nnɛn’n niɔn. Nán maan ɔ sie wie lɛ naan aliɛ cɛn su.+

16 Sɛ ɔ tali nda wie yɛ ɔ su yi i su tɛ’n,+ annzɛ sɛ i klunklo like yɛ ɔ su fa man’n,+ maan be di i cɛn nga be yi tɛ’n nun. Sanngɛ sɛ i wie ka, naan aliɛ cɛn su’n, be kwla di. 17 Sɛ tɛ’n i nnɛn’n wie ka naan ɔ di cɛn nsan’n, maan be yrɛ i sin nun.+ 18 Sanngɛ sɛ bo kun yolɛ tɛ ng’ɔ yili’n i nnɛn’n di cɛn nsan naan be di’n, sran ng’ɔ yili tɛ’n Ɲanmiɛn i klun su jɔmɛn i wun. Tɛ ng’ɔ yili’n ti ngbɛn, ɔ ti like tɛ, yɛ sran ng’ɔ di wie’n, ɔ́ wún i sa tɛ’n i su afɛ.+ 19 Sɛ fiɛn wie kan nnɛn’n, ɔ fataman kɛ be di. Maan be yrɛ i sin nun. Sran kwlaa ng’ɔ ti sanwun’n yɛ ɔ kwla di nnɛn ng’ɔ ti sanwun’n niɔn.

20 “‘Sanngɛ sran kwlaa ng’ɔ wlu fiɛn nun m’ɔ di bo kun yolɛ tɛ m’ɔ ti Zoova liɛ’n i nnɛn’n, maan be yi sran sɔ’n* i nvlefuɛ’m be afiɛn.+ 21 Sɛ sran kun kan like ng’ɔ ti fiɛn’n, sɛ sran wun fiɛn-o,+ annzɛ nnɛn wie m’ɔ ti fiɛn’n nin-o,+ annzɛ like kain wie m’ɔ ti fiɛn’n,+ naan ɔ di bo kun yolɛ tɛ’n i nnɛn m’ɔ ti Zoova liɛ’n wie’n, maan be yi sran sɔ’n* i nvlefuɛ’m be afiɛn.’”

22 Zoova seli Moizi ekun kɛ: 23 “Se Izraɛlifuɛ’m be kɛ: ‘Nán amun di nannin tola lui annzɛ bua gbanflɛn lui annzɛ boli lui wie fi.+ 24 Nnɛn ng’ɔ wuli i sa su’n nin nnɛn nga nnɛn uflɛ kunnin i’n be lui’n, amun kwla fa yo like uflɛ, sanngɛ nán amun di i le.+ 25 Afin sran kwlaa ng’ɔ di nnɛn ng’ɔ fa yi tɛ mɔ be yrɛ i sin’n su be man Zoova’n i lui’n, ɔ fata kɛ be yi i* i nvlefuɛ’m be afiɛn.

26 Lika kwlaa nga amun tran lɛ’n, nán amun di mmoja fi,+ i anunman mmoja-o, annzɛ nnɛn uflɛ mmoja-o. 27 Sran kwlaa ng’ɔ di mmoja’n, maan be yi i*+ i nvlefuɛ’m be afiɛn.’”

28 Zoova seli Moizi ekun kɛ: 29 “Se Izraɛlifuɛ’m be kɛ: ‘Sran kwlaa nga i waan ɔ́ yí bo kun yolɛ tɛ mán Zoova’n, maan ɔ fa bo kun yolɛ tɛ’n i bue man Zoova.+ 30 Maan i bɔbɔ fa nnɛn’n i lui’n+ nin i wue’n i sa nun fa bla, naan be yrɛ i sin’n su be man Zoova, kpɛkun maan ɔ toto i wɔ i ɲrun nin i sin,+ kɛ like mɔ be toto i be man Zoova’n sa. 31 Maan Ɲanmiɛn ɲrun jranfuɛ’n yrɛ i lui’n tɛ yiwlɛ’n su naan i wunsrɛn’n fite.+ Sanngɛ i wue’n ti Aarɔn nin i mma’m be liɛ.+

32 “‘Amun fa bo kun yolɛ tɛ’n i nnɛn’m be sɔwa fama’n man Ɲanmiɛn ɲrun jranfuɛ’n. Ɔ ti Ɲanmiɛn liɛ klonglo.+ 33 Aarɔn i wa ng’ɔ́ fá bo kun yolɛ tɛ’n i mmoja’n nin i lui’n fá mán’n, nnɛn’n i sɔwa fama’n ti i liɛ.+ 34 Afin bo kun yolɛ tɛ nga Izraɛlifuɛ’m bé yí’n, ń fɛ́ i wue mɔ be toto i’n ɔ nin i sɔwa m’ɔ ti i liɛ ngunmin’n ń mán Ɲanmiɛn ɲrun jranfuɛ Aarɔn nin i mma mun. Maan Izraɛlifuɛ’m be di mmla sɔ’n su tititi.+

35 “‘Cɛn nga be sieli Aarɔn nin i mma mun kɛ be di Ɲanmiɛn ɲrun jranlɛ junman be man Zoova’n,+ tɛ nga be yrɛ i sin su be man Zoova’n i bue ng’ɔ ti Ɲanmiɛn ɲrun jranfuɛ’m be liɛ’n yɛ ɔ o lɛ-ɔ. 36 Cɛn nga Zoova kpali be sieli be ngunmin’n,+ ɔ seli kɛ maan be fɛ i bue sɔ’n like nga Izraɛlifuɛ’m be man’n nun naan be fa man be. Ɔ ti mmla kun m’ɔ fata kɛ be di su tititi-ɔ.’”

37 Tɛ nga kɛ bé yí’n be yra nnɛn’n i kɔlikɔli’n,+ ɔ nin ble annzɛ i wunsu like mɔ be fa man Ɲanmiɛn’n+ nin sa tɛ’n i ti tɛ’n,+ ɔ nin sa tɛ’n i ti kpatalɛ tɛ’n,+ nin junman nun wlulɛ tɛ’n,+ ɔ nin bo kun yolɛ tɛ’n+ be su mmla’n yɛ ɔ o lɛ-ɔ. 38 I nun mɔ Zoova seli Izraɛlifuɛ’m be kɛ be yi tɛ be mɛn i Sinai aawlɛ flɛnnɛn’n+ nun lɔ’n, ndɛ nga Zoova kan kleli Moizi Sinai Oka’n+ su lɔ’n yɛ ɔ o lɛ-ɔ.

8 Zoova seli Moizi ekun kɛ: 2 “Fa Aarɔn nin i mma mun,+ nin tralɛ mun,+ nin be ti su gualɛ ngo’n,+ nin nannin tola nga bé fá yí sa tɛ’n i ti tɛ’n, nin bua ɲin nɲɔn’n, ɔ nin gbogbo nga kpanwun mɔ levii nunman nun’n+ o nun’n, 3 kpɛkun yia nvlefuɛ’m be kwlaa tannin sua mɔ Ɲanmiɛn yi i wun nglo nun’n i anuan’n nun lɛ.”

4 Ɔ maan Moizi niannin ndɛ nga Zoova kannin’n su yoli, nvlefuɛ’m be yiali tannin sua mɔ Ɲanmiɛn yi i wun nglo nun’n i anuan’n nun lɛ. 5 Kpɛkun Moizi seli nvlefuɛ’m be kɛ: “Like nga Zoova seli kɛ e yo’n yɛ.” 6 Moizi fali Aarɔn nin i mma mun ɔli, yɛ ɔ fali nzue wunnzinnin be.+ 7 I sin’n, ɔ fali tralɛ tɛnndɛn’n+ wlali Aarɔn i wun, ɔ fali cisu’n+ cili i bo, ɔ fali tralɛ tɛnndɛn m’ɔ leman sa’n+ wlɛli i wun, ɔ fali efɔdu’n+ wlɛli i wun, kpɛkun ɔ fali cisu* nga be wuli’n,+ ɔ fa cili su fa trɛli i ase. 8 I sin’n, ɔ fali be wue nun pɔsu’n+ wlɛli i wun, kpɛkun ɔ fali Urimun nin Tumimun’n+ wlali be wue nun pɔsu’n nun. 9 I sin’n, ɔ fali tannin tanmue’n+ cicili i ti, ɔ fali sika ɔkwlɛ paplapa m’ɔ bo mianmian’n m’ɔ ti nzɔliɛ kun m’ɔ kle kɛ b’a fa be wun b’a man Ɲanmiɛn’n+ ɔ sieli i tannin tanmue’n i ɲrun wa, kɛ nga Zoova kan kleli Moizi’n sa.

10 I sin’n, Moizi fali be ti su gualɛ ngo’n, kpɛkun ɔ fa guɛguɛli i tannin sua’n nin i nun ninnge’m be kwlaa+ be su, yɛ ɔ yoli be sanwun. 11 I sin’n, ɔ fali ngo’n i wie kpɛntɛnkpɛntɛnnin tɛ yiwlɛ’n su kpɛ nso, ɔ guali tɛ yiwlɛ’n nin i ninnge’m be kwlaa, ɔ nin kpongbo dan’n nin i takawlɛ’n be su ngo naan ɔ́ yó be sanwun. 12 I agualiɛ su’n, ɔ fali be ti su gualɛ ngo’n i wie guali Aarɔn i ti su, ɔ guɛli i su ngo naan ɔ́ yó i sanwun.+

13 I sin’n, Moizi fali Aarɔn i mma mun bali, kpɛkun ɔ fali tralɛ tɛnndɛn mun wlali be wun, ɔ fali cisu mun cili be bo, yɛ ɔ fali kle mun wlali be ti,+ kɛ nga Zoova kan kleli Moizi’n sa.

14 I sin’n, ɔ fali nannin tola nga bé fá yí sa tɛ’n i ti tɛ’n bali, kpɛkun Aarɔn nin i mma’m be fali be sa fuali nannin tola nga bé fá yí sa tɛ’n i ti tɛ’n i ti’n su.+ 15 Moizi kpɛli i kɔmin, kpɛkun ɔ fɛli i sa mma boli mmoja’n+ nun fa guɛli i nnɛn wɛ mɔ be o tɛ yiwlɛ’n i bue kwlaa su’n be su, yɛ ɔ yoli tɛ yiwlɛ’n i sanwun sa tɛ’n ti. Kpɛkun ɔ fali mmoja’n i onga’n guɛli i tɛ yiwlɛ’n i bo lɛ, naan ɔ́ yó i sanwun naan be yi tɛ su be fa siesie be nin Ɲanmiɛn be afiɛn. 16 I sin’n, Moizi fali nnɛn’n i aya’n i wun lui’n i kwlaa nin i buɛ’n i wun lui’n, ɔ nin i aklɛnzia nɲɔn mun nin be wun lui’n, kpɛkun ɔ yrali be tɛ yiwlɛ’n su naan be wunsrɛn’n fite.+ 17 I sin’n, ɔ yoli maan be yrali nannin tola’n i onga’n, i kplo’n nin i nnɛn’n nin i aya’n i nun ninnge mun nanmue’n i sin lɔ,+ kɛ nga Zoova kan kleli Moizi’n sa.

18 I sin’n, ɔ fali bua ɲin nga bé fá yí tɛ nga kɛ bé yí’n be yra nnɛn’n i kɔlikɔli’n bali, kpɛkun Aarɔn nin i mma’m be fali be sa fuali bua ɲin’n i ti’n su.+ 19 I sin’n, Moizi kpɛli i kɔmin kpɛkun ɔ fali mmoja’n kpɛntɛnkpɛntɛnnin i tɛ yiwlɛ’n i bue kwlaa su. 20 Moizi tutuli bua ɲin’n i likalika mun, kpɛkun ɔ yrali nnɛn’n i ti’n nin i likalika mun nin i aklɛnzia’m be wun lui’n naan be wunsrɛn’n fite. 21 Moizi fali nzue wunnzinnin i aya mun nin i ja mun, kpɛkun ɔ yrali bua ɲin’n i wunmuan’n tɛ yiwlɛ’n su naan i wunsrɛn’n fite. Ɔ ti tɛ kun mɔ kɛ bé yí’n be yra nnɛn’n i kɔlikɔli-ɔ, yɛ ɔ bɔn fannin.* Ɔ ti tɛ kun mɔ be yrɛ i sin’n su be man Zoova-ɔ, kɛ nga Zoova kan kleli Moizi’n sa.

22 I sin’n, ɔ fali bua ɲin nɲɔn su’n m’ɔ ti junman nun wlulɛ bua ɲin’n,+ kpɛkun Aarɔn nin i mma’m be fali be sa fuali bua ɲin’n i ti’n su.+ 23 Moizi kpɛli i kɔmin, kpɛkun ɔ fɛli i mmoja’n wie kliklili Aarɔn i su fama’n i pɛkɛpɛkɛ’n su nin i sa mma kokotre fama’n su nin i ja mma kokotre fama’n su. 24 I sin’n, Moizi fali Aarɔn i mma mun bali, kpɛkun ɔ fali mmoja’n wie kliklili Aarɔn i mma’m be su fama’n i pɛkɛpɛkɛ’n su, nin be sa mma kokotre fama’n su, ɔ nin be ja mma kokotre fama’n su. Kpɛkun Moizi fali mmoja’n i onga’n kpɛntɛnkpɛntɛnnin tɛ yiwlɛ’n i bue kwlaa su.+

25 I sin’n, ɔ fɛli i lui’n nin i lua’n, ɔ nin i aya’n i wun lui’n i kwlaa, nin i buɛ’n i wun lui’n, nin i aklɛnzia nɲɔn’n nin be wun lui’n, ɔ nin i sɔwa fama’n.+ 26 Ɔ fali gbogbo nga kpanwun mɔ levii nunman nun’n wo nun’n, m’ɔ o Zoova ɲrun’n i nun kpanwun kukluuklu* mɔ levii nunman nun’n+ kun, ɔ nin kpanwun kukluuklu* mɔ be sɛnngɛnnin i nin ngo’n+ kun, nin gato kun. Kpɛkun ɔ fali be sieli i nnɛn lui’n nin i sɔwa fama’n su. 27 I sin’n, ɔ fɛli i kwlaa guɛli i Aarɔn nin i mma’m be sa klun, kpɛkun ɔ totoli be ɔli i ɲrun nin i sin, kɛ like mɔ be toto i be man Zoova’n sa. 28 I sin’n, Moizi fali ninnge sɔ’m be sa nun kpɛkun ɔ yrali be tɛ yiwlɛ’n su naan be wunsrɛn’n fite, ɔ fa be sieli i tɛ nga kɛ bé yí’n be yra nnɛn’n i kɔlikɔli’n su. Be ti junman nun wlulɛ tɛ m’ɔ bɔn fannin-ɔn.* Ɔ ti tɛ kun mɔ be yrɛ i sin su be man Zoova-ɔ.

29 Moizi fali nnɛn’n i wue’n, kpɛkun ɔ totoli i ɔli i ɲrun nin i sin, kɛ like mɔ be toto i be man Zoova’n sa.+ Junman nun wlulɛ bua ɲin’n i lika sɔ’n yoli Moizi liɛ, kɛ nga Zoova kan kleli Moizi’n sa.+

30 I sin’n, Moizi fali be ti su gualɛ ngo’n+ wie nin mmoja ng’ɔ o tɛ yiwlɛ’n su’n wie, kpɛkun ɔ fa kpɛntɛnkpɛntɛnnin i Aarɔn i wun nin i tralɛ’m be su, ɔ nin i mma nga be nin i o lɛ’n be wun nin be tralɛ’m be su. Ɔ yoli Aarɔn nin i tralɛ mun, ɔ nin i mma mun+ nin be tralɛ’m+ be sanwun.

31 I sin’n, Moizi seli Aarɔn nin i mma’m be kɛ: “Amun tɔn+ nnɛn’n tannin sua mɔ Ɲanmiɛn yi i wun nglo nun’n i anuan’n nun lɛ, kpɛkun amun di i lɛ, ɔ nin kpanwun ng’ɔ o junman nun wlulɛ gbogbo’n nun’n, kɛ nga be kan kleli min’n sa: ‘Maan Aarɔn nin i mma’m be di.’+ 32 Nnɛn’n nin kpanwun nga be ka’n, amun yra be sin nun.+ 33 Nán amun jaso tannin sua mɔ Ɲanmiɛn yi i wun nglo nun’n i anuan’n i wun lɛ lele cɛn nso, amun ka lɛ lele naan amun junman nun wlulɛ blɛ’n wie. Afin bé fá cɛn nso yɛ bé fá síe amun Ɲanmiɛn ɲrun jranfuɛ-ɔ.+ 34 Zoova seli kɛ e yo like nga e yoli i andɛ’n naan e fa siesie amun nin i amun afiɛn.+ 35 Maan amun ka tannin sua mɔ Ɲanmiɛn yi i wun nglo nun’n i anuan’n nun lɛ lele maan aliɛ cɛn amun, yɛ ɔ san amun sɔ lele cɛn nso+ naan amun yia like nga Zoova seli amun kɛ amun yo’n i nuan,+ naan amun a wuman. Afin i sɔ yɛ be kan kleli min-ɔn.”

36 Ɔ maan Aarɔn nin i mma’m be yoli like kwlaa nga Zoova seli Moizi kɛ be yo’n.

9 I cɛn mɔcuɛ su’n,+ Moizi flɛli Aarɔn nin i mma mun ɔ nin Izraɛli kpɛnngbɛn mun. 2 Ɔ seli Aarɔn kɛ: “Fa nannin ba kun m’ɔ ti kpa mɔ bé fá yí sa tɛ’n i ti tɛ’n,+ yɛ fa bua ɲin kun m’ɔ ti kpa mɔ bé fá yí tɛ nga kɛ bé yí’n be yra nnɛn’n i kɔlikɔli’n naan fa be kɔ Zoova ɲrun. 3 Sanngɛ se Izraɛlifuɛ’m be kɛ: ‘Amun fa boli yasua kun mɔ bé fá yí sa tɛ’n i ti tɛ’n, yɛ amun fa nannin ba kun ɔ nin bua gbanflɛn kun mɔ b’a ɲan afuɛ kun’n, mɔ kusu be ti kpa’n, mɔ bé fá yí tɛ nga kɛ bé yí’n be yra nnɛn’n i kɔlikɔli’n, 4 yɛ amun fa nannin tola kun nin bua ɲin kun mɔ bé fá yí bo kun yolɛ tɛ’n+ naan be fa yi tɛ Zoova ɲrun, yɛ amun fa ble annzɛ i wunsu like+ mɔ be sɛnngɛnnin i nin ngo’n. Afin andɛ’n, Zoova wá yí i wun nglo klé amun.’”+

5 Ɔ maan ninnge nga Moizi seli be kɛ be fa man’n, be fa bali tannin sua mɔ Ɲanmiɛn yi i wun nglo nun’n i ɲrun lɛ. I sin’n, Izraɛlifuɛ’m be kwlaa be mantannin lɔ kpɛkun be jrannin Zoova ɲrun. 6 I sin’n, Moizi seli kɛ: “Like nga Zoova seli amun kɛ amun yo’n yɛ ɔ o lɛ-ɔ. I liɛ’n, Zoova yí i aɲrunɲan’n i nglo klé amun.”+ 7 I sin’n, Moizi seli Aarɔn kɛ: “Wunnge tɛ yiwlɛ’n i wun lɔ naan yi ɔ sa tɛ’n i ti tɛ,+ kpɛkun yi tɛ nga kɛ bé yí’n be yra nnɛn’n i kɔlikɔli’n, yɛ kpata Ɲanmiɛn naan ɔ yaci ɔ sa tɛ’n cɛ wɔ,+ naan ɔ yaci ɔ awlofuɛ’m be sa tɛ’n cɛ be. I sin’n, yi nvlefuɛ’m be ti tɛ+ yɛ kpata Ɲanmiɛn naan ɔ yaci be sa tɛ’n cɛ be,+ kɛ nga Zoova kannin’n sa.”

8 Be ja nun lɛ’n, Aarɔn wunngeli tɛ yiwlɛ’n i wun lɔ, kpɛkun ɔ kpɛli nannin ba nga ɔ́ fá yí i sa tɛ’n i ti tɛ’n i kɔmin.+ 9 I sin’n, Aarɔn i mma’m be fali mmoja’n+ mɛnnin i, ɔ fɛli i sa mma boli mmoja’n nun kpɛkun ɔ fa guɛli i nnɛn wɛ nga be o tɛ yiwlɛ’n su’n be su, yɛ ɔ fali mmoja’n i onga’n utuli i tɛ yiwlɛ’n i bo lɛ.+ 10 Ɔ yrali sa tɛ’n i ti tɛ’n i nnɛn’n i lui’n, nin i aklɛnzia mun ɔ nin i buɛ’n i wun lui’n tɛ yiwlɛ’n su naan be wunsrɛn’n fite, kɛ nga Zoova kan kleli Moizi’n sa.+ 11 Ɔ yrɛli i nnɛn’n nin i kplo’n sin’n nun nanmue’n i sin lɔ.+

12 I sin’n, ɔ kpɛli nnɛn nga bé fá yí tɛ nga kɛ bé yí’n be yra nnɛn’n i kɔlikɔli’n i kɔmin. Kpɛkun Aarɔn i mma’m be fali mmoja’n be mɛnnin i, yɛ ɔ fa guɛguɛli i tɛ yiwlɛ’n i bue kwlaa su.+ 13 Be fali tɛ nga kɛ bé yí’n be yra nnɛn’n i kɔlikɔli’n i nnɛn’n i likalika mun, ɔ nin i ti’n be mɛnnin i, yɛ ɔ yrali be tɛ yiwlɛ’n su naan be wunsrɛn’n fite. 14 Asa ekun’n, ɔ wunnzinnin i aya’n, nin i ja mun kpɛkun ɔ fa be sieli i tɛ nga kɛ bé yí’n be yra nnɛn’n i kɔlikɔli’n i nnɛn’n su, yɛ ɔ yrali be tɛ yiwlɛ’n su naan be wunsrɛn’n fite.

15 I sin’n, ɔ yili nvlefuɛ’m be ti tɛ, ɔ fali boli nga bé fá yí nvlefuɛ’m be sa tɛ’n i ti tɛ’n, kpɛkun ɔ kpɛli i kɔmin fa yili sa tɛ’n i ti tɛ, kɛ ng’ɔ fa yoli klikli liɛ’n sa. 16 Ɔ yili tɛ nga kɛ bé yí’n be yra nnɛn’n i kɔlikɔli’n. Ɔ niannin wafa nga be kleli kɛ be yo’n su yoli.+

17 I sin’n, ɔ fali ble annzɛ i wunsu like’n mannin Ɲanmiɛn:+ Ɔ fali wie i sa klun kpɛkun ɔ yrɛli i tɛ yiwlɛ’n su naan i wunsrɛn’n fite. Ɔ yoli sɔ fa ukali tɛ nga kɛ bé yí’n be yra nnɛn’n i kɔlikɔli’n m’ɔ yili i nglɛmun’n su.+

18 I sin’n ɔ kpɛli nannin tola’n, nin bua ɲin nga bé fá yí bo kun yolɛ tɛ mán nvlefuɛ mun’n, be kɔmin. Aarɔn i mma’m be fali mmoja’n mɛnnin i, kpɛkun ɔ fa kpɛntɛnkpɛntɛnnin tɛ yiwlɛ’n i bue kwlaa su.+ 19 Be fali nannin tola’n i lui lika mun,+ nin bua ɲin’n i lua’n nin i lui ng’ɔ kɛtɛ i klun ninnge’m be wun’n, nin i aklɛnzia mun, nin i buɛ’n i wun lui’n.+ 20 Be fali nnɛn lui sɔ mun sieli i nnɛn’m be wue’m be su. I sin’n, ɔ yrali nnɛn lui mun tɛ yiwlɛ’n su naan be wunsrɛn’n fite.+ 21 Sanngɛ Aarɔn totoli nnɛn’m be wue’n nin i sɔwa fama’n ɔli i ɲrun nin i sin, kɛ like mɔ be toto i be man Zoova’n sa, kɛ nga Moizi kannin’n sa.+  

22 I sin’n, Aarɔn tinngɛli i sa nvlefuɛ’m be su, kpɛkun ɔ boli muae mannin be.+ Kɛ ɔ wieli sa tɛ’n i ti tɛ’n, nin tɛ nga kɛ bé yí’n be yra nnɛn’n i kɔlikɔli’n, ɔ nin bo kun yolɛ tɛ’n be yi’n, ɔ jrali. 23 I agualiɛ su’n, Moizi nin Aarɔn be wluli tannin sua mɔ Ɲanmiɛn yi i wun nglo nun’n i nun lɔ, yɛ be fiteli kpɛkun be boli muae mannin nvlefuɛ mun.+

Zoova i aɲrunɲan’n fiteli nvlefuɛ’m be kwlaa be ɲrun.+ 24 Kpɛkun sin fin Zoova wun lɔ jrali.+ Ɔ yrali tɛ nga kɛ bé yí’n be yra nnɛn’n i kɔlikɔli’n i nnɛn’n ɔ nin i lui’n tɛ yiwlɛ’n su. Kɛ nvlefuɛ’m be kwlaa be wunnin i sɔ’n, be bo sroli woo, kpɛkun be utuli be ɲin ase.+

10 I sin’n, Aarɔn i wa Nadabu nin Abiu+ be tinuntinun be fali be ninnge nga be fa sin gua nun’n, be guali nun sin, yɛ be sieli be su ansan.+ Kpɛkun be fali sin m’ɔ nin i fataman’n+ be ɔli Zoova ɲrun. Kusu nn w’a seman be kɛ be yo sɔ. 2 Kɛ ɔ yoli sɔ’n, sin kun fiteli Zoova ɲrun lɛ ɔ yrali be,+ ɔ maan be wuli Zoova ɲrun lɛ.+ 3 I sin’n, Moizi seli Aarɔn kɛ: “Ndɛ nga Zoova kannin’n yɛ: ‘Maan ɔ tran be nga be mantan min’n be klun titi kɛ n ti sanwun,+ yɛ ɔ fata kɛ nvlefuɛ’m be kwlaa be manman min.’” Aarɔn w’a ijɔman.

4 Moizi flɛli Misaɛli nin Ɛlzafan mɔ be ti Aarɔn i si i niaan bian Uziɛli+ i mma mun’n, kpɛkun ɔ seli be kɛ: “Amun bla, amun fa amun niaan mun lika m’ɔ ti Ɲanmiɛn liɛ klonglo’n i ɲrun wa naan amun fa be wɔ nanmue’n i sin lɔ lika kun nun.” 5 Ɔ maan be bali be wa fali be, ɔ nin be wun tralɛ tɛnndɛn mun, kpɛkun be fa be ɔli nanmue’n i sin lɔ lika kun nun, kɛ nga Moizi kan kleli be’n sa.

6 Moizi seli Aarɔn nin i wa Eleazaa nin Itamaa be kɛ: “Nán amun yaci amun timuɛn’n i lɛ naan ɔ yo sukusuku, annzɛ nán amun titi amun tralɛ’m be nun,+ kɛ ɔ́ yó naan amun a wuman naan Ɲanmiɛn w’a faman nvlefuɛ’m be kwlaa be wun ya’n ti. Izraɛlifuɛ’m be kwlaa mɔ be ti amun niaan’n, be yɛ bé wá sún be nga Zoova fali sin kunnin be’n niɔn. 7 Nán amun jaso tannin sua mɔ Ɲanmiɛn yi i wun nglo nun’n i anuan’n i wun lɛ, sɛ ɔ timɛn i ti’n amún wú. Afin Zoova i ngo m’ɔ fa kpali amun’n ɔ o amun su.”+ Ɔ maan be fali ndɛ nga Moizi kannin’n su.

8 Yɛ Zoova seli Aarɔn kɛ: 9 “A nin ɔ mma mun, kɛ amún bá tannin sua mɔ Ɲanmiɛn yi i wun nglo nun’n i nun wa’n, nán amun nɔn duvɛn annzɛ nzan uflɛ m’ɔ bo’n,+ kɛ ɔ́ yó naan amun a wuman’n ti. Ɔ ti mmla kun m’ɔ fata kɛ amun di su tititi-ɔ. 10 I liɛ’n, ngbaciɛ trán like ng’ɔ ti Ɲanmiɛn liɛ klonglo’n nin like ng’ɔ timan Ɲanmiɛn liɛ’n, ɔ nin like ng’ɔ ti fiɛn’n nin like ng’ɔ ti sanwun’n be afiɛn,+ 11 yɛ Izraɛlifuɛ’m bé sí mmla kwlaa nga Zoova seli Moizi kɛ ɔ fa kle be’n.”+

12 I sin’n, Moizi seli Aarɔn nin i wa Eleazaa nin Itamaa mɔ be kali lɛ’n be kɛ: “Amun fa ble annzɛ i wunsu like mɔ be yrɛli i sin nun be mannin Zoova’n i onga’n, naan amun fa yo kpanwun mɔ levii nunman nun’n, yɛ amun di i tɛ yiwlɛ’n i wun lɛ,+ afin ɔ ti i liɛ ngunmin, yɛ ɔ ti Ɲanmiɛn liɛ klonglo.+ 13 Amun di i lika kun m’ɔ ti Ɲanmiɛn liɛ klonglo’n+ nun, afin like nga be yrɛ i sin su be man Zoova’n, i ng’ɔ ti a nin ɔ mma mun amun liɛ’n, yɛ ɔ o lɛ-ɔ. Afin i sɔ yɛ be seli min kɛ n yo-ɔ. 14 A nin ɔ mma yasua mun, nin ɔ mma bla mun,+ amun di nnɛn’n i wue mɔ be toto i’n, ɔ nin i sɔwa m’ɔ ti i liɛ ngunmin’n,+ lika kun m’ɔ ti sanwun’n nun. Afin bo kun yolɛ tɛ nga Izraɛlifuɛ’m be yi’n, i lika nga be man m’ɔ ti a nin ɔ mma mun amun liɛ’n, yɛ ɔ o lɛ-ɔ. 15 Maan be fa nnɛn’n i sɔwa m’ɔ ti i liɛ ngunmin’n nin i wue mɔ be toto be man Ɲanmiɛn’n, ɔ nin i lui mɔ bé wá yrɛ́ i sin nun’n be bla, naan be toto be wɔ be ɲrun nin be sin Zoova ɲrun. Nnɛn’n i lika sɔ’n ɔ́ yó a nin ɔ mma mun amun liɛ tititi,+ kɛ nga Zoova kannin’n sa.”

16 Moizi kunndɛli boli nga be fa yili sa tɛ’n i ti tɛ’n,+ kpɛkun ɔ wunnin kɛ be yrɛli i. Ɔ maan ɔ fali Aarɔn i wa Eleazaa nin Itamaa mɔ be kali lɛ’n be wun ya. Kpɛkun ɔ usali be kɛ: 17 “?Ngue ti yɛ amun a diman sa tɛ’n i ti tɛ’n i nnɛn’n lika m’ɔ ti Ɲanmiɛn liɛ klonglo’n+ nun-ɔn? Afin ɔ ti i liɛ ngunmin, yɛ ɔ ti Ɲanmiɛn liɛ klonglo. Ɔ fa mannin amun naan amun sua nvlefuɛ’m be sa tɛ’n, yɛ amun kpata be ti Zoova ɲrun. 18 Amun nian! Sran fi w’a fɛmɛn i mmoja’n w’a baman lika m’ɔ ti Ɲanmiɛn liɛ klonglo’n+ nun wa. Ɔ fata kɛ amun di i lika m’ɔ ti Ɲanmiɛn liɛ klonglo’n nun, kɛ nga be kan kleli min’n sa.” 19 Aarɔn tɛli Moizi su kɛ: “Nian! Andɛ’n be yili be sa tɛ’n i ti tɛ’n nin tɛ nga kɛ bé yí’n be yra nnɛn’n i kɔlikɔli’n Zoova ɲrun,+ ɔ nin i sɔ’n ngba’n, sa sɔ’m be tɔli min su. ?Sɛ n dili nnɛn nga be fa yili sa tɛ’n i ti tɛ’n, nn ɔ yoli Zoova i fɛ?” 20 Kɛ Moizi tili ndɛ sɔ’n, i klun jɔli.

11 I sin’n, Zoova seli Moizi nin Aarɔn be kɛ: 2 “Amun se Izraɛlifuɛ’m be kɛ: ‘Asiɛ’n su nnɛn nga amun kwla di’n yɛ:+ 3 Nnɛn kwlaa nga be ja bui’n nun ti kpaciwa’n, mɔ be di like kpɛkun be kpu be di i ekun’n, amun kwla di.

4 “‘Sanngɛ nnɛn nga be kpu like be di’n, annzɛ be ja bui’n nun ti kpaciwa m’ɔ fataman kɛ amun di’n be yɛ: Ɲɔnngɔnmin’n, afin ɔ kpu like di, sanngɛ i ja bui’n nun timan kpaciwa. Maan amun bu i like fiɛn.+ 5 I wie yɛle oya’n,+ afin ɔ kpu like di, sanngɛ i ja bui’n nun timan kpaciwa. Maan amun bu i like fiɛn. 6 I wie ekun yɛle gbanmlɔ’n, afin ɔ kpu like di, sanngɛ i ja bui’n nun timan kpaciwa. Maan amun bu i like fiɛn. 7 I wie ekun yɛle kɔkɔti’n,+ afin i ja bui’n nun ti kpaciwa, sanngɛ ɔ kpuman like diman. Maan amun bu i like fiɛn. 8 Nán amun di be nnɛn’n, yɛ nán amun kan be fuɛn’n. Maan amun bu be like fiɛn.+

9 “‘Ninnge kwlaa nga be o nzue nun’n, be nga amun kwla di’n be yɛ: Nzue nun ninnge kwlaa nga be le mmɛ’n nin wun bui’n, sɛ be o jenvie’n nun-o, annzɛ nzue ba’m be nun-o, amun kwla di.+ 10 Sanngɛ like kwlaa ng’ɔ o jenvie mun nin nzue ba’m be nun m’ɔ leman mmɛ nin wun bui’n, m’ɔ o nnɛn kanngan nga be wlanwlan likawlɛ’n, annzɛ nnɛn uflɛ mɔ be o nzue’m be nun’n be nun’n, maan amun bu i like fiɛn. 11 Maan amun bu be like kain, nán amun di be nnɛn’n,+ yɛ maan be fuɛn’n yo kain amun ɲrun. 12 Nzue nun like kwlaa nga be leman mmɛ nin wun bui’n, maan amun bu be like kain.

13 “‘Nnɛn nga be tu m’ɔ fata kɛ be yo amun kain m’ɔ fataman kɛ amun di, afin be ti kain’n be yɛ: Anunman ɲin,+ asri nga jue yɛ ɔ ti i aliɛ’n, apɛtɛkuasi ble,+ 14 kotoklo ɔkwlɛ, nin kotoklo ble’n i wafa kwlaa, 15 kɔkɔkuankuan’n i wafa kwlaa, 16 klɔnsoklo, akpatue, muɛti,* nin asri’n i wafa kwlaa, 17 akpatue kaan’n, anunman m’ɔ tra jue sie i konviabo’n, akpatue nga i su’n ti tɛnndɛn’n, 18 blo labu, nzue su anunman nga be flɛ i kɛ pelikan’n, apɛtɛkuasi, 19 ɔngɔ, jejewu’n i wafa kwlaa, bobomunzue, ɔ nin akpannin. 20 Kakaa kanngan kwlaa nga be le ndɛwa mɔ be nanti be ja nnan su’n, maan amun bu be like kain.

21 “‘Kakaa nga be le ndɛwa mɔ be nanti be ja nnan’m be su’n, be nun nga amun kwla di’n, yɛle be nga be ja’m be nun nɲɔn be ti tɛnndɛn tra be onga mun’n, mɔ be tu kpɛn su’n. 22 I sɔ kakaa liɛ’m be nun nga amun kwla di’n be yɛ: Lalo nga be tu kɔ nvle uflɛ nun’n, lalo wafa uflɛ mɔ be di’n,+ klannan mun, ɔ nin aɛcɛ mun. 23 Kakaa uflɛ mɔ be le ndɛwa mɔ be ja’m be ti nnan’n, maan amun bu be kwlaa be like kain. 24 Ninnge sɔ’m be kwla yo maan amun wlu fiɛn nun. Sran ng’ɔ kan be fuɛn’n, nn w’a wlu fiɛn nun. Ɔ́ ká sɔ lele nnɔsua.+ 25 Sran kwlaa ng’ɔ fa kakaa sɔ’m be nun kun i fuɛn’n, ɔ fata kɛ ɔ kpu i tralɛ mun,+ yɛ ɔ́ ká fiɛn nun lele nnɔsua.

26 “‘Nnɛn kwlaa nga i ja bui’n nun ti kpaciwa, mɔ sanngɛ i nun timan kpaciwa kpa’n, mɔ kusu ɔ kpuman like diman’n, maan amun bu be like fiɛn. Sran kwlaa ng’ɔ kan be’n, nn w’a wlu fiɛn nun.+ 27 Nnɛn nga be nanti be ja nnan’m be su’n, be nun nga be nanti be ja ngbabua’m be su’n, maan amun bu be like fiɛn. Sran kwlaa ng’ɔ kan be fuɛn’n, nn w’a wlu fiɛn nun. Ɔ́ ká sɔ lele nnɔsua. 28 Sran ng’ɔ man be fuɛn’n su’n, ɔ fata kɛ ɔ kpu i tralɛ mun,+ yɛ ɔ́ ká fiɛn nun lele nnɔsua.+ Maan amun bu be like fiɛn.

29 “‘Asiɛ’n su nnɛn nga be wlanwlan likawlɛ m’ɔ fata kɛ amun bu be like fiɛn’n be yɛ: Gbekle nga be fiman ndrɛ’n, gbekle,+ ablɔ’n i wafa kwlaa, 30 laliɛ, ablɔ dandan, ablɔ, aunɲan nun ablɔ, ɔ nin lolowlɛ. 31 Maan amun bu nnɛn kanngan sɔ mɔ be wlanwlan likawlɛ’n be like fiɛn.+ Sran kwlaa ng’ɔ kan be fuɛn’n, nn w’a wlu fiɛn nun. Ɔ́ ká sɔ lele nnɔsua.+

32 “‘Like kwlaa nga be fuɛn’n tɔ su’n, ɔ́ yó fiɛn. Maan ɔ yo like wie mɔ be fali waka be yoli’n nin-o, annzɛ tralɛ-o, annzɛ kplo-o, annzɛ bajɛ-o, ɔ́ yó fiɛn. Like kwlaa nga be fa yo like mɔ be fuɛn’n tɔ su’n, maan be fa wlɛ i nzue nun, yɛ ɔ́ ká fiɛn lele nnɔsua. I sin’n, ɔ́ yó sanwun ekun. 33 Sɛ be tɔ sɛ wie mɔ fa yɛ be fa yoli’n nun’n, ɔ fata kɛ be bo i. Like kwlaa ng’ɔ o sɛ sɔ’n nun’n, ɔ́ yó fiɛn.+ 34 Aliɛ kwlaa nga sɛ sɔ’n i nun nzue’n kɛn i’n, ɔ́ yó fiɛn. Yɛ like kwlaa nga be kwla nɔn m’ɔ o sɛ sɔ’n nun’n, ɔ́ yó fiɛn. 35 Like kwlaa nga be fuɛn’n tɔ su’n, ɔ́ yó fiɛn. Sɛ be tɔ fuu wie su-o, annzɛ like tɔnwlɛ kaan wie su-o, ɔ fata kɛ be bubu i. Fiɛn w’a kan be, yɛ ɔ fata kɛ amun bu be like fiɛn titi. 36 Sanngɛ sɛ nzue ba annzɛ nzue guawlɛ wie nun yɛ be tɔli’n, ɔ su yoman fiɛn. Sanngɛ sran kwlaa ng’ɔ kan be fuɛn’n, ɔ́ yó fiɛn. 37 Sɛ be fuɛn’n tɔ like mma wie m’ɔ fata kɛ be lua’n i su’n, like mma sɔ’n ká sanwun. 38 Sanngɛ sɛ be guali like mma sɔ’n su nzue naan be fuɛn’n i lika wie tɔ su’n, maan amun bu like mma sɔ’n i like fiɛn.

39 “‘Sɛ nnɛn kun mɔ amun di’n ɔ wu’n, sran kwlaa ng’ɔ kɛn i fuɛn’n, nn w’a wlu fiɛn nun. Ɔ́ ká sɔ lele nnɔsua.+ 40 Sran kwlaa ng’ɔ di nnɛn fuɛn sɔ’n i wie’n, ɔ fata kɛ ɔ kpu i tralɛ mun, yɛ ɔ́ ká fiɛn nun lele nnɔsua.+ Sran kwlaa ng’ɔ mɛn i fuɛn’n su’n, ɔ fata kɛ ɔ kpu i tralɛ mun, yɛ ɔ́ ká fiɛn nun lele nnɔsua. 41 Asiɛ’n su nnɛn kanngan nga be wlanwlan likawlɛ’n be kwlaa be ti like kain.+ Ɔ fataman kɛ amun di. 42 Nnɛn kwlaa nga be cuɛn be wun ase’n, ɔ nin be nga be nanti be ja nnan’m be su’n, ɔ nin asiɛ’n su nnɛn kanngan nga be wlanwlan likawlɛ mɔ be ja’m be sɔnnin’n, nán amun di. Afin be ti like kain.+ 43 Nán maan nnɛn kanngan nga be wlanwlan likawlɛ’n be ti’n amun yo kain Ɲanmiɛn ɲrun. Nán maan be ti’n, amun wlu fiɛn nun naan amun yo fiɛn.+ 44 Afin n ti amun Ɲanmiɛn Zoova,+ ɔ fata kɛ amun yo sanwun naan amun yo min liɛ klonglo,+ afin n ti sanwun.+ Ɔ maan nán asiɛ’n su nnɛn kanngan nga be wlanwlan likawlɛ’n be ti’n amun wlu fiɛn nun. 45 Afin n ti Zoova. Min yɛ n fali amun Ezipti mɛn’n nun n fiteli-ɔ. N yoli sɔ naan amun wun kɛ n ti Ɲanmiɛn.+ Ɔ fata kɛ amun yo sanwun,+ afin n ti sanwun.+

46 “‘Nnɛn nga be le ja nnan’n nin nnɛn nga be tu’n, ɔ nin nnɛn nga be wlanwlan nzue nun’n, nin nnɛn kanngan kwlaa nga be wlanwlan asiɛ’n su’n, be su mmla’n yɛ ɔ o lɛ-ɔ. 47 Kɛ ɔ ko yo naan amun a wun ngbaciɛ ng’ɔ o like ng’ɔ ti fiɛn nin ng’ɔ ti sanwun’n, ɔ nin nnɛn nga amun kwla di nin nga amun kwlá diman’n be afiɛn’n ti.’”+

12 Zoova seli Moizi ekun kɛ: 2 “Se Izraɛlifuɛ’m be kɛ: ‘Sɛ bla kun wunnzɛ naan ɔ wu ba yasua’n, ɔ́ ká fiɛn nun cɛn nso, kɛ nga i mannza blɛ’n nun’n ɔ o fiɛn nun’n sa.+ 3 Cɛn mɔcuɛ su’n, maan be wla ba’n i klɛn.+ 4 Mmoja m’ɔ tuli bla’n ti’n, maan ɔ kplo i wun fiɛn’n cɛn ba ablasan-nin-nsan (33) ekun. Nán ɔ kan like wie fi m’ɔ ti Ɲanmiɛn liɛ klonglo’n, yɛ nán ɔ wlu lika m’ɔ ti Ɲanmiɛn liɛ klonglo’n nun lɔ lele saan cɛn ng’ɔ fata kɛ ɔ kplo i wun fiɛn’n i nuan w’a yia.

5 “‘Sɛ ɔ wu ba bla’n, ɔ́ ká fiɛn nun cɛn blu-nin-nnan (14), kɛ i mannza blɛ nun’n sa. Mmoja m’ɔ tuli i ti’n, maan ɔ kplo i wun fiɛn’n cɛn ba ablesiɛn-nin-nsiɛn (66) ekun. 6 Sɛ ɔ wu ba yasua annzɛ ba bla naan ɔ yia cɛn ng’ɔ fata kɛ ɔ fa kplo i wun fiɛn’n i nuan’n, maan ɔ fa bua gbanflɛn kun, m’ɔ nin-a traman afuɛ kun’n, mɔ bé fá yí tɛ nga kɛ bé yí’n be yra nnɛn’n i kɔlikɔli’n,+ ɔ nin okunmomo ba kun annzɛ auble kun mɔ bé fá yí sa tɛ’n i ti tɛ’n, naan ɔ fa be wɔ tannin sua mɔ Ɲanmiɛn yi i wun nglo nun’n i anuan’n nun lɔ, naan ɔ fa be man Ɲanmiɛn ɲrun jranfuɛ’n. 7 Ɲanmiɛn ɲrun jranfuɛ’n ɔ́ fá be kɔ́ Zoova ɲrun, yɛ ɔ́ kpáta bla’n i ti, kpɛkun fiɛn m’ɔ wluli nun mmoja m’ɔ tuli i’n ti’n, ɔ́ wíe yɛ ɔ́ yó sanwun. Bla ng’ɔ wu ba yasua annzɛ ba bla’n i su mmla’n yɛ ɔ o lɛ-ɔ. 8 Sɛ ɔ kwlá toman bua’n, maan ɔ fa auble nɲɔn annzɛ okunmomo ba nɲɔn.+ Bé fá kun yí tɛ nga kɛ bé yí’n be yra nnɛn’n i kɔlikɔli’n yɛ bé fá kun yí sa tɛ’n i ti tɛ. Kpɛkun Ɲanmiɛn ɲrun jranfuɛ’n ɔ́ kpɛ́tɛ i ti yɛ ɔ́ yó sanwun.’”

13 Zoova seli Moizi nin Aarɔn be ekun kɛ: 2 “Sɛ like wie wun sran kun i kplo’n su’n,* annzɛ awlowlɛ guɛ i wun’n, annzɛ like wie tɛtɛ i kplo’n su, naan ɔ kwla kaci kokowe*+ i kplo’n su’n, ɔ fata kɛ be fɛ i ko man Aarɔn m’ɔ ti Ɲanmiɛn ɲrun jranfuɛ’n, annzɛ i mma mɔ be ti Ɲanmiɛn ɲrun jranfuɛ’n+ be nun kun. 3 Ɲanmiɛn ɲrun jranfuɛ’n nían tukpacɛ ng’ɔ o i kplo’n su’n. Sɛ i wunnɛn’n i lika nga tukpacɛ’n wo lɛ’n i nun ndrɛ’n w’a yo ufue naan like sɔ’n w’a kpɛ kunman’n, nn kokowe-ɔ. Ɲanmiɛn ɲrun jranfuɛ’n níɛn i, kpɛkun ɔ́ sé kɛ w’a wlu fiɛn nun. 4 Sanngɛ sɛ like ng’ɔ o i kplo’n su’n ti ufue’n naan w’a kpɛman kunman’n, yɛ sɛ i ndrɛ’n w’a yoman ufue’n, Ɲanmiɛn ɲrun jranfuɛ’n síe sran nga like’n wo i wun’n i ngunmin cɛn ba nso.+ 5 I cɛn nso su’n, Ɲanmiɛn ɲrun jranfuɛ’n níɛn i. Sɛ ɔ wun kɛ tukpacɛ’n w’a trɛman naan w’a trumɛn i kplo’n su’n, ɔ́ síe i ngunmin cɛn ba nso ekun.

6 “I cɛn nso su’n, Ɲanmiɛn ɲrun jranfuɛ’n níɛn i ekun. Sɛ like ng’ɔ o i wun’n i ɲrun’n w’a kpa naan w’a trumɛn i kplo’n su’n, Ɲanmiɛn ɲrun jranfuɛ’n sé kɛ ɔ ti sanwun.+ Awlowlɛ ngbɛn-ɔn. Sran’n kpú i tralɛ mun, kpɛkun ɔ́ yó sanwun. 7 Sanngɛ sɛ ɔ fɛli i wun ko kleli Ɲanmiɛn ɲrun jranfuɛ’n kɛ ɔ nian sɛ w’a yo sanwun’n, naan i sin’n awlowlɛ’n* tru i kplo’n su’n, maan ɔ wɔ Ɲanmiɛn ɲrun jranfuɛ’n i ɲrun ekun.* 8 Ɲanmiɛn ɲrun jranfuɛ’n níɛn i, sɛ awlowlɛ’n w’a tru i kplo’n su’n, ɔ́ sé kɛ w’a wlu fiɛn nun. Kokowe-ɔ.+

9 “Sɛ kokowe gua sran kun wun’n, ɔ fata kɛ be fɛ i ko man Ɲanmiɛn ɲrun jranfuɛ’n, 10 yɛ Ɲanmiɛn ɲrun jranfuɛ’n níɛn i.+ Sɛ like wie wun i kplo’n su’n naan i su ndrɛ’n yo ufue’n, yɛ sɛ kannin+ wo like ng’ɔ wunnin’n su’n, 11 nn kokowe’n wá cɛ́ i kplo’n su. Ɲanmiɛn ɲrun jranfuɛ’n sé kɛ w’a wlu fiɛn nun. Ɔ fataman kɛ ɔ sie i ngunmin,+ afin w’a wlu fiɛn nun. 12 Sɛ kokowe’n fite i kplo wunmuan’n su’n, sɛ ɔ fɛ i ti’n su lele ju i ja’m be wun lɔ naan Ɲanmiɛn ɲrun jranfuɛ’n wun i sɔ’n, 13 sɛ Ɲanmiɛn ɲrun jranfuɛ’n niɛn i naan ɔ wun kɛ kokowe’n w’a fɛ i kplo wunmuan’n, ɔ́ sé kɛ sran sɔ mɔ like’n wo i wun’n ɔ ti sanwun.* Kɛ mɔ i kwlaa w’a yo ufue’n ti’n, ɔ ti sanwun. 14 Sanngɛ sɛ i nun tu kannin’n, ɔ́ wlú fiɛn nun. 15 Kɛ Ɲanmiɛn ɲrun jranfuɛ’n ko wun kannin’n, ɔ́ sé kɛ w’a wlu fiɛn nun.+ Kannin’n ti like fiɛn. Kokowe-ɔ.+ 16 Sanngɛ sɛ kannin’n i ɲrun’n yo ufue ekun’n, sran’n kɔ́ Ɲanmiɛn ɲrun jranfuɛ’n i sin. 17 Ɲanmiɛn ɲrun jranfuɛ’n níɛn i,+ yɛ sɛ kannin’n w’a yo ufue’n, ɔ́ sé kɛ sran nga tukpacɛ’n wo i wun’n w’a yo sanwun. Ɔ ti sanwun.

18 “Sɛ yra yo sran kun i kplo’n su naan ɔ wie’n, 19 sɛ yra’n i osu’n wun naan ɔ yo ufue’n, annzɛ sɛ i osu’n yo ufue nin ɔkwlɛ’n, maan ɔ fɛ i wun ko kle Ɲanmiɛn ɲrun jranfuɛ’n. 20 Ɲanmiɛn ɲrun jranfuɛ’n níɛn i,+ yɛ sɛ ɔ wun kɛ w’a kpɛ kunman i kplo’n nun naan i nun ndrɛ’n w’a yo ufue’n, ɔ́ sé kɛ sran’n w’a wlu fiɛn nun. Kokowe yɛ ɔ fiteli yra’n i osu’n nun-ɔn. 21 Sanngɛ sɛ Ɲanmiɛn ɲrun jranfuɛ’n nian like ng’ɔ o sran’n i kplo’n su’n naan ɔ wun kɛ i nun ndrɛ’n timan ufue naan w’a kpɛman kunman’n, naan i ɲrun’n w’a kpa’n, ɔ́ síe sran sɔ’n i ngunmin cɛn ba nso.+ 22 Yɛ sɛ w’a tru i kplo’n su sakpa’n, Ɲanmiɛn ɲrun jranfuɛ’n sé kɛ w’a wlu fiɛn nun. Tukpacɛ-ɔ. 23 Sanngɛ sɛ like’n w’a ɔmɛn i ɲrun naan w’a truman’n, nn yra’n i osu’n yɛ ɔ fɛfɛli ngbɛn-ɔn. Ɔ maan Ɲanmiɛn ɲrun jranfuɛ’n sé kɛ sran’n ti sanwun.+

24 “Annzɛ sɛ sin yra sran kun naan i osu’n yo ufue nin ɔkwlɛ’n, annzɛ ɔ yo ufue’n, 25 Ɲanmiɛn ɲrun jranfuɛ’n níɛn i. Sɛ like ng’ɔ o i wun’n i nun ndrɛ’n yo ufue’n naan w’a kpɛ kunman’n, nn kokowe yɛ ɔ fiteli kannin’n nun-ɔn. Ɲanmiɛn ɲrun jranfuɛ’n sé kɛ sran’n w’a wlu fiɛn nun. Kokowe-ɔ. 26 Sanngɛ sɛ Ɲanmiɛn ɲrun jranfuɛ’n niɛn i naan ɔ wun kɛ like ng’ɔ o i wun’n i nun ndrɛ’n timan ufue naan w’a kpɛman kunman’n, naan i ɲrun’n w’a kpa’n, ɔ́ síe sran sɔ’n i ngunmin cɛn ba nso.+ 27 I cɛn nso su’n, Ɲanmiɛn ɲrun jranfuɛ’n níɛn i, yɛ sɛ ɔ wun kɛ like’n w’a tru i kplo’n su sakpa’n, ɔ́ sé kɛ sran’n w’a wlu fiɛn nun. Kokowe-ɔ. 28 Sanngɛ sɛ like ng’ɔ o sran’n i wun’n ka lika kunngba’n nun naan w’a trumɛn i kplo’n su, naan i ɲin’n kpa’n, nn kannin’n i osu’n yɛ ɔ wunnin ngbɛn-ɔn. Ɔ maan Ɲanmiɛn ɲrun jranfuɛ’n sé kɛ sran’n ti sanwun, afin kannin’n i osu’n yɛ ɔ wunnin-ɔn.

29 “Sɛ tukpacɛ wie fite yasua kun annzɛ bla kun i ti’n su annzɛ i aoje’n su’n, 30 Ɲanmiɛn ɲrun jranfuɛ’n nían tukpacɛ’n.+ Sɛ w’a kpɛ kunman’n naan i su ndrɛ’n ti youun’n naan i su ndrɛ’n w’a sɔnman’n, Ɲanmiɛn ɲrun jranfuɛ’n sé kɛ sran sɔ’n w’a wlu fiɛn nun. Ɔ ti be ti kplo’n su tukpacɛ annzɛ be akanza’n nun tukpacɛ. Ɔ ti be ti su kokowe annzɛ be aoje su kokowe. 31 Sanngɛ sɛ Ɲanmiɛn ɲrun jranfuɛ’n wun kɛ tukpacɛ’n w’a kpɛman kunman naan ndrɛ ble fi nunman nun’n, ɔ fata kɛ Ɲanmiɛn ɲrun jranfuɛ’n sie sran nga tukpacɛ’n wo i wun’n i ngunmin cɛn ba nso.+ 32 I cɛn nso su’n, Ɲanmiɛn ɲrun jranfuɛ’n nían tukpacɛ’n. Sɛ w’a trɛman naan i nun ndrɛ’n w’a yoman youun’n, yɛ sɛ w’a kpɛman kunman’n, 33 ɔ fata kɛ be yi sran sɔ’n i ti’n, annzɛ i akanza’n, sanngɛ nán be yi i lika nga tukpacɛ’n wo lɛ’n wie. I sin’n, Ɲanmiɛn ɲrun jranfuɛ’n síe sran sɔ’n i ngunmin cɛn ba nso.

34 “I cɛn nso su’n, Ɲanmiɛn ɲrun jranfuɛ’n nían tukpacɛ’n ekun. Sɛ tukpacɛ m’ɔ o sran’n i ti kplo’n su’n annzɛ i akanza’n nun’n w’a trumɛn i kplo’n su’n, yɛ sɛ w’a kpɛman kunman’n, ɔ fata kɛ Ɲanmiɛn ɲrun jranfuɛ’n se kɛ sran’n ti sanwun, yɛ maan sran’n kpu i tralɛ mun naan ɔ yo sanwun. 35 Sanngɛ sɛ Ɲanmiɛn ɲrun jranfuɛ’n seli i kɛ ɔ ti sanwun naan i sin’n, tukpacɛ’n tru i kplo’n su’n, 36 Ɲanmiɛn ɲrun jranfuɛ’n níɛn i, yɛ sɛ tukpacɛ’n w’a tru i kplo’n su’n, ɔ nunman nun kun kɛ Ɲanmiɛn ɲrun jranfuɛ’n nian sɛ i nun ndrɛ’n ti youun-o. Sran sɔ’n w’a wlu fiɛn nun. 37 Sanngɛ sɛ be niɛn i naan tukpacɛ’n w’a truman naan i nun ndrɛ’n ti ble’n, nn tukpacɛ’n w’a wie. Sran’n ti sanwun, yɛ Ɲanmiɛn ɲrun jranfuɛ’n sé kɛ ɔ ti sanwun.+

38 “Sɛ like wie tata yasua kun annzɛ bla kun i kplo’n su* naan like sɔ’n ti ufue’n, 39 Ɲanmiɛn ɲrun jranfuɛ’n nían like sɔ’n.+ Sɛ like ng’ɔ tɛtɛ i kplo’n su’n i ɲrun’n kpa fuaii’n, nn like ng’ɔ o i kplo’n su’n timan tukpacɛ kekle. Sran sɔ’n ti sanwun.

40 “Sɛ yasua kun i ti ndrɛ’n tutu naan i ti’n kpa’n, ɔ ti sanwun. 41 Sɛ i ti’n i ɲrun wa ndrɛ’n tutu naan i lɛ lika’n kpa’n, ɔ ti sanwun. 42 Sanngɛ sɛ kannin kun m’ɔ ti ufue nin ɔkwlɛ’n ɔ fite i ti kpawa’n su’n annzɛ i ngban’n su’n, nn kokowe yɛ w’a fite i ti’n su annzɛ i ngban’n su-ɔ. 43 Ɲanmiɛn ɲrun jranfuɛ’n níɛn i, yɛ sɛ like ng’ɔ wunnin sran’n i ti kpawa’n su’n, annzɛ i ngban’n su’n ti ufue nin ɔkwlɛ, naan ɔ ti kɛ kokowe sa i kplo’n su’n, 44 nn ɔ ti kokowefuɛ. W’a wlu fiɛn nun, yɛ Ɲanmiɛn ɲrun jranfuɛ’n sé kɛ w’a wlu fiɛn nun, tukpacɛ m’ɔ o i ti’n su’n ti. 45 Sran ng’ɔ ti kokowefuɛ’n, maan ɔ wla tralɛ titiwa, maan ɔ yaci i ti ndrɛ’n i lɛ naan ɔ yo sukusuku, yɛ maan ɔ kɛtɛ i nuan wun ndrɛ’n su naan ɔ kpan se kɛ: ‘N wo fiɛn nun-o, n wo fiɛn nun-o!’ 46 Blɛ kwlaa nga tukpacɛ’n wo i wun’n, ɔ o fiɛn nun. Kɛ m’ɔ o fiɛn nun’n ti’n, ɔ fata kɛ ɔ trɛn i ngunmin. Maan ɔ tran nanmue’n i sin lɔ.+

47 “Sɛ kokowe tɔ tralɛ wie nun’n, sɛ nnɛn ndrɛ tralɛ-o, annzɛ lɛn tralɛ-o, 48 annzɛ lɛn tralɛ’n i nun jese’m be nun-o, annzɛ nnɛn ndrɛ tralɛ’n i nun jese’m be nun-o, annzɛ nnɛn kplo wie nun-o, annzɛ like kwlaa nga be fa nnɛn kplo be yo’n nun-o, 49 yɛ sɛ like sɔ mɔ i ɲin ti ble nɲanɲa nin youun’n, annzɛ ɔkwlɛ’n, ɔ tɔ tralɛ wie nun’n, annzɛ nnɛn kplo wie su’n, annzɛ tralɛ’n i nun jese’m be nun’n, annzɛ like kwlaa nga be fa nnɛn kplo be yo’n nun’n, nn kokowe yɛ w’a tɔ like sɔ’n nun-ɔn. Maan be fa kle Ɲanmiɛn ɲrun jranfuɛ’n. 50 Ɲanmiɛn ɲrun jranfuɛ’n nían tukpacɛ’n, yɛ ɔ fata kɛ ɔ sie like sɔ mɔ tukpacɛ’n tɔli nun’n i ngunmin cɛn ba nso.+ 51 I cɛn nso su’n, sɛ ɔ nian tukpacɛ’n naan ɔ wun kɛ w’a fa tralɛ wunmuan’n, annzɛ tralɛ i nun jese mun’n annzɛ nnɛn kplo’n (kannzɛ be fa kplo sɔ’n be yo like wie-o), nn tukpacɛ sɔ’n ti kokowe tɛ, yɛ ɔ ti like fiɛn.+ 52 Ɔ fata kɛ ɔ yra tralɛ’n, annzɛ nnɛn ndrɛ tralɛ’n i nun jese mun, annzɛ lɛn tralɛ’n i nun jese mun, annzɛ like kwlaa nga be fa kplo be yoli mɔ tukpacɛ’n tɔli nun’n, afin ɔ ti kokowe tɛ. Ɔ fata kɛ be yrɛ i sin nun.

53 “Sanngɛ sɛ Ɲanmiɛn ɲrun jranfuɛ’n nian naan tukpacɛ’n w’a faman tralɛ’n annzɛ tralɛ mɔ be wuli’n i nun jese mun annzɛ like kwlaa nga be fali nnɛn kplo be yoli’n, 54 Ɲanmiɛn ɲrun jranfuɛ sé kɛ maan be kpu like nga tukpacɛ’n tɔli nun’n, kpɛkun ɔ́ síe like sɔ’n i ngunmin cɛn ba nso ekun. 55 I sin’n, Ɲanmiɛn ɲrun jranfuɛ’n nían like nga tukpacɛ’n tɔli nun mɔ be kpuli’n i kpa. Sɛ like ng’ɔ o nun’n i ɲin’n w’a kaciman’n, kannzɛ bɔbɔ tukpacɛ’n w’a truman’n, sanngɛ ɔ ti fiɛn. Ɔ fata kɛ a yrɛ i sin nun, afin like’n dili i, ɔ dili i klun annzɛ i sin.

56 “Sanngɛ sɛ Ɲanmiɛn ɲrun jranfuɛ’n nianniannin like’n i kpa naan ɔ wunnin kɛ kɛ be kpuli lika nga tukpacɛ’n tɔli lɛ’n ɔ kpali’n, sɛ tralɛ-o, sɛ nnɛn kplo-o, sɛ tralɛ’n i nun jese mun-o, maan ɔ kpɛ i lɛ lika sɔ’n yi. 57 Sɛ kusu ɔ tɔ tralɛ’n i bue uflɛ su’n, annzɛ tralɛ’n i nun jese mun, annzɛ like kwlaa nga be fali nnɛn kplo be yoli’n, naan ɔ su trɛ’n, like kwlaa nga tukpacɛ’n tɔli nun’n, ɔ fata kɛ a yrɛ i sin nun.+ 58 Sanngɛ sɛ tukpacɛ’n tu tralɛ’n nun’n annzɛ tralɛ’n i nun jese’m be nun’n annzɛ like kwlaa nga be fali nnɛn kplo be yoli mɔ a kpuli’n nun’n, ɔ fata kɛ be kpu like sɔ’n i kpɛ nɲɔn su, yɛ ɔ́ yó sanwun.

59 “Kokowe m’ɔ tɔ nnɛn ndrɛ tralɛ annzɛ lɛn tralɛ, annzɛ tralɛ’n i nun jese’m be nun’n, annzɛ like kwlaa nga be fali nnɛn kplo be yoli’n nun’n, i su mmla’n yɛ ɔ o lɛ-ɔ. Mmla sɔ’n su yɛ bé nían bé sé kɛ like kun ti sanwun annzɛ ɔ ti fiɛn-ɔn.”

14 Zoova seli Moizi ekun kɛ: 2 “Sɛ be fa kokowefuɛ kun ba Ɲanmiɛn ɲrun jranfuɛ’n+ i sin naan bé kpló i wun fiɛn’n, like ng’ɔ fata kɛ be yo’n yɛ: 3 Ɲanmiɛn ɲrun jranfuɛ’n kɔ́ nanmue’n i sin lɔ kó níɛn i. Sɛ kokowefuɛ’n i kokowe’n w’a wie’n, 4 Ɲanmiɛn ɲrun jranfuɛ’n sé i kɛ ɔ fa anunman nɲɔn mɔ be ti sanwun’n, nin sɛdri waka, nin tannin ɔkwlɛ bioun, nin izɔpu sama fa bla naan be fa kplo i wun fiɛn’n.+ 5 Ɲanmiɛn ɲrun jranfuɛ’n sé kɛ be kun anunman’n be nun kun talie kun mɔ nzue m’ɔ sonji’n i wie o nun’n, i su nglo. 6 Kpɛkun ɔ́ fá anunman nga i ɲin o su’n, nin sɛdri waka’n, nin tannin ɔkwlɛ bioun’n, nin izɔpu sama’n ɔ́ fá wlɛ́ i anunman nga be kunnin i nzue m’ɔ sonji’n su’n, i mmoja’n nun. 7 I sin’n, ɔ́ fá mmoja’n kpɛ́ntɛnkpɛ́ntɛn sran nga kokowe’n ti’n ɔ su kplo i wun fiɛn’n i wun kpɛ nso, yɛ ɔ́ sé kɛ w’a yo sanwun. Kpɛkun ɔ́ yáci anunman nga i ɲin o su’n i nun blo lɔ.+

8 “Ɔ fata kɛ sran ng’ɔ su kplo i wun fiɛn’n, ɔ kpu i tralɛ mun, ɔ yi i wun ndrɛ’n kwlaa yɛ ɔ wunnzin nzue nun, kpɛkun ɔ́ yó sanwun. I sin’n, ɔ kwla kɔ nanmue’n nun lɔ, sanngɛ ɔ su wlumɛn i tannin sua’n nun lele cɛn nso. 9 I cɛn nso su’n, maan ɔ yi i ti ndrɛ’n nin i akanza’n nin i ɲinma sin ndrɛ’n i kwlaa. Kɛ ɔ ko yi i wun ndrɛ’n i kwlaa’n, ɔ́ kpú i tralɛ mun yɛ ɔ́ wúnnzin nzue nun, kpɛkun ɔ́ yó sanwun.

10 “I cɛn mɔcuɛ su’n, maan ɔ fa bua gbanflɛn nɲɔn mɔ be ti kpa’n, ɔ nin bua ba bla kun m’ɔ ti kpa’n,+ mɔ i afuɛ’n traman afuɛ kun’n. Yɛ maan ɔ fa sanmlɛn mlɛnnɛnnɛn kpa efa kun mɔ be bubuli nun blu’n i bue nsan* mɔ be sɛnngɛnnin i nin ngo’n, ɔ ti ble annzɛ i wunsu like mɔ be fa man Ɲanmiɛn-ɔn,+ ɔ nin ngo lɔgu kun.*+ 11 Kpɛkun Ɲanmiɛn ɲrun jranfuɛ ng’ɔ́ sé sran ng’ɔ su kplo i wun fiɛn’n kɛ w’a yo sanwun’n, ɔ́ fá sran’n nin ninnge ng’ɔ́ fá yí tɛ’n ɔ́ kɔ́ Zoova ɲrun tannin sua mɔ Ɲanmiɛn yi i wun nglo nun’n i anuan’n nun lɔ. 12 Ɲanmiɛn ɲrun jranfuɛ’n fá bua gbanflɛn’n kun fá yí sa tɛ’n i ti kpatalɛ tɛ,+ yɛ ɔ́ fá ngo lɔgu kun’n ɔ́ síe su, kpɛkun ɔ́ tótó be kɔ́ i ɲrun nin i sin, kɛ like mɔ be toto i be man Zoova’n sa.+ 13 I sin’n, ɔ́ kpɛ́ bua gbanflɛn’n i kɔmin lika m’ɔ ti Ɲanmiɛn liɛ klonglo’n nun, kan be kpɛ sa tɛ’n i ti tɛ’n nin tɛ nga kɛ bé yí’n be yra nnɛn’n i kɔlikɔli’n be nnɛn’m be kɔmin lɛ’n.+ Afin kɛ sa tɛ’n i ti tɛ’n i nnɛn’n sa’n, sa tɛ’n i ti kpatalɛ tɛ’n i nnɛn’n ti Ɲanmiɛn ɲrun jranfuɛ’n i liɛ.+ Ɔ ti i liɛ ngunmin, yɛ ɔ ti Ɲanmiɛn liɛ klonglo.+

14 “I sin’n, Ɲanmiɛn ɲrun jranfuɛ’n fá sa tɛ’n i ti kpatalɛ tɛ’n i mmoja’n wie, kpɛkun ɔ́ fá kpɛ́n sran ng’ɔ su kplo i wun fiɛn’n i su fama’n i pɛkɛpɛkɛ’n su. Kpɛkun ɔ́ fá wie kpɛ́n i sa mma kokotre fama’n nin i ja mma kokotre fama’n be su. 15 Ɲanmiɛn ɲrun jranfuɛ’n fá ngo lɔgu kun’n+ i wie, yɛ ɔ́ fá gúɛ i i sa bɛ’n i klun. 16 Kpɛkun Ɲanmiɛn ɲrun jranfuɛ’n fɛ́ i sa mma fama’n kun ɔ́ fá bó ngo ng’ɔ o i sa bɛ’n i klun’n nun, yɛ ɔ́ fɛ́ i sa mma’n fa kpɛ́ntɛnkpɛ́ntɛn ngo’n wie Zoova ɲrun kpɛ nso. 17 I sin’n, Ɲanmiɛn ɲrun jranfuɛ’n fá ngo’n i onga ng’ɔ o i sa klun’n i wie gúa sran ng’ɔ su kplo i wun fiɛn’n i su fama’n i pɛkɛpɛkɛ’n su, yɛ ɔ́ fá wie gúɛ i sa mma kokotre fama’n nin i ja mma kokotre fama’n be su, kan ɔ fali sa tɛ’n i ti kpatalɛ tɛ’n i mmoja’n guɛli i lɛ’n. 18 Ɲanmiɛn ɲrun jranfuɛ’n fá ngo ng’ɔ kɛli i sa klun’n guɛ́ i sran ng’ɔ su kplo i wun fiɛn’n i ti’n su. Kpɛkun ɔ́ kpáta sran’n i ti Zoova ɲrun.+

19 “Ɲanmiɛn ɲrun jranfuɛ’n fá nnɛn nga bé fá yí sa tɛ’n i ti tɛ’n+ mán Ɲanmiɛn, yɛ ɔ́ kpáta sran ng’ɔ su kplo i wun fiɛn’n i ti. I sin’n, ɔ́ kpɛ́ tɛ nga kɛ bé yí’n be yra nnɛn’n i kɔlikɔli’n i nnɛn’n i kɔmin. 20 Ɲanmiɛn ɲrun jranfuɛ’n fá tɛ nga kɛ bé yí’n be yra nnɛn’n i kɔlikɔli’n, nin ble annzɛ i wunsu like mɔ be fa man Ɲanmiɛn’n+ ɔ́ fá síe i tɛ yiwlɛ’n su, kpɛkun ɔ́ kpáta sran’n i ti,+ yɛ ɔ́ yó sanwun.+

21 “Sanngɛ sɛ sran’n ti yalɛfuɛ naan i sa juman ninnge’n i ngba su’n, maan ɔ fa bua gbanflɛn kun mɔ bé fá yí sa tɛ’n i ti kpatalɛ tɛ’n, naan be toto i be man Ɲanmiɛn, kɛ ɔ yo naan b’a kpɛtɛ i ti’n ti. Yɛ maan ɔ fa sanmlɛn mlɛnnɛnnɛn kpa efa kun mɔ be bubuli nun blu’n i bue kun* mɔ be sɛnngɛnnin i nin ngo’n, ɔ ti ble annzɛ i wunsu like mɔ be fa man Ɲanmiɛn-ɔn, ɔ nin ngo lɔgu kun, 22 ɔ nin auble nɲɔn annzɛ okunmomo ba nɲɔn. Nga i sa ju su’n yɛ ɔ fa-ɔ. Bé fá kun bé yí sa tɛ’n i ti tɛ, yɛ bé fá kun bé yí tɛ nga kɛ bé yí’n be yra nnɛn’n i kɔlikɔli’n.+ 23 I cɛn mɔcuɛ su’n,+ ɔ́ fá be bá Ɲanmiɛn ɲrun jranfuɛ’n i sin tannin sua mɔ Ɲanmiɛn yi i wun nglo nun’n, i anuan’n nun lɛ Zoova ɲrun,+ naan be fa kplo i wun fiɛn’n.

24 “Ɲanmiɛn ɲrun jranfuɛ’n fá bua gbanflɛn mɔ bé fá yí sa tɛ’n i ti kpatalɛ tɛ’n+ nin ngo lɔgu kun’n, kpɛkun ɔ́ tótó be kɔ́ i ɲrun nin i sin, kɛ like mɔ be toto i be man Zoova’n sa.+ 25 Ɲanmiɛn ɲrun jranfuɛ’n kpɛ́ bua gbanflɛn mɔ bé fá yí sa tɛ’n i ti kpatalɛ tɛ’n i kɔmin. Kpɛkun ɔ́ fá sa tɛ’n i ti kpatalɛ tɛ’n i nnɛn’n i mmoja’n wie ɔ́ kpɛ́n sran ng’ɔ su kplo i wun fiɛn’n i su fama’n i pɛkɛpɛkɛ’n su. Yɛ ɔ́ fá wie kpɛ́n i sa mma kokotre fama’n nin i ja mma kokotre fama’n be su.+ 26 Ɲanmiɛn ɲrun jranfuɛ’n fá ngo’n wie guɛ́ i i bɔbɔ i sa bɛ’n i klun.+ 27 Kpɛkun Ɲanmiɛn ɲrun jranfuɛ’n fɛ́ i sa mma fama’n ɔ́ fá ngo ng’ɔ o i sa bɛ’n i klun’n wie, yɛ ɔ́ fá kpɛ́ntɛnkpɛ́ntɛn Zoova ɲrun kpɛ nso. 28 I sin’n, ɔ́ fá ngo ng’ɔ o i sa klun’n i wie kpɛ́n sran ng’ɔ su kplo i wun fiɛn’n i su fama’n i pɛkɛpɛkɛ’n su, yɛ ɔ́ fá wie kpɛ́n i sa mma kokotre fama’n nin i ja mma kokotre fama’n be su, lika kunngba ng’ɔ fali sa tɛ’n i ti kpatalɛ tɛ’n i mmoja’n kpɛnnin i lɛ’n. 29 Ɲanmiɛn ɲrun jranfuɛ’n fá ngo ng’ɔ kɛli i sa klun’n guɛ́ i sran ng’ɔ su kplo i wun fiɛn’n i ti’n su, kɛ ɔ ko yo naan w’a kpata sran’n i ti Zoova ɲrun’n ti.

30 “Ɔ́ fá auble’n kun annzɛ okunmomo ba’n kun fá mán, nga i sa ju su’n yɛ ɔ́ fá mán-ɔn,+ 31 nga ɔ kwla to’n yɛ ɔ fata kɛ ɔ fa yi sa tɛ’n i ti tɛ’n niɔn, kpɛkun ɔ́ fá kun’n yí tɛ nga kɛ bé yí’n be yra nnɛn’n i kɔlikɔli’n.+ Maan ɔ fa ble annzɛ i wunsu like mɔ be fa man Ɲanmiɛn’n sie su. Kpɛkun Ɲanmiɛn ɲrun jranfuɛ’n kpáta sran ng’ɔ su kplo i wun fiɛn’n i ti Zoova ɲrun.+

32 “Sran nga kokowe o i wun laa m’ɔ leman ninnge ng’ɔ fata kɛ ɔ yi naan b’a fa kplo i wun fiɛn’n i su mmla’n yɛ ɔ o lɛ-ɔ.”

33 I sin’n, Zoova seli Moizi nin Aarɔn be kɛ: 34 “Sɛ amun ju Kanaan mɛn+ mɔ n seli kɛ ń fá mán amun’n+ nun lɔ’n, naan n fa kokowe+ n yi amun nvle’n nun sua kun nun’n, 35 sran nga i liɛ yɛle sua’n, maan ɔ wɔ Ɲanmiɛn ɲrun jranfuɛ’n i sin naan ɔ se i kɛ: ‘Like wie m’ɔ sa’n w’a tɔ min sua’n nun.’ 36 Maan Ɲanmiɛn ɲrun jranfuɛ’n se kɛ be yi sua’n i nun ninnge mun ka naan w’a ko nian, kɛ ɔ ko yo naan w’a seman kɛ ninnge nga be o sua’n nun’n be kwlaa be ti fiɛn’n ti. I sin’n, ɔ́ kó nían sua’n. 37 Ɔ́ nían sua’n i lika nga like sɔ’n wo lɛ’n, kpɛkun sɛ ɔ wun kɛ sua’n i talɛ’n ti youun nin ble nɲanɲa’n, annzɛ ɔkwlɛ naan ɔ wlu talɛ’n nun’n, 38 Ɲanmiɛn ɲrun jranfuɛ’n fín sua’n nun fíte, kpɛkun ɔ́ ɲín sua’n i anuan’n cɛn ba nso.+

39 “I cɛn nso su’n, Ɲanmiɛn ɲrun jranfuɛ’n sɛ́ i sin kó nían sua’n ekun. Sɛ ɔ wun kɛ like ng’ɔ o talɛ’n nun’n w’a trɛ’n, 40 ɔ́ sé kɛ maan be yiyi yɔbuɛ nga like’n wo be su’n naan be yi be blo klɔ’n i sin lɔ lika kun m’ɔ ti fiɛn’n nun. 41 Yɛ maan ɔ se kɛ be kpu sua’n i klun lɔ’n i kpa, kpɛkun maan be fa like kwlaa nga be kpuli’n guɛ i klɔ’n i sin lɔ lika kun m’ɔ ti fiɛn’n nun. 42 I sin’n, maan be fa yɔbuɛ uflɛ be siesie yɔbuɛ nga be yili be’n be osu’n nun. Kpɛkun maan be fa fa uflɛ be siesie be afiɛn yɛ be fa wie wasa sua’n.

43 “Sɛ be yiyi yɔbuɛ mun naan be kpu sua’n nun’n, yɛ sɛ be wɛsɛ i naan i sin’n like’n fite sua’n nun ekun’n, 44 Ɲanmiɛn ɲrun jranfuɛ’n kó nían sua’n. Sɛ like m’ɔ o sua’n nun’n w’a trɛ’n, nn kokowe tɛ+ yɛ w’a tɔ sua’n nun-ɔn. Fiɛn w’a kan sua’n. 45 Maan ɔ se kɛ be bubu sua’n naan be fɛ i yɔbuɛ mun, nin i waka mun, ɔ nin fa nga be fa siesieli yɔbuɛ’m be afiɛn’n, ɔ nin fa nga be fa wasali sua’n naan be fa be ko guɛ i klɔ’n i sin lɔ, lika kun m’ɔ ti fiɛn’n nun.+ 46 Blɛ mɔ be ɲinnin sua’n i anuan’n,+ sran kwlaa ng’ɔ wlu lɔ’n, nn w’a wlu fiɛn nun. Ɔ́ ká fiɛn nun lele nnɔsua.+ 47 Sran kwlaa ng’ɔ ko la sua’n nun’n, ɔ fata kɛ ɔ kpu i tralɛ mun, yɛ sran kwlaa ng’ɔ di like sua’n nun’n, ɔ fata kɛ ɔ kpu i tralɛ mun.

48 “Sanngɛ sɛ be wasa sua’n naan i sin’n Ɲanmiɛn ɲrun jranfuɛ’n ba naan ɔ wun kɛ like’n w’a trɛman sua’n nun’n, ɔ́ sé kɛ sua’n ti sanwun. Afin like m’ɔ sa’n w’a wie. 49 Kɛ ɔ ko yo naan w’a kplo sua’n i wun fiɛn’n,* maan ɔ fa anunman nɲɔn nin sɛdri waka nin tannin ɔkwlɛ bioun, ɔ nin izɔpu sama.+ 50 Maan ɔ kun anunman’n i kun talie kun mɔ nzue m’ɔ sonji’n i wie o nun’n, i su nglo. 51 Sanngɛ maan ɔ fa sɛdri waka’n, nin izɔpu sama’n, nin tannin ɔkwlɛ bioun’n, nin anunman nga i ɲin o su’n, naan ɔ fa be wlɛ i anunman ng’ɔ kunnin i’n i mmoja’n nun nin nzue m’ɔ sonji m’ɔ o sɛ nun’n i nun, yɛ maan ɔ to mmoja’n guɛ i sua’n i wun kpɛ nso.+ 52 Kpɛkun ɔ́ fá anunman mmoja’n, nin nzue m’ɔ sonji m’ɔ o sɛ nun’n, nin anunman nga i ɲin o su’n, nin sɛdri waka’n, nin izɔpu sama’n, ɔ nin tannin ɔkwlɛ bioun’n ɔ́ fá yó sua mɔ fiɛn* kɛnnin i’n i sanwun. 53 I sin’n, ɔ́ yáci anunman’n nga i ɲin o su’n i nun klɔ’n i sin lɔ, blo lɔ. Kpɛkun like nga be yo fa kplo fiɛn’n,* ɔ́ yó i sua’n i wun naan sua’n yo sanwun.

54 “Kokowe nin tukpacɛ m’ɔ tɔ be ti’n su’n, annzɛ be akanza’n nun’n,+ 55 nin kokowe m’ɔ tɔ tralɛ nun’n+ annzɛ sua nun’n,+ 56 nin like m’ɔ wun be kplo’n su’n, nin awlowlɛ nin like m’ɔ tata be kplo’n su’n,+ be su mmla’n yɛ ɔ o lɛ-ɔ. 57 Kɛ ɔ ko yo naan amun a si like ng’ɔ ti fiɛn’n, nin like ng’ɔ ti sanwun’n ti.+ Kokowe’n i su mmla’n yɛ ɔ o lɛ-ɔ.”+

15 Zoova seli Moizi nin Aarɔn be ekun kɛ: 2 “Amun kan ndɛ kle Izraɛlifuɛ mun, amun se be kɛ: ‘Sɛ yasua kun i yasua lika’n* bu nzue’n, i yasua lika m’ɔ bu nzue’n ti’n w’a wlu fiɛn nun.+ 3 Sɛ i yasua lika’n bu nzue gua-o, annzɛ ɔ kete lɔ-o, sran sɔ’n wo fiɛn nun.

4 “‘Bɛ kwlaa nga sran kun mɔ i yasua lika’n bu nzue’n ɔ la su’n, ɔ́ yó fiɛn. Yɛ like kwlaa ng’ɔ tran su’n, ɔ́ yó fiɛn. 5 Sran kwlaa ng’ɔ kɛn i bɛ’n, ɔ fata kɛ ɔ kpu i tralɛ mun, yɛ ɔ wunnzin nzue nun. Ɔ́ ká fiɛn nun lele nnɔsua.+ 6 Sran kwlaa ng’ɔ tran like kun mɔ sran nga i yasua lika’n bu nzue’n trannin su’n i su’n, ɔ fata kɛ ɔ kpu i tralɛ mun, yɛ ɔ wunnzin nzue nun. Ɔ́ ká fiɛn nun lele nnɔsua. 7 Sran kwlaa ng’ɔ kan sran nga i yasua lika’n bu nzue’n, ɔ fata kɛ ɔ kpu i tralɛ mun, yɛ ɔ wunnzin nzue nun. Ɔ́ ká fiɛn nun lele nnɔsua. 8 Sɛ sran nga i yasua lika’n bu nzue’n ɔ ti i nuan nzue guɛ i sran kun wun’n, ɔ fata kɛ sran sɔ’n kpu i tralɛ mun, yɛ ɔ wunnzin nzue nun. Ɔ́ ká fiɛn nun lele nnɔsua. 9 Like kwlaa nga be fa sie i nnɛn’m be su mɔ be tran su’n, sɛ sran nga i yasua lika’n bu nzue’n tran su’n, ɔ́ yó fiɛn. 10 Sran kwlaa ng’ɔ kan like wie m’ɔ trannin su’n, ɔ́ ká fiɛn nun lele nnɔsua. Yɛ sran kwlaa ng’ɔ mɛn i sɔ ninnge’m be su’n, maan ɔ kpu i tralɛ mun, yɛ ɔ wunnzin nzue nun. Ɔ́ ká fiɛn nun lele nnɔsua. 11 Sɛ sran nga i yasua lika’n bu nzue’n+ w’a wunnzinmɛn i sa nzue nun naan ɔ kan sran kun’n, ɔ fata kɛ sran sɔ’n kpu i tralɛ mun, yɛ ɔ wunnzin nzue nun. Ɔ́ ká fiɛn nun lele nnɔsua. 12 Sɛ kwlaa nga be fali fa be yoli mɔ sran nga i yasua lika’n bu nzue’n ɔ kɛn i’n, maan be bobo i, sɛ kusu waka yɛ be fa yoli sɛ sɔ’n, maan be fa nzue be wunnzin i.+

13 “‘Sɛ sran’n i yasua lika’n buman nzue kun’n, naan w’a yo sanwun’n, maan ɔ fa cɛn nso fa kplo i wun fiɛn’n, maan ɔ ko wunnzin nzue kun m’ɔ sonji’n nun. Kpɛkun ɔ́ yó sanwun.+ 14 I cɛn mɔcuɛ su’n, maan ɔ fa auble nɲɔn annzɛ okunmomo ba nɲɔn,+ naan ɔ fa be wɔ Zoova ɲrun tannin sua mɔ Ɲanmiɛn yi i wun nglo nun’n i anuan’n nun lɔ, yɛ maan ɔ fa be man Ɲanmiɛn ɲrun jranfuɛ’n. 15 Ɲanmiɛn ɲrun jranfuɛ’n fá be mán Ɲanmiɛn. Ɔ́ fá kun yí sa tɛ’n i ti tɛ, yɛ ɔ́ fá kun’n yí tɛ nga kɛ bé yí’n be yra nnɛn’n i kɔlikɔli’n. Kpɛkun Ɲanmiɛn ɲrun jranfuɛ’n kpɛ́tɛ i ti Zoova ɲrun, i yasua lika m’ɔ buli nzue’n ti.

16 “‘Sɛ yasua kun i wun nzue gua’n, ɔ fata kɛ ɔ wunnzin i wunnɛn wunmuan’n nzue nun. Ɔ́ ká fiɛn nun lele nnɔsua.+ 17 Tralɛ kwlaa annzɛ kplo kwlaa nga i wun nzue’n gua su’n, ɔ fata kɛ ɔ kpu, yɛ like sɔ’n ká fiɛn nun lele nnɔsua.

18 “‘Sɛ yasua kun nin bla kun be la naan i wun nzue gua’n, ɔ fata kɛ be wunnzin nzue nun, yɛ bé ká fiɛn nun lele nnɔsua.+

19 “‘Sɛ bla kun i sa bu mɔ i wun mmoja’n gua’n, ɔ́ ká fiɛn nun cɛn ba nso.+ Sran kwlaa ng’ɔ kɛn i’n ɔ́ ká fiɛn nun lele nnɔsua.+ 20 Like kwlaa ng’ɔ la su i mannza blɛ nun’n, ɔ́ yó fiɛn yɛ like kwlaa ng’ɔ tran su’n ɔ́ yó fiɛn.+ 21 Sran kwlaa ng’ɔ kɛn i bɛ’n, ɔ fata kɛ ɔ kpu i tralɛ mun, yɛ ɔ wunnzin nzue nun. Ɔ́ ká fiɛn nun lele nnɔsua. 22 Sran kwlaa ng’ɔ kan like wie m’ɔ trannin su’n, ɔ fata kɛ ɔ kpu i tralɛ mun, yɛ ɔ wunnzin nzue nun. Ɔ́ ká fiɛn nun lele nnɔsua. 23 Sɛ ɔ tran bɛ wie su, annzɛ like uflɛ su’n, sran kwlaa ng’ɔ kan like sɔ’n ɔ́ ká fiɛn nun lele nnɔsua.+ 24 Sɛ yasua kun nin i be la naan i mannza mmoja’n kɛn i’n,+ yasua sɔ’n ká fiɛn nun lele cɛn nso, yɛ bɛ kwlaa ng’ɔ la su’n ɔ́ yó fiɛn.

25 “‘Sɛ mmoja tu bla kun naan ɔ di cɛn kpanngban’n,+ sɛ ɔ timɛn i sa bulɛ blɛ’n,+ annzɛ sɛ i sa bu naan ɔ cɛ tra titi liɛ’n, blɛ kwlaa nga mmoja tu i’n nun’n, ɔ́ yó fiɛn kɛ i mannza blɛ nun m’ɔ o fiɛn nun’n sa. 26 Blɛ mɔ mmoja’n tu i’n, bɛ kwlaa ng’ɔ la su’n, ɔ́ yó fiɛn kɛ i mannza blɛ nun bɛ ng’ɔ la su’n sa,+ yɛ like kwlaa ng’ɔ tran su’n, ɔ́ yó fiɛn kɛ like m’ɔ tran su i mannza blɛ nun’n sa. 27 Sran kwlaa ng’ɔ kan ninnge sɔ mun’n ɔ́ yó fiɛn, ɔ fata kɛ ɔ kpu i tralɛ mun, yɛ ɔ wunnzin nzue nun. Ɔ́ ká fiɛn nun lele nnɔsua.+

28 “‘Kɛ mmoja’n ko yaci i tulɛ’n, ɔ́ mínndɛ cɛn nso. Kɛ cɛn nso ko sin’n, ɔ́ yó sanwun.+ 29 I cɛn mɔcuɛ su’n, maan ɔ fa auble nɲɔn annzɛ okunmomo ba nɲɔn.+ Maan ɔ fa be ko man Ɲanmiɛn ɲrun jranfuɛ’n tannin sua mɔ Ɲanmiɛn yi i wun nglo nun’n i anuan’n nun lɔ.+ 30 Ɲanmiɛn ɲrun jranfuɛ’n fá kun yí sa tɛ’n i ti tɛ, yɛ ɔ́ fá kun’n yí tɛ nga kɛ bé yí’n be yra nnɛn’n i kɔlikɔli’n. Kpɛkun ɔ́ kpɛ́tɛ i ti Zoova ɲrun, mmoja m’ɔ tuli i mɔ i ti’n ɔ wluli fiɛn nun’n ti.+

31 “‘Ɔ maan amun uka Izraɛlifuɛ mun naan be yo sanwun, kɛ ɔ ko yo naan b’a yoman min tannin sua m’ɔ o be afiɛn’n+ i finfin naan b’a wuman’n ti.

32 “‘Yasua nga i yasua lika’n bu nzue’n, nin yasua nga i wun nzue gua+ mɔ i sɔ’n ti ɔ wlu fiɛn nun’n, 33 ɔ nin bla ng’ɔ o fiɛn nun i mannza blɛ nun’n,+ nin yasua annzɛ bla kwlaa nga i wun bu nzue’n,+ ɔ nin yasua ng’ɔ nin bla wie mɔ w’a wlu fiɛn nun’n be la’n, be su mmla’n yɛ ɔ o lɛ-ɔ.’”

16 Kɛ Aarɔn i mma nɲɔn mun be wunngeli Zoova i wun lɔ mɔ i sɔ’n ti’n be wuli’n,+ Zoova kannin ndɛ kleli Moizi ekun. 2 Zoova seli Moizi kɛ: “Se ɔ niaan bian Aarɔn kɛ nán ɔ wlu lika m’ɔ ti Ɲanmiɛn liɛ klonglo’n nun lɔ ngbɛnngbɛn+ naan ɔ jran rido’n+ i sin lɔ Alaka’n i su tre’n i ɲrun lɛ, kɛ ɔ ko yo naan w’a wuman’n ti.+ Afin ń má yí min wun nglo i su tre’n+ su ɲanmiɛn ble+ kun nun.

3 “Kɛ Aarɔn wlú lika m’ɔ ti Ɲanmiɛn liɛ klonglo’n nun’n, like ng’ɔ fata kɛ ɔ fa bla’n yɛ: Nannin gbanflɛn mɔ bé fá yí sa tɛ’n i ti tɛ’n,+ nin bua ɲin kun mɔ bé fá yí tɛ nga kɛ bé yí’n be yra nnɛn’n i kɔlikɔli’n.+ 4 Maan ɔ wla lɛn tralɛ tɛnndɛn m’ɔ ti Ɲanmiɛn liɛ klonglo’n,+ yɛ maan lɛn cɛkoto’m+ be kɛtɛ i wunnɛn’n su, maan ɔ fa lɛn cisu’n+ ci i bo yɛ ɔ fa lɛn tannin tanmue’n+ cici i ti. Tralɛ sɔ’m be ti Ɲanmiɛn liɛ klonglo.+ Maan ɔ wunnzin nzue+ nun naan ɔ wla be.

5 “Maan ɔ fa boli gbanflɛn nɲɔn mɔ bé fá yí sa tɛ’n i ti tɛ’n, nin bua ɲin kun mɔ bé fá yí tɛ nga kɛ bé yí’n be yra nnɛn’n i kɔlikɔli’n Izraɛlifuɛ’m+ be sa nun.

6 “Maan Aarɔn fa nannin tola ng’ɔ́ fá yí i bɔbɔ i sa tɛ’n i ti tɛ’n fa man, yɛ ɔ́ kpɛ́tɛ i bɔbɔ+ nin i awlofuɛ’m be ti.

7 “I sin’n, maan ɔ fa boli nɲɔn mun wɔ Zoova ɲrun tannin sua mɔ Ɲanmiɛn yi i wun nglo nun’n i anuan’n nun lɔ. 8 Maan Aarɔn tu boli nɲɔn’m be wun fɔtɔ, fɔtɔ kun ti Zoova liɛ yɛ kun ti Azazɛli* liɛ. 9 Maan Aarɔn fa boli nga fɔtɔ’n+ kleli kɛ ɔ ti Zoova liɛ’n ɔ fa yi sa tɛ’n i ti tɛ. 10 Sanngɛ boli nga fɔtɔ’n kleli kɛ ɔ ti Azazɛli liɛ’n, nán maan be kun i, maan be fa wɔ Zoova ɲrun naan be fa kpata sa tɛ’n i ti, yɛ be fɛ i wɔ aawlɛ flɛnnɛn’n nun lɔ,+ ɔ ti Azazɛli liɛ.

11 “Maan Aarɔn fa nannin tola ng’ɔ́ fá yí i bɔbɔ i sa tɛ’n i ti tɛ’n fa man, yɛ ɔ kpɛtɛ i bɔbɔ nin i awlofuɛ’m be ti. I sin’n, maan ɔ kpɛ nannin tola ng’ɔ́ fá yí i bɔbɔ+ i sa tɛ’n i ti tɛ’n i kɔmin.

12 “I sin’n, maan ɔ fa sin guawlɛ’n+ naan ɔ fa tɛ yiwlɛ+ ng’ɔ o Zoova ɲrun’n i nun sɛnmlɛn’n wie gua nun naan ɔ yi, yɛ ɔ fa ansan+ fanninfannin sanmlɛn mlɛnnɛnnɛn kpa’n i sa buɛ nɲɔn, naan ɔ fa be wɔ rido’n+ i sin lɔ. 13 Maan ɔ fa ansan’n guɛ i sin’n su Zoova ɲrun,+ kpɛkun maan ansan’n i wunsrɛn’n kata Mmla’n*+ i alaka’n i tre’n+ su, kɛ ɔ ko yo naan w’a wuman’n ti.

14 “Maan ɔ fa nannin tola’n i mmoja’n+ wie, yɛ ɔ fɛ i sa mma bo nun naan ɔ fa kpɛntɛnkpɛntɛn alaka’n i tre’n i bue nga i ɲin kpɛ wia afiliɛ lɔ’n su. Kpɛkun maan ɔ fɛ i sa mma bo mmoja’n nun naan ɔ fa kpɛnkpɛn alaka’n i tre’n i ɲrun kpɛ nso.+

15 “I sin’n, maan ɔ kpɛ boli nga bé fá yí nvlefuɛ’m+ be sa tɛ’n i ti tɛ’n i kɔmin, yɛ maan ɔ fɛ i mmoja’n wɔ rido’n+ i sin lɔ naan ɔ yo i mmoja’n+ i kɛ ng’ɔ fa yoli nannin tola’n i mmoja’n sa. Maan ɔ fa mmoja’n kpɛntɛnkpɛntɛn alaka’n i tre’n i wun lɔ, yɛ ɔ fa wie kpɛntɛnkpɛntɛn i ɲrun.

16 “Sa nga Izraɛlifuɛ’m be yo m’ɔ fa be wlɛ i fiɛn nun’n, nin be fɔnlɛ mun, ɔ nin be sa tɛtɛ’m+ be ti’n, ɔ fata kɛ a yo lika m’ɔ ti Ɲanmiɛn liɛ klonglo’n i sanwun. Like kunngba’n yɛ ɔ fata kɛ ɔ fa yo tannin sua mɔ Ɲanmiɛn yi i wun nglo nun’n niɔn, be sa nga be yo m’ɔ fa be wlɛ i fiɛn nun’n ti.

17 “Blɛ m’ɔ wlu tannin sua mɔ Ɲanmiɛn yi i wun nglo nun’n i nun kɛ ɔ́ kó kpáta sa tɛ’n i ti lika m’ɔ ti Ɲanmiɛn liɛ klonglo’n nun lɔ’n, lele m’ɔ́ fá fíte’n, ɔ fataman kɛ sran kun sa tran lɔ. Maan ɔ kpɛtɛ i bɔbɔ nin i awlofuɛ mun+ nin Izraɛlifuɛ’m+ be kwlaa be ti.

18 “I sin’n, maan ɔ fite wɔ tɛ yiwlɛ+ m’ɔ o Zoova ɲrun’n i wun lɔ naan ɔ yo i sanwun. Maan ɔ fa nannin tola’n i mmoja’n wie, nin boli’n i mmoja’n wie, naan ɔ fa guɛ i nnɛn wɛ nga be o tɛ yiwlɛ’n i bue kwlaa su’n be wun. 19 Maan ɔ fɛ i sa mma bo mmoja’n nun naan ɔ fa kpɛntɛnkpɛntɛn tɛ yiwlɛ’n su kpɛ nso, naan ɔ fa kplo i wun fiɛn’n, yɛ ɔ yo i sanwun Izraɛlifuɛ’m be sa nga be yo m’ɔ fa be wlɛ i fiɛn nun’n ti.

20 “Kɛ ɔ ko wie lika m’ɔ ti Ɲanmiɛn liɛ klonglo’n, nin tannin sua mɔ Ɲanmiɛn yi i wun nglo nun’n, nin tɛ yiwlɛ’n be sanwun+ yo’n,+ maan ɔ fa boli nga i ɲin o su’n+ man. 21 Maan Aarɔn fɛ i sa nɲɔn’n fua boli’n i ti’n su, yɛ maan ɔ di sa nga Izraɛlifuɛ’m be yoli’n, nin be fɔnlɛ mun, ɔ nin be sa tɛtɛ mun be nanwlɛ guɛ i boli’n su. Kpɛkun maan ɔ fa sa sɔ mɔ be yoli’n sie i boli’n i ti’n su,+ yɛ maan sran nga be sieli i kɛ ɔ fa boli’n wɔ aawlɛ flɛnnɛn’n nun lɔ’n ɔ fa wɔ. 22 Maan ɔ yaci boli’n nun naan ɔ wɔ, yɛ ɔ́ súa be sa tɛ’n+ i kwlaa kɔ́ aawlɛ flɛnnɛn’n nun lɔ.+

23 “I sin’n, maan Aarɔn wlu tannin sua mɔ Ɲanmiɛn yi i wun nglo nun’n nun lɔ, yɛ maan ɔ yi lɛn tralɛ m’ɔ wlali be fa ɔli lika m’ɔ ti Ɲanmiɛn liɛ klonglo’n nun lɔ’n, kpɛkun maan ɔ gua be lɔ. 24 Maan ɔ wunnzin nzue+ nun lika kun m’ɔ ti Ɲanmiɛn liɛ klonglo’n nun lɔ yɛ ɔ wlɛ i tralɛ mun.+ I sin’n, maan ɔ fite naan ɔ yi tɛ nga kɛ bé yí’n be yra nnɛn’n i kɔlikɔli’n,+ maan ɔ yi i bɔbɔ liɛ yɛ ɔ yi nvlefuɛ’m be liɛ. Maan ɔ kpɛtɛ i bɔbɔ nin nvlefuɛ’m be ti.+ 25 Maan ɔ yra sa tɛ’n i ti tɛ’n i nnɛn’n i lui’n tɛ yiwlɛ’n su naan i wunsrɛn’n fite.

26 “Maan sran ng’ɔ fali Azazɛli+ i boli’n ɔli’n, ɔ kpu i tralɛ mun, yɛ ɔ wunnzin nzue nun kwlaa naan w’a kwla wlu nanmue’n nun lɔ.

27 “Kpɛkun nannin tola nin boli nga be fa yili sa tɛ’n i ti tɛ mɔ be fali be mmoja’n be ɔli lika m’ɔ ti Ɲanmiɛn liɛ klonglo’n nun lɔ, naan b’a kpata sa tɛ’n i ti’n, maan be fa be wɔ nanmue’n i sin lɔ. Maan be yra be kplo’n nin be nnɛn’n nin be aya’n i nun ninnge mun sin nun.+ 28 Sran ng’ɔ yra be’n, maan ɔ kpu i tralɛ mun, yɛ ɔ wunnzin nzue nun kwlaa naan w’a kwla wlu nanmue’n nun lɔ.

29 “Ɔ ti mmla kun m’ɔ fata kɛ amun di su tititi-ɔ: Anglo nso su’n, i cɛn ba blu’n su’n, ɔ fata kɛ amun yo amun wun aunnvɔɛfuɛ,* yɛ nán amun di junman wie fi,+ i Izraɛlifuɛ-o, i aofuɛ nga be o amun afiɛn’n nin-o. 30 Cɛn sɔ’n nun’n, bé kpáta amun sa tɛ’m be ti,+ yɛ bé sé kɛ amun ti sanwun. Bé yáci amun sa tɛ mun cɛ́ amun, yɛ amún yó sanwun Zoova ɲrun.+ 31 Ɔ ti amun wunmiɛn-lolɛ-cɛn ngunmin kun, yɛ ɔ fata kɛ amun yo amun wun aunnvɔɛfuɛ.+ Ɔ ti mmla kun m’ɔ́ ká lɛ tititi-ɔ.

32 “Ɲanmiɛn ɲrun jranfuɛ nga be kpɛli i sieli i ngunmin’n,+ mɔ be sieli i kɛ ɔ di Ɲanmiɛn ɲrun jranlɛ junman’n+ i si i osu’n,+ ɔ́ kpáta sa tɛ’n i ti, yɛ ɔ́ wlá lɛn tralɛ+ mɔ be ti Ɲanmiɛn liɛ klonglo’n.+ 33 Ɔ́ yó lika ngunmin kun m’ɔ ti Ɲanmiɛn liɛ klonglo’n+ nin tannin sua mɔ Ɲanmiɛn yi i wun nglo nun’n+ nin tɛ yiwlɛ’n+ be sanwun, yɛ ɔ́ kpáta Ɲanmiɛn ɲrun jranfuɛ mun, nin nvlefuɛ’m be kwlaa be ti.+ 34 Ɔ fata kɛ amun di mmla nga su tititi,+ naan afuɛ kwlaa nun’n amun kpata Izraɛlifuɛ’m be sa tɛ’n i ti kpɛ kunngba.”+

Ɔ maan ɔ yoli i kɛ nga Zoova kan kleli Moizi’n sa.

17 Zoova seli Moizi ekun kɛ: 2 “Kan ndɛ kle Aarɔn nin i mma mun nin Izraɛlifuɛ’m be kwlaa, se be kɛ: ‘Ndɛ nga Zoova kannin’n yɛ:

3 “‘“Sɛ Izraɛlifuɛ kun kpɛ nannin tola kun, annzɛ bua gbanflɛn kun, annzɛ boli kun i kɔmin nanmue’n nun, annzɛ sɛ ɔ kpɛ i kɔmin nanmue’n i sin lɔ’n, 4 naan w’a fa ɔman tannin sua mɔ Ɲanmiɛn yi i wun nglo nun’n i anuan’n nun lɔ, naan w’a fa yi tɛ Zoova i tannin sua’n i ɲrun lɔ w’a man Zoova’n, nn sran sɔ’n w’a yo sa tɛ. Sran sɔ’n guali mmoja ase, yɛ ɔ fata kɛ be yi i* i nvlefuɛ’m be afiɛn. 5 I liɛ’n, Izraɛlifuɛ’m bé fá tɛ nnɛn mɔ be kun be blo lɔ’n, bé fá blɛ́ Zoova tannin sua mɔ Ɲanmiɛn yi i wun nglo nun’n i anuan’n nun lɛ, bé fá mán Ɲanmiɛn ɲrun jranfuɛ’n. Ɔ fata kɛ be fa yi bo kun yolɛ tɛ be man Zoova.+ 6 Yɛ Ɲanmiɛn ɲrun jranfuɛ’n kpɛ́ntɛnkpɛ́ntɛn mmoja’n wie Zoova i tɛ yiwlɛ m’ɔ o tannin sua mɔ Ɲanmiɛn yi i wun nglo nun’n i anuan’n nun lɛ’n su, kpɛkun ɔ́ yrɛ́ i lui’n naan i wunsrɛn’n fite naan ɔ bɔn Zoova i bue nun fannin.*+ 7 Ɔ maan ɔ fataman kɛ be yi tɛ be man amuin mɔ be ti kɛ boli kpakpuɛ sa’n,*+ mɔ be sɔ be’n+ be kun.* Ɔ fata kɛ amun di mmla sɔ’n su tititi blɛ kwlaa nun.”’

8 “Ɔ fata kɛ a se be kɛ: ‘Izraɛlifuɛ kwlaa annzɛ aofuɛ kwlaa ng’ɔ tran amun afiɛn’n, sɛ ɔ́ yí tɛ nga kɛ bé yí’n be yra nnɛn’n i kɔlikɔli’n, annzɛ ɔ́ yí tɛ uflɛ 9 naan ɔ faman nnɛn’n kɔman tannin sua mɔ Ɲanmiɛn yi i wun nglo nun’n i anuan’n nun lɔ ɔ fa ko manman Zoova’n, ɔ fata kɛ be yi i* i nvlefuɛ’m be afiɛn.+

10 “‘Sɛ Izraɛlifuɛ kun annzɛ aofuɛ kun m’ɔ tran amun afiɛn’n ɔ di mmoja’n+ i wafa kwlaa wie’n, saan e nin sran ng’ɔ di mmoja’n é ɲɛ́n i, yɛ ń yí i* i nvlefuɛ’m be afiɛn. 11 Afin ninnge nga be o nguan nun’n, be mmoja’n nun yɛ be nguan’n wo-ɔ,+ yɛ n fa mannin amun naan amun fa kpata amun sa tɛ’n i ti, tɛ yiwlɛ’n+ su. Afin mmoja mɔ i nun yɛ nguan’n wo’n yɛ be fa kpata sa tɛ’n i ti-ɔ.+ 12 I sɔ’n ti’n, n seli Izraɛlifuɛ’m be kɛ: “Nán amun nun wie fi di mmoja, yɛ nán aofuɛ nga be tran amun afiɛn’n+ be wie fi di mmoja.”+

13 “‘Sɛ Izraɛlifuɛ kun annzɛ aofuɛ nga be tran amun afiɛn’n be nun kun kɔ koniɛn naan ɔ tra blo nnɛn, annzɛ anunman wie mɔ be kwla di’n, maan ɔ guɛ i mmoja’n i ase,+ yɛ ɔ fa ndutre kata su. 14 Afin ninnge kwlaa nga be o nguan nun’n, be nguan’n yɛle be mmoja’n. I sɔ’n ti’n, n seli Izraɛlifuɛ’m be kɛ: “Nán amun di like wie fi i mmoja, afin ninnge kwlaa nga be o nguan nun’n, be nguan’n yɛle be mmoja’n. Sran kwlaa ng’ɔ di’n, bé kún i.”*+ 15 Sɛ sran kun, sɛ Izraɛlifuɛ-o, annzɛ aofuɛ-o, ɔ di nnɛn fuɛn annzɛ nnɛn wie mɔ blo nnɛn wie titili i nun’n,+ maan ɔ kpu i tralɛ mun naan ɔ wunnzin nzue nun, yɛ ɔ́ ká fiɛn nun lele nnɔsua.+ I sin’n, ɔ́ yó sanwun. 16 Sanngɛ sɛ w’a kpuman be naan w’a wunnzinman’n, ɔ́ wún i sa tɛ’n i su afɛ.’”+

18 Zoova seli Moizi ekun kɛ: 2 “Kan ndɛ kle Izraɛlifuɛ mun, se be kɛ: ‘N ti amun Ɲanmiɛn Zoova.+ 3 Ezipti mɛn mɔ amun trannin nun lɔ’n, nán amun yo like nga be yo i lɔ’n wie. Yɛ Kanaan mɛn mɔ n su fa amun n kɔ nun lɔ’n, nán amun yo like nga be yo i lɔ’n wie.+ Nán amun nanti be mmla’m be su. 4 Ɔ fata kɛ amun nanti ndɛ nga n kan’n su, amun fa min mmla’m be su, yɛ amun nian be su be nanti.+ N ti amun Ɲanmiɛn Zoova. 5 Ɔ fata kɛ amun fa min mmla’m be su, yɛ amun nanti ndɛ nga n kan’n su. Sran ng’ɔ yo sɔ’n, ɔ́ ká nguan nun mmla sɔ’m be ti.+ N ti Zoova.

6 “‘Nán amun nun wie fi fɛ i wun mɛntɛn i osufuɛ wie naan ɔ nin i be la.*+ N ti Zoova. 7 Nán a nin ɔ si be la, yɛ nán a nin ɔ nin be la. Ɔ ti ɔ nin, ɔ fataman kɛ a nin i be la.

8 “‘Nán a nin ɔ si i yi be la.+ I sɔ’n ti ɔ si i ɲin ase gualɛ.

9 “‘Nán a nin ɔ niaan bla be la, sɛ ɔ ti ɔ si i wa-o annzɛ ɔ nin i wa-o, sɛ be wuli amun awlo kunngba’n nun-o annzɛ be wuli i awlo uflɛ nun-o.+

10 “‘Nán a nin ɔ wa yasua’n i wa bla, annzɛ ɔ wa bla’n i wa bla be la, afin i sɔ’n ti ɔ bɔbɔ ɔ ɲin ase gualɛ.

11 “‘Nán a nin ɔ si i yi i wa bla m’ɔ ti ɔ si i wa’n be la, afin ɔ ti ɔ niaan bla.

12 “‘Nán a nin ɔ si i niaan bla be la, afin ɔ nin ɔ si be mmoja’n ti kun.+

13 “‘Nán a nin ɔ nin i niaan bla be la, afin ɔ nin ɔ nin be mmoja’n ti kun.

14 “‘Nán a nin ɔ si i niaan bian yi be la naan gua ɔ si i niaan bian’n i ɲin ase. Bla sɔ’n ti ɔ osufuɛ.+

15 “‘Nán a nin ɔ sewi be la,+ afin ɔ ti ɔ wa’n i yi, ɔ fataman kɛ a nin i be la.

16 “‘Nán a nin ɔ niaan bian i yi’n be la,+ afin ɔ ti ɔ niaan bian’n i ɲin ase gualɛ.

17 “‘Nán a nin bla kun nin i wa bla be la.+ Nán fɛ i wa yasua’n i wa bla’n, annzɛ i wa bla’n i wa bla naan a nin i be la. Be ti i osufuɛ, be nin i mantan dan, i sɔ’n ti tete like.*

18 “‘Nán fa bla kun ukɛ i niaan bla m’ɔ te o nguan nun’n i su, naan be kaci wla+ naan a nin i be la.

19 “‘Nán fa ɔ wun mantan bla kun m’ɔ o mannza nun’n, mɔ i sɔ’n ti ɔ o fiɛn nun’n naan a nin i be la.+

20 “‘Nán a nin ɔ wiengu i yi be la, sɛ a yo sɔ’n á wlú fiɛn nun.+

21 “‘Nán kplin su kɛ be fa ɔ wa be yi tɛ be man Molɛki.+ Nán yo sɔ naan saci ɔ Ɲanmiɛn’n i dunman.+ N ti Zoova.

22 “‘Nán a nin yasua be la kɛ nga be nin bla be fa la’n sa.+ I sɔ’n ti tete like.

23 “‘Nán yasua kun nin nnɛn be la, sɛ ɔ yo sɔ’n ɔ́ wlú fiɛn nun. Yɛ nán bla kun fɛ i wun man nnɛn kun naan ɔ nin i be la.+ I sɔ yolɛ’n timan su.

24 “‘Nán amun yo ninnge sɔ’m be nun wie fi naan amun wlu fiɛn nun, afin ninnge kwlaa sɔ’m be ti yɛ nvle nga n su fuan be nunfuɛ mun amun ɲrun’n be wluli fiɛn nun-ɔn.+ 25 I sɔ’n ti’n, mɛn’n w’a yo fiɛn, yɛ ń má tú i nunfuɛ’m be fɔ be sa tɛ’m be ti, kpɛkun ń kán be bo mɛn sɔ’n nun.+ 26 Sanngɛ maan amun fa min mmla’m be su, ɔ nin ndɛ nga n kan’n su,+ maan ɔ wie Izraɛlifuɛ-o, annzɛ aofuɛ nga be tran amun afiɛn’n nin-o, nán amun yo tete sa sɔ’m be nun wie fi.+ 27 Afin tete sa sɔ mun yɛ be nga be dun mmua trannin mɛn sɔ’n nun’n be yoli-ɔ,+ ɔ maan mɛn’n w’a yo fiɛn. 28 Sɛ amun a yoman mɛn’n i fiɛn’n, ɔ su fiman amun guaman, kɛ nga ɔ́ wá fí nvlenvle nga be dun mmua trannin mɛn’n nun amun ɲrun’n ɔ́ gúa’n sa. 29 Sɛ sran kun yo tete sa sɔ’m be nun wie’n, sran kwlaa ng’ɔ yo sa sɔ’n, maan be yi i* i nvlefuɛ’m be afiɛn. 30 Maan amun nian ndɛ nga n kan kleli amun’n su be nanti, nán amun yo tete sa nga be nga be dun mmua trannin nvle’n nun be yoli’n be nun wie fi.+ Kɛ ɔ ko yo naan amun a wluman fiɛn nun’n ti. N ti amun Ɲanmiɛn Zoova.’”

19 Zoova seli Moizi ekun kɛ: 2 “Kan ndɛ kle Izraɛlifuɛ mun, se be kɛ: ‘Ɔ fata kɛ amun yo sanwun, afin min Zoova mɔ n ti amun Ɲanmiɛn’n n ti sanwun.+

3 “‘Ɔ fata kɛ amun tinuntinun amun ɲin yi* amun nin ɔ nin amun si,+ yɛ amun di min wunmiɛn-lolɛ-cɛn’m be su.+ N ti amun Ɲanmiɛn Zoova. 4 Nán amun kpɛ amun ɲin amuin mɔ be timan like fi’n+ be wun lɔ, yɛ nán amun klo blalɛ be yo amuin.+ Min yɛ n ti Zoova amun Ɲanmiɛn’n niɔn.

5 “‘Sɛ amún yí bo kun yolɛ tɛ bé mán Zoova’n,+ maan amun yi tɛ’n kɛ ng’ɔ nin i fata’n sa naan i klun jɔ amun wun.+ 6 Ɔ fata kɛ amun di i nnɛn’n cɛn nga amun yili tɛ’n, ɔ nin cɛn ng’ɔ su i su’n nun. Sanngɛ i ng’ɔ ka lɛ lele cɛn nsan’n, ɔ fata kɛ amun yrɛ i sin nun.+ 7 Sanngɛ sɛ be di i nnɛn’n wie i cɛn nsan su’n nun’n, ɔ ti like kain, Ɲanmiɛn su sɔman nun klanman. 8 Sran ng’ɔ di’n ɔ́ wún i sa tɛ’n i su afɛ, afin ɔ yoli like m’ɔ ti Zoova liɛ klonglo’n i finfin. Ɔ fata kɛ be yi sran sɔ’n* i nvlefuɛ’m be afiɛn.

9 “‘Kɛ amún kpɛ́ amun fie’n su ninnge mun amun mɛn’n nun’n, nán amun kpɛ ng’ɔ o fie’n i nuan su’n i kwlaa. Yɛ kɛ amun ko kpɛ’n, i ng’ɔ ka’n nán amun isa.+ 10 Asa ekun’n, kɛ á títí ɔ viɲin mma mun’n, i ng’ɔ ka’n nán titi be, yɛ i ng’ɔ gua’n nán isa. Ɔ fata kɛ a yaci be lɛ man yalɛfuɛ* mun+ nin aofuɛ mun. N ti amun Ɲanmiɛn Zoova.

11 “‘Nán amun wua,+ nán amun laka sran,+ nán amun bu amun wiengu lufle. 12 Nán amun fa min dunman ta ato nda,+ naan yo ɔ Ɲanmiɛn’n i dunman’n i finfin. N ti Zoova. 13 Nán di ɔ wiengu lufle,+ yɛ nán fa sran wie like yo ɔ liɛ.+ Nán tra junman difuɛ’n i akatua’n i ase lele naan aliɛ cɛn su.+

14 “‘Nán bo sutrefuɛ wie i sannzan,* yɛ nán fa like wie sie i aɲinsifuɛ wie bo,+ ɔ fata kɛ a sro Ɲanmiɛn.+ N ti Zoova.

15 “‘Nán amun bu sran lufle jɔlɛ dilɛ nun, nán amun nian kɛ sran kun ti yalɛfuɛ’n ti’n amún bú ndɛ yí i su, yɛ nán amun nian kɛ sran kun ti sikafuɛ’n ti’n amún jrɛ́n i sin.+ Amun di amun wiengu jɔlɛ nanwlɛ su.

16 “‘Nán tɔn sran suɛn sin ɔ nvle’n nunfuɛ’m be afiɛn.+ Nán fua ɔ wiengu wie ti kɛ á kún i.*+ N ti Zoova.

17 “‘Nán kpɔ ɔ niaan’n ɔ awlɛn’n nun lɔ.+ Ɔ fata kɛ a tu ɔ wiengu’n i fɔ,+ kɛ ɔ ko yo naan ɔ sa w’a tranman i sa tɛ’n nun wie’n ti.

18 “‘Nán tu ɔ klunngbɔ,+ yɛ nán fa ɔ nvle’n nunfuɛ wie i wun ndɛ sie ɔ klun. Klo ɔ wiengu kɛ a fa klo ɔ bɔbɔ wun’n sa.+ N ti Zoova.

19 “‘Ɔ fata kɛ amun di mmla nga’m be su: Nán yo maan nnɛn wafa nɲɔn be fu be wiengu. Nán lua like mma wafa nɲɔn fie kunngba’n su,+ yɛ nán wla tralɛ nga be fali jese wafa nɲɔn be wuli’n.+

20 “‘Sɛ yasua kun nin bla kun be la’n, sɛ bla’n ti kanga naan be sieli i kɛ bé fɛ́ i mán yasua uflɛ’n, sɛ be nin-a kpɔmɛn i ti annzɛ ɔ te o kanga nun’n, ɔ fata kɛ be tu be fɔ. Sanngɛ nán be kun be, afin bla’n te o kanga nun. 21 Maan yasua’n fa sa tɛ’n i ti kpatalɛ tɛ’n i nnɛn’n m’ɔ́ fá mán Zoova’n, ɔ fa wɔ tannin sua mɔ Ɲanmiɛn yi i wun nglo nun’n i anuan’n nun lɔ: Bua ɲin kun yɛ ɔ́ fá yí sa tɛ’n i ti kpatalɛ tɛ’n+ niɔn. 22 Ɲanmiɛn ɲrun jranfuɛ’n fá bua ɲin nga bé fá yí sa tɛ’n i ti kpatalɛ tɛ’n, ɔ́ fá kpáta sa tɛ ng’ɔ yoli’n i ti Zoova ɲrun. Ɔ maan bé yáci sa tɛ ng’ɔ yoli’n cɛ́ i.

23 “‘Kɛ amun ko ju mɛn’n nun lɔ’n, sɛ amun ta waka wie kɛ amún dí i su mma’n, maan amun bu i su mma’n i like fiɛn, nán amun kɛn i. Nán amun kɛn i, lele afuɛ nsan. Ɔ fataman kɛ be di. 24 I afuɛ nnan su’n, i su mma’m be kwlaa bé yó sanwun, yɛ amún dí su aklunjɔɛ Zoova ɲrun.+ 25 I afuɛ nnun su’n, amun kwla di i su mma mun, yɛ kɛ amún kpɛ́ amun fie su ninnge mun’n amun kwla titi i su mma mun wie. N ti amun Ɲanmiɛn Zoova.

26 “‘Nán amun di like wie fi mɔ mmoja+ o nun’n.

“‘Nán amun yi wunnzue, yɛ nán amun yi atrɛ.+

27 “‘Nán amun yi* amun ti’n i papla nun ndrɛ mun, yɛ nán amun kpɛkpɛ amun akanza’n i tiwatiwa mun.+

28 “‘Sɛ sran kun wu’n, nán amun bobo amun wun kannin be mɛn i,+ nán amun klɛklɛ like amun wunnɛn’n su. N ti Zoova.

29 “‘Nán fa ɔ wa bla’n yo tekle bla+ naan guɛ i ɲin ase, kɛ ɔ́ yó naan mɛn’n nunfuɛ’m b’a boman tekle naan sa sukusuku yolɛ’n w’a truman’n ti.+

30 “‘Maan amun di min wunmiɛn-lolɛ-cɛn’m+ be su, yɛ maan amun bu min sua’n i like dan.* N ti Zoova.

31 “‘Nán amun wɔ be nga be waan be nin be nga be wuli’n be ijɔ’n be sin,+ yɛ nán amun wɔ wunnzue yifuɛ’m+ be sin. Sɛ amun yo sɔ’n, amún wlú fiɛn nun. N ti amun Ɲanmiɛn Zoova.

32 “‘Maan amun ɲin yi be nga be ti w’a bo je’n,+ yɛ amun bu sran kpɛnngbɛn’m be sran.+ Maan amun sro amun Ɲanmiɛn’n.+ N ti Zoova.

33 “‘Sɛ amun nin aofuɛ kun tran amun mɛn’n nun’n, nán amun yo i tɛtɛ.+ 34 Maan aofuɛ ng’ɔ nin amun tran’n, ɔ kaci kɛ amun niaan Izraɛlifuɛ sa.+ Amun klo i kɛ amun fa klo amun bɔbɔ amun wun’n sa, afin amun bɔbɔ amun yoli aofuɛ Ezipti mɛn’n nun lɔ.+ N ti amun Ɲanmiɛn Zoova.

35 “‘Kɛ amún súnnzun like wie i tɛnndɛn nun’n, annzɛ like wie i nɔnnin’n, annzɛ kɛ amún súnnzun like wie m’ɔ ti kɛ nzue sa’n, nán amun kpɛ nun gblɛ.+ 36 Maan amun toe mun, nin amun jayɔbuɛ mun, ɔ nin amun ninnge’m be suliɛ mun* be di nanwlɛ.+ N ti amun Ɲanmiɛn Zoova, min yɛ n fali amun Ezipti mɛn’n nun lɔ bali-ɔ. 37 Ɔ maan ɔ fata kɛ amun di min mmla’m be su, yɛ amun fa ndɛ nga n kan’n su, amun nian be su nanti.+ N ti Zoova.’”

20 Zoova seli Moizi ekun kɛ: 2 “Ɔ fata kɛ a se Izraɛlifuɛ’m be kɛ: ‘Sɛ Izraɛli yasua kun, annzɛ aofuɛ nga be tran Izraɛlifuɛ’m be afiɛn’n be nun kun fɛ i wa yi tɛ man Molɛki’n, ɔ fata kɛ be kun i, nán be yaci i lɛ.+ Maan nvlefuɛ’m be finfin i yɔbuɛ be kun i. 3 N bɔbɔ min, e nin sran sɔ’n e le i, yɛ ń yí i* i nvlefuɛ’m be afiɛn. Afin ɔ fɛli i mma’m be nun wie mannin Molɛki, kpɛkun ɔ yoli lika m’ɔ ti min liɛ klonglo’n i finfin,+ yɛ ɔ sacili min dunman m’ɔ ti sanwun’n. 4 Sɛ nvlefuɛ’m be yo kɛ b’a wunman sa nga sran ng’ɔ fɛli i wa’n mannin Molɛki’n yoli’n sa’n, naan b’a kunmɛn i’n,+ 5 n bɔbɔ min, e nin sran sɔ’n nin i osufuɛ mun é ɲɛ́n i.+ Ń yí sran sɔ’n* i nvlefuɛ’m be afiɛn, ɔ nin be kwlaa nga be suli i su mɔ be sɔli Molɛki’n.*

6 “‘Sɛ sran kun kɔ be nga be waan be nin be nga be wuli’n be ijɔ’n be sin’n,+ annzɛ ɔ kɔ wunnzue yifuɛ’m+ be sin’n, mɔ i sɔ’n ti amuin sɔlɛ’n,* saan e nin sran sɔ’n é ɲɛ́n i, yɛ ń yí i* i nvlefuɛ’m be afiɛn.+

7 “‘Maan amun yo sanwun yɛ amun yo min liɛ klonglo,+ afin min yɛ n ti Zoova amun Ɲanmiɛn’n niɔn. 8 Maan amun fa min mmla’m be su, yɛ amun nian be su nanti.+ N ti Zoova, min yɛ n su yo amun sanwun-ɔn.+

9 “‘Sɛ sran kun bo i si annzɛ i nin i sannzan’n, ɔ fata kɛ be kun i, nán be yaci i lɛ.+ Kɛ m’ɔ boli i si annzɛ i nin i sannzan’n ti’n, i mmoja’n wo i bɔbɔ i ti su.

10 “‘Sɛ yasua kun nin sran uflɛ yi be la’n, like ng’ɔ fata kɛ be yo’n yɛ: Sran ng’ɔ nin i wiengu kun i yi be la’n, ɔ fata kɛ be kun i, nán be yaci i lɛ. Maan be kun yasua nin bla nga be yoli sa sɔ’n.+ 11 Yasua ng’ɔ nin i si i yi be la’n, ɔ guɛ i si i ɲin ase.+ Ɔ fata kɛ be kun be nɲɔn’n, nán be yaci be lɛ. Be mmoja’n wo be bɔbɔ be ti su. 12 Sɛ sran kun nin i sewi be la’n, ɔ fata kɛ be kun be nɲɔn’n, nán be yaci be lɛ. I sɔ yolɛ’n timan su. Be mmoja’n wo be bɔbɔ be ti su.+

13 “‘Sɛ yasua kun nin i wiengu yasua be la kɛ nga be nin bla fa la’n sa’n, nn be nɲɔn’n b’a yo tete sa.+ Ɔ fata kɛ be kun be, nán be yaci be lɛ. Be mmoja’n wo be bɔbɔ be ti su.

14 “‘Sɛ sran kun fa bla kun nin i nin’n, i sɔ’n ti tete like.*+ Ɔ fata kɛ be yrɛ i ɔ nin bla mun sin nun,+ kɛ ɔ ko yo naan tete sa sɔ’n w’a truman amun afiɛn’n ti.

15 “‘Sɛ yasua kun nin nnɛn be la’n, ɔ fata kɛ be kun i, nán be yaci i lɛ. Yɛ ɔ fata kɛ amun kun nnɛn’n.+ 16 Sɛ bla kun nin nnɛn be la’n,+ ɔ fata kɛ a kun bla’n nin nnɛn’n. Ɔ fata kɛ a kun be, nán yaci be lɛ. Be mmoja’n wo be bɔbɔ be ti su.

17 “‘Sɛ yasua kun nin i niaan bla be la’n, sɛ i si i wa bla-o, annzɛ i nin i wa bla-o, sɛ ɔ wun bla’n i bo annzɛ bla’n wun i bo’n, i sɔ’n ti ɲannzuɛn sa.+ Maan be yi* be be nvlefuɛ’m be mma’m be ɲin bo lɛ. Ɔ guɛli i niaan bla’n i ɲin ase. Ɔ́ wún i sa tɛ’n i su afɛ.

18 “‘Sɛ yasua kun nin bla kun m’ɔ o mannza nun’n be la’n, nn yasua’n nin bla’n be nɲɔn’n b’a wun mmoja m’ɔ tu bla’n.+ Maan be yi* be nɲɔn’n be nvlefuɛ’m be afiɛn.

19 “‘Nán a nin ɔ nin i niaan bla, annzɛ ɔ si i niaan bla be la, afin i sɔ’n ti be osufuɛ mɔ be nin i be mmoja ti kun’n i ɲin ase gualɛ.+ Bé wún be sa tɛ’n i su afɛ. 20 Sɛ yasua kun nin i si i niaan bian yi be la’n, i sɔ’n ti i si i niaan bian’n i ɲin ase gualɛ.+ Bé wún be sa tɛ’n i su afɛ. Bé wú, be su wuman ba. 21 Sɛ yasua kun fɛ i niaan bian i yi’n, i sɔ’n ti like kain.+ W’a guɛ i niaan bian’n i ɲin ase. Bé wú, be su wuman ba.

22 “‘Maan amun fa min mmla’m be kwlaa nin ndɛ nga n kan’n be kwlaa be su,+ yɛ amun nian be su nanti.+ Kɛ ɔ ko yo naan mɛn nga n su fa amun n kɔ nun lɔ naan amun ko tran nun’n, w’a fiman amun w’a guaman’n ti.+ 23 Nán amun fa nvle nga n su fuan be amun ɲrun’n be mmla’m be su,+ afin be yoli sa tɛtɛ sɔ’m be kwlaa, yɛ min ɲin w’a tu be su mlɔnmlɔn.+ 24 I sɔ’n ti’n, n seli amun kɛ: “Amún fá be mɛn’n, ń fá mán amun naan ɔ yo amun liɛ. Ɔ ti mɛn kun mɔ nɔnnɔn nin awɛma nzue be sonji nun-ɔn.+ Amun Ɲanmiɛn Zoova’n yɛle min, min yɛ n fali amun nvlefuɛ’m be afiɛn n sieli amun ngunmin-ɔn.”+ 25 Maan amun si nnɛn nga be ti sanwun’n nin nga be timan sanwun’n, ɔ nin anunman nga be timan sanwun’n nin nga be ti sanwun’n be ngbaciɛ’n.+ Nán maan nnɛn wie, annzɛ anunman wie, annzɛ like wie m’ɔ cuɛn i wun ase, mɔ n sieli be ngunmin kɛ amun bu be like fiɛn’n be ti’n, amun wlu fiɛn nun.+ 26 Maan amun yo sanwun, afin min Zoova n ti sanwun,+ yɛ n fali amun nvlefuɛ’m be afiɛn n sieli amun ngunmin naan amun kaci min liɛ.+

27 “‘Yasua annzɛ bla kwlaa nga i waan ɔ nin be nga be wuli’n be ijɔ’n, annzɛ ɔ yi wunnzue’n, ɔ fata kɛ amun kun i, nán amun yaci i lɛ.+ Maan nvlefuɛ’m be finfin be yɔbuɛ naan be wu. Be mmoja’n wo be bɔbɔ be ti su.’”

21 Zoova seli Moizi ekun kɛ: “Kan ndɛ kle Aarɔn i mma mɔ be ti Ɲanmiɛn ɲrun jranfuɛ’n, se be kɛ: ‘Nán maan be nun wie i nvle’n nunfuɛ wie m’ɔ wuli’n ti’n, ɔ wlu fiɛn nun.+ 2 Sanngɛ sɛ ɔ ti i osufuɛ wie m’ɔ nin i be mantan’n, sɛ ɔ ti i nin, annzɛ i si, annzɛ i wa yasua, annzɛ i wa bla, annzɛ i niaan bian’n, ɔ kwla yo sɔ. 3 Sɛ ɔ ti i niaan bla wie m’ɔ mɛntɛn i’n, m’ɔ nin-a siman bian’n, mɔ kusu be nin-a jɛmɛn i’n, ɔ kwla wlu fiɛn nun. 4 Ɔ fataman kɛ i nvle’n nun bla wie m’ɔ le bian’n i ti’n, ɔ wlu fiɛn nun naan ɔ yo i wun finfin. 5 Ɔ fataman kɛ Ɲanmiɛn ɲrun jranfuɛ’m be yi be ti,+ annzɛ be yi be akanza’n i wun, annzɛ be bobo be wun kannin.+ 6 Ɔ fata kɛ be yo sanwun man be Ɲanmiɛn’n,+ yɛ ɔ fataman kɛ be yo be Ɲanmiɛn’n i dunman’n i finfin.+ Afin be yɛ be fa ninnge nga be yra be sin’n su, mɔ be ti be Ɲanmiɛn’n i kpanwun’n* be man Zoova-ɔ. Ɔ fata kɛ be yo sanwun.+ 7 Nán maan be ja tekle bla,+ annzɛ bla wie mɔ be yoli i finfin’n, annzɛ bla wie mɔ i wun yrɛli i’n,+ afin Ɲanmiɛn ɲrun jranfuɛ’n ti i Ɲanmiɛn’n i liɛ klonglo. 8 Ɔ fata kɛ a yo i sanwun,+ afin i yɛ ɔ fa ɔ Ɲanmiɛn’n i kpanwun’n mɛn i-ɔ. Maan ɔ yo sanwun ɔ ɲrun, afin min Zoova mɔ n su yo amun sanwun’n, n ti sanwun.+

9 “‘Sɛ Ɲanmiɛn ɲrun jranfuɛ kun i wa bla kun bo tekle naan ɔ yo i wun finfin’n, ɔ ti i si i finfin yolɛ. Ɔ fata kɛ be yrɛ i sin nun.+

10 “‘Sran nga i niaan’m be nun’n, i yɛ ɔ ti Ɲanmiɛn ɲrun jranfuɛ dan’n, mɔ be guɛli i ti su ngo’n,+ mɔ be sieli i kɛ ɔ wla Ɲanmiɛn ɲrun jranlɛ tralɛ mun’n,+ ɔ fataman kɛ ɔ yaci i timuɛn’n i lɛ naan ɔ yo sukusuku, annzɛ ɔ titi i wun tralɛ’m be nun.+ 11 Ɔ fataman kɛ ɔ mantan sran kun mɔ w’a wu’n.+ Sɛ ɔ wie i si annzɛ i nin bɔbɔ-o, ɔ fataman kɛ be ti’n, ɔ wlu fiɛn nun. 12 Nán ɔ tu i bo Ɲanmiɛn i sua’n nun, yɛ nán ɔ yo i Ɲanmiɛn’n i sua’n i finfin,+ afin nzɔliɛ m’ɔ kle kɛ ɔ fɛli i wun mannin Ɲanmiɛn’n, ɔ nin be ti su gualɛ ngo’n+ be o i wun. N ti Zoova.

13 “‘Bla ng’ɔ nin-a siman bian’n yɛ ɔ fata kɛ ɔ jɛ i-ɔ.+ 14 Nán maan ɔ ja angbeti bla, annzɛ bla kun mɔ i wun yrɛli i’n, annzɛ bla kun mɔ be yoli i finfin’n, annzɛ tekle bla. Sanngɛ ɔ fata kɛ ɔ jɛ i nvlefuɛ’m be nun bla kun m’ɔ nin-a siman bian’n. 15 Nán ɔ yo i mma mɔ be o i nvlefuɛ’m be afiɛn’n be finfin,+ afin n ti Zoova, min yɛ n su yo be sanwun-ɔn.’”

16 Zoova seli Moizi ekun kɛ: 17 “Se Aarɔn kɛ: ‘Nán ɔ mma’m be nun wie mɔ lɛ o i wun’n, ɔ mantan tɛ yiwlɛ’n i wun lɔ le kɛ ɔ́ fɛ́ i Ɲanmiɛn’n i kpanwun’n mɛ́n i. 18 Sran nga lɛ o i wun’n, nán ɔ mantan tɛ yiwlɛ’n: Sran ng’ɔ wunman ase’n, annzɛ sran nga i ja timan kpa’n, annzɛ sran nga i ɲrun’n ti cisanwa’n,* annzɛ sran nga i wunnɛn’n i lika kun ti tɛnndɛn trɛ i onga mun’n, 19 annzɛ sran nga i ja kun ti buwa’n, annzɛ i sa kun ti buwa’n, 20 annzɛ afunfuɛ, annzɛ akliwi,* annzɛ sran nga i ɲinma kun yo i ya’n, annzɛ nɲaa o i kplo’n su’n, annzɛ kongonglele o i wun’n, annzɛ sran nga i ndɔnman’m be ti bowa’n.+ 21 Nán maan Aarɔn m’ɔ ti Ɲanmiɛn ɲrun jranfuɛ’n i wa wie mɔ lɛ o i wun’n ɔ mantan tɛ yiwlɛ’n i wun lɔ kɛ ɔ́ fá ninnge nga be yra be sin’n su be man Zoova’n ɔ́ fá mɛ́n i. Kɛ mɔ lɛ o i wun’n ti’n, ɔ fataman kɛ ɔ mantan tɛ yiwlɛ’n i wun lɔ kɛ ɔ́ fɛ́ i Ɲanmiɛn’n i kpanwun’n mɛ́n i. 22 Ɔ kwla di i Ɲanmiɛn’n i kpanwun mɔ be fɛli i ninnge nga be ti be liɛ ngunmin mɔ be ti Ɲanmiɛn liɛ klonglo’n be nun’n,+ annzɛ ninnge nga be ti Ɲanmiɛn liɛ klonglo’n be nun’n.+ 23 Sanngɛ nán ɔ mantan rido’n,+ yɛ nán ɔ mantan tɛ yiwlɛ’n+ i wun lɔ, afin lɛ o i wun. Ɔ fataman kɛ ɔ yo min sua’n+ i finfin, afin n ti Zoova, min yɛ n su yo be sanwun-ɔn.’”+

24 Ɔ maan Moizi kannin ndɛ’n kleli Aarɔn nin i mma mun ɔ nin Izraɛlifuɛ’m be kwlaa.

22 Zoova seli Moizi ekun kɛ: 2 “Se Aarɔn nin i mma’m be kɛ be nian be wun su Izraɛlifuɛ’m be ninnge nga be ti Ɲanmiɛn liɛ’n be lika, naan b’a yoman min dunman m’ɔ ti sanwun’n i finfin+ ninnge nga be fa man min’n ti.+ N ti Zoova. 3 Se be kɛ: ‘Blɛ kwlaa nun’n, sɛ amun mma’m be nun kun o fiɛn nun naan ɔ mantan Izraɛlifuɛ’m be ninnge nga be ti Ɲanmiɛn liɛ mɔ be fa mannin Zoova’n, bé yí* sran sɔ’n min ɲin bo lɛ.+ N ti Zoova. 4 Nán maan Aarɔn i wa yasua wie mɔ kokowe+ o i wun’n, annzɛ i wa yasua wie mɔ i yasua lika bu nzue’n,+ ɔ di ninnge nga be ti Ɲanmiɛn liɛ’n lele saan w’a yo sanwun.+ I kunngba’n yɛle i wa yasua ng’ɔ kan sran kun mɔ sran wie m’ɔ wuli’n ti’n ɔ o fiɛn nun’n,+ annzɛ i wa yasua nga i wun nzue gua’n,+ 5 annzɛ i wa yasua ng’ɔ kan nnɛn kanngan mɔ be wlanwlan likawlɛ’n+ mɔ be ti fiɛn’n, annzɛ ɔ kan sran kun mɔ sa wie ti’n ɔ o fiɛn nun’n, m’ɔ kwla yo maan ɔ wlu fiɛn nun’n i liɛ’n.+ 6 Sran ng’ɔ kan ninnge sɔ’m be nun wie’n, ɔ́ wlú fiɛn nun, ɔ́ ká sɔ lele nnɔsua, yɛ ɔ fataman kɛ ɔ di ninnge nga be ti Ɲanmiɛn liɛ’n be wie fi. Sanngɛ ɔ fata kɛ ɔ wunnzin nzue nun.+ 7 Kɛ wia’n ko tɔ’n, ɔ́ yó sanwun, kpɛkun kɛ ɔ fɛ i lɛ’n ɔ kwla di ninnge nga be ti Ɲanmiɛn liɛ’n wie, afin i aliɛ’n yɛ ɔ o lɛ-ɔ.+ 8 Asa ekun’n, ɔ fataman kɛ ɔ di nnɛn fuɛn, annzɛ nnɛn nga blo nnɛn wie titili i nun’n naan ɔ wlu fiɛn nun.+ N ti Zoova.

9 “‘Maan be nanti min mmla’m be su, kɛ ɔ ko yo naan b’a yoman sa tɛ naan b’a wuman, ninnge mɔ be ti min liɛ’n be finfin yolɛ’n ti. N ti Zoova, min yɛ n su yo be sanwun-ɔn.

10 “‘Sran ng’ɔ leman atin* diman ninnge nga be ti Ɲanmiɛn liɛ’n, nán ɔ di.+ Nán maan aofuɛ ng’ɔ tran Ɲanmiɛn ɲrun jranfuɛ kun i awlo’n nin junman difuɛ nga be tuɛ i kalɛ’n, be di wie. 11 Sanngɛ sɛ Ɲanmiɛn ɲrun jranfuɛ kun fɛ i bɔbɔ i sika to sran kun’n, sran sɔ’n kwla di wie. Kanga nga be wuli i i awlo’n nun’n, ɔ kwla di i aliɛ’n wie.+ 12 Sɛ Ɲanmiɛn ɲrun jranfuɛ kun i wa bla kun ja sran kun m’ɔ timan Ɲanmiɛn ɲrun jranfuɛ’n,* nán ɔ di ninnge nga be fa man m’ɔ ti Ɲanmiɛn liɛ’n wie. 13 Sanngɛ sɛ Ɲanmiɛn ɲrun jranfuɛ kun i wa bla’n ti angbeti, annzɛ i wun yrɛli i naan ɔ leman ba’n, sɛ ɔ sɛ i sin ko trɛn i si i awlo’n nun kɛ i talua nun sa’n, ɔ kwla di i si i aliɛ’n wie.+ Sanngɛ sran ng’ɔ leman atin* diman’n, nán ɔ di.

14 “‘Sɛ sran kun siman nun naan ɔ di ninnge nga be ti Ɲanmiɛn liɛ’n wie’n, maan ɔ yi sie i osu, yɛ maan be bu like’n i gua’n nun nnun, naan ɔ fɛ i bue kun uka su, naan ɔ fa like m’ɔ ti Ɲanmiɛn liɛ’n ko man Ɲanmiɛn ɲrun jranfuɛ’n.+ 15 Ɔ maan ɔ fataman kɛ be yo Izraɛlifuɛ’m be ninnge nga be ti Ɲanmiɛn liɛ mɔ be fa mannin Zoova’n be finfin,+ 16 kɛ ɔ ko yo naan b’a diman be ninnge nga be ti Ɲanmiɛn liɛ’n naan m’an tuman be fɔ be sa tɛ’n ti. N ti Zoova, min yɛ n su yo be sanwun-ɔn.”’

17 Zoova seli Moizi ekun kɛ: 18 “Kan ndɛ kle Aarɔn nin i mma mun, ɔ nin Izraɛlifuɛ’m be kwlaa, se be kɛ: ‘Sɛ Izraɛli yasua kun, annzɛ Izraɛli nvle’n nun aofuɛ kun yi tɛ nga kɛ bé yí’n be yra nnɛn’n i kɔlikɔli’n+ man Zoova kɛ ɔ́ fá yía nda wie m’ɔ tali’n i nuan’n, annzɛ sɛ i klunklo like yɛ ɔ su fa man’n,+ 19 maan ɔ fa nannin yasua kun m’ɔ ti kpa’n,+ annzɛ bua gbanflɛn mun, annzɛ boli mun, kɛ ɔ ko yo naan w’a ɲan su ye’n ti. 20 Nán amun fa like wie fi mɔ lɛ o i wun’n be man,+ afin amun su ɲanman su ye.

21 “‘Sɛ yasua kun yi bo kun yolɛ tɛ+ man Zoova kɛ ɔ́ fá yía nda wie m’ɔ tali’n i nuan’n, annzɛ sɛ i klunklo like yɛ ɔ su fa man’n, maan ɔ fa nannin, annzɛ bua, annzɛ boli ng’ɔ ti kpa’n, kɛ ɔ́ yó naan w’a ɲan su ye’n ti. Nán maan lɛ fi trɛn i wun. 22 Nán amun fa nnɛn nga i ɲin w’a si’n, annzɛ i lika wie w’a bu’n, annzɛ kannin o i wun’n, annzɛ like wie w’a wun i kplo’n su’n, annzɛ tukpacɛ wie o i kplo’n su’n, annzɛ kongonglele o i wun’n be man. Nán amun fa nnɛn sɔ’m be nun wie fi wɔ Zoova ɲrun, yɛ nán amun fɛ i sɔ nnɛn liɛ’m be man Zoova tɛ yiwlɛ’n su. 23 Sɛ amun klunklo like yɛ amun su fa man’n, amun kwla fa nannin tola, annzɛ bua nga i lika wie ti tɛnndɛn annzɛ i lika wie ti tika trɛ i onga mun’n. Sanngɛ sɛ nda wie mɔ amun tali’n i nuan like yɛ amun su fa man’n, be su sɔman nun. 24 Nán amun fa nnɛn nga i ndɔnman’m be ti bowa’n annzɛ kpɔtɔwa’n, annzɛ mɔ be yili i ndɔnman mun’n annzɛ be kpɛli be’n, be man Zoova. Nán amun fa nnɛn kɛ ngalɛ sa’m be yi tɛ amun mɛn’n nun. 25 Sɛ aofuɛ wie waan ɔ́ fá nnɛn kɛ ngalɛ’n sa’n mán’n, nán amun kplin su naan amun fa man amun Ɲanmiɛn’n kɛ i aliɛ* sa. Afin be timan kpa, lɛ o be wun. Be su sɔman nun klanman.”’

26 Zoova seli Moizi ekun kɛ: 27 “Sɛ nannin, annzɛ bua, annzɛ boli wu ba’n, maan ba sɔ’n ɔ kɛ i nin bo wun lele cɛn nso,+ sanngɛ kɛ ɔ fɛ i i cɛn mɔcuɛ’n su’n be kwla fa man naan be fɛ i yi tɛ nga kɛ bé yí’n be yra nnɛn’n be man Zoova. 28 Nannin tola nin bua’m be liɛ’n, nán amun kun be nin be mma mun cɛn kunngba’n nun.+

29 “Sɛ amún yí ase lalɛ tɛ bé mán Zoova’n,+ amun yi i kɛ ɔ nin i fata’n sa naan i klun jɔ amun wun. 30 Ɔ fata kɛ amun di i cɛn kunngba sɔ’n nun. Nán amun yaci wie lɛ naan aliɛ cɛn su.+ N ti Zoova.

31 “‘Ɔ fata kɛ amun fa min mmla’m be su, yɛ amun nian be su nanti.+ N ti Zoova. 32 Nán amun yo min dunman m’ɔ ti sanwun’n i finfin,+ sanngɛ maan amun yo naan n yo sanwun Izraɛlifuɛ’m be afiɛn.+ N ti Zoova, min yɛ n su yo amun sanwun-ɔn,+ 33 min yɛ n fali amun Ezipti mɛn’n nun fiteli naan ń klé amun kɛ n ti Ɲanmiɛn’n niɔn.+ N ti Zoova.”

23 Zoova seli Moizi ekun kɛ: 2 “Kan ndɛ kle Izraɛlifuɛ mun, se be kɛ: ‘Zoova i cɛn nga kɛ be blɛ ju’n, ɔ fata kɛ be di be’n,+ m’ɔ fata kɛ amun bo be jɔ’n,+ be ti aɲia cɛn mɔ be ti be liɛ ngunmin-ɔn. Min cɛn nga kɛ be blɛ ju’n, ɔ fata kɛ be di be’n be yɛ:

3 “‘Amun kwla fa cɛn nsiɛn di junman, sanngɛ cɛn’n i nso su’n ti wunmiɛn-lolɛ-cɛn ngunmin kun,+ ɔ ti aɲia cɛn ngunmin kun. Ɔ fataman kɛ amun di junman wie fi. Kan kwlaa nga amun tran’n, ɔ ti wunmiɛn-lolɛ-cɛn kun m’ɔ fata kɛ amun fa man Zoova-ɔ.+

4 “‘Zoova i cɛn nga kɛ be blɛ ju’n, ɔ fata kɛ be di be’n, m’ɔ fata kɛ be yo aɲia mɔ be ti be liɛ ngunmin’n, mɔ kɛ be blɛ ju’n, ɔ fata kɛ be bo be jɔ’n, be yɛ: 5 Anglo klikli’n i cɛn ba blu-nin-nnan (14) su’n,+ kɛ sɛnzɛ’n ko tɔ’n,* ɔ ti Zoova i Delɛ Cɛn.+

6 “‘Anglo sɔ’n i cɛn ba blu-nin-nnun (15) su’n, ɔ ti Kpanwun mɔ Levii Nunman nun’n i ti Cɛn mɔ be di be man Zoova-ɔ.+ Maan amun di kpanwun mɔ levii nunman nun’n cɛn ba nso.+ 7 I cɛn ba klikli’n su’n, maan amun yo aɲia kun m’ɔ ti i liɛ ngunmin’n.+ Nán amun di junman kekle wie fi. 8 Sanngɛ amun yi tɛ nga be yrɛ i nnɛn’n sin su’n, be man Zoova cɛn nso. I cɛn nso su’n, maan amun yo aɲia kun m’ɔ ti i liɛ ngunmin’n. Nán amun di junman kekle wie fi.’”

9 Zoova seli Moizi ekun kɛ: 10 “Kan ndɛ kle Izraɛlifuɛ mun, se be kɛ: ‘Kɛ amun ko ju mɛn nga n su fa man amun’n i nun mɔ amún kpɛ́ amun fie su ninnge mun’n, ninnge klikli nga amun kpɛ’n,+ amun fɛ i sɔlɛ’n kun ko man Ɲanmiɛn ɲrun jranfuɛ’n.+ 11 Kpɛkun Ɲanmiɛn ɲrun jranfuɛ’n tótó i sɔlɛ’n kɔ́ i ɲrun nin i sin Zoova ɲrun naan amun ɲan su ye. Maan ɔ toto i Wunmiɛn-lolɛ-cɛn’n i cɛn ng’ɔ su i su’n nun. 12 Cɛn nga be toto i sɔlɛ’n, maan amun fa bua gbanflɛn kun m’ɔ ti kpa’n, mɔ i afuɛ’n traman afuɛ kun’n be man, naan be fa yi tɛ nga kɛ bé yí’n be yra nnɛn’n i kɔlikɔli’n be man Zoova. 13 Amun fa ble annzɛ i wunsu like be sie su. Maan ɔ yo sanmlɛn mlɛnnɛnnɛn kpa efa kun mɔ be bubuli nun blu’n i bue nɲɔn* mɔ be sɛnngɛnnin i nin ngo’n. Maan be yrɛ i sin’n su be man Zoova naan ɔ bɔn fannin.* Amun sie su duvɛn inin kun* mɔ be bubuli nun nnan’n i bue kun. 14 Nán amun di kpanwun, annzɛ like mma wie mɔ be kɛɛnnin’n, annzɛ like mma uflɛuflɛ wie fi, lele naan cɛn sɔ’n w’a ju, lele naan amun a man amun Ɲanmiɛn’n i like. Ɔ ti mmla kun m’ɔ́ ká lɛ tititi-ɔ. Kan kwlaa nga amun tran lɛ’n, amun di su blɛ kwlaa nun.

15 “‘Kɛ ɔ fɛ i cɛn ng’ɔ su Wunmiɛn-lolɛ-cɛn’n su’n mɔ amun fali like nga amun kpɛli’n i sɔlɛ’n bali kɛ be toto i Ɲanmiɛn ɲrun’n, amun ka wunmiɛn-lolɛ-cɛn nso.+ Maan be yo lemɔcuɛ klonglo. 16 Amun ka cɛn ba ablenun (50)+ lele fa ju Wunmiɛn-lolɛ-cɛn nso su’n i cɛn ng’ɔ su i su’n su. I sin’n, amun fa ble annzɛ i wunsu like be man Zoova ekun.+ 17 Amun fa amun awlo’m be nun kpanwun nɲɔn fa bla naan be toto be Ɲanmiɛn ɲrun. Maan be fa sanmlɛn mlɛnnɛnnɛn kpa efa kun mɔ be bubuli nun blu’n i bue nɲɔn* be yo. Maan be gua nun levii naan b’a tɔn.+ Be ti fie su like klikli mɔ be fa man Zoova-ɔ.+ 18 Kpɛkun maan amun fa bua ba yasua nso mɔ be ti kpa’n mɔ be le afuɛ kun’n, ɔ nin nannin gbanflɛn, nin bua ɲin+ nɲɔn be uka kpanwun’m be su. Bé wá fá be yí tɛ nga kɛ bé yí’n be yra nnɛn’n i kɔlikɔli’n bé mán Zoova. Maan be fa ble annzɛ i wunsu like, nin nzan m’ɔ fata kɛ be fa sie su’n be man naan be yra be sin’n su, naan ɔ bɔn Zoova i bue nun fannin.* 19 Maan amun fa boli ba kun be yi sa tɛ’n i ti tɛ,+ yɛ amun fa bua ba yasua nɲɔn mɔ be le afuɛ kun’n be yi bo kun yolɛ tɛ.+ 20 Ɲanmiɛn ɲrun jranfuɛ’n tótó be nin kpanwun mɔ be ti fie su like klikli’n kɔ́ i ɲrun nin i sin Ɲanmiɛn ɲrun, ɔ ti like mɔ be toto be Zoova ɲrun-ɔn. Ɔ́ tótó be nin bua ba yasua nɲɔn mun likawlɛ. Be ti like mɔ be ti Zoova liɛ klonglo-ɔ, be ti Ɲanmiɛn ɲrun jranfuɛ’n i liɛ.+ 21 Cɛn sɔ’n nun’n, amun bo i jɔ+ naan amun yo aɲia kun m’ɔ ti i liɛ ngunmin’n. Nán amun di junman kekle wie fi. Ɔ ti mmla kun m’ɔ́ ká lɛ tititi-ɔ. Kan kwlaa nga amun tran lɛ’n, amun di su blɛ kwlaa nun.

22 “‘Kɛ amún kpɛ́ amun fie su ninnge mun’n, nán amun kpɛ nga be o fie’n i nuan su’n be ngba, yɛ kɛ amun ko kpɛ’n, i ng’ɔ ka’n nán amun isa.+ Amun yaci i lɛ be man yalɛfuɛ*+ nin aofuɛ mun.+ N ti amun Ɲanmiɛn Zoova.’”

23 Zoova seli Moizi ekun kɛ: 24 “Se Izraɛlifuɛ’m be kɛ: ‘Anglo nso su’n, i cɛn ba klikli’n maan amun lo wunmiɛn mlɔnmlɔn. Maan be bo awɛ+ be fa bo amun wla kpɛnlɛ cɛn sɔ’n i jɔ. Ɔ ti aɲia cɛn ngunmin kun. 25 Nán amun di junman kekle wie fi cɛn sɔ’n nun, yɛ amun yi tɛ nga be yrɛ i nnɛn’n sin su’n, be man Zoova.’”

26 Zoova seli Moizi ekun kɛ: 27 “Sanngɛ anglo nso su’n i cɛn ba blu’n su’n, ɔ ti Sa Tɛ’n i Ti Kpatalɛ Cɛn.+ Ɔ fata kɛ amun yo aɲia kun m’ɔ ti i liɛ ngunmin’n, amun yo amun wun aunnvɔɛfuɛ,*+ yɛ amun yi tɛ nga be yrɛ i nnɛn’n sin su’n, be man Zoova. 28 Ɔ fataman kɛ amun di junman wie fi cɛn sɔ’n nun, afin ɔ ti sa tɛ’n i ti kpatalɛ cɛn.+ Bé fá kpáta amun sa tɛ’n i ti amun Ɲanmiɛn Zoova i ɲrun. 29 Sran kwlaa nga w’a yomɛn i wun aunnvɔɛfuɛ* cɛn sɔ’n nun’n, maan be yi i* i nvlefuɛ’m be afiɛn.+ 30 Yɛ sran kwlaa ng’ɔ di junman wie cɛn sɔ’n nun’n, ń núnnún i i nvlefuɛ’m be afiɛn. 31 Nán amun di junman wie fi. Ɔ ti mmla kun m’ɔ́ ká lɛ tititi-ɔ. Kan kwlaa nga amun tran lɛ’n, amun di su blɛ kwlaa nun. 32 Maan ɔ yo amun wunmiɛn-lolɛ-cɛn klonglo kun, yɛ anglo’n i cɛn ba ngwlan su’n i nnɔsua nun’n amun yo amun wun aunnvɔɛfuɛ.*+ Amun bo amun wunmiɛn-lolɛ-cɛn’n i dilɛ bo nnɔsua kun su lele fa ju nnɔsua uflɛ su.”

33 Zoova seli Moizi ekun kɛ: 34 “Se Izraɛlifuɛ’m be kɛ: ‘Anglo’n i cɛn ba blu-nin-nnun (15) su’n ti Kpata Bo Tranlɛ Cɛn’n i dilɛ. Amun fa cɛn nso be di be man Zoova.+ 35 I cɛn ba klikli’n su’n, amun yo aɲia kun m’ɔ ti i liɛ ngunmin’n, yɛ nán amun di junman kekle wie fi. 36 Amun fa cɛn nso be yi tɛ nga be yrɛ i nnɛn’n sin su’n, be man Zoova. I cɛn mɔcuɛ su’n, amun yo aɲia kun m’ɔ ti i liɛ ngunmin’n,+ yɛ amun yi tɛ nga be yrɛ i nnɛn’n sin su’n, be man Zoova. Ɔ ti aɲia ngunmin kun. Nán amun di junman kekle wie fi.

37 “‘Zoova i cɛn nga kɛ be blɛ ju’n, ɔ fata kɛ be di be’n,+ m’ɔ fata kɛ amun bo be jɔ naan amun yo aɲia mɔ be ti be liɛ ngunmin’n,+ be yɛ be o lɛ-ɔ. Yɛ cɛn sɔ’m be nun’n, amun yi tɛ kun mɔ be yrɛ i nnɛn’n sin su’n, be man Zoova: Tɛ nga kɛ bé yí’n be yra nnɛn’n i kɔlikɔli’n,+ ɔ nin ble annzɛ i wunsu like mɔ be fa uka tɛ’n su be man’n,+ ɔ nin nzan mɔ be fa man Ɲanmiɛn’n.+ Cɛn kun nun liɛ nga be kle’n i su yɛ be nian-ɔn. 38 Amún yí tɛ sɔ mun fá úka tɛ nga amun yi be Zoova i wunmiɛn-lolɛ-cɛn’m+ be nun’n be su, amún fá úka like nga amun fa cɛ Ɲanmiɛn’n,+ nin like nga amun tali nda kɛ amún fá mɛ́n i’n,+ ɔ nin amun klunklo like mɔ amun man’n,+ m’ɔ fata kɛ amun fa be man Zoova’n be su. 39 Sanngɛ anglo nso su’n i cɛn ba blu-nin-nnun (15) su’n, kɛ amun ko kpɛ amun mɛn’n nun ninnge mun’n, amun fa cɛn nso be di Zoova i cɛn’n.+ Cɛn klikli’n amun lo wunmiɛn mlɔnmlɔn, yɛ cɛn mɔcuɛ su’n amun lo wunmiɛn mlɔnmlɔn ekun.+ 40 I cɛn klikli’n su’n, amun titi waka dandan nglanman’m be su mma, amun kpɛ nglesia nɲa,+ amun bubu waka nga be nɲa’m be sɔnnin’n be sama, nin kongo nun waka nga be flɛ i peplie’n i sama, yɛ amun bo sro+ amun Ɲanmiɛn Zoova i ɲrun cɛn nso.+ 41 Afuɛ kwlaa nun’n, amun fa cɛn nso be di cɛn sɔ’n be man Zoova.+ Ɔ ti mmla kun m’ɔ́ ká lɛ tititi blɛ kwlaa nun-ɔn. Maan amun di cɛn sɔ’n anglo nso su’n nun. 42 Maan amun fa cɛn nso be tran kpata’m be bo.+ Ɔ fata kɛ be kwlaa nga be ti Izraɛlifuɛ’m be tran kpata’m be bo. 43 I liɛ’n, amun mma’m be kwlaa bé sí kɛ,+ kɛ ń fá Izraɛlifuɛ mun Ezipti mɛn’n nun ń fíte’n, n yoli maan be trannin kpata’m be bo.+ N ti amun Ɲanmiɛn Zoova.’”

44 Ɔ maan Moizi kannin cɛn ng’ɔ fata kɛ be di be man Zoova titi’n be ndɛ kleli Izraɛlifuɛ mun.

24 Zoova seli Moizi ekun kɛ: 2 “Se Izraɛlifuɛ mun naan be fa olivie mma nga be sili’n i ngo jrɛiin be blɛ wɔ, ɔ ti kannin’m be liɛ. I liɛ’n, kannin’m bé júe titi.+ 3 Maan Aarɔn yo naan kannin’m be jue Zoova ɲrun nnɔsua lele nglɛmun tannin sua mɔ Ɲanmiɛn yi i wun nglo nun’n i nun, rido’n i ɲrun lɛ, kan Mmla’n* i alaka’n wo lɛ’n. Ɔ ti mmla kun m’ɔ́ ká lɛ tititi blɛ kwlaa nun-ɔn. 4 Maan ɔ fa kannin mun siesie kannin siewlɛ+ mɔ be fali sika ɔkwlɛ jrɛiin be yoli’n su sɛsɛsɛ Zoova ɲrun titi.

5 “Fa sanmlɛn mlɛnnɛnnɛn kpa tɔn kpanwun kukluuklu* blu-nin-nɲɔn (12), fa sanmlɛn efa kun mɔ be bubuli nun blu’n i bue nɲɔn* fa tɔn kpanwun kun. 6 Fa be siesie be wiengu su sɔ ɲanman nɲɔn, siesie be nsiɛnnsiɛn+ tabli mɔ be fali sika ɔkwlɛ jrɛiin be yoli’n su, Zoova ɲrun.+ 7 Fa ansan ufue jrɛiin fa guɛ i kpanwun ɲanman’m be tinuntinun be su, yɛ bé yrɛ́ i sin su bé mán Zoova, ɔ ti kpanwun nga be fa man Ɲanmiɛn’n i nzɔliɛ.*+ 8 Wunmiɛn-lolɛ-cɛn kwlaa nun’n, maan ɔ fa be siesie Zoova ɲrun titi.+ Ɔ ti aenguɛ kun mɔ e nin Izraɛlifuɛ mun e trali m’ɔ́ ká lɛ tititi-ɔ. 9 Ɔ ti Aarɔn nin i mma’m be liɛ,+ maan be di i lika kun m’ɔ ti Ɲanmiɛn liɛ klonglo’n nun.+ Afin be fɛli i ninnge nga be yra be sin su be man Zoova’n be nun. Ɔ ti Ɲanmiɛn ɲrun jranfuɛ’n i ɲrun like kun m’ɔ ti i liɛ ngunmin-ɔn, ɔ ti Ɲanmiɛn liɛ klonglo. Mmla sɔ’n ɔ́ ká lɛ tititi.”

10 Izraɛli bla kun nin Ezipti bian kun be le ba yasua kun.+ Cɛn kun’n, utre tɔli be wa yasua’n nin Izraɛli bian kun be afiɛn nanmue’n nun. 11 Izraɛli bla’n i wa yasua’n kannin Dunman’n* i ndɛ tɛtɛ, yɛ ɔ boli i sannzan.*+ Ɔ maan be fɛ i ɔli Moizi sin.+ Be flɛ i nin’n kɛ Selomiti, ɔ ti Dibri m’ɔ fin Dan akpasua’n su’n i wa bla. 12 Be fɛ i sieli i lika kun nun, lele naan Zoova w’a kan like ng’ɔ fata kɛ be fa yo i’n, i ndɛ weiin w’a kle be.+

13 I sin’n, Zoova seli Moizi kɛ: 14 “Fa sran ng’ɔ boli sannzan’n kɔ nanmue’n i sin lɔ, yɛ maan be nga be tili ndɛ ng’ɔ kannin’n be fa be sa fuɛ i ti’n su. I sin’n, maan Izraɛlifuɛ’m be kwlaa be finfin i yɔbuɛ.+ 15 Kpɛkun se Izraɛlifuɛ’m be kɛ: ‘Sɛ sran kun bo i Ɲanmiɛn’n i sannzan’n, ɔ́ ɲɛ́n i sa tɛ’n i nuan like. 16 Ɔ maan sran ng’ɔ kan Zoova i dunman’n i ndɛ tɛtɛ’n, ɔ fata kɛ be kun i, nán be yaci i lɛ.+ Ɔ fata kɛ Izraɛlifuɛ’m be kwlaa be finfin i yɔbuɛ, nán be yaci i lɛ. Sɛ aofuɛ-o, sɛ Izraɛlifuɛ-o, sran kwlaa ng’ɔ kan Dunman’n i ndɛ tɛtɛ’n, maan be kun i.

17 “‘Sɛ sran kun kun sran’n, maan be kun i wie, nán be yaci i lɛ.+ 18 Sɛ sran kun fin klɔ nnɛn kun like naan ɔ kun i’n, maan ɔ fa uflɛ sie i osu. 19 Sɛ sran kun yo i wiengu i like yaya’n, maan be yo i like kunngba sɔ’n wie.+ 20 Sɛ ɔ bu i wiengu i lika wie’n, maan be bu i liɛ’n wie, sɛ ɔ bo i ɲinma’n maan be bo i liɛ’n wie, sɛ ɔ bu i je’n maan be bu i liɛ’n wie, like yaya kwlaa ng’ɔ fa yo sran’n maan be fa yo i wie.+ 21 Sran ng’ɔ fin nnɛn kun like naan ɔ kun i’n, maan ɔ fa uflɛ sie i osu.+ Sanngɛ sran ng’ɔ fin sran kun like naan ɔ kun i’n, maan be kun i wie.+

22 “‘I aofuɛ-o, i Izraɛlifuɛ-o, mmla kunngba’n yɛ bé fá dí be jɔlɛ-ɔ.+ Afin n ti amun Ɲanmiɛn Zoova.”’

23 I sin’n, Moizi kannin ndɛ kleli Izraɛlifuɛ mun, kpɛkun be fali sran ng’ɔ boli sannzan’n be ɔli nanmue’n i sin lɔ, yɛ be finfinnin i yɔbuɛ.+ Ɔ maan Izraɛlifuɛ’m be niannin ndɛ nga Zoova kan kleli Moizi’n su be yoli.

25 Zoova kannin ndɛ kleli Moizi ekun Sinai Oka’n su lɔ, ɔ seli i kɛ: 2 “Kan ndɛ kle Izraɛlifuɛ mun, se be kɛ: ‘Sɛ amun ju mɛn nga n su fa man amun’n i nun lɔ’n,+ amun yaci asiɛ’n i lɛ naan ɔ lo wunmiɛn, yɛ amun di wunmiɛn-lolɛ-cɛn’n be man Zoova.+ 3 Fa afuɛ nsiɛn fa lua like ɔ fie’n nun, yɛ fa afuɛ nsiɛn fa kpɛkpɛ ɔ viɲin’m be su, kpɛkun kpɛ ɔ fie’n su ninnge mun.+ 4 Sanngɛ maan afuɛ nso su’n yo asiɛ’n i wunmiɛn lolɛ afuɛ ngunmin kun, ɔ ti Zoova i wunmiɛn lolɛ afuɛ. Ɔ fataman kɛ a lua like ɔ fie’n nun, yɛ nán kpɛkpɛ ɔ viɲin’m be su. 5 Kɛ á kpɛ́ ɔ fie’n su ninnge mun’n, ninnge’m be mma nga be kali lɔ mɔ be bɔbɔ be fifili’n, nán titi be su mma mun, yɛ nán titi ɔ viɲin mɔ w’a kpɛkpɛman be su’n be su mma mun. Maan asiɛ’n lo wunmiɛn afuɛ klonglo kun. 6 Sanngɛ asiɛ’n i wunmiɛn lolɛ blɛ nun’n, ninnge nga be fifi’n, amun kwla di. A nin ɔ kanga yasua nin ɔ kanga bla mun, ɔ nin ɔ junman difuɛ nga a tuɛ i kalɛ’n, ɔ nin aofuɛ nga be nin wɔ tran’n amun kwla di, 7 klɔ nnɛn nin blo nnɛn nga be o ɔ mɛn’n nun’n be kwla di wie. Like kwlaa ng’ɔ fifi amun mɛn’n nun’n, be kwla di.

8 “‘Amun ka wunmiɛn lolɛ afuɛ nso, afuɛ nso sɔ kpɛ nso, yɛ wunmiɛn lolɛ afuɛ nso sɔ’n i kwlaa yó afuɛ ablanan-nin-ngwlan (49). 9 Anglo nso su’n i cɛn ba blu su’n, bo awɛ’n kekle kpa. Sa Tɛ’n i Ti Kpatalɛ Cɛn’n nun’n,+ ɔ fata kɛ a bo awɛ’n, maan be ti i tɛlɛ’n ɔ mɛn’n i lika kwlaa. 10 Afuɛ ablenun (50) su’n ti Ɲanmiɛn liɛ klonglo, amun bo i jɔ nvle’n nun, amun se nvle’n nunfuɛ’m be kwlaa kɛ b’a ɲan be ti.+ Ɔ́ yó amun Ti Ɲanlɛ Afuɛ, amun asiɛ’m bé sá be sin bé yó amun liɛ ekun, yɛ amún sá amun sin amun awlo’m be nun.+ 11 Afuɛ ablenun (50) su’n yó amun Ti Ɲanlɛ Afuɛ. Amun su luaman like, yɛ amun fie’m be su ninnge’m be mma nga be kali lɔ mɔ be bɔbɔ be fifili’n, amun su titiman be su mma mun, yɛ amun viɲin mɔ amun a kpɛkpɛman be su’n, amun su titiman be su mma mun.+ 12 Ɔ ti be Ti Ɲanlɛ Afuɛ. Maan ɔ yo Ɲanmiɛn liɛ klonglo. Amun mɛn’n nun ninnge nga be bɔbɔ be fifili’n be ngunmin be su mma mun yɛ amun kwla di-ɔ.+

13 “‘Amun Ti Ɲanlɛ Afuɛ sɔ’n nun’n, amun asiɛ’m bé sá be sin bé yó amun liɛ ekun.+ 14 Sɛ á yó like wie atɛ ɔ wiengu kun sa nun’n annzɛ á tó like wie i sa nun’n, nán amun di amun wiengu lufle.+ 15 Sɛ á tó like wie ɔ wiengu kun sa nun’n, nian be Ti Ɲanlɛ Afuɛ ng’ɔ sinnin’n i afuɛ nga w’a di’n su, yɛ maan sran ng’ɔ yo i atɛ’n ɔ nian afuɛ nga ɔ́ wá fá kpɛ́ fie su ninnge mun’n be su naan w’a di i gua’n.+ 16 Sɛ afuɛ ng’ɔ ka’n te sɔn’n, ɔ kwla ukɛ i gua’n su, yɛ sɛ afuɛ ng’ɔ ka’n w’a sɔnman’n, maan ɔ ti i gua’n su. Afin fie su ninnge nga bé wá sú’n, yɛ ɔ su yo be atɛ ɔ sa nun-ɔn. 17 Nán amun nun wie fi di i wiengu lufle,+ ɔ fata kɛ amun sro amun Ɲanmiɛn’n,+ afin n ti amun Ɲanmiɛn Zoova.+ 18 Sɛ amun nanti min mmla’m be su’n, yɛ sɛ amun fa ndɛ nga n kan’n su’n, amún trán fɔuun mɛn’n nun.+ 19 Amun mɛn’n nun ninnge’m bé yó ye,+ amún dí like lele amun ku yí, yɛ amún trán mɛn’n nun fɔuun.+

20 “‘Sanngɛ amun kwla usa amun wun kɛ: “?Sɛ y’a luaman like, annzɛ y’a timan e ninnge’m be su mma’n, ngue yɛ é dí i afuɛ nso su’n nun-ɔn?”+ 21 Ń má yrá amun su afuɛ nsiɛn su’n nun, yɛ amun fie’m be su ninnge nga amún títí’n bé jú amun, afuɛ nsan liɛ.+ 22 I sin’n, amún lúa ninnge mun afuɛ mɔcuɛ su’n nun, yɛ amún dí ninnge nga amun kpɛli be laa’n lele ɔ́ fá jú afuɛ ngwlan’n su. Ka naan amun a kpɛ amun ninnge mun’n, amún dí laa liɛ’n.

23 “‘Nán amun yo asiɛ’n i atɛ naan ɔ ka sran kun sa nun mlɔnmlɔn.+ Afin asiɛ’n ti min bɔbɔ min liɛ.+ Yɛ amun ti aofuɛ min ɲrun.+ 24 Mɛn ng’ɔ́ wá yó amun liɛ’n nun lɔ’n, sɛ sran kun yo i asiɛ’n i atɛ’n, maan ɔ ɲan atin to i ekun.

25 “‘Sɛ ɔ niaan wie kaci yalɛfuɛ naan ɔ fata kɛ ɔ yo i asiɛ’n i bue atɛ’n, maan i ti kpɔfuɛ m’ɔ ti i osufuɛ ng’ɔ mɛntɛn i koko’n, ɔ bla naan ɔ to like nga i niaan bian’n yoli i atɛ’n.+ 26 Sɛ sran kun leman sran kpɔmɛn i ti’n, sɛ ɔ kaci aɲanbeunfuɛ naan ɔ kwla ɲan sika to i asiɛ’n ekun’n, 27 maan ɔ nian blɛ nga kɛ ɔ yoli asiɛ’n i atɛ’n w’a di’n su naan ɔ kɛ i ti sika’n, yɛ maan ɔ yi sika’n i ng’ɔ ka’n ɔ fa man sran ng’ɔ yoli asiɛ’n i atɛ i sa nun’n. I sin’n, asiɛ’n sɛ́ i sin yó i liɛ ekun.+

28 “Sanngɛ sɛ w’a kwlá ɲanman alaje naan w’a to i asiɛ’n ekun’n, like ng’ɔ yoli i atɛ’n ká sran ng’ɔ toli’n i sa nun lele be Ti Ɲanlɛ Afuɛ’n jú.+ Be Ti Ɲanlɛ Afuɛ’n nun yɛ ɔ́ ɲɛ́n i-ɔ, asiɛ’n sɛ́ i sin yó i liɛ ekun.+

29 “‘Sɛ sua kun o klɔ kun mɔ be sisili i wun’n nun’n, naan sran kun yo i atɛ’n, kɛ ɔ fɛ i cɛn m’ɔ yoli sua’n i atɛ lele m’ɔ́ fá dí afuɛ kun’n, ɔ le atin kpɔ i ti. Atin ng’ɔ le i kpɔ sua’n i ti’n,+ ɔ́ dí afuɛ klonglo kun. 30 Sanngɛ sɛ sran’n w’a kwlá tomɛn i sua’n ekun naan afuɛ nuan yia’n, sua sɔ m’ɔ o klɔ mɔ be sisili i wun’n nun’n, ɔ́ káci sran ng’ɔ toli’n i liɛ mlɔnmlɔn. Be Ti Ɲanlɛ Afuɛ’n nun’n, be su fa mɛnmɛn i. 31 Sanngɛ sua nga be o klɔ nga b’a sisiman be wun’n be nun’n be liɛ’n, be ti kɛ nvle’n nun fie mun sa. Be kwla kpɔ be ti blɛ kwlaa nun, yɛ be Ti Ɲanlɛ Afuɛ’n nun’n, bé fá sua’n bé mán.

32 “‘Levifuɛ’m be sua nga be o be klɔ’m be su’n be liɛ’n,+ Levifuɛ’m be le atin be kpɔ be ti blɛ kwlaa nun. 33 Sɛ b’a kwlá kpɔman Levifuɛ’m be sua wie ti’n, be Ti Ɲanlɛ Afuɛ’n nun’n, bé fá sua mɔ be yoli i atɛ m’ɔ o Levifuɛ’m be klɔ’n su’n bé mán.+ Afin sua nga be o Levifuɛ’m be klɔ’m be su’n be yɛ be ti like mɔ Levifuɛ’m be le i Izraɛlifuɛ’m be afiɛn-ɔn.+ 34 Asa ekun’n, ɔ fataman kɛ be yo asiɛ ng’ɔ sin yia be klɔ mun’n+ be atɛ, afin ɔ ti be liɛ mlɔnmlɔn.

35 “‘Sɛ ɔ niaan m’ɔ o ɔ wun lɛ’n kaci yalɛfuɛ naan ɔ kwlá niɛnmɛn i wun lika’n, ɔ fata kɛ a suɛn i bo,+ kɛ ng’ɔ fata kɛ a suan aofuɛ ng’ɔ tran amun afiɛn’n, annzɛ sran kun m’ɔ tran amun mɛn’n nun’n i bo’n sa.+ I liɛ’n, ɔ́ ká nguan nun amun afiɛn. 36 Nán se i kɛ ɔ su i bo annzɛ nán fɛ i kunndɛ ɔ sika.+ Ɔ fata kɛ a sro ɔ Ɲanmiɛn’n,+ i liɛ’n ɔ niaan’n ɔ́ ká nguan nun amun afiɛn. 37 Sɛ a bo i bosia’n, nán se i kɛ ɔ su i bo,+ annzɛ nán fa ɔ aliɛ’n mɛn i naan kunndɛ kɛ á ɲán nun like. 38 N ti amun Ɲanmiɛn Zoova, min yɛ n fali amun Ezipti mɛn’n nun n fiteli+ naan ń fá Kanaan mɛn’n ń mán amun naan ń klé amun kɛ n ti amun Ɲanmiɛn’n niɔn.+

39 “‘Sɛ ɔ niaan m’ɔ o ɔ wun lɛ’n kaci yalɛfuɛ naan ɔ fata kɛ ɔ yo i wun atɛ ɔ sa nun’n,+ ɔ fataman kɛ a miɛn i kɛ ɔ di kanga junman.+ 40 Ɔ fata kɛ a fɛ i kɛ junman difuɛ mɔ be tuɛ i kalɛ’n sa,+ annzɛ kɛ sran kun m’ɔ tran ɔ mɛn’n nun’n sa. Maan ɔ di junman ɔ sa nun lele fa ju be Ti Ɲanlɛ Afuɛ’n nun. 41 I sin’n, ɔ́ yáci wɔ kɔ́. Ɔ nin i mma mun bé kɔ́ be awlo. Maan ɔ sɛ i sin i nannan’m be asiɛ’n su.+ 42 Afin be ti min kanga mɔ n toli be Ezipti mɛn’n nun-ɔn.+ Ɔ fataman kɛ be yo be wun atɛ kɛ nga be fa yo kanga kun i atɛ’n sa. 43 Ɔ fataman kɛ a yo i tɛtɛ,+ ɔ fata kɛ a sro ɔ Ɲanmiɛn’n.+ 44 Maan ɔ kanga yasua nin ɔ kanga bla’m be yo nvle nga be mantan wɔ’n be nunfuɛ. Nvle sɔ’m be nunfuɛ’m be sa nun yɛ a kwla to kanga yasua kun annzɛ kanga bla kun-ɔn. 45 Asa ekun’n, amun kwla to amun kanga mun aofuɛ nga be tran amun afiɛn’n+ be mma’m be nun, ɔ nin be awlofuɛ nga be wuli be amun mɛn’n nun’n be nun, yɛ bé káci amun liɛ. 46 Amun yaci be man amun mma mɔ bé wá bá amun sin’n, naan be kaci be aja like mlɔnmlɔn. Amun fa be kɛ junman difuɛ sa, sanngɛ ɔ fataman kɛ a yo ɔ niaan Izraɛlifuɛ kun i tɛtɛ.+

47 “‘Sanngɛ sɛ aofuɛ kun annzɛ sran m’ɔ tran amun nvle’n nun’n ɔ kaci aɲanbeunfuɛ’n, naan ɔ niaan m’ɔ o i wun lɛ’n kaci yalɛfuɛ naan ɔ fata kɛ ɔ yo i wun atɛ aofuɛ’n i sa nun’n, annzɛ sran m’ɔ tran amun nvle’n nun’n i sa nun’n, annzɛ ɔ yo i wun atɛ aofuɛ m’ɔ tran amun afiɛn’n i osufuɛ wie i sa nun’n, 48 kɛ ɔ ko yo i wun atɛ’n, ɔ le atin kpɔ i ti blɛ kwlaa nun. I niaan’m be nun kun kwla kpɔ i ti,+ 49 annzɛ i si i niaan bian, annzɛ i si i niaan bian i wa yasua kwla kpɔ i ti, annzɛ i osufuɛ kwlaa ng’ɔ mɛntɛn i koko’n, * i awlofuɛ kun kwla kpɔ i ti.

“‘Annzɛ sɛ i bɔbɔ kaci aɲanbeunfuɛ’n, ɔ kwla kpɔ i bɔbɔ i ti.+ 50 Maan ɔ nin sran ng’ɔ toli i’n be ka afuɛ nga be o afuɛ ng’ɔ yoli i wun atɛ i sa nun’n, ɔ nin be Ti Ɲanlɛ Afuɛ’n+ be afiɛn’n nun’n. Afuɛ sɔ’m be su yɛ bé nían bé dí i gua-ɔ.+ Sika nga be fa man junman difuɛ kun mɔ be tuɛ i kalɛ’n i su yɛ bé nían bé ká blɛ ng’ɔ fa dili junman’n i nuan sika’n niɔn.+ 51 Sɛ afuɛ ng’ɔ ka’n te sɔn’n, maan ɔ nian afuɛ ng’ɔ ka’n su naan ɔ yi i ti kpɔlɛ sika’n. 52 Sanngɛ sɛ afuɛ ng’ɔ ka naan be Ti Ɲanlɛ Afuɛ’n w’a ju’n w’a sɔnman’n, maan ɔ nian afuɛ ng’ɔ ka’n su naan ɔ ka sika ng’ɔ fata kɛ ɔ fa kpɔ i ti’n, yɛ maan ɔ yi man. 53 Blɛ kwlaa ng’ɔ́ dí junman i min’n i sa nun’n, maan ɔ fɛ i kɛ junman difuɛ mɔ be tuɛ i kalɛ’n sa. Ɔ fata kɛ a nian su kpa naan i min’n w’a yomɛn i tɛtɛ.+ 54 Sanngɛ sɛ w’a kwlá kpɔmɛn i ti blɛ sɔ’n nun’n, sɛ be Ti Ɲanlɛ Afuɛ’n ju’n, ɔ́ ɲɛ́n i ti kɔ́,+ ɔ nin i mma mun.

55 “‘Afin Izraɛlifuɛ’m be ti min bɔbɔ min kanga. Be ti min kanga mɔ n fali be Ezipti mɛn’n nun n fiteli-ɔ.+ N ti amun Ɲanmiɛn Zoova.

26 “‘Nán amun yo amuin mɔ be timan like fi’n,+ nán amun sɛ like wie+ annzɛ amun taka yɔbuɛ nga be sɔ be’n,+ nán amun taka like wie mɔ be fali yɔbuɛ be yoli’n amun mɛn’n nun kɛ amún kóto i bo.+ Afin n ti amun Ɲanmiɛn Zoova. 2 Maan amun di min wunmiɛn-lolɛ-cɛn’m be su, yɛ amun bu min sua’n i like dan.* N ti Zoova.

3 “‘Sɛ amun fa min mmla’m be su titi’n, yɛ sɛ amun fa ndɛ nga n kan’n su naan amun nian su nanti’n,+ 4 ń má yó maan kɛ nzue’n i tɔlɛ blɛ ju’n ɔ́ tɔ́,+ yɛ asiɛ’n i su ninnge’m bé yó ye,+ yɛ fie’m be su waka’m bé sú mma. 5 Amún bó amun ble’n lele fá jú viɲin mma tilɛ blɛ’n nun, yɛ amún tí amun viɲin’n i su mma mun lele fá jú ninnge’m be lualɛ blɛ’n nun. Amún dí like* lele amun ku yí, yɛ amún trán fɔuun amun mɛn’n nun.+ 6 Ń má yó maan amun mɛn’n i nun jɔ́ fɔuun,+ amún lá diin yɛ sran fi su wlaman amun srɛ.+ Ń yí blo nnɛn wlɛfuɛ nga be o amun mɛn’n nun’n, yɛ alɛ kunlɛ tokofi’n su sinman amun mɛn’n nun. 7 Amún fúan amun kpɔfuɛ mun, be su kwlá jranman amun ɲrun, amún kún be nin tokofi. 8 Amun nun sran nnun bé fúan be nun sran ya (100), yɛ amun nun sran ya (100) bé fúan be nun sran akpi blu (10.000). Ɔ maan amun kpɔfuɛ’m be su kwlá jranman amun ɲrun, amún kún be nin tokofi.+

9 “‘Ń yrá amun su,* ń yó maan amún wú ba kaka, yɛ amún sɔ́n.+ Ń dí aenguɛ nga e nin amun e trali’n+ su titi. 10 Ninnge nga amun kpɛ be afuɛ kun nun’n, amun su wieman be di naan afuɛ uflɛ liɛ’n w’a fite. Amún yí laa liɛ mun yɛ amún fá uflɛuflɛ’n bé síe i osu. 11 Ń fá min tannin sua’n ń síe i amun afiɛn.+ Yɛ n su yiman amun blo. 12 E nin amun é nánti, ń káci amun Ɲanmiɛn+ yɛ amun kusu amún káci min nvle.+ 13 N ti amun Ɲanmiɛn Zoova, n fali amun Ezipti mɛn’n nun fiteli naan amun a yoman be kanga kun, yɛ n bubuli amun kɔmin su waka’n nun, n yoli maan kɛ amún nánti’n amun kɔmin’n jin su.

14 “‘Sanngɛ sɛ amun a tieman min ndɛ’n, annzɛ amun a faman min mmla’m be su’n,+ 15 sɛ amun kpalo min mmla mun’n,+ yɛ sɛ ndɛ nga n kan’n yo amun tɛ naan amun nantiman min mmla’m be kwlaa be su’n, sɛ amun diman aenguɛ nga e nin amun e trali’n+ su’n, 16 n kusu ń yó maan sa nga’m bé tɔ́ amun su: Ń fá sa kekle wie mun ń yí amun su ń fá tú amun fɔ, ń fá tanngɔ ufue ń yí amun su, ayrɛ dan kpa gúa amun wun, ɔ maan amun ɲinma’m bé glɔ́glɔ́, yɛ amún wunmiɛn’n wíe. Like nga amun lua’n, amún lúɛ i ngbɛn. Afin amun kpɔfuɛ mun yɛ bé dí-ɔ.+ 17 E nin amun é ɲɛ́n i, kpɛkun amun kpɔfuɛ’m bé kwlá amun.+ Be nga be kpɔ amun’n bé yó amun tɛtɛ.+ Amún wánndi kusu nn sran fi fuanman amun.+

18 “‘Sɛ ɔ nin i sɔ ngba’n, amun sieman amun su tieman min ndɛ’n, fɔ nga ń má tú amun’n i kekle’n trá sa tɛ nga amun yoli’n i kpɛ nso. 19 Ń yó maan amun wun tulɛ beblebe’n ɔ́ wíe, yɛ ń yó maan ɲanmiɛn su lɔ’n káci kɛ blalɛ sa,+ yɛ asiɛ’n káci kɛ aaba sa. 20 Amún klé amun wun yalɛ ngbɛn, afin amun asiɛ’n i su ninnge’m be su yoman ye,+ yɛ amun mɛn’n nun waka’m be su suman mma.

21 “‘Sanngɛ sɛ amun te kaci amun sin te si min naan amun tieman min ndɛ’n, fɔ nga ń tú amun’n ɔ́ trá laa liɛ’n i kpɛ nso, amun sa tɛ’m be ti. 22 Ń má súnman blo nnɛn nga be o fie’m be su’n amun afiɛn,+ bé wá yó maan amun mma’m bé fí amun sa,+ bé núnnún amun klɔ nnɛn mun, bé yó maan amún ká kaan, yɛ amun atin’m be su tɔ́ srolo.+

23 “‘Sɛ ɔ nin i sɔ ngba’n amun sɔman fɔ nga n tu amun’n nun+ naan amun te kaci amun sin te si min’n, 24 n kusu ń káci min sin ń sí amun, yɛ n bɔbɔ ń tú amun fɔ kpɛ nso, amun sa tɛ’m be ti. 25 Kɛ mɔ amun a diman aenguɛ’n+ su’n ti’n, ń fá tokofi ń tú min klunngbɔ amun su. Sɛ amun wanndi kɔ amun klɔ’m be su’n, ń yó maan tukpacɛ tɔ́ amun su,+ kpɛkun bé fá amun wlá amun kpɔfuɛ’n i sa nun.+ 26 Kɛ n ko saci amun kpanwun* nga amun fa be sieli’n,*+ bla blu bé tɔ́n amun kpanwun’n fuu kunngba nun, bé súnnzun yɛ bé fɛ́ i kanngan yɛ bé fá mán amun-ɔn.+ Ɔ maan amún dí, sanngɛ amun ku su yiman.+

27 “‘Sɛ ɔ nin i sɔ ngba’n amun tieman min ndɛ’n, naan amun te kaci amun sin te si min’n, 28 ń káci n sin ń sí amun tɛ kpa,+ yɛ n bɔbɔ ń tú amun fɔ kpɛ nso, amun sa tɛ’m be ti. 29 Ɔ maan amún dí amun mma yasua’m be nnɛn’n, yɛ amún dí amun mma bla’m be nnɛn’n.+ 30 Ń núnnún amun amuin sɔwlɛ mun,*+ ń búbú amun ansan yrawlɛ mun, yɛ ń tían amun fuɛn’m be nuan amun amuin mɔ be ti like kain’n* mɔ n bubuli be’n be su.+ Kpɛkun amun wun m’ɔ́ yó min tɛ’n ti’n, min ɲin tú amun su.+ 31 Ń fá tokofi ń núnnún amun klɔ mun,+ yɛ amun sua’m bé tɔ́ srolo, kpɛkun tɛ nga amun yi be mɔ be bɔn fannin’n* n su nianman be lɔ. 32 N bɔbɔ ń yó maan amun mɛn’n tɔ́ srolo.+ Kɛ amun kpɔfuɛ nga be tran nun’n bé wún i sɔ’n be nuan bó be wun.+ 33 Ń má yó maan amún bó sánndi nvlenvle’m be nun,+ ń yí min tokofi’n yɛ e nin amun é kún,+ ɔ maan amun mɛn’n tɔ́ srolo,+ yɛ amun klɔ’m bé núnnún.

34 “‘Blɛ nga amún dí i amun kpɔfuɛ’m be lɔ mɔ amun mɛn’n tɔ́ srolo’n, asiɛ’n wá ló wunmiɛn. Blɛ sɔ’n nun’n, asiɛ’n ló wunmiɛn,* ɔ́ yí wunmiɛn lolɛ kalɛ ng’ɔ o i su’n.+ 35 Blɛ mɔ amun mɛn’n tɔ́ srolo’n, asiɛ’n ló wunmiɛn, afin i nun mɔ amun o asiɛ’n su’n, amun wunmiɛn-lolɛ-cɛn’m be nun’n, w’a loman wunmiɛn.

36 “‘Be nga bé ká nguan nun’n,+ ń yó maan bé wla bó be wun be kpɔfuɛ’m be mɛn’n nun lɔ. Ɔ maan nɲa mɔ aunmuan’n keje i sa’n i tɛlɛ’n ti’n, bé wánndi. Bé wánndi kɛ sran mɔ be su i su nin tokofi sa, yɛ kannzɛ sran fi fuanman be’n bé tɔ́.+ 37 Kannzɛ sran fi fuanman be’n, bé tɔ́ be wiengu su kɛ sran mɔ be su wanndi tokofi ɲrun’n sa. Amun su kwlá jranman amun kpɔfuɛ’m be ɲrun.+ 38 Amún wú nvlenvle’m be nun,+ amún wú amun kpɔfuɛ’m be mɛn’n nun. 39 Amun nun nga bé ká’n, bé yó koklo be kpɔfuɛ’m be mɛn’n+ nun be fɔnlɛ’m be ti. Nanwlɛ, bé yó koklo be si’m be fɔnlɛ’m be ti.+ 40 I sin’n, bé dí be bɔbɔ be fɔnlɛ’n i nanwlɛ,+ yɛ bé dí be si’m be fɔnlɛ’n nin be sa tɛ’n i nanwlɛ, bé dí i nanwlɛ kɛ be nin min b’a nantiman klanman, yɛle kɛ be kacili be sin sili min.+ 41 I sɔ’n ti’n, n kusu n kacili min sin n sili be,+ n fa be ɔli be kpɔfuɛ’m be mɛn’n nun lɔ.+

“‘Atrɛkpa’n be awlɛn’n su keteman kun,*+ ɔ maan bé kán be wun ase, bé túa be sa tɛ’n i ti kalɛ. 42 Ɔ maan min wla kpɛ́n aenguɛ nga e nin Zakɔbu e trali’n+ su, nin aenguɛ nga e nin Izaaki e trali’n+ su, nin aenguɛ nga e nin Abraamun e trali’n+ su, yɛ min wla kpɛ́n mɛn’n su. 43 Kɛ bé yáci asiɛ’n i lɛ bé kɔ́’n, asiɛ’n yí wunmiɛn lolɛ kalɛ ng’ɔ o i su’n,+ ɔ́ tɔ́ srolo, be su tranman su. Bé túa be fɔnlɛ’n i ti kalɛ, afin b’a faman ndɛ nga n kan’n su, yɛ min mmla’m be yoli be tɛ.+ 44 Ɔ nin i sɔ ngba’n blɛ mɔ be o be kpɔfuɛ’m be mɛn’n nun lɔ’n, n su yiman be blo mlɔnmlɔn,+ yɛ n su yoman naan be nunnun mlɔnmlɔn. Sɛ n yo sɔ’n nn m’an diman aenguɛ+ nga e nin be e trali’n su. N ti be Ɲanmiɛn Zoova. 45 Be dunman nun ti’n, aenguɛ nga e nin be nannan mun e trali’n, min wla kpɛ́n su.+ N fali be nannan mun Ezipti mɛn’n nun n fiteli nvlenvle’m be ɲrun+ naan ń klé kɛ n ti be Ɲanmiɛn. N ti Zoova.’”

46 Atin nga Zoova kleli’n, nin ndɛ ng’ɔ kannin’n ɔ nin mmla ng’ɔ sinnin Moizi lika fa mannin Izraɛlifuɛ mun Sinai Oka’n su lɔ’n,+ be yɛ be o lɛ-ɔ.

27 Zoova seli Moizi ekun kɛ: 2 “Kan ndɛ kle Izraɛlifuɛ mun, se be kɛ: ‘Sɛ sran kun ta nda kun m’ɔ ti i liɛ ngunmin+ kɛ ɔ́ fá sika mán Zoova naan ɔ́ fá kpɔ́ sran kun ti’n, 3 yasua kwlaa ng’ɔ le afuɛ ablaɔn (20) lele m’ɔ́ fá jú afuɛ ablesiɛn’n (60), i ti sika’n yó sikli ablenun (50).* Maan be nian Ɲanmiɛn i sua’n nun lɔ sikli liɛ’n* su be sunnzun. 4 Sanngɛ sɛ ɔ ti bla’n, i ti sika’n yó sikli ablasan (30). 5 Sran kwlaa ng’ɔ le afuɛ nnun lele m’ɔ́ fá jú afuɛ ablaɔn’n (20), sɛ ɔ ti yasua’n i ti sika’n yó sikli ablaɔn (20), yɛ sɛ ɔ ti bla’n i ti sika’n yó sikli blu. 6 Sran kwlaa ng’ɔ le anglo kun lele m’ɔ́ fá jú afuɛ nnun’n, sɛ ɔ ti yasua’n i ti sika’n yó sikli nnun, yɛ sɛ ɔ ti bla’n i ti sika’n yó sikli nsan.

7 “‘Sran kwlaa ng’ɔ le afuɛ ablesiɛn’n (60), sɛ ɔ ti yasua’n i ti sika’n yó sikli blu-nin-nnun (15), yɛ sɛ ɔ ti bla’n i ti sika’n yó sikli blu. 8 Sɛ sran’n ti yalɛfuɛ dan naan ɔ kwlá yiman sika’n,+ ɔ́ kɔ́ Ɲanmiɛn ɲrun jranfuɛ’n i ɲrun kpɛkun Ɲanmiɛn ɲrun jranfuɛ’n bó i ti sika’n. Ɲanmiɛn ɲrun jranfuɛ’n nían like nga sran ng’ɔ tali nda’n ɔ kwla yi’n su naan w’a bo i ti sika’n.+

9 “‘Sɛ nnɛn nga ɔ nin Zoova i fa manlɛ fata’n yɛ sran’n tali nda kɛ ɔ́ fá mán’n, like kwlaa ng’ɔ́ fá mán Zoova’n, ɔ́ káci i liɛ klonglo. 10 Ɔ fataman kɛ ɔ fa nnɛn uflɛ sie i osu annzɛ ɔ kaci i. Nán ɔ se kɛ ɔ́ fá nnɛn ng’ɔ ti kpa’n ɔ́ káci ng’ɔ timan kpa’n, annzɛ ɔ́ fá nnɛn ng’ɔ timan kpa’n ɔ́ káci ng’ɔ ti kpa’n. Sanngɛ sɛ i waan ɔ́ fá nnɛn uflɛ káci i’n, klikli’n nin ng’ɔ fa kaci i’n be nɲɔn’n bé káci Ɲanmiɛn liɛ klonglo. 11 Sɛ ɔ ti nnɛn fiɛn kun+ mɔ be kwlá fa yiman tɛ manman Zoova’n, ɔ́ fá nnɛn’n kɔ́ Ɲanmiɛn ɲrun jranfuɛ’n i ɲrun. 12 Sɛ nnɛn’n ti kpa’n annzɛ ɔ timan kpa’n, Ɲanmiɛn ɲrun jranfuɛ’n nían su bó i gua’n. I gua nga Ɲanmiɛn ɲrun jranfuɛ’n bo’n i su yɛ ɔ́ ká-ɔ. 13 Sanngɛ sɛ ɔ kunndɛ kɛ ɔ́ tó i nnɛn’n ekun’n, maan ɔ bu nnɛn’n i gua’n nun nnun naan ɔ fɛ i bue kun uka i gua nga be boli’n su fa man.+

14 “‘Sɛ sran kun waan ɔ́ fɛ́ i sua’n mán Zoova naan ɔ yo i liɛ klonglo’n, sɛ ɔ ti kpa’n annzɛ ɔ timan kpa’n, Ɲanmiɛn ɲrun jranfuɛ’n nían su bó i gua’n. Sika nga Ɲanmiɛn ɲrun jranfuɛ’n bo’n yɛ ɔ́ yó i gua’n niɔn.+ 15 Sanngɛ sɛ sran ng’ɔ fɛli i sua’n mannin Ɲanmiɛn’n i waan ɔ́ tó i ekun’n, maan ɔ bu i gua’n nun nnun naan ɔ fɛ i bue kun uka su fa man, kpɛkun sua’n káci i liɛ ekun.

16 “‘Sɛ sran kun fɛ i fie ng’ɔ le i’n i bue man Zoova’n, like mma nga be kwla luɛ i fie’n su’n, sɛ ɔ sɔnnin annzɛ w’a sɔnman’n, i su yɛ bé nían bé bó i gua’n niɔn: Ɔɔzu mma ɔmɛɛ kun* i gua’n yó sika sikli ablenun (50). 17 Sɛ be Ti Ɲanlɛ Afuɛ’n+ nun yɛ sran’n fɛli i fie’n mannin Ɲanmiɛn’n, i gua nga be boli’n i su yɛ ɔ́ ká-ɔ. 18 Sɛ be Ti Ɲanlɛ Afuɛ’n sin ka naan sran’n w’a fɛ i fie’n w’a man Ɲanmiɛn’n, Ɲanmiɛn ɲrun jranfuɛ’n ká afuɛ ng’ɔ ka naan be Ti Ɲanlɛ Afuɛ uflɛ w’a ju’n, yɛ ɔ́ nían su bó i gua’n. Kpɛkun bé tí i gua’n su.+ 19 Sanngɛ sɛ sran’n kunndɛ kɛ ɔ́ tó i fie’n ekun’n, maan ɔ bu fie’n i gua’n nun nnun naan ɔ fɛ i bue kun uka su fa man. Yɛ fie’n kɛ́ i sa nun. 20 Sanngɛ sɛ w’a kpɔmɛn i fie’n i ti naan be yo i atɛ sran uflɛ sa nun’n, ɔ su kwlá tomɛn i kun. 21 Be Ti Ɲanlɛ Afuɛ’n nun’n bé fá fie’n mán, yɛ ɔ́ káci Zoova liɛ klonglo, ɔ ti fie kun mɔ be fa mɛnnin i mlɔnmlɔn-ɔn. Ɔ́ káci Ɲanmiɛn ɲrun jranfuɛ’m be liɛ.+

22 “‘Sɛ sran kun to fie kun m’ɔ timɛn i aja like+ naan i waan ɔ́ fá mán Zoova’n, 23 Ɲanmiɛn ɲrun jranfuɛ’n ká afuɛ ng’ɔ ka naan be Ti Ɲanlɛ Afuɛ’n w’a ju’n, kpɛkun ɔ́ nían su bó i gua’n.+ Yɛ sran’n fá sika’n mán cɛn kunngba sɔ’n nun. Ɔ ti Zoova liɛ klonglo. 24 Be Ti Ɲanlɛ Afuɛ’n nun’n, bé fá fie’n mán sran nga i sa nun yɛ ɔ toli’n, bé fá mán sran nga i liɛ yɛle asiɛ’n.+

25 “‘Ɲanmiɛn i sua’n nun lɔ sikli liɛ’n su yɛ bé nían bé bó ninnge’m be kwlaa be gua’n niɔn: Maan sikli’n ju gera ablaɔn (20).*

26 “‘Sanngɛ nán sran fi fa nnɛn kun i wa klikli’n man Ɲanmiɛn, afin nnɛn’m be mma klikli’m be ti Zoova liɛ.+ Maan ɔ wie nannin tola-o, annzɛ bua-o, ɔ ti Zoova liɛ laa.+ 27 Sɛ ɔ ti nnɛn nga be ti fiɛn’n be nun kun yɛ i waan ɔ́ nían sika nga be boli’n su kpɔ́ i ti’n, maan ɔ bu sika’n nun nnun naan ɔ fɛ i bue kun uka su fa man.+ Sanngɛ sɛ w’a kpɔmɛn i ti’n, bé nían sika nga be boli’n su bé yó i atɛ.

28 “‘Sanngɛ sɛ sran kun sie like kun i ngunmin kɛ ɔ́ fá mán Zoova mlɔnmlɔn’n,* be kwlá yomɛn i atɛ kun, yɛ be kwlá tomɛn i kun. Maan ɔ wie sran-o, annzɛ nnɛn-o, annzɛ fie-o. Like kwlaa nga be sie i ngunmin’n, ɔ ti Zoova liɛ klonglo.+ 29 Asa ekun’n, sran kwlaa nga be buli i fɔ* mɔ be sieli i ngunmin kɛ bé kún i’n, nán be kpɔ i ti.+ Maan be kun i, nán be yaci i lɛ.+

30 “‘Amun mɛn’n nun ninnge’m be kwlaa be blusu’n,+ maan ɔ wie fie’m be su ninnge mun-o, annzɛ waka’m be su mma mun-o, be ti Zoova liɛ. Be ti Zoova liɛ klonglo. 31 Sɛ sran kun waan ɔ́ kpɔ́ i ninnge’m be blusu’n be ti’n, maan ɔ bu be gua’n nun nnun naan ɔ fɛ i bue kun uka su fa man. 32 Nannin nin bua nin boli’m be blusu’n, like kwlaa ng’ɔ sin nnɛn kankanfuɛ kun i kpɔnman’n bo’n, nnɛn’n i blusu’n* ɔ́ káci Zoova liɛ klonglo. 33 Ɔ su nianman sɛ nnɛn’n ti kpa-o, annzɛ ɔ timan kpa-o. Asa kusu’n, ɔ su kacimɛn i. Sanngɛ sɛ i waan ɔ́ káci i’n, nnɛn klikli’n nin ng’ɔ́ fá káci i’n, be nɲɔn’n bé káci Ɲanmiɛn liɛ klonglo.+ Ɔ fataman kɛ ɔ kpɔ be ti.’”

34 Mmla nga Zoova fa mannin Moizi Sinai Oka’n su lɔ+ kɛ ɔ fa man Izraɛlifuɛ mun’n yɛ be o lɛ-ɔ.