NGWLƐ YILƐ
א [Alɛfu]*
1 Ɔo, klɔ mɔ laa’n i su sran’m be sɔnnin kpanngban kpa’n,+ siɛn’n w’a tɔ srolo.
Klɔ mɔ laa’n i yɛ nvlenvle’m be nun’n, sran kpanngban tran su’n,+ siɛn’n w’a kaci kɛ angbeti bla sa.
Klɔ m’ɔ ti kɛ wlengbi bla wie sa nvle onga’m be nun’n, siɛn’n be miɛn i fii kɛ ɔ di plɔtrɔ junman.+
ב [Bɛti]
2 Kɔnguɛ’n, ɔ sun lelele,+ i fuka’n ti ɲinmuɛn nzue ngunmin.
Be kwlaa nga be wuli i ti kpo’n, be nun wie fi nunman lɛ kun naan w’a fɔnvɔ i.+
I janvuɛ’m be kwlaa be kpɛli i bo waka,+ b’a kaci i kpɔfuɛ.
ג [Gimɛli]
3 Be trali Zida ɔli nvle uflɛ nun.+ Ɔ o awlabɔɛ nun. Kanga ng’ɔ su di’n, be flɛmɛn i kanga dilɛ.+
Ɔ fata kɛ ɔ tran nvlenvle’m be nun.+ Ɔ ɲanman wunmiɛn lolɛ lika bɔ kaan sa.
Blɛ mɔ ɔ́ wún ɲrɛnnɛn’n, i yalɛ klefuɛ’m be kwlaa be wa toli i.
ד [Dalɛti]
4 Siɔn i atin’m be o sɛ nun, afin sran fi kɔman cɛn dilɛ kun.+
I anuan’m be kwlaa b’a saci.+ I Ɲanmiɛn ɲrun jranfuɛ’m be su sun.
Lɔ talua’m* be klun timan jɔwa kaan sa. Yɛ klɔ’n i liɛ’n, awlabɔɛ’n w’a kun i kpo.
ה [E]
5 Siɛn’n, i ɲrun tanndanfuɛ mun yɛ b’a kaci i min’n niɔn. I kpɔfuɛ’m be klun titiman be kaan sa.+
Afin sa tɛtɛ kpanngban ng’ɔ yoli be’n ti’n, Zoova fali ɲrɛnnɛn yili i su.+
I kpɔfuɛ’m be trɛli i mma mun ɔli.+
ו [Vavu]
6 Siɔn i wa bla’n leman ɲrun kun.+
I sran dandan’m be ti kɛ flete yasua mɔ be leman didiwlɛ kun’n sa.
B’a fɛ kpa yɛ be nanti sran ng’ɔ su fuan be’n i ɲrun yɛ be kɔ-ɔ.
ז [Zayin]
7 Siɛn mɔ Zerizalɛmun su wun i ɲrun’n, m’ɔ leman tranwlɛ kun’n,
i wla kpɛn ninnge kpakpa ng’ɔ le be laa’n be su.+
Kɛ i sran’m be tɔli i ɲrun tanndanfuɛ’m be sa nun’n, mɔ w’a ɲanman ukafuɛ’n,+
i ɲrun tanndanfuɛ’m be wunnin i kpɛkun be srili i, tɔlɛ m’ɔ tɔli’n ti.+
ח [Ɛti]
8 Sa nga Zerizalɛmun yoli’n ti tɛ dan.+
I sɔ’n ti yɛ w’a yo kain sɔ-ɔ.
Be kwlaa nga be yɛyɛ i laa’n, i wun yo be tɛ siɛn’n afin be wunnin i wun kplɛn’n.+
Ɔ fɛfɛ+ kpɛkun ɲannzuɛn’n ti’n, ɔ to i ɲin blo.
ט [Tɛti]
9 I wun fiɛn’n w’a saci i tralɛ’n.
W’a buman ainman liɛ’n i akunndan.+
I tɔlɛ’n boli sran’m be nuan. Ɔ leman sran naan w’a fɔnvɔ i.
Ɔo Zoova, nian kɛ n wun ɲrɛnnɛn-ɔn. Afin min kpɔfuɛ’n dili i nuan.+
י [Yɔdu]
10 I ɲrun tanndanfuɛ’n fɛli i sa sieli i ninnge kpakpa kwlaa su.+
Ɔ wunnin kɛ nvle wie’m be nunfuɛ’m be wluli Ɲanmiɛn sua’n nun.+
Nvle sɔ mun yɛ a kannin be ndɛ seli kɛ ɔ fataman kɛ i nunfuɛ’m be nin ɔ sran’m be yia’n niɔn.
כ [Kafu]
11 I sran’m be kwlaa be fɛfɛ. Be wlan kunndɛ kpanwun kan.+
Be fa be ninnge kpakpa kwlaa be man naan b’a kwla ɲan like kan b’a di naan b’a ka nguan nun.
Ɔo Zoova, nian, m’an kaci kɛ bla kun* mɔ be bumɛn i wie’n sa.
ל [Lamɛdi]
12 ?Amun kwlaa nga amun sin akpɔ’n su’n, sa ng’ɔ o min su’n, ɔ yoman amun like fi?
Maan amun bo amun ɲin ase be nian.
?Kɛ Zoova fali ya dan’n, ɲrɛnnɛn ng’ɔ fa yili min su’n,+
amun a wun wie le?
מ [Mɛmun]
13 Ɔ o nglo lɔ, kpɛkun ɔ fa sin yi min owie’m be nun.+ Yɛ ɔ sie min owie’m be kwlakwla.
Ɔ trɛli lala* kun nun naan min ja’n tɔ nun. Ɔ miannin min kɛ n wɔ min sin.
Ɔ yoli maan m’an kaci kɛ bla kun mɔ i ngunmin yɛ ɔ o’n sa.
Kɛ ɔ fɛ i nglɛmun lele nnɔsua’n, min wunnɛn’n yo min ya.
נ [Nunnun]
14 Ɔ fɛli i sa’n fa tiantiannin min sa tɛ’m be nuan ɔ fa yoli kɔmin su waka, kpɛkun ɔ fa cicili min kɔmin.
Ɔ fa be sieli min kɔmin su, kpɛkun min wunmiɛn’n wieli min nun.
Zoova fali min wlali be nga e nin be e kwlá kunman’n be sa nun.+
ס [Samɛki]
15 Zoova yili yasua kwlaa nga be le wunmiɛn kpa mɔ be o min wun wa’n.+
Ɔ yiali sran kpanngban kpa kɛ be bla naan be wa kun min gbanflɛn mun.+
Zida i wa bla mɔ nin-a siman bian’n, Zoova tiɛtiɛli i su duvɛn yiwlɛ’n nun.+
ע [Ayin]
16 Sa sɔ’m be ti yɛ n sun-ɔn.+ Min ɲinmuɛn nzue’n bu sa puu.
Afin be kwlaa nga be kwla fɔnvɔ min mɔ be kwla man min wunmiɛn’n, be o mmua kpa.
Min mma’m be leman like kun mɔ be kwla fa be wla gua su-ɔ, afin min kpɔfuɛ’n w’a kwla.
פ [Pe]
17 Siɔn tinngɛli i sa’m be nun,+ sanngɛ sran fi w’a fɔnvɔmɛn i.
Zoova kannin ndɛ kleli Zakɔbu i ɲrun tanndanfuɛ nga be bo sin yiɛ i’n be kwlaa naan be fa alɛ wlɛ
i sin.+
Zerizalɛmun w’a kaci like kain be ɲrun.+
צ [Sade]
18 Zoova yo sa i nuan su sɛsɛ,+ afin i nuan ndɛ’n* yɛ m’an faman su-ɔ.+
Nvlefuɛ mun, amun kwlakwla amun sie amun su. Yɛ amun nian fɛlɛ nga n su fɛ’n.
B’a tra min wa talua mun* nin min gbanflɛn mun b’a ɔ.+
ק [Kɔfu]
19 N kpan flɛli be nga be wuli min ti kpo’n, sanngɛ be lakali min.+
Klɔ’n nun’n, kɛ min Ɲanmiɛn ɲrun jranfuɛ mun nin klɔ’n su kpɛnngbɛn mun
bé kúnndɛ aliɛ bé sín naan b’a ka nguan nun’n, be wuli.+
ר [Rɛsi]
20 Ɔo Zoova, nian ɲrɛnnɛn dan ng’ɔ o min su’n.
Min ku’n* nun cisan min.
Min awlɛn’n kpɛ min klun afin n yoli ɲin kekle dan.+
Gua su lɔ’n, tokofi’n kun min mma mun.+ Sua’n nun wa kusu’n, wie’n yɛ ɔ
o lɛ-ɔ.
ש [Sinin]
21 Sran’m be tili min fɛfɛlɛ’n. N leman sran naan w’a fɔnvɔ min.
Min kpɔfuɛ’m be kwlaa be tili ɲrɛnnɛn ng’ɔ tɔli min su’n.
Be klun ti jɔwa afin wɔ yɛ a fa yili min su-ɔ.+
Sanngɛ á wá yó maan cɛn nga a kɛnnin i ndɛ’n ɔ́ jú.+ Cɛn sɔ’n nun’n, bé káci kɛ min sa.+
ת [Tavu]
22 Maan ɔ ɲin tran sa tɛtɛ kwlaa nga be yoli’n be su. Yɛ kle be ɲrɛnnɛn kpa,+
kɛ nga sa tɛtɛ kwlaa nga n yoli be’n ti’n, a kleli min ɲrɛnnɛn’n sa.
M’an kplin lele min awlɛn ba’n yo min ya siɛn’n.
א [Alɛfu]
2 Zoova w’a fɛ i ya’n w’a kata Siɔn i wa bla’n su kɛ ɲanmiɛn ble wie sa.
W’a finndin Izraɛli i klanman’n ɲanmiɛn su lɔ w’a yi i asiɛ’n su wa.+
Cɛn ng’ɔ fali ya’n, i wla w’a kpɛnmɛn i ja takatakawlɛ’n su.+
ב [Bɛti]
2 Zoova w’a bubu Zakɔbu i tranwlɛ mun, w’a siman aunnvɔɛ.
Kɛ ɔ fali ya’n, ɔ bubuli Zida i wa bla’n i fiawlɛ mun.+
Ɔ yili famiɛn diwlɛ’n+ nin i sran dandan’m+ be ase, kpɛkun ɔ yoli be wanzo.
ג [Gimɛli]
3 Kɛ ɔ fali ya dan’n, ɔ yoli maan Izraɛli w’a ɲanman wunmiɛn* kun.
Kɛ i kpɔfuɛ’n mantannin koko’n, ɔ cuɛnnin i sa fama’n,+
yɛ ya ng’ɔ fɛli i Zakɔbu wun’n, ɔ jue kɛ sin wie m’ɔ yra ninnge kwlaa nga be o i wun lɛ’n sa.+
ד [Dalɛti]
4 Ɔ cuɛnnin i ta’n nun* kɛ e kpɔfuɛ wie sa. I sa fama’n sa lɛ cɛiin naan ɔ́ yó e like yaya kɛ e ɲrun tanndanfuɛ wie sa.+
Be kwlaa nga be ɲinma wun be-ɔ be klo be’n, ɔ kunnin be sa trilili.+
Ɔ yoli maan ya ng’ɔ fali’n kacili kɛ sin wie sa+ Siɔn i wa bla’n i tannin sua’n su.+
ה [E]
5 Zoova w’a kaci kɛ e
kpɔfuɛ sa.+
Ɔ mɛnnin Izraɛli gla.
Ɔ mɛnnin i fiawlɛ sua fleiin’m be kwlaa.
Ɔ sacili i fiawlɛ’m be kwlaa.
Yɛ ɔ yoli maan sunlɛ nin ngwlɛ yilɛ ngunmin yɛ be ti i Zida i wla bla’n i lɔ-ɔ.
ו [Vavu]
6 Ɔ bubuli i kpata’n sekeseke+ kɛ sua kan wie m’ɔ o fie klanman kun nun’n sa.
Ɔ yoli maan b’a diman i cɛn’n kun.+
Zoova yoli maan be wla fili cɛn nin i wunmiɛn-lolɛ-cɛn nga be di be Siɔn lɔ’n be su.
Yɛ kɛ ɔ ko fa ya kpa’n, ɔ buman famiɛn’n nin Ɲanmiɛn ɲrun jranfuɛ’n be like fi.+
ז [Zayin]
7 Zoova yili i tɛ yiwlɛ’n i blo.
Ɔ yili i sua’n i blo.+
Ɔ fali Siɔn lɔ fiawlɛ’m be talɛ mun wlali be kpɔfuɛ’n i sa nun.+
Be kpan kekle kpa Zoova i sua’n nun lɔ,+ ɔ waan cɛn wie yɛ be su di sa.
ח [Ɛti]
8 Zoova guguli kɛ ɔ́ búbú Siɔn i wa bla’n i talɛ’n.+
Ɔ tinngɛli ɲanman nga be fa sunnzun like’n nun.+
Kɛ i sa’n kɔ́ ninnge’m be sacilɛ’n w’a trɛmɛn i.
Ɔ yoli maan ce nga be sili’n nin talɛ’n be o awlabɔɛ’n nun.
Be nɲɔn’n be leman wunmiɛn kun.
ט [Tɛti]
9 I anuan’m be mlɔnnin
asiɛ’n nun.+
Ɔ sacili ninnge nga be fa tanndan i anuan’m be sin’n kpɛkun ɔ bubuli be nun.
I famiɛn’n nin i nvle’n nun sran dandan’m b’a bo b’a sanndi nvlenvle’m be nun.+
Mmla nunman lɛ kun.* Zoova faman aolia nun sa mun klemɛn i nuan ijɔfuɛ’m be kun.+
י [Yɔdu]
10 Siɔn i wa bla’n i lɔ kpɛnngbɛn’m be titi asiɛ wun lɛ sa koun.+
Bajɛ tralɛ wla be wun, yɛ be fa ndutre gua be ti’n su.+
Zerizalɛmun lɔ talua nga be nin-a siman bian’n, be kluli be ti’n lele ɔ toli asiɛ’n.
כ [Kafu]
11 M’an sun lele min ɲinma’n w’a bloblo min ti’n nun siɛn’n.+
Min ku’n* nun cisan min.
Tɔlɛ mɔ min nvle’n i wa bla’n tɔli’n* ti’n, min buɛ’n flo tɔli asiɛ wun.+
Afin ba kanngan mun nin ba nɔnman’m be ɲrun blu klɔ’n i gua’m be su.+
ל [Lamɛdi]
12 Be usa be nin mun sa trilili kɛ: “?Aliɛ’n nin duvɛn’n be o nin?”+
Kusu nn klɔ’n i gua’m be su’n, be ɲrun su blu kɛ sran wie mɔ b’a bobo be kannin’n sa.
Yɛ be su wu be nin’m be sa nun blɛlɛlɛ.
מ [Mɛmun]
13 ?Ɔo Zerizalɛmun i wa bla, ngue yɛ n kwla fa yo min lalofuɛ-ɔ?
?Ngue yɛ n kwla fa wɔ n sunnzun i-ɔ?
?Ɔo Siɔn i bla m’ɔ nin-a siman bian’n, ngue yɛ n kwla fa wɔ n sunnzun i naan m’an fa fɔnvɔ wɔ-ɔ?
Afin tɔlɛ nga a tɔli’n, ɔ ti dan kɛ jenvie’n sa.+ ?Wan yɛ ɔ kwla yo wɔ ayre-ɔ?+
נ [Nunnun]
14 Ɔ wun sa nga ɔ Ɲanmiɛn nuan ijɔfuɛ’m be waan be wunnin i aolia nun’n, ɔ ti ato, yɛ ɔ ti finfin ndɛ.+
B’a kanman sa tɛ nga a yoli’n i ndɛ b’a kleman wɔ weiin naan nvle uflɛ nun kanga yolɛ’n w’a to w’a fuan wɔ.+
Sanngɛ ɔ wun ndɛ nga be waan be wunnin i mɔ be kan kle wɔ’n, ɔ ti ato. Gblɛ ndɛ yɛ be kan kle wɔ-ɔ.+
ס [Samɛki]
15 Ɔ wun yo tɛ ti’n, be kwlaa nga be sin akpɔ’n su lɛ’n be bo ndɛ gua ɔ wun.+
Kɛ be wun Zerizalɛmun i wa bla’n, be bo feliman be nuan m’ɔ bo be wun’n ti.+ Yɛ be keje be ti’n sɛkɛsɛkɛ, kpɛkun
be se kɛ:
“?Klɔ nga be waan ‘i klanman liɛ’n leman wunsu naan ɔ ti asiɛ’n i cenjele like’n’ yɛ ɔ o yɛ?”+
פ [Pe]
16 Ɔ kpɔfuɛ’m be kwlaa be kannin ɔ wun ndɛ tɛ.
Be bo feliman, yɛ be di
be je. Be se kɛ: “E mɛnnin i gla.+
Cɛn nga e minndɛli i lele’n yɛ w’a ju yɛ.+ W’a ju siɛn’n, yɛ e ɲinma tɛ i!”+
ע [Ayin]
17 Zoova yoli like ng’ɔ guguli kɛ ɔ́ yó’n.+ Ɔ yoli maan ndɛ ng’ɔ kannin’n,
Ɔ bubuli i, w’a siman aunnvɔɛ.+
Ɔ yacili ɔ kpɔfuɛ’n i lɛ naan ɔ ti’n, ɔ di aklunjɔɛ. Ɔ yoli maan ɔ ɲrun tanndanfuɛ’m b’a ɲan wunmiɛn.*
צ [Sade]
18 Ɔo Siɔn i wa bla’n i talɛ’n, nvlefuɛ’m be awlɛn’n kpan flɛ Zoova kekle kpa.
Maan ɔ ɲinmuɛn’n sonji kɛ nzue ba wie sa, wia nun nin kɔnguɛ.
Nán yaci sunlɛ, nán yaci ɔ ɲinma’n* i lɛ naan ɔ lo wunmiɛn.
ק [Kɔfu]
19 Jaso! Kpan kɔnguɛ wunmuan’n nun.
Like ng’ɔ o ɔ awlɛn’n nun lɔ’n, utu i kɛ nzue sa Zoova i ɲrun lɛ.
Manman ɔ sa’m be su kle i naan ɔ mma’m be ka nguan nun,
ר [Rɛsi]
20 Ɔo Zoova, nian. Nian nvle nga a kleli i nunfuɛ’m be ɲrɛnnɛn’n.
?Naan kɛ bla’m bé dí be bɔbɔ be klun ba mɔ kɛ bé wú be-ɔ be ti juejue’n* sa trilili?+
?Annzɛ bé kún Ɲanmiɛn ɲrun jranfuɛ mun nin Ɲanmiɛn nuan ijɔfuɛ mun Zoova i sua’n nun kɛ
nga sa?+
ש [Sinin]
21 Gbanflɛn mun nin bian oke mɔ be wuli’n, be tru akpɔ’m be su.+
Be fali tokofi kunnin min wa bla mɔ be nin-a siman bian’n* nin min gbanflɛn mun.+
Cɛn nga a fali ya’n, a kunnin be. A kunnin be lele, w’a siman be aunnvɔɛ.+
ת [Tavu]
22 A ko flɛflɛli be nga be kle min ɲrɛnnɛn’n lika kwlaa, kɛ cɛn wie yɛ be wa di sa.+
Zoova i ya cɛn’n nun’n, sran fi w’a ɲɛnmɛn i ti, sran fi w’a fiteman nun.+
Be nga n wuli be’n,* mɔ n tali be’n min kpɔfuɛ’n nunkunnin be.+
א [Alɛfu]
3 Kɛ be se kɛ sran kun wun i ɲrun’n, yɛle min liɛ’n. Afin kɛ ɔ fali ya’n ɔ fɛli i ɲantiaan’n boli min.
2 Ɔ kannin min bo, yɛ ɔ yo maan n nanti aosin’n nun, lika’n kpajaman min su.+
3 Aliɛ ba kwlaa nun’n, ɔ tinngɛ i sa’n nun ɔ fa kle min ɲrɛnnɛn sa trilili.+
ב [Bɛti]
4 Ɔ yoli maan min wunnɛn ba’n nin min wunnɛn kplo’n b’a wɔnsɔn.
Ɔ bubuli min owie’m
be nun.
5 Ɔ bo sin yiali min. Ɔ fali ayre wiwi’n+ nin ɲrɛnnɛn’n bo sin yiali min.
6 Ɔ miannin min kɛ n tran lika nga be nun lu tuun’n be nun, kɛ be nga be wuli w’a cɛ kpa’n be liɛ’n sa.
ג [Gimɛli]
7 Ɔ fali talɛ kun sisili min wun naan m’an kwlá wanndiman.
Ɔ fali aaba jrɔkɔ m’ɔ yo nɔnnin kpa’n ɔ fa cili min.+
8 Yɛ kɛ n kpan kekle kpa n kunndɛ ukalɛ’n, srɛlɛ nga n srɛ i’n ɔ siemɛn i su tieman.*+
9 Ɔ fali yɔbuɛ nga be sɛli be’n tanninnin min atin mun.
Ɔ yoli maan min atin’m b’a blibli.+
ד [Dalɛti]
10 Ɔ bu sali min ɲrun kɛ nnɛn ngble nga be flɛ i kɛ ursu’n sa, kɛ asɔmɔli wie m’ɔ o i fiawlɛ’n nun’n sa.+
11 Ɔ miannin min fii kɛ n jaso atin’m be su, yɛ ɔ titili
min nun.*
W’a yo maan min ngunmin yɛ m’an ka-ɔ.+
12 W’a cuɛn* i ta’n nun. W’a fɛ i ta mma’n w’a sunnzun min wun.
ה [E]
13 Ɔ yiyili i ta mma* nga be o i bua nun’n ɔ fa sransrannin min aklɛnzia’m be nun.
14 Aliɛ ba kwlaa nun’n, nvlenvle’m be kwlaa be yo min finfin, be to jue be di min wun asanse.
15 Ɔ mannin min ninnge wiwi mun lele be yili min piɛ. Ɔ fali ijre wiwi’n i nzue’n mannin min n nɔnnin i lele.+
ו [Vavu]
16 Ɔ fali yɔbuɛ mma mun bubuli min je mun.
Ɔ fali min wlali nzuɛn’n nun.+
17 A yoli maan n ɲanman fɔundi kun. Like nga be flɛ i like kpa’n, min wla w’a fi su.
18 I sɔ’n ti’n n seli kɛ: “Min aɲrunɲan’n w’a wie. N minndɛman like fi kun Zoova sa nun.”
ז [Zayin]
19 Maan ɔ wla kpɛn su kɛ n wo ɲrɛnnɛn nun naan n leman lawlɛ kun.+ Maan ɔ wla kpɛn ijre wiwi’n nin like wiwi m’ɔ kun’n be su.+
20 Ɔ wla kpɛ́n su sakpasakpa kpɛkun á klú min wun lɛ.+
21 N te fɛ i sɔ liɛ’n n te sie mun klun. I sɔ’n ti’n, ń trá min awlɛn ń mínndɛ.+
ח [Ɛti]
22 Zoova i sran klolɛ dan’n, i ti yɛ e nin-a nunnunman mlɔnmlɔn-ɔn.+
Afin ɔ yaciman aunnvɔɛ
silɛ le.+
23 Nglɛmun kwlakwla’n, a yi be nglo ekun.+ A ti nanwlɛfuɛ dan.+
24 N seli kɛ: “Min like liɛ nga n ɲɛnnin i’n yɛle Zoova.+ I sɔ’n ti’n, ń trá min awlɛn ń mínndɛ i.”+
ט [Tɛti]
25 Sran ng’ɔ fɛ i wla gua Zoova su’n,+ sran ng’ɔ kpɛ i sin atin titi’n,+ ɔ yo i ye.
26 Sɛ sran kun tran diin minndɛ*+ kɛ Zoova wa de i’n,+ i sɔ’n ti kpa.
27 Kɛ sran kun jran sa’m be ɲrun kekle* i gbanflɛn nun annzɛ i talua nun’n, i sɔ’n ti kpa dan.+
י [Yɔdu]
28 Kɛ Ɲanmiɛn fa sa mun yi i su’n, maan i ngunmin tran lɛ naan ɔ muɛn i nuan.+
29 Maan ɔ fɛ i nuan’n bo i ndutre nun.+ Atrɛkpa’n ɔ́ ɲɛ́n i ti.+
30 Maan ɔ fɛ i fuka’n man sran ng’ɔ su bo i’n. Maan ɔ yaci i lɛ naan ɔ kpɛ i nzowa lelele.
כ [Kafu]
31 Afin Zoova liɛ’n ɔ su yiman e blo mlɔnmlɔnmlɔn.+
32 Kannzɛ bɔbɔ ɔ kle sran kun ɲrɛnnɛn’n, sanngɛ ɔ́ sí i aunnvɔɛ afin i sran klolɛ’n wieman le.+
33 Afin i awlɛn’n nun lɔ’n, ɔ kunndɛman kaan sa kɛ ɔ́ fá ɲrɛnnɛn yí i klɔ sran’m be su annzɛ ɔ́ yó be tɛ.+
ל [Lamɛdi]
34 Kɛ be tiatia asiɛ’n su bisuafuɛ’m be kwlaa be su’n,+
35 kɛ be yoman sa ng’ɔ ti i nuan su’n be manman sran kun Ɲanmiɛn m’ɔ o Like Kwlaa Ti Su’n i ɲin bo lɛ’n,+
36 kɛ bé dí jɔlɛ mɔ be bu sran kun i ndɛ kwlɛ’n,
Zoova i ɲin ci ninnge kwlaa sɔ mun.
מ [Mɛmun]
37 ?Wan yɛ sɛ Zoova w’a faman ndɛ w’a wlɛmɛn i nuan’n, ɔ kwla kan ndɛ kpɛkun ɔ yo maan ndɛ sɔ’n kpɛn su-ɔ?
38 Like ng’ɔ ti kpa’n nin like ng’ɔ ti tɛ’n,
be kwlá finman Ɲanmiɛn m’ɔ o Like Kwlaa Ti Su’n i nuan nun fiteman likawlɛ.
39 ?Wan yɛ sɛ ɔ yoli sa tɛ naan ɔ su wun i ɲrun’n ɔ́ plán-ɔn?+
נ [Nunnun]
40 Maan e nian e nzuɛn’n naan e bu i akunndan kpa+ naan e sa e sin Zoova wun.+
41 Kɛ é mánmán e sa’m be su é klé Ɲanmiɛn m’ɔ o nglo lɔ’n, maan e man e awlɛn’m be su wie:+
42 “E yoli ɲin kekle yɛ e jasoli ɔ wun,+ yɛ w’a yaciman e wun sa’n w’a cɛman e.+
ס [Samɛki]
43 Kɛ a fali ya’n a tanninnin atin nga e fa kɔ ɔ wun lɔ’n.+
A fuannin e kpɛkun a kunnin e. W’a siman e aunnvɔɛ.+
44 A fali ɲanmiɛn ble kun katali ɔ sin atin’n naan e srɛlɛ’n w’a juman ɔ wun lɔ.+
45 A yoli maan y’a kaci kɛ wla nin ofuɛ su like sa nvlenvle’m be afiɛn.”
פ [Pe]
46 E kpɔfuɛ’m be kwlaa be tike be nuan’n be kan e wun ndɛ tɛtɛ.+
47 Nga e o nun’n, yɛle sa sroesroe nga be tɔ e su’n, nin aya nga e tɔ be nun’n,+ nin e mɛn’n i sacilɛ’n, ɔ nin ɲrɛnnɛn’n.+
48 Ɲrɛnnɛn ng’ɔ tɔli min nvle’n i wa bla’n i su’n ti’n, min ɲinmuɛn’n sonji kɛ nzue ba wie sa.+
ע [Ayin]
49 Min ɲinmuɛn’n utu lelele ɔ kpɛman.+
50 Ɔ́ yó sɔ lele saan Zoova m’ɔ o nglo lɔ’n w’a nian asiɛ su w’a wun i.+
51 Kɛ min ɲinma’n wun sa ng’ɔ juli min klɔ’n su talua’m be kwlaa be su’n, ɔ yo min ya lele kpe nun.+
צ [Sade]
52 Min kpɔfuɛ’m be dili min wun koniɛn kɛ anunman wie sa, kusu nn m’an yoman sa.
53 Be fali min yili i kunman’n nun naan b’a timan min ngan kun. Be totoli min yɔbuɛ sa lelele.
54 Nzue’n yili lele ɔ trali min ti’n su. Yɛ n seli kɛ: “Min liɛ w’a wie-o!”
ק [Kɔfu]
55 Ɔo Zoova, kɛ n wo kunman’n i bo lɔ’n n mannin min nɛn’n su n boli ɔ dunman’n.+
56 Sie ɔ su tie min nɛn’n. Kɛ n kpan n flɛ wɔ kɛ a uka min naan n ɲan min ti’n, nán tannin ɔ su’n.
57 Kɛ n flɛli wɔ’n, a wunngeli min wun kpɛkun a seli kɛ: “Nán srɛ kun wɔ.”
ר [Rɛsi]
58 Ɔo Zoova, a kannin min ti ndɛ, a kpɔli min ti.+
59 Ɔo Zoova, a wunnin tɛ nga be yoli min’n. Yaci kan min ti ndɛ.+
60 Klunngbɔ nga be waan bé tú’n, min wun ndɛ nga be cicili’n a wunnin i kwlaa.
ש [Sinin]
61 Ɔo Zoova, min nzowa nga be kpɛli’n a tili. A tili min wun ndɛ kwlaa nga be cicili’n,+
62 a tili ndɛ ng’ɔ fin min kpɔfuɛ’m be nuan fiteli’n, ɔ nin min wun aswre nga be tuli i aliɛ ba kwlaa nun’n.
63 Nian be. Kɛ bé trán ase’n annzɛ bé jáso’n, min wun asanse jue yɛ be to-ɔ.
ת [Tavu]
64 Ɔo Zoova, á wá fá sa nga be yoli’n i nuan like mán be.
65 Á yó maan be awlɛn’n kéte, sannzan nga á bó be’n yɛ ɔ o lɛ-ɔ.
66 Ee, Zoova, ya mɔ w’a fa’n ti’n, á sú be su lele yɛ á núnnún be sekeseke, ɔ ɲanmiɛn m’ɔ la nglo lɔ plaii’n i bo wa.
א [Alɛfu]
4 Ɔo! Nian kɛ sika ɔkwlɛ’n m’ɔ bo mianmian’n, sika ɔkwlɛ jrɛiin’n, w’a kpa-ɔ.+
Ɲanmiɛn sua’n i yɔbuɛ kpakpa mun+ yɛ be tru anngɔnda’m be kwlaa be su* yɛ.+
ב [Bɛti]
2 Siɔnfuɛ mɔ be le ɲrun kɛ sika ɔkwlɛ jrɛiin’n sa’n,
siɛn’n, be bu be kɛ ufa sɛ ngbɛn
m’ɔ ti sɛ wufuɛ’n i sa nuan like’n sa.
ג [Gimɛli]
3 Blo alua mun bɔbɔ’n, be man be mma’m be wunflɛn.
Sanngɛ min nvle’n i wa bla’n i liɛ’n i klun yo wi+ kɛ klɔnsoklo nga be o aawlɛ flɛnnɛn’n nun lɔ’n sa.+
ד [Dalɛti]
4 Ba nɔnman’n i taaman’n mantan i lalolalo’n nun.
Ba kanngan’m be srɛ aliɛ+ lele ngbɛn, sran fi manman be like.+
ה [E]
5 Be nga titi’n aliɛ kpakpa mun yɛ be di’n, siɛn’n be la akpɔ’m be su, awe’n w’a kun be lele.+
Be nga kɛ ɔ fɛ i be kaan nun lele’n, tralɛ ɔkwlɛ bioun yɛ be wla’n,+ be flafla nzuɛn nga be boli be kwle’n.
ו [Vavu]
6 Ɲrɛnnɛn nga be kleli min nvle’n i wa bla’n, i dan tra ɲrɛnnɛn nga be kleli Sodɔmun+
mɔ i sa tɛ’n ti’n be kali lɛ be sacili i kpɛ kunngba’n, mɔ sran fi w’a kwlá demɛn i’n.+
ז [Zayin]
7 I Nazirifuɛ’m+ be ti yɛiin tra laglasi m’ɔ fin nglo lɔ gua munkɛnmunkɛn’n, be fɛn fuai tra nɔnnɔn.
Be loko tra korai mun, yɛ be bo mianmian kɛ safii sa.
ח [Ɛti]
8 Siɛn’n be lu tra bunnde.
Kɛ be o akpɔ’m be su’n a wunman be wlɛ.
Be wunnɛn kplo’n w’a mantan be owie’n kpan.+ W’a kaci kɛ waka kee sa.
ט [Tɛti]
9 Be nga be fa tokofi kun be’n, be liɛ’n flunman tra be nga awe kun be lele be wu’n.+
Be liɛ’n flunman tra be nga fie su ninnge mɔ be ɲɛnmɛn i’n ti’n, b’a yo kokloo kɛ b’a fa like wie b’a wɔwɔ be sa’n.
י [Yɔdu]
10 Bla mɔ be ti aunnvɔɛ sifuɛ’n be tɔnnin be bɔbɔ be klun ba mun.+
Kɛ ɲrɛnnɛn tɔli min nvle’n i wa bla’n i su’n, be fali ba sɔ mun yoli be sɛ bo aliɛ.+
כ [Kafu]
11 Zoova yili i ya’n i nglo.
Ɔ yoli ya dan ng’ɔ fali’n i nuan su like.+
Ɔ trɔli sin kun Siɔn lɔ. Sin sɔ’n yrali Siɔn i bo ase nga be wlali’n sekeseke.+
ל [Lamɛdi]
12 Asiɛ’n su famiɛn mun ɔ nin asiɛ’n sufuɛ’m be kwlaa b’a lafiman su kɛ
be kpɔfuɛ’m bé sín Zerizalɛmun anuan’m be nun bé wlú klɔ’n nun.+
מ [Mɛmun]
13 Sa tɛ nga lɔ Ɲanmiɛn nuan ijɔfuɛ mun nin Ɲanmiɛn ɲrun jranfuɛ’m be yoli’n ti yɛ sa sɔ’n juli be su-ɔ.+
Be guali be nga b’a yoman sa fi’n be mmoja’n i ase klɔ’n i afiɛn lɔ.+
נ [Nunnun]
I sɔ’n ti’n, sran fi kwlá kanman be tralɛ mun.
ס [Samɛki]
15 Be kpan be su be se kɛ: “Amun wɔ amun ɲrun! Amun ti fiɛn! Amun wɔ amun ɲrun! Amun wɔ amun ɲrun! Nán amun kan e!”
Afin be leman lawlɛ kun. Be wlan sa daan.
Sran’m be kan sin nvle’m be nun kɛ: “Be kwlá kaman e wun wa.”*+
פ [Pe]
16 Zoova bɔbɔ* yoli maan be bo sanndili.+
Ɔ su yoman be ye.
Sran’m be ɲin su yiman Ɲanmiɛn ɲrun jranfuɛ mun,+ be su buman kpɛnngbɛn’m be sran.”+
ע [Ayin]
17 E buli i kɛ é ɲán defuɛ kun. Andɛ nin andɛ’n, y’a minndɛ lele ngbɛn.+
E minndɛli nvle kun m’ɔ kwlá deman e’n lelele.+
צ [Sade]
18 E ja kwlaa nga é tú’n be su e su.+ Ɔ maan e kwlá kɔman e klɔ’n i gua’m be su lɔ.
E liɛ su wa wie. E cɛn’m b’a wie, afin awieliɛ’n w’a wie e.
ק [Kɔfu]
19 Be nga be su fuan e’n, be wun kpɛ tra anunman ɲin m’ɔ tu sin nglo lɔ’n.+
Be fuannin e sinnin oka’m be su lɔ. Be ko bu sali e ɲrun aawlɛ flɛnnɛn’n nun lɔ.
ר [Rɛsi]
20 Sran nga Zoova kpɛli i+ mɔ sɛ é kwlá sé’n, ɔ ti aunmuan ng’ɔ fin e bue nun fite’n, be trɛli i be kunman dan’n nun.+
I yɛ e kɛnnin i ndɛ’n niɔn. E seli kɛ: “É trɛ́n i fɔnvɔ’n i bo nvlenvle’m be afiɛn.”
ש [Sinnin]
21 Edɔmun i wa bla,+ wɔ mɔ a tran Izi mɛn’n nun’n, bo sro yɛ di aklunjɔɛ.
Sanngɛ bé fá klowa’n bé mán ɔ wie.+ Á nɔ́n nun lele á bó, kpɛkun á yí ɔ wun kplɛn’n klé sran mun.+
ת [Tavu]
22 Siɔn i wa bla, fɔ nga be ko tu wɔ’n w’a wie.
Ɔ su traman ɔ kɔman nvle uflɛ nun kun.+
Sanngɛ Edɔmun i wa bla, sa tɛ nga a yoli’n ɔ́ wá kɛ́n
i ndɛ.
Ɔ́ yí ɔ sa tɛtɛ’m be nglo.+
5 Ee Zoova, maan ɔ wla kpɛn sa ng’ɔ juli e su’n su.
Bo ɔ ɲin ase naan nian sokpalɛ mɔ y’a sokpa’n.+
2 E aja like’n w’a tɔ sran nga e siman be’n be sa nun. E sua’m b’a kaci aofuɛ’m be liɛ.+
3 Y’a ka aika, e leman si kun. E nin’m b’a kaci kɛ angbeti wie mun sa.+
4 E bɔbɔ e nzue’n saan é tó naan y’a nɔn,+ yɛ e bɔbɔ e yie’n saan é tó.
5 Be nga be fuan e’n be o e kɔmin sin.
Y’a fɛ sanngɛ be manman e atin naan e lo wunmiɛn bɔ kaan sa.+
6 E yo Ezipti+ nin Asiri+ be atannin naan y’a ɲan kpanwun y’a di naan e ku w’a yi.
7 E nannan mɔ be yoli sa tɛ’n be nunman lɛ kun. Sanngɛ e ti su yɛ be sa tɛ’n i trɔ’n taka-ɔ.
8 Siɛn’n, kanga mun yɛ be sie e-ɔ. Yɛ e ɲanman sran naan w’a de e be sa nun.
9 Be nga alɛ kunlɛ ninnge o be sa nun’n, mɔ be o aawlɛ flɛnnɛn’n nun lɔ’n be ti’n, e fa e nguan’n e sie i wie nuan naan y’a ko kunndɛ kpanwun y’a ba.+
10 Awe mɔ w’a kun e lele mɔ e siman wie se’n ti’n, e wunnɛn kplo’n lo fiaan kɛ fuu wie sa.+
11 Be kuakuali bla mun* Siɔn lɔ. Be sokpali talua nga be nin-a siman bian’n Zida klɔ’m be su.+
12 Be sa kunngba yɛ be fa boli nvle’n nun sran dandan’m be kɔmin-ɔn.+ Kpɛkun be yoli kpɛnngbɛn’m be finfin.+
13 Gbanflɛn mun be sua yɔbuɛ nga be fa yi ble’n i nzuɛn’n. Yɛ yie’n i nɔnninnɔnnin’n ti’n, kɛ ba yasua kanngan’m bé nánti’n nn bé tɔ́.
14 Kpɛnngbɛn’m be nunman klɔ’n i anuan’n nun lɔ kun.+ Gbanflɛn’m be kusu be boman be miziki bolɛ ninnge’m be kun.+
15 E klun jɔman kun. E siman able kun, sɛ yɛ e yo i siɛn’n niɔn.+
16 Famiɛn kle’n w’a flo e ti w’a tɔ. Ɔo, e o afɛ nun-o! Afin e yoli sa tɛ.
17 I sɔ’n ti’n, e awlɛn ba’n yo e ya.+
Yɛ sa sɔ’m be ti’n, e ɲinma’n wunman ase kpa kun.+
18 Siɔn Oka’n mɔ w’a tɔ srolo’n,+ mɔ lɔ yɛ blo alua’m be kɔ wlanwlanlɛ’n i dunman nun ti-ɔ.
19 Ee Zoova, ɔ liɛ’n a ti famiɛn tititi.
Ɔ famiɛn bia’n ɔ o lɛ tititi.+
20 ?Ngue ti yɛ ɔ wla kó fí e su sa trilili-ɔ? ?Yɛ ngue ti yɛ w’a yi e blo w’a cɛ sɔ-ɔ?+
21 Ee Zoova, fa e sa e sin ɔ wun. Yɛ e klun klo su é sá e sin ɔ wun.+
Yo maan lika’n yo kpa kɛ laa’n sa ekun.+
22 Sanngɛ w’a yi e blo mlɔnmlɔnmlɔn.
E wun ya nga w’a fa’n ɔ ti dan.+
Ndɛ tre 1 lele 4 be ti ngwlɛ yilɛ ndɛ. Wafa nga Ebre nun fluwa mma’m be fa lɔngɔ su’n, i su yɛ be niannin naan b’a klɛ-ɔ.
Annzɛ “talua nga be nin-a siman bian’n.”
Zerizalɛmun ndɛ yɛ be su kan-ɔn.
Annzɛ “tɛ.”
Ebr., “i nuan’n.”
Annzɛ “talua nga be nin-a siman bian’n.”
Ebr., “Min klun aya’n.”
Ebr., “wɛ.”
Ebr., “fɛli i ja’n sieli i ta’n su.”
Annzɛ “Be kleman like kun.”
Ebr., “Min klun aya’n.”
Atrɛkpa’n, aunnvɔɛ silɛ’n i ndɛ yɛ be waan bé kán-ɔn.
Ebr., “wɛ.”
Ebr., “ɔ ɲinma’n i wa bla’n.”
Ebr., “akpɔ’m be kwlaa be ti’m be su.”
Annzɛ “b’a tin kpa’n.”
Annzɛ “min wa talua mun.”
Annzɛ “kɛ ń wú be’n nn be ti juejue’n.”
Annzɛ “ɔ yo naan srɛlɛ nga n srɛ i’n w’a sinman”, “ɔ kɛtɛ i atin’n.”
Be kwla se ekun kɛ “ɔ yacili min lɛ sa ngbɛn.”
Ebr., “W’a fɛ i ja’n w’a sie i.”
Ebr., “i mma yasua.”
Annzɛ “tran minndɛ.”
Ebr., “sua kɔmin su waka.”
Ebr., “akpɔ’m be kwlaa be ti’m be su.”
Annzɛ “Be kwlá tranman wa kɛ aofuɛ sa.”
Ebr., “Zoova i ɲrun’n.”
Annzɛ “Be nin bla mun be lali kekle nun.”