Zezi yoli abonuan sa kun mannin sran kpanngban be aliɛ

Zezi i akoto blu-nin-nɲɔn (12) mun be boli jasin Galile mɛn’n wunmuan’n nun. Kpɛkun be wa kannin “like kwlaa nga be yoli’n, ɔ nin like kwlaa nga be kleli sran mun’n be ndɛ kleli i.” Nanwlɛ, junman dan sɔ’n ti’n b’a fɛ kpa. Yɛ kɛ mɔ sran kpanngban be kɔ be ba’n ti’n, be leman blɛ kaan sa naan b’a di like bɔbɔ. I sɔ’n ti’n, Zezi seli be kɛ: “An bla e wɔ lika diin kun nun naan amun lo wunmiɛn kan.”​—Marki 6:30, 31.

Atrɛkpa blɛ sɔ’n nun’n, Zezi nin i sɔnnzɔnfuɛ’m be o Kapɛɛnaɔmun wun lɛ. Be fuli alie kun nun, naan b’a to be ti Zurdɛn nzue’n i wia afiliɛ lɔ, Bɛtsaida klɔ’n i sin lɔ. Sanngɛ kɛ bé kɔ́’n, sran kpanngban be wunnin be. Wie’m be kusu be tili i kɛ be su kɔ. I sɔ’n ti’n, be kwlaa be wanndili jenvie’n i nuan su, be dunnin be ɲrun mmua. Ɔ maan kɛ Zezi fín alie’n nun jrá’n, nn sran sɔ’m be o lɔ lalaa be su minndɛ i.

Kɛ Zezi fin alie’n nun jrali’n, ɔ wunnin sran kpanngban kpa. Yɛ be yoli i annvɔ. Afin be ti kɛ bua mɔ be leman sran taman be’n sa. Ɔ maan ɔ kannin Ɲanmiɛn Famiɛn dilɛ’n i su ndɛ kleli be. “Ɔ kleli be like kpanngban.” (Marki 6:34) Kpɛkun ɔ yoli “be nga be wunnɛn yo be ya’n be juejue.” (Liki 9:11) Kɛ aliɛ jɔli’n, i sɔnnzɔnfuɛ’m be seli i kɛ: “Lika nga e wo nun yɛ’n wo mmua, kusu aliɛ w’a dun mmua w’a san. Se nzrafuɛ’m be kɛ be wɔ. I liɛ’n, bé kwlá kɔ́ klɔ’m be su bé kó tó be aliɛ.”​—Matie 14:15.

Sanngɛ Zezi seli be kɛ: “Ɔ nunman nun kɛ be wɔ. Amun bɔbɔ amun man be like maan be di.” (Matie 14:16) Kannzɛ bɔbɔ Zezi si like ng’ɔ su wa yo’n, ɔ sali Filipu niannin. Ɔ usɛli i kɛ: “?Nin yɛ é kó tó kpanwun naan y’a fa man sran nga mun naan b’a di-ɔ?” Kɛ mɔ Filipu fin Bɛtsaida’n ti yɛ Zezi usɛli i sɔ-ɔ. Sanngɛ sɛ i li bɔbɔ be ko to kpanwun’n, ɔ su juman be ngba. Afin be nun yasua’m be ti sran kɔe akpi nnun (5.000). Ɔ maan sɛ be ka bla mun nin ba kanngan mun wla nun’n, be kwla tra sran akpi blu (10.000) bɔbɔ. Filipu tɛli Zezi su kɛ: “Sɛ e to kpanwun denie ya nɲɔna (200) naan e bubu nun kannganngan bɔbɔ’n, ɔ su juman be ngba.”​—Zan 6:5-7.

Atrɛkpa’n, Andre buli i kɛ be kwlá manman sran nga be o lɛ’n, be ngba be aliɛ. I ti’n, ɔ seli kɛ: “Ba yasua kaan kun o wa, ɔ le ɔrzu kpanwun nnun ɔ nin jue kanngan nɲɔn. ?Sanngɛ sran kpanngban nga be o yɛ’n, ɔ kwla ju be?”​—Zan 6:9.

Kɛ ɔ́ yó sɔ’n, nn e o afuɛ 32 nun, Marsi annzɛ Avrili anglo’n nun. Yɛ Delɛ cɛn’n i dilɛ’n su w’a ju. Zezi seli i sɔnnzɔnfuɛ’m be kɛ be se sran mun naan be trantran akpasuaakpasua ijre’n su lɛ. Yɛ maan akpasua kun nun’n, be yo sran ablenun (50) annzɛ sran ya (100). Ɔ fali kpanwun nnun nin jue nɲɔn mun, kpɛkun ɔ lali Ɲanmiɛn ase. I sin’n, ɔ bubuli kpanwun nin jue’m be nun. Ɔ fa mɛnnin i sɔnnzɔnfuɛ mun naan be fa man sran mun. Aliɛ’n juli sran’m be kwlaa. Be dili i lele be ku yili. Nanwlɛ, ɔ ti abonuan dan!

I sin’n, Zezi seli i sɔnnzɔnfuɛ’m be kɛ: “An tiantian i sinsin kanngan nga be kali’n be nuan. I liɛ’n, wie fi su saciman.” (Zan 6:12) I sinsin nga be tiantiannin be nuan’n, be yili gbogbo blu-nin-nɲɔn (12)!