Zoova i nglo nin asiɛ’n be sielɛ’n ɔ nin Ɲanmien Sielɛ’n
‘Anannganman, a ti dan, a kwla, a yo ɲɛnmɛn, a o lɛ tititi, ɔ ɲrun’n ti ɲanɲanɲan. Anannganman wɔ yɛ a ti famiɛn’n niɔn.’—1 Be Nyoliɛ 29:11.
1. ?Ngue ti yɛ Zoova le atin sie ninnge kwlaa nga be o nglo lɔ nin asiɛ’n su wa’n niɔn?
JUE TOFUƐ’N kan Zoova i sielɛ’n i su ndɛ nanwlɛ kun se kɛ: ‘Anannganman takali i famiɛn bia’n ɲanmiɛn su lɔ, ɔ sie ninnge’n kwlaa.’ (Jue Mun 103:19) Ɲanmiɛn Zoova yɛ ɔ yili ninnge’n kwlaa ɔ. I sɔ’n ti’n, ɔ le atin sie ninnge kwlaa nga be o nglo lɔ nin asiɛ’n su wa’n.
2. ?Ngue ndɛ yɛ Daniɛli kɛnnin i lika nga Zoova o nun ɲanmiɛn su lɔ’n, i su ɔ?
2 Siefuɛ kun sa’n, ɔ le sran m’ɔ sie be ɔ. Yɛ sran nga Zoova sie be’n be nun klikli’n yɛle aolia nun sran m’ɔ yili be’n. Ɔ dun mmua yili i Wa Kunngba cɛ’n i sin naan w’a yi anzi kpanngban kpa mun. (Kolɔsfuɛ Mun 1:15-17) Kɛ ɔ cɛli kpa’n, Ɲanmiɛn maan i nuan ijɔfuɛ Daniɛli wunnin like kun kpe kan ɲanmiɛn su lɔ. Ɔ kɛnnin i ndɛ seli kɛ: ‘N te nian, kpɛkun ń wún i ɔ, b’a siesie famiɛn bia mun. Kpɛkun sran oke kun wa trannin ase su. Sran akpi sɔ lele akpi be su i. Yɛ sran akpinngbin be jinjin i ɲrun lɛ.’ (Daniɛl 7:9, 10) Kɛ ɔ fɛ i lalaa kpa nun’n, Zoova m’ɔ ti ‘sran oke’n,’ ɔ sie i wa kpanngban kpa mɔ be ti aolia nun sran’n. Be o awlo kun m’ɔ ti siesiewa sɛsɛsɛ’n nun, kpɛkun be “ti i sufuɛ mun” mɔ be yo i klun sa’n.—Jue Mun 103:20, 21.
3. ?Wafa sɛ yɛ Zoova i sielɛ’n trɛli lele fa juli ɲanmiɛn ng’ɔ la nglo lɔ plaii’n nin asiɛ’n su ɔ?
3 Kasiɛn su’n, Zoova yoli maan i sielɛ’n trɛli ekun, afin ɔ yili ɲanmiɛn ng’ɔ la nglo lɔ plaii’n nin asiɛ’n. (Zɔb 38:4, 7) Kɛ e nian wafa nga ɲanmiɛn su lɔ ninnge ngblingbli mɔ be o lika plaii’n nun be nanti sɛsɛsɛ’n, e kwla bu i kɛ nán sran yɛ ɔ kle be atin ɔn. Sanngɛ jue tofuɛ’n waan: ‘Zoova fɛli i nuan nun ndɛ’n yɛ ɔ fa yili be ɔ. Ɔ sieli be kɛ be tran lɛ tititi. Ɔ mannin be mmla mɔ be to fuɛn i ɔ, ɔ yoman ye.’ (Jue Mun 148:5, 6) Zoova sie aolia nun ninnge mun nin ninnge nga be o lika plaii sɔ nun’n, afin ɔ kle be atin, ɔ man be mmla, yɛ ɔ nian be nantilɛ’n su.—Neemi 9:6.
4. ?Wafa sɛ yɛ Zoova sie sran mun ɔn?
4 Kɛ Ɲanmiɛn yili yasua nin bla klikli’n, ɔ yili i sran sielɛ’n i wafa uflɛ nglo. Ninnge kwlaa nga sran’m be miɛn i wun naan be ɲrun w’a yoman be koun, naan mɛn dilɛ w’a yo be fɛ’n, Ɲanmiɛn fa mannin be. Asa ekun’n, ɔ mannin be kwlalɛ kɛ be sie ninnge kwlaa nga be o asiɛ’n su wa’n. (Bo Bolɛ 1:26-28; 2:8, 9) Ɔ ti weiin kusu kɛ Ɲanmiɛn si sran sie naan sran ng’ɔ sie be’n, be ɲan su mmlusuɛ. Asa kusu’n, ɔ bu be sran yɛ ɔ yo maan be ɲan ɲrun. Ɔ maan, sɛ Adam nin Ɛvu be loli be wun mannin Zoova kɛ ɔ sie be’n, nn bé kwlá láfi su kɛ bé trán asiɛ klanman’n su tititi.—Bo Bolɛ 2:15-17.
5. ?Ngue ndɛ yɛ amun kwla kɛn i wafa nga Zoova sie sran’n i su ɔ?
5 ?Ngue yɛ i kwlaa sɔ’n kle e ɔ? I klikli su’n, Zoova sie ninnge kwlaa ng’ɔ yili be’n tititi. I nɲɔn su’n, Ɲanmiɛn si sran sie kpɛkun ɔ yo maan sran ng’ɔ sie be’n be ɲan ɲrun. I kasiɛn su’n, sɛ e lo e wun man Ɲanmiɛn kɛ ɔ sie e naan e suɛn i sielɛ’n bo’n, é dí aklunjuɛ tititi. Ɔ maan, nán ngbɛn ti yɛ Davidi m’ɔ yoli laa Izraɛli nvle’n i famiɛn’n, ɔ seli kɛ: ‘Anannganman, a ti dan, a kwla, a yo ɲɛnmɛn, a o lɛ tititi, ɔ ɲrun’n ti ɲanɲanɲan. Nglo lɔ nin asiɛ’n su wa ninnge’n kwlaa be ti ɔ liɛ. Anannganman wɔ yɛ a ti famiɛn’n niɔn. A o ninnge’n kwlaa ti su.’—1 Be Nyoliɛ 29:11.
?Ngue ti yɛ Ɲanmiɛn Sielɛ’n yoli cinnjin ɔn?
6. ?Ngue like yɛ ɔ o atin nga Ɲanmiɛn le i sie ninnge kwlaa’n ɔ nin Ɲanmiɛn Sielɛ’n be afiɛn ɔn?
6 ?Kɛ mɔ Zoova ti nglo nin asiɛ’n be siefuɛ tititi’n niɔn, ngue ti yɛ Ɲanmiɛn Sielɛ’n yoli cinnjin ɔn? Titi kɛ sran kun ti famiɛn’n, ɔ le i ja nunfuɛ m’ɔ fa yi i sielɛ’n i nglo ɔ. Ɔ maan, Ɲanmiɛn Sielɛ’n ti kɛ Ɲanmiɛn i ja nunfuɛ sa. I yɛ ɔ fa sie ninnge kwlaa ng’ɔ yili be’n niɔn.
7. ?Ngue ti yɛ Zoova kacili i sa ninnge’m be sielɛ nun ɔn?
7 Kɛ nga blɛ’n fa ti’n, Zoova nian su fa ajalɛ wafawafa ɔ fa yi i sran sielɛ’n i nglo. I sɔ’n ti’n, sa wie’m be ti’n, ɔ kacili i sa ninnge’m be sielɛ’n nun. Yɛle kɛ Satan mɔ laa ɔ ti Ɲanmiɛn i wa’n, ɔ yoli ɲin kekle Ɲanmiɛn su. Kpɛkun, ɔ suli Adam nin Ɛvu be bo maan be kusu be yoli ɲin kekle wie. Ɲin kekle yolɛ sɔ’n, ɔ ti Ɲanmiɛn i sran sielɛ’n i su akplowa silɛ. ?Wafa sɛ? Satan seli Ɛvu kɛ sɛ ɔ di waka mma nga Ɲanmiɛn seli be kɛ nán be di’n, ‘ɔ su wuman.’ I lɛ nun’n, ɔ su se kɛ Ɲanmiɛn diman nanwlɛ naan ɔ nin i fataman kɛ be lafi i su. Satan seli Ɛvu ekun kɛ: ‘Ɲanmiɛn bɔbɔ si kɛ cɛn nga amun di’n, amun ɲin tí. Amún yó kɛ i bɔbɔ sa, amún sí sa kpa’n nin sa tɛ’n.’ Ɔ maan Satan su se Adam nin Ɛvu kɛ, sɛ be kpalo Ɲanmiɛn i atin’n naan be bɔbɔ be fa be tiaun ajalɛ liɛ’n, yɛ be wun sa yó ye ɔ. (Bo Bolɛ 3:1-6) I sɔ liɛ’n, ɔ ti atin nga Ɲanmiɛn le i sie nglo nin asiɛ’n i su akplowa silɛ trele. ?Ngue yɛ Zoova yoli ɔ?
8, 9. (a) ?Sɛ sran’m be jaso mɛn siefuɛ kun wun’n, wafa sɛ yɛ ɔ kpɛ ndɛ’n nun ɔn? (b) ?Kɛ be yoli ɲin kekle Edɛni lɔ’n, ngue yɛ Zoova yoli ɔ?
8 ?Sɛ sran’m be jaso mɛn siefuɛ kun wun’n, ngue yɛ e lafi su kɛ mɛn siefuɛ sɔ’n ɔ́ yó ɔ? Be nga be si sa nga be juli laa nun’n, be si like mɔ mɛn siefuɛ’m be yo i blɛ kɛ ngalɛ sa nun’n. Mɛn siefuɛ nga ɔ yo sran’m be kpa bɔbɔ’n, i ɲin kpaman sa sɔ’n su. Sanngɛ, ɔ di sran sɔ’m be jɔlɛ, ɔ bu be fɔ afin be jasoli i wun. I sin’n, ɔ kwla sunmɛn i ja nunfuɛ kɛ ɔ nin ɲin keklefuɛ’m be ko kun naan ɔ kwla be, naan ɔ yo maan lika’n ɔ sɛ i sin ɔ yo fɔuun ekun. I kunngba’n, Zoova yili i nglo kɛ i sa’n te sɔn mɛn’n su. Afin, ɔ fali ajalɛ wie mun ndɛndɛ kpa, kpɛkun ɔ buli ɲin keklefuɛ’m be fɔ. Ɔ kleli kɛ Adam nin Ɛvu be nin anannganman nguan fataman kun. Kpɛkun, ɔ kannin be bo Edɛni fie’n nun.—Bo Bolɛ 3:16-19, 22-24.
9 Kɛ Zoova bú Satan i fɔ’n, ɔ yili i nglo kɛ ɔ fali ajalɛ uflɛ ninnge’m be sielɛ’n nun naan fɔundi w’a tran lika’n kwlaa nun, naan sa sukusuku yolɛ w’a tranman lɛ kun. Ɔ seli Satan kɛ: ‘Ń fá kpɔlɛ ń wlá a nin bla’n be afiɛn, ń fá wlá ɔ osu’n nin bla’n i osu liɛ’n be afiɛn. Bla’n i osufuɛ’m bé kpɔ́tɔ ɔ ti’n, yɛ ɔ kusu á ká be ja sin.’ (Bo Bolɛ 3:15) Ɔ maan, Zoova yili i nglo kɛ ɔ fali “bla’n i osu’n” kɛ ɔ nunnun Satan nin i minniɛn mun. I liɛ’n, ɔ́ yí i nglo kɛ i yɛ ɔ le atin sie nglo nin asiɛ’n niɔn.—Jue Mun 2:7-9; 110:1, 2.
10. (a) ?Wan mun yɛ be ti “bla’n i osufuɛ” mɔ be kannin be ndɛ’n niɔn? (b) ?Ngue ndɛ yɛ Pɔlu kɛnnin i Ɲanmiɛn i nuan ndɛ klikli’n i su kpɛnlɛ’n su ɔ?
10 “Bla’n i osufuɛ” sɔ mun yɛle Zezi Klist ɔ nin sran wie mun ekun mɔ be nin i bé dí famiɛn’n. Be wunmuan’n yɛ be ti Mɛsi i sielɛ’n annzɛ i awa’n niɔn. (Daniɛl 7:13, 14, 27; Matie 19:28; Lik 12:32; 22:28-30) Sanngɛ Ɲanmiɛn w’a yiyimɛn i ngba ngalɛ’n nun kpɛ kunngba. Wafa nga e ɲrun lɔ ndɛ klikli’n mɔ Ɲanmiɛn nuan ijɔfuɛ’m be klɛli i Biblu’n nun’n, ɔ́ kpɛ́n su’n, ɔ kɛli i liɛ kɛ ‘sa nga Ɲanmiɛn yimɛn i nglo kleman e laa’n sa. Kɛ ɔ fin mɛn’n i bo bolɛ nun’n, Ɲanmiɛn fiali sa sɔ’n su.’ (Rɔmfuɛ Mun 16:25) Kɛ ɔ fɛ i laa kpa nun’n, sran mɔ be lafi Ɲanmiɛn su’n, be kunndɛli kɛ bé sí blɛ mɔ Ɲanmiɛn yí ‘sa nga w’a yimɛn i nglo w’a kleman e laa’n,’ i nglo’n. Kpɛkun, be kunndɛli ekun kɛ bé sí blɛ mɔ Zoova nuan ndɛ klikli’n kpɛ́n su naan w’a yo weiin kɛ i yɛ ɔ le atin sie nglo nin asiɛ’n niɔn.—Rɔmfuɛ Mun 8:19-21.
‘Sa nga Ɲanmiɛn yimɛn i nglo kleman e laa’n,’ ɔ tuli i ɲin blɛblɛblɛ
11. ?Ngue yɛ Zoova tuli i ɲin kleli Abraamu ɔn?
11 Kɛ blɛ’n sín’n, Zoova ‘yili i sielɛ’n i wun akunndan mɔ sran wunmɛn i wlɛ’n,’ i su ninnge wie’m be nglo kleli sran mun blɛblɛblɛ. (Mark 4:11) Sran nga Ɲanmiɛn tuli sa sɔ’n i ɲin kleli be’n, be nun kun yɛle Abraamu mɔ ‘Ɲanmiɛn flɛli i i janvuɛ’n.’ (Zak 2:23) Zoova seli Abraamu kɛ ‘ɔ́ yó maan i osu’n wá yó nvle dan kun.’ I sin’n, ɔ seli Abraamu kɛ: ‘Wɔ anunman wie’m bé yó famiɛn,’ kpɛkun ‘ń sín wɔ anunman’m be nun ń yó asiɛ’n su nvlenvle’m be kwlaa be ye.’—Bo Bolɛ 12:2, 3; 17:6; 22:17, 18.
12. ?Kɛ nzue dan’n tɔli m’ɔ kpɛli’n, wafa sɛ yɛ Satan i osu’n yili i wun nglo ɔ?
12 Abraamu blɛ su’n, sran’m be kunndɛli kɛ bé síe be wiengu mun. Be nun kun yɛle Nowe i anunman mɔ be flɛ i Nimrɔdu’n. I su ndɛ nga Biblu’n kan’n yɛ: ‘Nimrɔdu yɛ ɔ yoli asiɛ’n su sran m’ɔ yoli famiɛn klikli’n niɔn. Nimrɔdu yoli koniɛn difuɛ dan kpa Anannganman ɲrun.’ (Bo Bolɛ 10:8, 9) Nanwlɛ, Nimrɔdu nin sran wie mun ekun mɔ be bɔbɔ be yoli be wun famiɛn’n, Satan yɛ ɔ sieli be ɔ. Sran sɔ mun nin be nga be suannin be bo’n, be ti Satan i osu’n annzɛ i minniɛn.—1 Zan 5:19.
13. ?Ngue ndɛ yɛ Zoova maan Zakɔbu kannin ɔn?
13 Kannzɛ bɔbɔ Satan miɛnnin i ɲin naan klɔ sran’m be sie be bɔbɔ be wun’n, sanngɛ Zoova w’a yacimɛn i klun sa’n i yolɛ. Zoova seli Zakɔbu m’ɔ ti Abraamu i anunman’n kɛ: ‘Famiɛn kpɔnman’n ɔ ti Zida awlo’n i liɛ mlɔnmlɔn, kpɛnngbɛn kpɔnman’n ɔ ti i osu’n i liɛ titi lele saan sran ng’ɔ le i bo’n w’a ba, naan nvle’m be kwlaa b’a su i.’ (Bo Bolɛ 49:10) Ɔ maan, Ɲanmiɛn nuan ijɔfuɛ’n i ndɛ sɔ’n kle kɛ bé fá “famiɛn kpɔman’n” bé mán sran kun m’ɔ le i sɔ liɛ’n i wun atin’n naan ɔ di famiɛn. Kpɛkun, bé mɛ́n i “kpɛnngbɛn kpɔnman’n” naan ɔ sie “nvle’m be kwlaa,” yɛle kɛ sran’m be kwlaa. ?Wan yɛle sran sɔ’n?
‘Lele saan sran ng’ɔ le i bo’n w’a ba’
14. ?Aenguɛ benin yɛ Zoova nin Davidi be trali ɔ?
14 Zida osu’n nun sran klikli nga Zoova fɛli i kɛ ɔ yo i nvle nunfuɛ’m be su famiɛn’n, yɛle Davidi. Ɔ ti nnɛn tafuɛ, ɔ ti Izai mɔ be flɛ i ekun kɛ Yese’n i wa.a (1 Samiɛl 16:1-13) Kannzɛ bɔbɔ Davidi fɔnnin naan ɔ yoli sa tɛ’n, sanngɛ Zoova kloli i sa. Afin, ɔ suannin Zoova i sran sielɛ’n i bo titi. Aenguɛ nga Zoova nin Davidi trali’n, ɔ tuli ndɛ ng’ɔ kɛnnin i Edɛni fie’n nun lɔ’n i ɲin. Ɔ seli Davidi kɛ: ‘Ń yó maan ɔ klun ba kun ɔ́ wá trán ɔ ja nun. Ń yó maan i sielɛ’n ɔ́ táka.’ Aenguɛ sɔ’n i nun ndɛ’n timan Davidi nin Salomɔn m’ɔ sinnin i osu famiɛn bia’n su’n be ngunmin be liɛ, afin Zoova seli ekun kɛ: ‘Ń tɛ́kɛ i sielɛ’n tititi.’ Aenguɛ nga Ɲanmiɛn nin Davidi trɛli i sɔ’n, ɔ kle kɛ ‘bla’n i osu’n,’ mɔ be seli kɛ ɔ́ yó famiɛn’n, ɔ́ fín Davidi i osu’n nun.—2 Samiɛl 7:12, 13.
15. ?Ngue ti yɛ e kwla se kɛ Zida famiɛn diwlɛ’n ti Ɲanmiɛn Sielɛ’n i nzɔliɛ like kun ɔn?
15 Ɲanmiɛn ɲrun jranfuɛ’m be su kpɛn mun, yɛ be guali Davidi nin i osu nunfuɛ nga be trannin bia’n su’n, be ti su ngo ɔ. Ɔ maan, be kwla se kɛ be kpali famiɛn sɔ mun sieli be ngunmin annzɛ be kwla se kɛ be ti mɛsi. (1 Samiɛl 16:13; 2 Samiɛl 2:4; 5:3; 1 Famiɛn Mun 1:39) Zoova fali be sieli famiɛn bia’n su kɛ be di famiɛn i dunman nun Zerizalɛmu lɔ. (2 Be Nyoliɛ 9:8) I sɔ’n ti’n, Zida famiɛn diwlɛ’n ti Ɲanmiɛn Sielɛ’n i nzɔliɛ like, ɔ ti wafa nga Zoova sie sran’n i nun kun.
16. ?Zida famiɛn’m be famiɛn dilɛ’n i bo’n guali sɛ?
16 Kɛ famiɛn’n nin i nvlefuɛ’m be lo be wun man Zoova kɛ ɔ sie be’n, Zoova sasa be kpɛkun ɔ ra be su. Salomɔn i famiɛn dilɛ blɛ nun’n, sran’m be wun jɔli be wun kpɛkun be yoli aɲanbeunfuɛ. I sɔ liɛ’n yi i nglo kɛ, blɛ mɔ Satan su kwlá lakaman sran mun kun’n, m’ɔ́ yó weiin kɛ Zoova le atin sie’n, like kunngba’n yɛ Ɲanmiɛn Sielɛ’n wá yó ɔ. (1 Famiɛn Mun 4:20; 5:5) Sanngɛ nga m’ɔ yo ɲrɛnnɛn’n, yɛle kɛ Davidi i osufuɛ nga be yoli famiɛn’n b’a nantiman Zoova i atin’m be su. Ɔ maan, nvlefuɛ’m be sɔli amuin kpɛkun be boli tekle. I agualiɛ su’n, afuɛ nga be flɛ i 607 nun ka naan y’a ju Zezi blɛ su’n, Zoova mannin Babilɔnifuɛ’m be atin kɛ be nunnun famiɛn diwlɛ sɔ’n. I lɛ nun’n, e kwla bu i kɛ Satan i ɲin m’ɔ mian naan w’a kan Zoova i sran sielɛ’n i ndɛ tɛ’n, ɔ yoli ye.
17. ?Kannzɛ bɔbɔ be nunnunnin Davidi nin i osufuɛ’m be famiɛn diwlɛ’n, ngue yɛ ɔ kle kɛ Zoova sa te sɔn mɛn’n su ɔ?
17 Davidi nin i osufuɛ’m be famiɛn diwlɛ’n, ɔ nin Izraɛli nglo lɔ famiɛn diwlɛ’n be nunnunlɛ’n, ɔ kleman kɛ Zoova siman sran sie. Sanngɛ, ɔ kle Satan i sran lakalɛ’n ɔ nin ɲin kekle mɔ sran’m be yoli Ɲanmiɛn su’n, be sin sa tɛtɛ mun. (Nyanndra Mun 16:25; Zeremi 10:23) Zoova yili i nglo kɛ ɔ ti famiɛn tititi, afin i nuan ndɛ nga Ezekiɛli kannin’n yɛ: ‘Bé dé wɔ famiɛn nzɔliɛ’n. Bé dé wɔ famiɛn kle’n [...] sacilɛ nga be flɛ i sacilɛ’n yɛ ɔ́ wá bá lɛ ɔ. Ń yó maan Zerizalɛmu sáci. Zerizalɛmu klɔ wunmuan’n ɔ́ sáci. Sanngɛ saan sran nga ń kpɛ́ i kɛ ɔ nin i be ɲɛ́n i’n ɔ́ bá naan i sɔ sa’n w’a ju [yɛle kɛ sanngɛ ɔ su yoman sran fi liɛ saan sran ng’ɔ le atin ɔ fa’n ɔ́ bá naan b’a fa mɛn i, NW].’ (Ezekiɛl 21:31, 32) Ndɛ nga kle kɛ ‘bla’n i osu’n,’ yɛle kɛ “sran ng’ɔ le atin ɔ fa’n” i balɛ’n te o siɛn.
18. ?Ngue ndɛ yɛ anzi Gabliɛli kan kleli Mali ɔ?
18 Afuɛ 2 nun ka naan y’a ju Zezi blɛ su’n, Ɲanmiɛn sunmɛnnin i anzi Gabliɛli Mali sin. Mali ti talua kun m’ɔ nin a siman bian ɔn. Ɔ tran Palɛstini mɛn’n i nglo lɔ lika’n i klɔ mɔ be flɛ i Galile’n, i su lɔ. Gabliɛli seli kɛ: ‘Nian, á wá wúnnzɛ, á wú ba yasua, yɛ á tɔ́n i dunman Zezi. Ɔ́ yó sran dan, bé flɛ́ i kɛ Ɲanmiɛn mɔ like fi nunmɛn i sin’n i Wa, yɛ e Min Ɲanmiɛn’n ɔ́ fɛ́ i nannan Davidi bia’n mɛ́n i. Ɔ́ síe Zakɔbu awlo’n, yɛ ɔ́ ká be osu’n nun tititi.’—Lik 1:31-33.
19. ?Sa cinnjin benin mun yɛ be su wa ju ɔ?
19 I agualiɛ su’n, blɛ m’ɔ nin i fatali kɛ ‘sa nga Ɲanmiɛn yimɛn i nglo kleman’n,’ ɔ yi i nglo siɛn’n, ɔ mantannin. I sɔ nun nn ‘bla’n i osufuɛ mun’ be nun sran cinnjin’n, ɔ su wa yi i wun nglo. (Galasifuɛ Mun 4:4; 1 Timote 3:16) Satan wá kɛ́ i ja sin. Sanngɛ, ‘bla’n i osu’n’ kpɔ́tɔ Satan i ti’n, ɔ maan Satan nin i minniɛn’m be su kwlá yoman like fi kun. Asa ekun’n, bla’n i osu’n yí i nglo kɛ Ɲanmiɛn Sielɛ’n bú sa tɛtɛ kwlaa nga Satan yoli’n be nuan nɲa, kpɛkun ɔ́ klé weiin kɛ Zoova kunngba cɛ yɛ ɔ le atin sie nglo nin asiɛ’n niɔn. (Ebre Mun 2:14; 1 Zan 3:8) ?Wafa sɛ yɛ Zezi wá yó i sɔ liɛ’n niɔn? ?Ajalɛ benin yɛ ɔ kleli e ɔ? Like suanlɛ ng’ɔ ba lɛ’n wá yíyí i sɔ liɛ’n nun.
[Ja ngua lɛ ndɛ’n]
a Sran klikli nga Ɲanmiɛn sieli i famiɛn Izraɛli nvle’n su’n yɛle Saili, ɔ fin Bɛnzamɛn akpasua’n nun.—1 Samiɛl 9:15, 16; 10:1.
?Amun kwla yiyi nun?
• ?Ngue ti yɛ Zoova le atin sie nglo nin asiɛ’n niɔn?
• ?Ngue ti yɛ Zoova takali Ɲanmiɛn Sielɛ’n niɔn?
• ?Wafa sɛ yɛ Zoova tuli ‘sa nga ɔ yimɛn i nglo kleman e laa’n,’ i ɲin blɛblɛblɛ ɔ?
• ?Kannzɛ bɔbɔ be nunnunnin Davidi nin i osufuɛ’m be famiɛn diwlɛ’n, ngue yɛ ɔ kle kɛ Zoova sa te sɔn mɛn’n su ɔ?
[Foto, bue 5]
?Ngue yɛ Zoova sinnin Abraamu sin ɔ tuli i ɲin ɔn?
[Foto, bue 7]
?Ngue ti yɛ Davidi nin i osufuɛ’m be famiɛn diwlɛ’n i nunnunlɛ’n kleman kɛ Zoova siman sran sie ɔ?