‘B’a buman like fi angunndan’

AKƆ waan ɔ́ tíman suu’n, ɔ́ tí papa.

Afuɛ 1974 nun’n, Ɔstrali mɛn’n nun lɔ’n klɔ nga be flɛ i Darwin’n, i su sran’m be su siesie be wun naan bé dí cɛn. Kpɔkun be boli i ndolo kɛ aunmuan dan kun su ba. Sanngɛ Darwin’n lɔfuɛ’m be wunnin aunmuan dan kɛ nga sa w’a di afuɛ kɔe 30. ?Aunmuan dan sɔ’n, ɔ́ bá yɛ ɔ o lɛ? Klɔfuɛ’m be nun sunman lika b’a faman ndɛ sɔ’n su. B’a faman su lele aunmuan dan sɔ’n bali, ɔ wa tuli sua’m be su kpongbo mun, yɛ ɔ bubuli sua nga sran’m be fiali be nun’n. Kɛ i lika cɛnnin’n, bé nían ɔn, klɔ wunmuan’n w’a wie saci.

Novamblu anglo nun afuɛ 1985 nun’n, Kolɔmbi lɔ klɔ nga be flɛ i Armɛro’n, i nun lɔ oka’n kun kpukeli. Oka’n su lɔ laglasi nin nnɔtiɛ dan kpa utuli sran akpiakpi ablaɔn (20.000) tra su be su kunnin be. ?B’a dunman mmua b’a wunmɛn i sɔ liɛ’n ti ɔ? Cɛcɛ, nɛ́n i sɔ ɔ. Afin, oka’n bɔbɔ’n, kɛ anglo’m bé sín’n, nn ɔ́ kéje. Sanngɛ, kɛ mɔ be tran oka’n i wun lɛ w’a cɛ’n ti’n, Armɛrofuɛ’m b’a bumɛn i sɔ liɛ’n i ndɛ. Be boli i sɔ ndɛ’n su kleli klɔ’n i siefuɛ mun, sanngɛ be liɛ’n b’a boman su b’a kleman klɔfuɛ mun. Aladio’n kusu, i liɛ nga ɔ kannin’n, yɛle kɛ nán maan srɛ kun sran mun. Aloalo nga ɔ o asɔnun sua’m be nun mɔ be fa flɛ sran mun’n, be kɛnnin i be nun kɛ maan sran’m be gua be wla ase. Sanngɛ kɛ lika’n sannin’n, oka’n kpukeli dan kpa kpɛ nɲɔn. ?Sɛ ɔ ti amun’n niɔn, amún yáci amun bo ninnge’m be lɛ bé wánndi? Be nga be kwla wanndili’n b’a sɔnman.

Wie liɛ’n, be nga be di asiɛ’n i wafa nga ɔ ti’n i su junman’n, be kwla bo i jɔ kɛ asiɛ’n su wa keje. Sanngɛ be kwlá kleman blɛ nga ɔ́ kéje’n sa trele. Afuɛ 1999 nun’n, asiɛ’n i kejelɛ kwlaa nga ɔ kejeli mɛn wunmuan nun’n, ɔ kunnin sran kɔe 20.000. Be nun sunman nga be wuli’n, be buli i kɛ i sɔ like’n su ɲanman be le.

?Kɛ Ɲanmiɛn bɔbɔ se kɛ sa wie’m bé wá jú’n, e bu i sɛ?

Biblu’n dun mmua yiyili ninnge nga be kle kɛ mɛn’n su kɔ i bue nuan’n, be nun kpa. I sɔ’n ti yɛ ɔ se e kɛ e bu ‘Nowe i blɛ su’n’ i angunndan’n niɔn. ‘Blɛ sɔ’n nun’n, kɛ nzue dan’n i tɔlɛ’n ɔ ka kaan ɔ́ jú’n,’ sran’m be like nga be yo i titi’n, yɛ ɔ lo be ɔ. Kusu nn sa kekleekle’m be bo sin yia be. Sanngɛ ndɛ nga Ɲanmiɛn kan kleli i sufuɛ Nowe mɔ i kusu kan kleli be’n, ‘b’a buman like fi angunndan lele nzue dan’n ɔ wa fa be kwlaa ɔli.’ (Matie 24:37-39). ?Sɛ ɔ ti amun’n niɔn, nn amun fali ndɛ sɔ’n su? ?Amun fa andɛ liɛ’n su?

Sodɔmu m’ɔ mantan jenvie ng’ɔ ti njin nzue klakla i wun lɛ’n, ɔ ti kɛ Edɛni fie’n sa. Aɲanbeun ninnge’m be o lɔ kpa. Lɔfuɛ’m be klun titiman be mlɔnmlɔn. Lɔ yɛ Lɔtu m’ɔ ti Abraamu i aosua’n ɔ trannin ɔn. Lɔtu blɛ su’n, “sran’m be di like, be nɔn nzan, be to ninnge, be yo be ninnge atɛ, be di fie, yɛ be kplan sua.” Kusu mɛn sɔ nun sran’m be sa sukusuku yolɛ liɛ’n, be kanman. ?Sɛ ɔ ti kɛ amun trannin Lɔtu i blɛ’n su wie’n nn amún yó i sɛ? ?Sran sɔ’m be ayeliɛ tɛ i ndɛ nga Lɔtu kannin’n, amún fá su? ?Kɛ ɔ seli kɛ Ɲanmiɛn waan ɔ su wa nunnun Sodɔmu nvle’n, nn amun fali amun su sieli i bo? ?Annzɛ amún bú i finfinfuɛ kɛ i sia’m be fa yoli’n sa? ?Annzɛ amún wánndi, kpɔkun amún nían amun sin kɛ Lɔtu i yi’n fa yoli’n sa? Sɛ bɔɔ sran’m b’a buman like fi angunndan, sanngɛ kɛ Lɔtu fin Sodɔmu lɔ fiteli’n, ‘sin nin sufru be fin ɲanmiɛn su lɔ guali kɛ nzue sa naan w’a nunnun be kwlaa.’—Lik 17:28, 29.

Andɛ’n, sran’m be sunman lika be buman like fi angunndan. Sanngɛ ndɛ nga e wunnin be lɛ’n, be klɛli i kwlaa sɔ’n sieli i Ɲanmiɛn Ndɛ’n nun naan e fa tu e wun fɔ nun, naan E TRAN MINNDƐ!

[Kuku/Foto, bue 22]

?Nzue dan’n tɔli sakpa?

Fluwa sifuɛ wie’m be waan w’a tɔman. Sanngɛ Biblu’n se kɛ ɔ tɔli.

Zezi kannin nzue dan sɔ’n i ndɛ. I nun mɔ nzue sɔ’n tɔ́’n, nn i bɔbɔ’n o ɲanmiɛn su lɔ.

[Kuku/Foto, bue 23]

?Sodɔmu nin Gomɔru be nunnunlɛ’n ti nanwlɛ ndɛ?

Laa ninnge’m be su junman difuɛ’m be seli kɛ ndɛ sɔ’n ti nanwlɛ.

Laa sa’m, be kle i sɔ liɛ’n.

Zezi Klist boli ndɛ sɔ’n su. Kpɔkun be kɛnnin i sɔ ndɛ’n Biblu’n i fluwa 14 nun.