Like suanlɛ 9
Maan Ɲanmiɛn i sufuɛ’m be yo saun
?Ngue ti yɛ ɔ fata kɛ e yo saun like kwlaa nun’n niɔn? (1)
?Ɲanmiɛn ninnge’m be nun saun yolɛ’n yɛle mennin? (2)
?Ngue yɛle ayeliɛ saun’n? (3) angunndan saun’n? (4) ɔ nin be wun yɛiinyɛiin yolɛ’n? (5) ?Be nuan’n nun ndɛ finfin mennin mun yɛ ɔ fata kɛ e wla be ase ɔ? (6)
1. Ɲanmiɛn Zoova ti saun kpɔkun fiɛn kaan sa nunmɛn i nzuɛn’n nun. I sɔ’n ti’n, ɔ kunndɛ kɛ i sufuɛ mun be fɛ i liɛ’n su i sulɛ’n nun, ɔ nin be nzuɛn’n nun, ɔ nin be angunndan’n nun, ɔ nin be wunnɛn’n su (1 Piɛr 1:16). Sɛ e kunndɛ kɛ nán fiɛn kaan sa tran e nzuɛn nun Ɲanmiɛn ɲrun’n, ɔ fata kɛ e jran kekle kpa. Afin mɛn nga e tran nun yɛ’n, i nun ayeliɛ’n ti fiɛn kpa. Kpɔkun e kusu, fɔ nga ɔ o e nun’n kle e yalɛ. Sanngɛ nán maan e sa sin bubu e.
2. Ɲanmiɛn ninnge’m be nun saun yolɛ’n: Sɛ e kunndɛ kɛ é sú Zoova’n, e su faman Ɲanmiɛn sulɛ wafa nga be diman nanwlɛ’n be ninnge klelɛ, ɔ nin be nzuɛn’m be su kun. Ɔ fata kɛ e fin Ɲanmiɛn sulɛ sɔ’m be nun e fite, nán maan e jran be sin mlɔnmlɔn kun (2 Korɛntfuɛ Mun 6:14-18; Sa Nglo Yilɛ 18: 4). Kɛ ɔ fin cɛn mɔ e suannin Ɲanmiɛn Kpli i su nanwlɛ’n cɛ’n, ɔ fata kɛ e tike e ɲin naan be nga be diman nanwlɛ’n b’a lakaman e kun.—2 Zan 10, 11.
3. Ayeliɛ saun: Zoova kunndɛ kɛ i sufuɛ’m be ayeliɛ’n yo saun kɛ Klistfuɛ kpa mun sa (1 Piɛr 2:12). I ɲin ta like kwlaa nga e yo’n, kannzɛ bɔɔ be ti nvialiɛ nun like o, ɔ wun be (Ebre Mun 4:13). I ti’n, ɔ fata kɛ e wla bla nin bian kunndɛlɛ sukusuku’n ɔ nin mɛn’n nun ayeliɛ fiɛnfiɛn’m be ase.—1 Korɛntfuɛ Mun 6:9-11.
4. Angunndan saun: Angunndan saun man ayeliɛ saun wie (Filipfuɛ Mun 4:8). Sanngɛ kusu sɛ e bu angunndan tɛ’n, e ayeliɛ’m bé yó tɛ wie (Matie 15:18-20). E wla aɔwi finfin dilɛ’n nga ɔ kwla man e angunndan tɛ’n, i ase. Sɛ e kanngan Ɲanmiɛn ndɛ’n nun’n, ɔ kwla wla e ti nun angunndan saun.
5. Be wun yɛiinyɛiin yolɛ: Kɛ mɔ Klistfuɛ’m be ti Ɲanmiɛn Kpli i nuan ijɔfuɛ’n ti’n, ɔ fata kɛ be wunnɛn’n nin be tralɛ’n be yo yɛiin. Sɛ be kɔ atin nun be ba’n, maan be wunnzin be sa nun. Asa ekun sɛ e waan é kán aliɛ’n, maan e wunnzin e sa nun ka. Sɛ e leman blɔfuɛ’m be atin nun kɔwlɛ’n wie’n, e fu buɛ e wla wakasu’n i ase (Mmla’n 23:12, 13). Be wun yɛiinyɛiin yolɛ’n yo maan be wun’n kpaja be. Ɔ fata kɛ Klistfuɛ kun i sua’n i klun nin i sin’n yo yɛiin kpa. Ɔ fata kɛ i tranwlɛ nun lɔ’n, i dunman fɛ yɛ be bo i sa titi ɔ.
6. Ijɔlɛ saun: Nanwlɛ yɛ ɔ fata kɛ Ɲanmiɛn sufuɛ’m be di i titi ɔ. Gblɛfuɛ’m be su yoman mɛn nga Ɲanmiɛn Kpli síe’n, i nunfuɛ mlɔnmlɔn (Efɛzfuɛ Mun 4:25; Sa Nglo Yilɛ 21:8). Klistfuɛ’m be diman aɔwi tɛ, be sieman be su ndɛ finfin’m be bo naan se kɛ bé kán wie. Junman su lɔ o, suklu lɔ annzɛ be tranwlɛ lɔ o, be ijɔlɛ saun’n ti’n, sran kwlaa wun kɛ be ti be liɛ ngunmin.—Efɛzfuɛ Mun 4:29, 31; 5:3.
[Foto mun, bue 18, 19]
Maan like kwlaa nun’n, Ɲanmiɛn i sufuɛ’m be yo saun.