Like suanlɛ 8
Awlobo tranlɛ nga ɔ jɔ Ɲanmiɛn klun’n
?Awlobo kun nun’n, siefuɛ’n yɛle wan? (1)
?Wafa sɛ yɛ ɔ fata kɛ yasua kun nin i yi’n be tran ɔn? (2)
?Siɛ kun i junman liɛ’n yɛle mennin? (3)
?Awlobo kun nun sa’n, bla i junman liɛ’n yɛle mennin? (4)
?Ngue like yɛ Ɲanmiɛn Kpli kunndɛ kɛ siɛ, niɛn nin ba’m be yo ɔ? (5)
?Ngue ndɛ yɛ Biblu’n kɛnnin i bian nin bla’m be nun titilɛ nin be wun yralɛ su’n niɔn? (6, 7)
1. Biblu’n waan yasua yɛ ɔ sie i awlobofuɛ mun ɔn (1 Korɛntfuɛ Mun 11:3). Bla kunngba lekeleke cɛ yɛ ɔ fata kɛ ɔ tran yasua kun bo ɔ. Ɔ fata kɛ ɔ fɛ i atɔnvlɛ kɛ nga awa i mmla’n fa kan’n sa.—1 Timote 3:2; Tit 3:1.
2. Ɔ fata kɛ yasua kun klo i yi’n kɛ ɔ fa klo i bɔbɔ i wun’n sa. Ɔ fata kɛ ɔ nin i be tran kɛ Zezi nin i sɔnnzɔnfuɛ’m be trannin sa (Efɛzfuɛ Mun 5:25, 28, 29). Ɔ fataman kɛ ɔ bo i yi’n, annzɛ ɔ yo i kpokokpoko le. Sanngɛ maan ɔ bui sran yɛ i ɲin’n yi i.—Kolɔsfuɛ Mun 3:19; 1 Piɛr 3:7.
3. Ɔ fata kɛ siɛ kun di junman kekle kpa naan w’a niɛn i awlobofuɛ’m be lika. Ɔ fata kɛ ɔ mɛn i yi nin i mma’m be aliɛ, ɔ man be tralɛ nin lawlɛ. Ɔ fata kɛ siɛ kun kle i awlobofuɛ’m be Ɲanmiɛn sulɛ’n wie (1 Timote 5:8). I yɛ ɔ fata kɛ ɔ fa Ɲanmiɛn Kpli i su like suanlɛ’n i nun ta’n naan w’a uka i awlobofuɛ mun ɔn.—Mmla’n 6:4-9; Efɛzfuɛ Mun 6:4.
4. Ɔ fata kɛ bla kun ukɛ i wun’n kpa (Bo Bolɛ 2:18). Ɔ ukɛ i ba’m be talɛ nin be ngwlɛlɛ klelɛ nun (Nyanndra Mun 1:8). Zoova klo kɛ klolɛ su yɛ bla’n nian i awlo’n i lika ɔ (Nyanndra Mun 31:10, 15, 26, 27; Tit 2:4, 5). Ɔ fata kɛ ɔ bu i wun’n i sran kpa.—Efɛzfuɛ Mun 5:22, 23, 33.
5. Ɲanmiɛn se ba’m be kɛ be ɲin yi be si nin be nin mun (Efɛzfuɛ Mun 6:1-3). Ɔ lafi siɛ nin niɛn’m be su naan be kle be mma’m be like naan be tu be fɔ. Maan be fa be wun mantan be mma mun, kpɔkun be kle be Biblu’n nun like. I sɔ’n ti be lika nianlɛ Ɲanmiɛn ninnge be nun ɔ nin be klolɛ (Mmla’n 11:18, 19; Nyanndra Mun 22:6, 15). Nán siɛ nin niɛn’m be fa awlɛn fufu be fa tu be mma’m be fɔ mlɔnmlɔn.—Kolɔsfuɛ Mun 3:21.
6. Sɛ sran kun nin i yi’n annzɛ i wun’n be afiɛn’n sɛman’n, ɔ fata kɛ be kunndɛ be nanti Biblu’n nun mmla’n su. Biblu’n se e kɛ e klo e wiengu, naan e yaci i sa’n e cɛ (Kolɔsfuɛ Mun 3:12-14). Ɲanmiɛn Ndɛ’n w’a seman kɛ sɛ sa kan tɔ yasua kun nin i yi be afiɛn ɔn, i kpo’n yɛle nun titilɛ’n. Sanngɛ yoo, (1) sɛ bian kun waan ɔ nianman i awlobofuɛ’m be lika’n, (2) sɛ i like yolɛ yo ya tɛ kpa, naan bla’n wunmɛn i wun fɛ’n, naan ɔ o wie nuan’n, annzɛ (3) sɛ ɔ tɛnndɛn i ɲrun Zoova sulɛ nun’n, bla kun kwla se kɛ ɔ́ kpáci i wun’n.—1 Korɛntfuɛ Mun 7:12, 13.
7. Ɔ fataman kɛ sran kun nin i yi’n annzɛ i wun’n, be kunndɛ bla nin bian be wiengu bo. I sɔ’n ti tete like Ɲanmiɛn Kpli, ɔ nin be wun’n annzɛ be yi’n i ɲrun (Ebre Mun 13:4). Like kunngba cɛ nga ti mɔ Klistfuɛ kun kwla yrɛ i yi’n annzɛ i wun’n, naan w’a kunndɛ sran uflɛ w’a ja’n, yɛle kɛ bian’n annzɛ bla’n w’a kunndɛ bla annzɛ bian i wun’n annzɛ i yi’n i bo (Matie 19:6-9; Rɔmfuɛ Mun 7 : 2, 3). Be nga be yra be wun ngbɛnngbɛn mɔ be nianman Biblu’n i mmla’n su naan b’a yo i sɔ like’n, be wun yo Zoova tɛ kpa.—Malasi 2:14 -16.
[Foto mun, bue 16, 17]
Siɛ kpa kun niɛn i awlobofuɛ’m be lika, like dilɛ, nin tralɛ wlalɛ nun, ɔ nin lawlɛ nin Ɲanmiɛn sulɛ nun.
[Foto, bue 17]
Ɲanmiɛn Kpli lafi siɛ nin niɛn’m be su naan be kle be mma’m be like, naan be tu be fɔ.