LIKE SUANLƐ 12
?Ngue yɛ ɔ kwla uka ɔ naan w’a suan Biblu’n nun like titi-ɔ?
Biblu’n nun like suanlɛ’n kwla yo e ye. Sanngɛ nán blɛ kwlaa nun yɛ ɔ ti pɔpɔ-ɔ. Ɔ ju wie’n a kwla usa ɔ wun sɛ á kwlá súan Biblu’n nun like titi-o. ?Ngue ti yɛ ɔ ti cinnjin kɛ a mian ɔ ɲin suan Biblu’n nun like titi-ɔ? ?Ngue yɛ ɔ kwla uka ɔ naan w’a kwla yo sɔ-ɔ?
1. ?Ngue ti yɛ Biblu’n nun like suanlɛ’n ti cinnjin-ɔn?
“Ɲanmiɛn i ndɛ’n le ta kpa, ɔ yo maan sran kaci.” (Ebre Mun 4:12) Biblu’n nun ndɛ’n ti cinnjin. Afin ɔ uka e naan y’a si akunndan nga Ɲanmiɛn bu’n, ɔ nin wafa ng’ɔ bu e’n. Ɔ yo maan e si sa. Sanngɛ nɛ́n i ngba-ɔ, ɔ uka e maan e yo ngwlɛlɛfuɛ, yɛ e ɲan like e fa e wla gua su. I ng’ɔ ti cinnjin kpafuɛ’n yɛle kɛ ɔ uka e maan e kaci Zoova i janvuɛ. Kɛ e suan Biblu’n nun like’n, ɔ ɲan ta e su, yɛ ɔ yo maan e liɛ yo ye.
2. ?Ngue ti yɛ ɔ fata kɛ Biblu’n nun ndɛ’n yo e cinnjin-ɔn?
Ndɛ nanwlɛ m’ɔ o Biblu’n nun’n ti cinnjin kpa. I sɔ’n ti’n, Biblu’n wla e fanngan kɛ e ‘to nanwlɛ’n naan nán e yo i atɛ le.’ (Ɲanndra Mun 23:23) Kɛ mɔ e si kɛ Biblu’n nun ndɛ nanwlɛ’n ti cinnjin’n ti’n, kannzɛ bɔbɔ sa wie’m be tanndan e ɲrun’n, sanngɛ e mian e ɲin e suan nun like titi.—An kanngan Ɲanndra Mun 2:4, 5 nun.
3. ?Wafa sɛ yɛ Zoova kwla uka ɔ naan w’a suan Biblu’n nun like titi-ɔ?
Zoova kwla like kwlaa yo, yɛ ɔ ti ɔ janvuɛ. Ɔ kunndɛ kɛ ɔ́ úka ɔ naan a si i. ‘Ɔ kwla yo maan a klo i klun sa’n i yolɛ. Yɛ ɔ kwla man ɔ wunmiɛn naan w’a kwla yo.’ (Kanngan Filipufuɛ Mun 2:13 nun.) Ɔ kwla uka ɔ naan w’a suan Biblu’n nun like titi naan kusu w’a kwla nanti like nga a suan’n su. Sɛ sa wie’m be tɔ ɔ su annzɛ sran wie’m be tanndan ɔ ɲrun’n, ɔ kwla man ɔ wunmiɛn naan w’a jran kekle. Srɛ Zoova titi kɛ ɔ uka ɔ naan w’a yaciman Biblu’n nun like suanlɛ.—1 Tesalonikifuɛ Mun 5: 17.
SI NDƐ’N NUN KPA EKUN
Sɛ a ɲanman ɔ ti annzɛ kusu ɔ wiengu’m be tanndan ɔ ɲrun naan i ti’n a kwlá suanman Biblu’n nun like’n, like nga a kwla yo’n é wá wún i. I sin’n, é wá fá e ɲin é síe i wafa nga Zoova kwla uka ɔ naan w’a suan Biblu’n nun like titi’n i su.
4. Maan Biblu’n nun like suanlɛ’n yo ɔ cinnjin
Wie liɛ’n ninnge ng’ɔ fata kɛ e yo be’n be sɔnnin. Ɔ maan ɔ kwla yo e kɛ e su ɲanman blɛ e suanman Biblu’n nun like sa. ?Sɛ ɔ yo ɔ sɔ’n, ngue yɛ ɔ kwla uka wɔ-ɔ? An kanngan Filipufuɛ Mun 1:10 nun, i sin’n an koko kosan yɛ’m be su yalɛ:
?Ninnge benin mun yɛ a bu i kɛ ‘be ti cinnjin kpa-ɔ’?
?Wafa sɛ a kwla kle kɛ Biblu’n nun like suanlɛ’n ti ɔ cinnjin kpa-ɔ?
Sɛ a dun mmua fa aunɲan’n guɛ i so nun ka naan w’a fa yɔbuɛ’n w’a gua su’n, be su sɔnman nun.
Sɛ a dun mmua fa yɔbuɛ mun guɛ i so nun’n, a kwla fa aunɲan’n i sunman lika gua nun. I kunngba’n, maan e dun mmua yo “ninnge nga be ti cinnjin kpa’n.”
Kɛ e suan Biblu’n nun like’n e wun i wlɛ kɛ e mian Ɲanmiɛn wun. Yɛle kɛ e wun i wlɛ kɛ ɔ fata kɛ e si i naan e su i. An kanngan Matie 5:3 nun, i sin’n an koko kosan yɛ’n i su yalɛ:
?Sɛ Biblu’n nun like suanlɛ’n ti e cinnjin tra like kwlaa’n i su ye benin yɛ é ɲɛ́n i-ɔ?
5. Jran yalɛ klelɛ’n i ɲrun kekle
Wie liɛ’n, sran’m be kunndɛ kɛ bé búbú ɔ sa sin naan a yaci Biblu’n nun like suanlɛ. Maan e nian wafa nga Flansɛko jrɛnnin i sɔ liɛ’n i ɲrun kekle’n. An bo VIDEO’N, i sin’n an koko kosan yɛ’m be su yalɛ.
?Video’n nun’n, kɛ Flansɛko kannin like ng’ɔ suɛn i Biblu’n nun’n i ndɛ kleli i janvuɛ nin i osufuɛ mun’n, wafa sɛ yɛ be sɔli nun-ɔn?
?Kɛ Flansɛko jrannin kekle’n i su ye benin yɛ ɔ ɲɛnnin i-ɔ?
An Kanngan 2 Timote 2:24, 25 nun, i sin’n an koko kosan yɛ’m be su yalɛ:
?Kɛ ɔ osufuɛ mun nin ɔ janvuɛ’m be si kɛ a suan Biblu’n nun like’n, wafa sɛ yɛ i sɔ’n yo be-ɔ?
?Kɛ nga ndɛ mma’m be fa kan’n sa’n, sɛ a suan Biblu’n nun like naan ɔ yoman sran wie’m be fɛ’n ngue yɛ ɔ fata kɛ a yo-ɔ? ?Yɛ ngue ti-ɔ?
6. Lafi su kɛ Zoova kwla uka ɔ
Sɛ e nin Zoova e afiɛn mantan kpa’n, é kúnndɛ kɛ é yó like ng’ɔ jɔ i klun. Sanngɛ wie liɛ’n, kɛ ɔ ko yo naan y’a kaci e sa ninnge wie’m be yolɛ nun naan y’a nanti i mmla’m be su’n ɔ ti kekle. Sɛ ɔ wun yo wɔ sɔ’n, nán maan ɔ sa sin bubu ɔ. Zoova kwla uka ɔ. An bo VIDEO’N, i sin’n an koko kosan yɛ’m be su yalɛ.
?Video’n nun’n, ninnge benin nun yɛ Jimun kacili i sa naan Zoova i klun w’a jɔ i wun-ɔn?
?Ngue yɛ Jimun yoli m’ɔ yo ɔ fɛ dan-ɔn?
An Kanngan Ebre Mun 11:6 nun, i sin’n an koko kosan yɛ’m be su yalɛ:
?Ngue yɛ Zoova wá yó mán be nga “be tu be klun be kunndɛ i’n” niɔn?
?Kɛ Zoova wun kɛ a miɛn ɔ ɲin a suan Biblu’n nun like’n wafa sɛ yɛ i sɔ’n yo i-ɔ?
SRAN KUN KWLA USA Ɔ KƐ: “?Ngue ti yɛ a suan Biblu’n nun like-ɔ?”
?Wafa sɛ yɛ á tɛ́ i su-ɔ?
NDƐ’N I KPƆLƐ BOLƐ
Nán blɛ kwlaa nun yɛ Biblu’n nun like suanlɛ’n ti pɔpɔ-ɔ. Sanngɛ sɛ a mian ɔ ɲin suan nun like’n, a kwla di aklunjɔɛ tititi. Sɛ a fa ɔ wla kwlaa gua Zoova su’n, ɔ́ yrá ɔ su.
Ndɛ’n i nun flanlɛ
?Ngue ti yɛ Biblu’n nun ndɛ’n ti ɔ cinnjin-ɔn?
?Á yó sɛ naan w’a kle kɛ a “wun ninnge nga be ti cinnjin kpa’n be wlɛ”?
?Ngue ti yɛ ɔ ti cinnjin kɛ a srɛ Zoova kɛ ɔ uka ɔ naan a kwla suan Biblu’n nun like titi-ɔ?
NDƐ WIE MUN EKUN
Ninnge nnan mɔ be ukali sran kpanngban naan b’a yo ninnge nga be ti cinnjin kpa’n.
“Dun mmua yo ninnge nga be ti cinnjin’n” (An tinnge!, afuɛ 2014 Fevrie)
Bla kun miɛnnin i ɲin kpa naan Zoova i klun jɔ i wun. Sanngɛ i sɔ’n yomɛn i wun’n i fɛ. ?Wafa sɛ yɛ Zoova ukali bla sɔ’n niɔn?
Wafa nga bla kun i ajalɛ kpa’n ukɛli i wun’n.
Sran wie’m be waan Zoova i Lalofuɛ’m be yo maan awlobo’m be nunfuɛ’m be bubu be wun nun. ?Sanngɛ be ndɛ sɔ’n ti nanwlɛ?
“?Zoova i Lalofuɛ’m be ti’n awlobofuɛ’m be afiɛn saci?” (jw.org su ndɛ)