Junman mɔ awlanman nun’n, i kpa’n tra junman kwlaa
1. ?Sɛ jasin fɛ’n ti e nanndoliɛ kpa’n, ngue yɛ é mían e ɲin é yó ɔ?
1 ?Ngue ti yɛ titi be wla e fanngan naan e fa e blɛ nin e wunmiɛn wunmuan’n e fa bo jasin fɛ’n yɛ e fa e aɲanbeun’n e fa e suɛn i bo ɔ? Yɛle kɛ, junman wie fi nin i sɛman. Junman sɔ mɔ e su dimɛn i kpɛ nɲɔn’n, sɛ e bu sa nga ti yɛ ɔ ti kpa’n i akunndan’n, ɔ́ úka e. Ɔ maan, e wun blíblí e kpa ekun kɛ e fa e wun wla nun.—Yol. 20:24.
2. ?Wafa sɛ yɛ jasin fɛ’n bolɛ’n kwla yo maan sran’m be bo Zoova m’ɔ ti kpli’n i dunman fɛ ɔ?
2 Ɔ yo maan be bo Zoova i dunman fɛ: Kɛ e bo jasin fɛ’n, e jran su kpa kɛ Zoova i Famiɛn Diwlɛ’n m’ɔ fa wlali Klist Zezi sa nun’n, ɔ́ núnnún klɔ sran’m be famiɛn diwlɛ mun sekeseke. Yɛ ɔ́ yó maan afɛ nin ɲrɛnnɛn kwlaa ng’ɔ kuakua sran’m bé wíe mlɔnmlɔn. (Mat. 6:9, 10) Asa, Zoova i dunman’n fu. Yɛle kɛ i kunngba cɛ yɛ ɔ kwla yo naan y’a ɲan e ti tukpaciɛ nin wie’n be sa nun ɔn. (Eza. 25:8; 33:24) Kpɛkun, Zoova dunman m’ɔ o e su’n ti’n, kɛ sran’m be wun e nzuɛn kpa nin wafa nga e bo e ɲin ase e di i junman’n, i sɔ’n kwla yo maan sran’m be yi i ayɛ. (1 Piɛ. 2:12) ?Nanwlɛ, kɛ e bo Ɲanmiɛn Kpli Zoova i dunman’n kle asiɛ sufuɛ’m be kwlaa’n, nán kpajalɛ cɛ yɛ e wun kpaja e ɔ?—Jue. 83:18, NW.
3. ?Mmlusuɛ benin yɛ be nga be fa Ɲanmiɛn Sielɛ’n i jasin fɛ’n su’n be ɲɛn i ɔ?
3 Ɔ de sran mun: Zoova “klo-man kɛ sran kun sa mlin, ɔ klo kɛ sran’m be kwlaa be kaci be nzuɛn’n.” (2 Piɛ. 3:9) ?Sanngɛ, sɛ sran fi kleman be Zoova ndɛ’n, ɔ́ yó sɛ yɛ bé wún like ng’ɔ ti kpa mɔ be kwla yo annzɛ ng’ɔ timan kpa m’ɔ fataman kɛ be yo’n, i wlɛ ɔ? (Zon. 4:11; Rɔm. 10:13-15) Kɛ sran’m be sɔ jasin fɛ’n nun klanman mɔ bé wlá be aeliɛ tɛtɛ’m be ase’n, nn bé yó kpa kɔ́. (Mis. 4:1-4) Kpɛkun, be lafi su kɛ cɛn wie lele’n, bé ɲán anannganman nguan. Jasin fɛ’n bolɛ’n dunman nun’n, e de e bɔbɔ nin be nga be ti e ndɛ’n. (1 Tim. 4:16) Nanwlɛ, e liɛ nga e yo i junman sɔ’n m’ɔ lemɛn i wunsu i nun’n, ɔ le ɲrun dan o!
4. ?Ngue ti yɛ ɔ fata kɛ e tu e klun e bo Ɲanmiɛn Sielɛ’n i jasin fɛ’n yɛ e kle sran’m be like naan be kaci Zezi i sɔnnzɔnfuɛ ɔ?
4 Ɔ cɛ kaan’n, kɛ ɲrɛnnɛn dan’n wá jú’n, é nían ɔn, mɛn nga e o nun yɛ’n ɔ nunman lɛ kun. Sanngɛ be nga be jran Zoova sin’n, bé fíte nun. I sɔ’n kle kɛ Ɲanmiɛn ndɛ mɔ e kan kle sran mun andɛ’n ɔ maan be kwla kaci Zezi i sɔnnzɔnfuɛ’n, ɔ ti junman nanndoliɛ kpafuɛ’n. Sran’m be ye yolɛ’n ti yɛ e di ɔ. Ɔ fataman kɛ e bo kokowa i dilɛ nun. I sɔ’n ti’n, maan e kwlaa e fa jasin fɛ’n bolɛ’n junman’n e fa sie like kwlaa ɲrun!—Mat. 6:33.