Like kwlaa nga Ɲanmiɛn yo man amun’n, nán amun wla fi
‘Sɛ e wun nga Klist maan ɔ jɔ e’n ti sran’n, nn é sé kɛ maan ɔ sie amun nin amun klun angunndan’n kwlaa, [...] nán amun wla fi.’—KOLƆSFUƐ MUN 3:15.
1. ?Ngbaciɛ mennin yɛ ɔ o Klistfuɛ’m be asɔnun’n, ɔ nin mɛn nga Satan sie’n, be afiɛn ɔn?
SRAN ye silɛ’n, i ɲin’n fite kpa Zoova i Lalofuɛ’m be asɔnun akpiakpi ablangwlan nin nnan asɔnun ya nsiɛn (94.600) nga be o asiɛ wunmuan’n su’n be nun. Aɲia kwlaa i bo bolɛ nin i agualiɛ su’n, be srɛ Zoova be yi be ye silɛ’n i nglo Zoova srɛlɛ nun. I gbaflɛn nin talua mun o, i kpɛnngbɛn mun o, i be nga be ti Zoova i Lalofuɛ i osu w’a cɛ’n ɔ nin be nga blɛ li yɛ b’a yo Zoova i Lalofuɛ mun mɔ be yia likawlɛ be su Ɲanmiɛn o, ndɛ kɛ “nja mo annzɛ mmo mo,” annzɛ kusu “nja kwla annzɛ mmo kwla,” annzɛ ye silɛ ndɛ kunngba sɔ’n wie mun ekun yɛ be kan ɔn (Jue Mun 133:1). Zoova i Lalofuɛ mun ɔ nin mɛn nunfuɛ mɔ be bu be bɔbɔ be ngunmin be wun angunndan’n, mɔ ‘be siman Ɲanmiɛn’n nin be nga be faman e Min Zezi i jasin fɛ’n su’n,’ amun nian kɛ ngbaciɛ dan o be afiɛn ɔn (2 Tɛsalonikfuɛ Mun 1:8)! Mɛn nga e o nun yɛ’n i nunfuɛ’m be siman ye. Kɛ e si kɛ Satan yɛ ɔ sie mɛn’n, i sɔ’n boman e nuan kaan sa. Afin i yɛ ɔ ti sran’n bɔbɔ i klunklo angunndan bulɛ’n, i bo’n niɔn. Ɔ maan, i wun tulɛ nin i ɲin kekle yolɛ ayeliɛ’n w’a sa klɔ sran mun!—Zan 8:44; 2 Korɛntfuɛ Mun 4:4; 1 Zan 5:19.
2. ?Afɔtuɛ mennin yɛ ɔ fata kɛ e fa su ɔ? ?Yɛ kosan mennin mun yɛ é wá bú be su angunndan ɔn?
2 Kɛ mɔ Satan i mɛn’n ɔ sin yia e’n ti’n, ɔ fata kɛ e sasa e wun kpa naan i ayeliɛ tɛtɛ’m b’a saman e. Afuɛ ya kpɔlɛ klikli nun’n, Pɔlu seli Efɛzi lɔ Klistfuɛ mun kɛ: ‘Amun nzuɛn’n fa be nga be o yɛ’n be liɛ’n. Amun ɲin yili nglo lɔ mmusu’m be si’n, i yɛ ndɛkɛn ɔ wlawla sran nga be ɲin yiman Ɲanmiɛn’n niɔn. Laa e kwlaa e ti kɛ be sa, like nga klɔ sran konvi sɔ i’n yɛ e kunndɛ ɔ, like kwlaa nga ɔ yo e fɛ mɔ e bu i angunndan’n yɛ e yo ɔ. Nzuɛn sɔ’n mɔ be wuli e nin i’n ti’n, saan Ɲanmiɛn fá e wun ya kɛ ɔ fali sran wie’m be wun ya’n sa.’ (Efɛzfuɛ Mun 2:2, 3). Andɛ’n, ndɛ sɔ’n kpɛn su sran kpanngban’m be lika wie. ?I sɔ ti’n, wafa sɛ yɛ e kwla si ye titi ɔ? ?Wafa sɛ yɛ Zoova uka e ɔ? ?Wafa sɛ yɛ e kwla yi i nglo kɛ e si ye sakpa ɔ?
Sa nga ti yɛ ɔ fata kɛ e si ye’n
3. ?Ninnge mennin’m be ti yɛ e si Zoova i ye ɔ?
3 Ninnge kpanngban nga Ɲanmiɛn Zoova m’ɔ ti e Yifuɛ nin e Nguan Manfuɛ’n ɔ tuli i klun mannin e’n, kɛ e bu be angunndan’n, e wun i wlɛ kɛ, ɔ fata kɛ e si Zoova i ye (Zak 1:17). Cɛn kwlaa kɛ mɔ e o nguan nun ti’n, e yo Zoova mo, e lɛ i ase (Jue Mun 36:10). E wun i kɛ Zoova i sa nuan ninnge mun kɛ wia’n nin anglo ba’n, ɔ nin nzraama mun sa’n, be sin yia e. Asiɛ’n su ninnge kpanngban be ti maan e te o nguan nun. Kpɔkun ninnge nga be ɲinma kwlá wunman be’n, be kusu be ti fanunfanun be ti siesiewa sɛsɛsɛ. Kpɔkun nzue m’ɔ tɔ’n, ɔ sonji gua nzue ba’m be nun. Yɛ nzue ba sɔ’m be sonji ko gua jenvie’n nun. Kpɔkun wia’n ti maan nzue sɔ’n i wie lo, ɔ kaci kpukpuwa. Yɛ kpukpuwa sɔ’m be nuan tian nglo lɔ. I sin naan nzue sɔ’n w’a tɔ ekun asiɛ’n su. Nanwlɛ, ninnge kwlaa sɔ’m be kle kɛ ye nga ɔ fata kɛ e si e Si m’ɔ o ɲanmiɛn su lɔ’n, ɔ ti kɛ kalɛ sa e su. Famiɛn Davidi seli kɛ: ‘Anannganman min Ɲanmiɛn, abonuan sa nga a yoli’n, be sɔnnin. Yɛ angunndan kpakpa nga a bu i e wun’n, be sɔnnin. Like fi nin wɔ sɛman. Min waan ń dí sa sɔ’m be wun lalo ń sín. Be sɔnnin dan, n kwlá kaman be ngba.’—Jue Mun 40:6.
4. ?Ngue ti yɛ aklunjuɛ nga e nin e niaan mun e di i e asɔnun’m be nun ti’n, ɔ fata kɛ e si Zoova i ye ɔ?
4 Kannzɛ bɔɔ andɛ’n, Zoova i sufuɛ’m be nunman mɛn klanman jrɛiin kun nun sa’n, sanngɛ Ɲanmiɛn ninnge’m be nun’n, be o mɛn klanman kun nun. E Ɲanmiɛn Sielɛ Blɛ Sua’m be nun’n, ɔ nin nvle kun aɲia nin akpasua kun aɲia nin cɛn ngunmin kun aɲia’m be bo lɔ’n, e wun i kɛ e niaan’m be yi sa nga Ɲanmiɛn wawɛ maan sran yo’n, i nglo. I kwlaa sɔ’n ti’n, kɛ Zoova i Lalofuɛ wie’m bé bó jasin fɛ’n kle sran nga be siman Ɲanmiɛn ndɛ’n i nun ninnge kpanngban’n, be dun mmua fa sran’m be ɲin sie i “klɔ sran i nzuɛn’n” su. Kpɔkun i sin’n, be usa ndɛ tiefuɛ mun sɛ be sie i sɔ ninnge’n be nzɔliɛ andɛ o (Galasifuɛ Mun 5:19-23). Ɔ maan sran sunman lika be se kɛ, ninnge sɔ mun yɛ be wun be klɔ sran’m be ayeliɛ’n nun andɛ ɔ. Zoova i Lalofuɛ’m be yiyi ‘sa nga Ɲanmiɛn wawɛ maan sran yo’n,’ i nun kle sran kpanngban mun. Kpɔkun be yia sran sɔ mun Ɲanmiɛn Sielɛ Blɛ Sua nga ɔ o be lɔ’n i nun, naan be bɔbɔ bé wá kpɛ́ i sɔ liɛ’n i bo bé nían. Ɔ fite sran sɔ’m be nun sunman be nuan ndɛndɛ kpa kɛ: ‘Ɲanmiɛn wo amun afiɛn sakpa.’ (1 Korɛntfuɛ Mun 14:25). Nán lika kunngba cɛ yɛ be wun i sɔ’n niɔn. Lika kwlaa nga amún kɔ́’n, kɛ amun nin Zoova i Lalofuɛ miliɔn nsiɛn tra su’n be nun wie yia nun’n, aklunjuɛ kunngba’n yɛ be yi i nglo ɔ. Nanwlɛ, anuannzɛ m’ɔ wla sran fanngan sɔ’n ti’n, ɔ fata kɛ e si Zoova i ye. Afin i wawɛ’n ti yɛ maan like kwlaa sɔ’n, ɔ kwla yo ye ɔ.—Sofoni 3:9; Efɛzfuɛ Mun 3:20, 21.
5, 6. ?Zezi i wun nga ɔ fa kpɔli sran’m be ti’n, m’ɔ ti ninnge’m be nun kpafuɛ nga Zoova mannin e’n, wafa sɛ yɛ e kwla kle kɛ e si su ye ɔ?
5 Like kpa kwlaa nga be fa man sran’n, i kwlaa nga Zoova maan be ɲɛn i’n, be nun ɲɛnmɛn kpafuɛ’n, yɛle e ti kpɔlɛ tɛ mɔ i Wa Zezi yili’n. Akoto Zan seli kɛ: ‘Sɛ Ɲanmiɛn klo e dan kɛ nga sa’n, maan e kusu e klo e wun sɔ.’ (1 Zan 4:11). Nanwlɛ, kannzɛ bɔɔ e kle kɛ e klo Zoova naan e si i ye’n, sanngɛ nɛ́n i ngunmin yɛ ɔ kle kɛ e si e ti kpɔlɛ tɛ’n i su ye ɔ. Sanngɛ, kɛ e mɛn dilɛ wafa’n kle kɛ e klo e wiengu mun’n, i sɔ’n yi e ye silɛ’n i nglo wie.—Matie 22:37-39.
6 Sɛ e bu wafa nga Zoova nin Izraɛli laa’n be trannin’n i su angunndan’n, é kwlá súan ye silɛ’n i su ninnge kpanngban. Mmla’n nga Zoova fa mannin Moizi’n yɛ ɔ jran su fa man i nvle i afɔtuɛ kpanngban ɔn. Sɛ ‘e si ngwlɛlɛ nin sa m’ɔ ti nanwlɛ’n i kwlaa m’ɔ o Mmla’n nun’n,’ é kwlá fá Pɔlu i afɔtuɛ nga su. I waan: “Nán amun wla fi.”—Rɔmfuɛ Mun 2:20; Kolɔsfuɛ Mun 3:15.
Like nsan nga Moizi Mmla’n kle e’n
7. ?Wafa sɛ yɛ ninnge’m be blusu like yilɛ’n, ɔ ukali Izraɛlifuɛ mun naan b’a si Zoova i ye ɔ?
7 Moizi Mmla nun’n, Zoova siesieli like nsan mɔ be kwla ukali Izraɛlifuɛ mun naan b’a kle kɛ be si i aklunye’n i su ye ɔ. I klikli su’n yɛle blusu like yilɛ’n. Fie su like nin waka mma’m be blusu’n, ɔ nin “like kɛ nannin sa annzɛ kɛ bua nin boli’m be sa’n, be blusu’n,” ‘be sie be nzɔliɛ, afin be ti min liɛ.’ (Saun Yolɛ 27:30-32). Kɛ Izraɛlifuɛ’m be di mmla sɔ’n su’n, Zoova yra be su dan kpa. Zoova m’ɔ sie mɛn wunmuan’n waan: ‘Amun ninnge nga amun ɲɛn i’n, i nga ɔ ti i blusu sakpa’n, amun fa be ko guɛ i min sua’n nun lɔ, naan nán aliɛ tu lɔ mlɔnmlɔn. Amun sa min sɔ be nian, sɛ m’an tikeman ɲanmiɛn su lɔ anuan’n m’an manman amun naan m’an manman amun ninnge kpakpa lele w’a boboman amun su cɛ’n, nn nán min ɔn.’—Malasi 3:10.
8. ?Ngbaciɛ mennin yɛ ɔ o be klunklo like manlɛ nin blusu like yilɛ’n be afiɛn ɔn?
8 I nɲɔn su m’ɔ su blusu like yilɛ’n i su’n, yɛle be klunklo like nga Zoova siesieli i kɛ Izraɛlifuɛ’m be man’n. Ɔ seli Moizi naan ɔ kan kle Izraɛlifuɛ mun kɛ: “Sɛ amun ju mɛn nga ń fá amun kɔ́ lɔ’n i nun lɔ’n, sɛ amún dí mɛn sɔ nun lɔ kpaun’n, amun fɛ i bue man min.” ‘Ble sanmlɛn mlɛnnɛnnɛn kpa mɔ be fɔtɔ be fa tɔn gato’n,’ ɔ fata kɛ be fɛ i gato klikli’n be ‘yi sraka be man min.’ Ɔ fata ekun kɛ be mma nga bé wú be’n, be yo i sɔ wie titi. Amun sie i nzɔliɛ. B’a kleman ninnge klikli nga be mannin be sɔ’n, be nuan trele sa m’ɔ fata kɛ be fa man ɔn (Kalɛ 15:18-21). Sanngɛ, kɛ Izraɛlifuɛ’m be man asenna like’n, be si kɛ Zoova yrá be su. Ndɛ sɔ’n i ɲin fite Ɲanmiɛn i sua nga Ezekiɛli wunnin i aolia nun’n, i nun ninnge siesielɛ’n nun wie. E kɛnngɛn i kɛ: ‘Fie’m be su ninnge klikli nga be ɲan be’n nin ninnge nga Izraɛlifuɛ’m be yi be aɲanbeun ninnge’m be su’n, be ti min ɲrun jranfuɛ’m be liɛ. Be ble sanmlɛn’n i kpafuɛ’n, maan be fa man be naan n yo be liɛ ye.’—Ezekiɛl 44:30.
9. ?Fie’n su ninnge nga ɔ fata kɛ like kpɛfuɛ’m be yaci i lɛ’n, ngue like yɛ i su mmla nga Zoova mannin’n, ɔ kle ɔ?
9 I nsan su’n, Zoova siesieli ninnge nga like kpɛfuɛ’m be yaci i fie nun’n i su mmla. Ɲanmiɛn seli kɛ: ‘Sɛ ble o annzɛ sɛ like m’ɔ ti kɛ ble sa mɔ amun su kpɛ’n, nán amun kpɛ nga m’ɔ fifili fie’n i nuan su’n. Yɛ kusu i nga mɔ amún kpɛ́ m’ɔ gua’n, nán amun sa amun sin be isɛ i kun. Amun viɲi fie’n i nun viɲi mma’n kusu, sɛ amún tí naan sɛ amun wla fili i sɔsɔwa wie i ɲanman’n su’n, nán amun sa amun sin be ti be kun. Sɛ i kusu i mma’n wie tɔli asiɛ wun’n, nán amun bli amun ɲin be isa. Amun yaci i lɛ be man yalɛfuɛ mun nin aofuɛ mun. Min yɛ n ti amun Ɲanmiɛn’n niɔn.’ (Saun Yolɛ 19:9, 10). B’a kleman like manlɛ sɔ’n i nuan kun sa trele wie. Izraɛlifuɛ kun bɔbɔ yɛ ɔ yaci i klunklo like lɛ man yalɛfuɛ mun nin aofuɛ mun ɔn. Famiɛn ngwlɛlɛfuɛ Salomɔn seli kɛ: ‘Like nga sran kun fa cɛ yalɛfuɛ’n, ɔ ti kɛ Anannganman yɛ w’a fa mɛn i sa. Ɔ maan Anannganman ɔ́ yó i mo.’ (Nyanndra Mun 19:17). I sɔ yolɛ nun’n, Zoova kle kɛ ɔ fata kɛ be si be nga be leman wie’n be aunnvuɛ.
10. ?Kɛ Izraɛlifuɛ’m be siman ye’n, i bo nzuɛn mennin yɛ be isa ɔ?
10 Kɛ Izraɛlifuɛ’m be fa Zoova i mmla’n su mɔ be mɛn i blusu’n ɔ nin be klunklo like’n, mɔ be cɛ yalɛfuɛ’m be like’n, nn Zoova kusu ɔ́ yrá be su. Sanngɛ, kɛ Izraɛlifuɛ’m be siman Zoova i ye’n, i klun jɔman be wun. Ɔ maan be wun ɲrɛnnɛn. Kpɔkun wie liɛ’n, be fa be kɔ lomuɛn (2 Be Nyoliɛ 36:17-21). ?Afɔtuɛ mennin yɛ i sɔ’n man e siɛn’n niɔn?
E ye silɛ’n i nglo yilɛ
11. ?Like cinnjin kpa mennin yɛ e kwla yo naan y’a yi e Zoova i ye silɛ’n i nglo ɔ?
11 Wafa cinnjin kpa nga e manman Zoova, mɔ e yi e ye silɛ’n i nglo’n wie’n, yɛle ‘ninnge nga e fa mɛn i’n.’ Nanwlɛ, kɛ mɔ e ti Klistfuɛ ti’n, Moizi Mmla’n sieman e. Ɔ maan i ti’n, e faman nnɛn annzɛ fie su ninnge mun e yiman tɛ (Kolɔsfuɛ Mun 2:14). Sanngɛ, akoto Pɔlu wlali Klistfuɛ Ebre’m be fanngan seli kɛ: ‘Maan manmanlɛ nga e manman Ɲanmiɛn titi’n ɔ yo kɛ asenna like mɔ e fa man Zezi kɛ ɔ fa mɛn i’n sa. Kɛ é yó sɔ’n e bo i dunman.’ (Ebre Mun 13:15). Jasin fɛ’n bolɛ nun’n, annzɛ e nin e niaan Klistfuɛ mun e ‘aɲia’m be nun’n,’ kɛ é fá e sa silɛ nin e aɲanbeun ninnge mun é lá Zoova i ase’n, e kwla tu e klun e yo e Si kpa Ɲanmiɛn Zoova m’ɔ o ɲanmiɛn su lɔ’n, i mo (Jue Mun 26:12). ?I sɔ yolɛ’n nun’n, wafa nga Izraɛlifuɛ’m be yi be ye silɛ’n i nglo’n Zoova i lika’n, ɔ kle e sɛ?
12. ?E Klistfuɛ junman dilɛ nun’n, ajalɛ mennin yɛ blusu like yilɛ’n ɔ kle e ɔ?
12 I klikli su’n, kɛ nga y’a dun mmua y’a wun i’n sa’n, blusu like yilɛ’n ti like kun m’ɔ fata kɛ Izraɛlifuɛ kwlaa be man ɔn. Ɔ lemɛn i yowlɛ, saan yolɛ cɛ yɛ bé yó like sɔ’n niɔn. E kusu, Klistfuɛ mɔ e ti’n ti’n, ɔ fata kɛ e bo jasin fɛ’n, yɛ e wɔ asɔnun aɲia’m be bo. Ngalɛ’n kusu, ɔ lemɛn i yowlɛ, saan yolɛ cɛ yɛ é yó like sɔ mun ɔn. Kɛ Zezi kán mɛn’n i awieliɛ’n i nzɔliɛ’n i ndɛ’n, ɔ seli weiin kɛ: ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’ (Matie 24:14; 28:19, 20). Kɛ Pɔlu kán Klistfuɛ’m be aɲia’m be ndɛ’n, Ɲanmiɛn wawɛ’n maan ɔ seli kɛ: ‘Maan e bu e wiengu’m be angunndan e wla be fanngan naan be klo be wun yɛ be yo sran ye. Nán maan e yaci yialɛ’n kɛ sran wie’m be yo’n sa. Sanngɛ maan e yia e tu e wun fɔ. Siɛn’n mɔ an wun kɛ e Min’n i cɛn’n su mantan’n, an yo i sɔ tra su.’ (Ebre Mun 10:24, 25). Kɛ e di jasin fɛ’n bolɛ nin sran’m be Biblu’n nun like klelɛ junman’n aklunjuɛ su’n, mɔ e nin e niaan mun e yia aɲia’m be bo titi’n, e yi e Zoova i ye silɛ’n i nglo. Kpɔkun, i sɔ yolɛ’n ti e cenjele nin e aɲrunɲan like.
13. ?Afɔtuɛ mennin yɛ be klunklo like manlɛ nin ninnge nga like kpɛfuɛ’m be yaci i fie nun’n, be man e ɔ?
13 I kusu’n, like siesielɛ nɲɔn ekun mɔ Izraɛlifuɛ’m be fa yi be ye silɛ i nglo ekun’n, yɛle be klunklo like manlɛ nin ninnge nga like kpɛfuɛ’m be yaci i fie nun’n. Sɛ e bu be su angunndan’n, é kwlá ɲán su mmlusuɛ. Blusu like yilɛ’n i su mmla’n ti weiin, sanngɛ be klunklo like manlɛ nin ninnge nga like kpɛfuɛ’m be yaci i fie nun’n, be liɛ’n ɔ timan sɔ. Ɔ maan i ti’n, wafa nga Zoova i sufuɛ kun i ye silɛ’n fa ti i awlɛn nun lɔ ju’n, i su yɛ ɔ nian yɛ ɔ yi i nglo ɔ. ?I sɔ kunngba’n kusu’n, kannzɛ bɔbɔ ɔ ti e klun su kɛ jasin fɛ’n bolɛ’n, ɔ nin asɔnun aɲia’m be bo kɔlɛ’n be ti ninnge m’ɔ fata kɛ Zoova i sufuɛ kwlaa yo’n, sanngɛ e klunklo su yɛ e tu e klun e yo ninnge sɔ mun ɔn? ?E bu ninnge sɔ mun kɛ be ti like kwlaa nga Zoova mannin e’n, i su ye silɛ’n dan’n i nglo yilɛ nzɔliɛ like? ?Kɛ nga e wunmiɛn’n kwla ju lɛ’n, i su yɛ e nian e tu e klun e di junman sɔ mun ɔn? ?Annzɛ kusu e ɲrun’n, be ti mmla nga be mannin e’n be su falɛ sa ngbɛn? Nanwlɛ, ɔ fata kɛ e bɔbɔ e sa e awlɛn e nian naan y’a tɛ kosan sɔ’m be su. Akoto Pɔlu i ndɛ nga ɔ kɛn i sɔ ninnge’m be su’n yɛ: ‘Maan sran kun niɛn i bɔbɔ i ɲoliɛ’n, sɛ ɔ wun kɛ ɔ ti kpa’n, ɔ́ yó i fɛ, ɔ maan ɔ su faman sran uflɛ liɛ’n sunnzunmɛn i liɛ’n.’—Galasifuɛ Mun 6:4.
14. ?Zoova i junman dilɛ nun’n, ngue like yɛ ɔ kunndɛ kɛ e yo ɔ?
14 Ɲanmiɛn Zoova si sa nga ɔ o e su’n kpa. Ɔ si kɛ e wunmiɛn’n fa ju lɛ’n. Like kwlaa nga i sufuɛ’m be tu be klun be yo mɛn i’n, sɛ ɔ ti dan annzɛ ɔ ti kaan o, i ɲin kpaman su. Ɔ miɛnmɛn i sufuɛ’m be kwlaa kɛ be ninnge nga be yo mɛn i’n, ɔ sɛ. E kwlá yomɛn i sɔ bɔbɔ. Kɛ akoto Pɔlu kán be sa nun like mɔ be fa cɛ Ɲanmiɛn i ndɛ klé Korɛnti lɔ Klistfuɛ mun’n, ɔ seli kɛ: ‘Sɛ sran kun bɔbɔ klun su i waan ɔ́ mán Ɲanmiɛn like’n, like nga i sa ju su m’ɔ fa mɛn i’n, ɔ sɔ nun, ɔ mianman sran kɛ ɔ mɛn i like m’ɔ lemɛn i’n.’ (2 Korɛntfuɛ Mun 8:12). Ndɛ sɔ’n, ɔ kan junman nga e di fa man Ɲanmiɛn’n wie. Nán junman’n i dan mɔ e di’n yɛ maan Zoova klun jɔ like nga e yo mɛn i’n i su ɔ. Sanngɛ wafa nga e di junman sɔ’n yɛ ɔ jɔ i klun ɔn. Yɛle kɛ, maan e tu e klun e di junman sɔ’n aklunjuɛ su.—Jue Mun 100:1-5; Kolɔsfuɛ Mun 3:23.
Angunndan nga atin bofuɛ’m be bu’n, maan e yi i nglo naan e yo i sɔ titi
15, 16. (a) ?Like mennin yɛ ɔ o ye silɛ nin atin bofuɛ junman dilɛ’n, be afiɛn ɔn? (b) ?Wafa sɛ yɛ be nga be kwlá diman atin bofuɛ junman’n be kwla yi angunndan nga atin bofuɛ’m be bu’n, i nglo wie ɔ?
15 Wafa nga e kwla kle kɛ e si Zoova i ye’n, i nun kun yɛle blɛ kwlaa nun Ɲanmiɛn junman dilɛ’n. Sɛ e yo sɔ’n, e bɔbɔ é ɲán su mmlusuɛ, yɛ é dí aklunjuɛ. Zoova i sufuɛ kpanngban be ye silɛ nin klolɛ mɔ be klo i’n, ɔ nin Zoova i aklunye m’ɔ nin be fataman’n ti’n, b’a fa be wun b’a mɛn i. Ɔ maan i ti’n, Zoova i sufuɛ kpanngban sɔ’m be kacili be mɛn dilɛ wafa’n naan b’a ɲan blɛ kpanngban b’a di i junman’n. Anglo kwlaa nun’n, be nun wie’m be di atin bofuɛ junman. I sɔ ti’n, be di dɔ kɔe ableso (70) jasin fɛ’n bolɛ nin sran’m be Biblu’n nun like klelɛ’n nun. Anglo kwlaa nun’n, be nun wie mun ekun mɔ be leman alaje blɛ kwlaa nun’n, be ti cɛn kunngun atin bofuɛ. Ɔ maan i ti’n, be di dɔ ablenun (50) jasin fɛ’n bolɛ nun.
16 ?Sanngɛ, Zoova i sufuɛ nga be kwlá diman titi atin bofuɛ junman annzɛ cɛn kunngun atin bofuɛ junman’n nin? Angunndan nga atin bofuɛ’m be bu’n, be kwla yi i nglo wie naan b’a kle kɛ be si ye. ?Wafa sɛ? Be kwla wla be nga be le atin bofuɛ junman dilɛ’n i wun alaje’n, be fanngan. Annzɛ be kwla yo maan be mma’m be konvi sɔ blɛ kwlaa nun Ɲanmiɛn junman dilɛ’n. Annzɛ kusu’n, be kwla nian kɛ nga be wunmiɛn’n kwla ju lɛ’n i su naan b’a bo jasin fɛ’n juejue su. Ninnge nga Zoova yoli mannin e’n, ɔ nin nga ɔ su yo be’n, ɔ nin nga ɔ́ wá yó mán e’n, kɛ nga e awlɛn fa si be su ye ju lɛ’n, i su yɛ e nian e bo jasin fɛ’n niɔn.
Maan e fa ‘e sa nun ninnge kpakpa’n,’ e yi e ye silɛ’n i nglo
17, 18. (a) ?Wafa sɛ yɛ e kwla fa ‘e sa nun ninnge kpakpa’n,’ e yi e ye silɛ’n i nglo ɔ? (b) Ngue ndɛ yɛ Zezi kɛnnin i angbeti bla’n i sika nga ɔ mannin’n su ɔ? ?Yɛ ngue ti ɔ?
17 Nyanndra Mun 3:9 se kɛ: ‘Fa ɔ sa nun ninnge kpakpa’n wie la Anannganman i ase. Ɔ fie’n su ninnge klikli nga a dun mmua ɲan be’n, fa be lɛ i ase.’ Blusu like yilɛ’n timan Zoova i sufuɛ’m be liɛ kun. Sanngɛ Pɔlu seli Korɛnti lɔ asɔnunfuɛ mun kɛ: ‘Maan sran kun i like nga ɔ bu i angunndan kɛ sɛ ɔ man ɔn ɔ ti kpa’n, ɔ fa man, nán maan ɔ yo i klunngbɔ su nin mianlɛ su, afin sran nga ɔ man Ɲanmiɛn like i klun ufue su’n, i klun jɔ i wun.’ (2 Korɛntfuɛ Mun 9:7). E klunklo like nga e man e fa suan mɛn wunmuan nun Ɲanmiɛn Sielɛ Blɛ junman dilɛ’n i bo’n, ɔ yi e ye silɛ’n i nglo wie. Ye silɛ m’ɔ fin e awlɛn nun sakpa’n, ɔ wla e fanngan naan y’a yo i sɔ titi. Sɛ e kwlɛ i yo’n, le mɔcuɛ kwlaa nun’n, maan e fa like nga e waan é mán’n e sie i bue kun kɛ nga Klistfuɛ klikli’m be yoli’n sa.—1 Korɛntfuɛ Mun 16:1, 2.
18 Nán like nga e man’n, yɛ ɔ yi ye nga e si i Zoova i lika’n i nglo ɔ. Sanngɛ angunndan nga e bu’n, mɔ i ti yɛ e man like’n yɛ ɔ ti cinnjin’n niɔn. Kɛ Zezi nían be nga be fa sika guɛ i sika guawlɛ nun Ɲanmiɛn i sua nun lɔ’n, i sɔ liɛ’n su yɛ ɔ fɛli i ɲin sieli ɔ. Kɛ Zezi wunnin kɛ angbeti bla yalɛfuɛ kun su fa ‘jɛtɛ mma kanngan nɲɔn’ guɛ i sika guawlɛ nun’n, ɔ seli kɛ: ‘Nanwlɛ, angbeti bla yalɛfuɛ nga i sika liɛ’n m’ɔ yili’n, ɔ tra be kwlaa be liɛ’n, afin be nga’m be liɛ nga be yi guali sika guawlɛ nun’n, ɔ buman be kplɛ, sanngɛ bla nga liɛ’n, ɔ yili i yalɛ liɛ kan’n. I kwlaa nga ɔ lɛ i m’ɔ fa di like’n yɛ ɔ fa mannin ɔn.’—Lik 21:1-4.
19. ?Ngue ti yɛ ɔ ti kpa kɛ e bu wafa nga e yi e ye silɛ’n i nglo’n, i su angunndan’n niɔn?
19 E lafi su kɛ ninnge nga e suannin be’n, bé úka e kpa naan y’a bu wafa nga e yi e ye silɛ’n i nglo’n, i su angunndan. ?Sɛ e uka e jasin fɛ’n bolɛ’n, ɔ nin e sa nun like nga e fa suan mɛn wunmuan nun Ɲanmiɛn junman dilɛ’n i bo’n be su’n, ɔ yoman ye? Sɛ e yo i sɔ’n, e kwla lafi su kɛ e Si aklunyefuɛ Zoova m’ɔ klo e’n, i klun’n jɔ́ dan kpa e ye silɛ’n i nglo yilɛ’n ti.
?Amun wla kwla kpɛn su?
• ?Ngue ti yɛ ɔ fata kɛ e si Zoova i ye ɔ?
• ?Ngue afɔtuɛ yɛ blusu like yilɛ’n, ɔ nin be klunklo like manlɛ’n, ɔ nin ninnge nga like kpɛfuɛ’m be yaci i fie nun’n, be man e ɔ?
• ?Angunndan nga atin bofuɛ’m be bu’n, wafa sɛ yɛ e kwla yi i nglo wie ɔ?
• ?Wafa sɛ yɛ e kwla fa ‘e sa nun ninnge kpakpa’n,’ e la Zoova i ase ɔ?