Sa tɛ nga Famiɛn Davidi yoli’n

Kɛ Saili wuli’n, Davidi kacili famiɛn. Blɛ sɔ’n nun’n, ɔ le afuɛ ablasan (30). Kɛ ɔ yoli famiɛn m’ɔ cɛli kan’n, cɛn kun’n ɔ fuli i sua’n i ti su lɔ, kpɛkun ɔ wunnin bla klanman kpa kun. Kɛ Davidi usausali’n, be seli i kɛ bla’n suan Bati-Seba, naan Iri m’ɔ ti sonja’n i yi-ɔ. Davidi yoli maan be ko fali Bati-Seba be bali. Ɔ nin Bati-Seba be lali, yɛ ɔ wunnzɛli. Davidi kunndɛli kɛ ɔ́ fía sa sɔ’n su. Ɔ seli i sonja’m be su kpɛn’n kɛ ɔ fa Iri sie i lika nga alɛ’n kpi kpa’n, naan be yaci i ngunmin lɛ. Kɛ be kunnin Iri’n, Davidi jali Bati-Seba.

Zoova wunnin sa sɔ m’ɔ juli’n i kwlaa nun. ?Ngue yɛ ɔ yoli-ɔ? Ɔ sunmɛnnin i nuan ijɔfuɛ Natan Davidi sin. Natan seli Davidi kɛ: ‘Aɲanbeunfuɛ kun le bua kpanngban kpa. Yɛ yalɛfuɛ kun kusu le bua kunngba cɛ. Ɔ ti kaan sa, yɛ ɔ klo i kpa. Kpɛkun aɲanbeunfuɛ’n w’a ko fa yalɛfuɛ’n i bua’n.’ Kɛ Davidi tili ndɛ sɔ’n, ɔ yoli i ya. Ɔ seli kɛ: ‘Aɲanbeunfuɛ sɔ’n, ɔ nin kunlɛ fata.’ Yɛ Natan seli i kɛ: ‘Aɲanbeunfuɛ sɔ’n yɛle wɔ.’ Davidi i wla boli i wun, kpɛkun ɔ seli Natan kɛ: ‘N fɔnnin Zoova wun.’ Sa tɛ sɔ’n ti’n, Davidi nin i awlofuɛ mun be wunnin be ɲrun kpa. Zoova tuli Davidi i fɔ. Sanngɛ kɛ mɔ Davidi dili nanwlɛ m’ɔ kɛnnin i wun ase’n ti’n, b’a kunmɛn i.

Davidi kunndɛli kɛ ɔ́ kplán sua kun mán Zoova. Sanngɛ Davidi i wa Salomɔn yɛ Zoova fɛli i kɛ ɔ kplan sua’n niɔn. Davidi kunndɛli sua’n i kplanlɛ ninnge wie mun mannin Salomɔn. Ɔ seli kɛ: ‘Ɔ fata kɛ Zoova i sua’n yo klanman. Salomɔn kusu te yo gbanflɛn kan. Ń má kúnndɛ ninnge wie mun ń mɛ́n i.’ Davidi mannin sika kpanngban kpa naan be fa kplan sua’n. Ɔ kunndɛli sran mɔ be si junman di kpa’n. Ɔ kunndɛli sika ɔkwlɛ nin sika, ɔ nin sɛdri waka m’ɔ fin Tir nin Sidɔn’n, ɔ fa sieli. Kɛ Davidi wá wú’n, ɔ fali sua’n i jajalɛ ng’ɔ jɛjɛli i fluwa su’n fa mannin Salomɔn. Ɔ seli kɛ: ‘Zoova yoli maan n jajali wafa ng’ɔ fata kɛ a kplan sua’n. Zoova wá úka wɔ. Nán srɛ kun wɔ. Tra wɔ awlɛn naan di junman’n.’