I su fitilɛ

Fluwa Biblu’n nun mmla wie mɔ be uka Klisifuɛ mun’n wá úka wɔ naan w’a wun Biblu’n nun ndɛ wie mɔ be kwla uka wɔ sa fanunfanun nun’n be ndɛndɛ. Asa’n, ɔ́ úka wɔ naan w’a wun Biblu’n nun ndɛ mma trele nga a kwla fa wla sran fanngan annzɛ a kwla fa ukɛ i naan w’a fa ajalɛ ng’ɔ manman Zoova’n. Fluwa’n i nun like kunndɛlɛ’n timan kekle. Sɛ ndɛ wie lo wɔ’n, kunndɛ. Kɛ a ko wun i’n, á wá wún kosan nin Biblu’n nun ndɛ wie mɔ be boli be kpɔlɛ’n. (Nian kuku “Wafa nga a kwla kunndɛ like fluwa nga nun’n” i nun.) Ndɛ sɔ’m bé úka wɔ kpa. Á wá wún afɔtuɛ kpakpa nin fɔnvɔlɛ ndɛ wie mɔ be fin Ɲanmiɛn Ndɛ’n nun’n. Asa’n, á wá wún ndɛ kpakpa wie mɔ a kwla fa uka ɔ wiengu mun’n. Ndɛ sɔ’m bé fɔ́nvɔ be, bé úka be naan b’a kwla jran be su sa’m be ɲrun kekle, yɛ bé wlá be fanngan kpa.

Wafa nga a kwla kunndɛ like fluwa nga nun’n

Sɛ ɔ waan á wún ndɛ wie’n, a kwla klɛ i lika nga be kunndɛ ninnge’m be lɔ’n annzɛ a kwla ko kunndɛ i ndɛ akpasua’m be nun. Fluwa’n i nun ndɛ akpasua’m be ti nso. Be yɛle Sa mun, Ayeliɛ, Asɔnun, Ninnge nga e yo be’n, Awlobo, Ɲanmiɛn sulɛ ɔ nin Nzuɛn mun. Ndɛ nga a kunndɛ’n, á wún be nun sunman akpasua sɔ’m be nun kun nun. Ɔ maan akpasua nga kɛ a niɛn i siin’n a kwla wun ndɛ sɔ’n i lɔ’n, tin su kpɛkun kunndɛ. Sanngɛ sɛ a wunman ndɛ akpasua trele nga a kwla wun like nga a kunndɛ’n i nun’n, tin I kwlaa su naan niannian nun lele naan w’a wun i. Ndɛ ja kwlaa i bo lɛ’n, ndɛ ce wie’m be o lɛ. Be klɛli be ble tuun kpa nun. Wie’m be ti kosan, yɛ wie’m be timan kosan. Be klɛli Biblu’n nun ndɛ mma wie mun ble tuun kpa ndɛ ce sɔ’m be bo lɛ. Kɛ á kánngan be nun’n, bu wafa nga be suan ndɛ ce’m be bo’n annzɛ wafa nga be tɛ kosan’n su’n be akunndan kpa. Ɔ ju wie’n, be kpɛkpɛ ndɛ ja’m be nun kanngan kɛ ɔ ko yo naan w’a kwla wun ndɛ nga a su kunndɛ’n ndɛndɛ ti. Wie liɛ kusu’n, be klɛ ndɛ mma’m be wun lɛ kɛ “Nian nun wie.” Ndɛ mma sɔ’m be uka e naan y’a wun ndɛ’n i wlɛ kpa. Kpɛ sunman’n, á wún kɛ be klɛli lika wie’m be nun kɛ “Biblu’n nun ndɛ mɔ be kwla uka e’n.” I bo lɛ’n be klɛli Biblu’n nun ndɛ mma wie mun. Be klɛli ndɛ mma sɔ’m be nun ndɛ cinnjin’n annzɛ like nga be kle e’n be wun lɛ. Ndɛ sɔ’m bé wá úka wɔ naan w’a wun like nga a su kunndɛ’n ndɛndɛ.

Fluwa nga boman Biblu’n nun ndɛ mma nga be kan sa kun ndɛ’n be kwlaa be su. Sanngɛ ɔ uka e naan y’a bo sa sɔ’n i su like kunndɛlɛ bo. (Ɲan 2:1-6) Sɛ a kunndɛ kɛ á sí sa wie i su ndɛ kpa’n, nian Biblu’n nun ndɛ mma nga be o Mɛn Uflɛ Biblu’n i nun fluwa nɲa’m be afiɛn’n be nun’n, be nun. A kwla nian blɔfuɛ nun Biblu’n i lika ng’ɔ suan Notes d’étude nun wie bɔbɔ. Asa’n, nian Zoova i Lalofuɛ’m be like kunndɛlɛ fluwa’n i nun wie. Ninnge sɔ’m bé úka wɔ naan w’a wun sa sɔ’n i su ndɛ uflɛuflɛ nga anuannzɛ’n yiyili nun’n.

É srɛ́ kɛ fluwa Biblu’n nun mmla wie mɔ be uka Klisifuɛ mun’n ɔ uka wɔ naan a si ngwlɛlɛ nin akunndan nga be o Ɲanmiɛn Ndɛ’n nun’n be kpa. Kɛ á wá fá fluwa’n kúnndɛ like kɔ́’n, á wá láfi su kpa ekun kɛ “Ɲanmiɛn i ndɛ’n le ta kpa.”—Ebr 4:12.