Maan e “tu e klun yo sran ye”
“Krist-Jésus [...] fɛli i wun mannin naan [...] e kaci i sa ti sran bɔ e wun sa tɛtɛ’n kwlaa w’a wie, bɔ e tu e klun yo sran ye.”—TIT 2:13, 14.
?AMÚN TƐ́ SU SƐ?
?Kɛ e tu e klun yo sran ye’n, ngue ti yɛ i sɔ’n ti e aɲrunɲan like ɔ?
?Kɛ e fa wunnin i Daniɛl i ndɛ tre 2:41-45 nun sa’n, ngue ti yɛ ɔ fata kɛ e tu e klun e bo jasin fɛ’n niɔn?
Wafa nga e nzuɛn kpa’n ti’n, sran’m be kunndɛ kɛ be nin Ɲanmiɛn Zoova bé síesíe be afiɛn naan bé sú i’n, amun fa sa wie yiyi nun.
1, 2. ?Junman benin yɛ Zoova i Lalofuɛ’m be kunngba cɛ yɛ be di ɔ? ?Wafa sɛ yɛ amun bu junman sɔ’n niɔn?
KƐ NDƐ tɔ nvle nɲɔn be afiɛn’n, sran wie’m be tu be klun be siesie. Kɛ be yo sɔ mɔ i bo gua kpa’n, be man be mo yolɛ like. I sɔ’n yo be fɛ kpa, afin ɔ ti be aɲrunɲan like. E kusu, Ɲanmiɛn sunman e kɛ e uka sran mun naan be nin i be siesie be afiɛn. ?Nán aɲrunɲan like’n i dan kpafuɛ’n yɛle i sɔ’n?
2 E mɔ e ti Zoova i Lalofuɛ’n, e kunngba cɛ yɛ Zoova fali junman ngunmin kun sɔ’n mannin e ɔ. Ɲanmiɛn bɔbɔ nin Klist be sunmannin e kɛ e uka sran mun naan ‘Nyanmiɛn siesie be nin i bɔbɔ be afiɛn.’ (2 Kor. 5:20) I sɔ mɔ e yo’n ti’n, nvle 235 tra su nun’n, sran kpanngban kpa be kaci Ɲanmiɛn janvuɛ. Ɔ maan be wla o su kɛ bé ɲán anannganman nguan. (Tit 2:11) E tu e klun e di junman sɔ’n naan “sran ng’ɔ klo kɛ” ɔ́ súan Ɲanmiɛn i su nanwlɛ’n, w’a si i. (Ngl. 22:17) Kɛ mɔ e yɛyɛ e junman sɔ’n, mɔ i dilɛ’n nun e yo like kwlaa nga e kwla yo ti’n, sɛ be se kɛ ‘e tu e klun yo sran ye’n,’ i su ɔ. (Tit 2:14) I sɔ’n ti’n, wafa nga e tu e klun yo sran’m be ye mɔ maan be kaci Zoova i sufuɛ’n, é wá kɛn i ndɛ. Wafa nga e yo i sɔ liɛ’n, i kun yɛle jasin fɛ’n i bolɛ junman mɔ e di’n.
MAAN E NIAN ZOOVA NIN ZEZI BE LIƐ’N SU
3. ?Kɛ be se kɛ ‘Zoova m’ɔ sie mɛn wunmuan’n ɔ tu i klun yo like’n,’ ngue yɛ i sɔ’n kle ɔ?
3 Ɲanmiɛn Ndɛ’n se kɛ Ɲanmiɛn i Wa’n, ɔ́ wá yó Famiɛn naan ɔ́ yó ninnge kpakpa kpanngban mán sran mun. “Zoova m’ɔ sie mɛn wunmuan’n m’ɔ tu i klun yo like’n,” i yɛ maan ɔ́ yó i kwlaa sɔ’n niɔn. (Eza. 9:7, NW) Ndɛ sɔ’n kle kɛ Zoova di junman juejue su naan sran’m be fite nun. I lɛ nun’n, ɔ kle e ajalɛ kpa. Yɛle kɛ e mɔ e ti Ɲanmiɛn Sielɛ’n i jasin fɛ bofuɛ’n, maan e tu e klun e di i junman’n naan sran’m be si i. E nin Ɲanmiɛn yɛ e di junman sɔ’n niɔn. ?Ɔ maan, e tinuntinun e yo like kwlaa nga e kwla yo naan y’a bo jasin fɛ’n?—1 Kor. 3:9.
4. ?Jasin fɛ’n i bolɛ nun’n, ajalɛ kpa benin yɛ Zezi kle ɔ?
4 Zezi kusu tuli i klun yoli sran ye. Sran’m be kleli i ɲrɛnnɛn dan. Sanngɛ, ɔ boli jasin fɛ’n i juejue su lele ɔ fa wuli. (Zan 18:36, 37) Kɛ i wie cɛn’n mántan koko bɔbɔ’n, yɛ ɔ tuli i klun kpa ukali sran mun naan be si Zoova ɔ.
5. ?Ɲanndra nga Zezi buli’n i nuan su like benin yɛ i bɔbɔ yoli ɔ?
5 Afuɛ nga be flɛ i 32 nun’n, Zezi buli ɲanndra kun. Ɔ seli kɛ bian kun tali figie bo kun i viɲi fie’n nun. Lele mɔ afuɛ nsan’n fá sín’n, ɔ suman. Ɔ maan, bian’n seli i fie’n i sunianfuɛ’n kɛ ɔ bu i bo. Fie’n i sunianfuɛ’n seli i kɛ ɔ yaci naan ɔ́ wá fá nnɛn waka su gúa figie’n i bo, naan sɛ ɔ́ sú o. (An kanngan Lik 13:6-9 nun.) I nun nga Zezi bú ɲanndra sɔ’n, nn sran kaan sa yɛ b’a kaci i sɔnnzɔnfuɛ ɔ. Like nga fie’n i sunianfuɛ’n yoli’n, i wie yɛ Zezi bɔbɔ yoli ɔ. Yɛle kɛ, ɔ tuli i klun boli jasin fɛ’n blɛ kan ng’ɔ tɛ ka naan w’a wu’n i nun. Ɔ boli jasin fɛ’n i kpa Zide nin Pere lɔ lele anglo nsiɛn. Sanngɛ sran’m b’a tieman. I sɔ’n ti’n kɛ ɔ ka kan ɔ́ wú’n, ɔ sun guali be wun seli kɛ “be su a ti-man.”—Mat. 13:15; Lik 19:41.
6. ?Ngue ti yɛ ɔ fata kɛ e tu e klun e bo jasin fɛ’n i kpa ɔ?
6 Ɔ ka kan mɛn’n wíe. I sɔ’n ti’n, ɔ fata kɛ e tu e klun bo jasin fɛ’n i kpa. (An kanngan Daniɛl 2:41-45 nun.) Zoova i Lalofuɛ mɔ e ti’n, ɔ ti e cenjele like dan. Afin e ngunmin yɛ asiɛ wunmuan’n su’n, e kle sran mun wafa nga ɲrɛnnɛn ng’ɔ o be su’n, bé wá wíe’n niɔn. Koko nun wa’n, zronali kun nun’n, bla kun usali kɛ: “?Ngue ti yɛ ɲrɛnnɛn tɔ sran kpa’m be su ɔ?” Kosan sɔ mɔ bla waan sran fi kwlá tɛman su’n, Ɲanmiɛn Ndɛ’n tɛ su kpa weiin. E mɔ e ti Klistfuɛ’n, e yɛ ɔ fata kɛ e yiyi nun kle sran mun. Kɛ é dí junman sɔ mɔ Zoova fa mannin e’n, ɔ fata kɛ e yo “waka-wakafuɛ.” (Rɔm. 12:11) Sɛ e yo sɔ’n, Zoova yrá e junman’n su. Ɔ maan, é úka sran mun naan b’a si i naan b’a klo i.
E WUN KLƐNLƐ’N MANMAN ZOOVA
7, 8. ?Kɛ e klɛn e wun e su Zoova’n, i bo gua sɛ?
7 Kɛ akoto Pɔlu dí Ɲanmiɛn junman’n, ɔ wunnin afɛ sunman. I wie yɛle kɛ ɔ juli wie’n, w’a “lafi-man” yɛ w’a “di-man like.” (2 Kor. 6:5) Ɲanmiɛn junman’n i dilɛ nun’n, e niaan’m be yo sɔ wie. I wie yɛle atin bofuɛ’m be liɛ’n. Be tu be klun bo jasin fɛ’n, afin i yɛ ɔ ti be junman cinnjin kpafuɛ’n niɔn. Be yo sɔ naan be kunngba’n b’a di junman uflɛ b’a fa nian be wun lika. Ngaliɛ difuɛ mɔ be tu be nvle liɛ’n nun be kɔ nvle uflɛ nun’n, be kusu be tu be klun be uka sran mun naan be si Ɲanmiɛn. (Fil. 2:17) Asɔnun’m be nun’n, aniaan’m be lika nianlɛ ti’n wie liɛ’n, asɔnun kpɛnngbɛn’m be ɲanman be ti be diman like, annzɛ be lafiman. E niaan kpɛnngbɛn mun nin be nga be ti tukpacifuɛ’n, be mian be ɲin be tran aɲia’m be bo yɛ be bo jasin fɛ’n. Wafa nga aniaan kwlaa sɔ’m be klɛn be wun be su Ɲanmiɛn’n, kɛ e bu i akunndan’n, ɔ wla e fanngan dan. Be nga be timan Zoova i sufuɛ bɔbɔ’n, be sie i nzɔliɛ kɛ Ɲanmiɛn junman’n ti e cinnjin kpa.
8 I wie yɛle Angle’m be lɔ sran kun m’ɔ timan Zoova i Lalofuɛ’n i ndɛ m’ɔ kannin’n. Ɔ kɛnnin i zronali kun nun kɛ: ‘Asɔnun kɔlɛ’n timan sran’m be cinnjin kun. Afin be like klefuɛ’m be yoman like fi. Klist ɔli sran’m be wun. Sanngɛ, be niɛnmɛn i liɛ’n su. Asɔnun kunngba cɛ nga i nunfuɛ’m be nian sran’m be lika’n, yɛle Zoova i Lalofuɛ mun. Be liɛ’n, be kɔ sran’m be wun be ko kle be Ɲanmiɛn ndɛ’n.’ Mɛn nga nun’n, sran’m be wiengu’m be ndɛ loman be. Sanngɛ e liɛ’n, e klɛn e wun e bo jasin fɛ’n. I sɔ mɔ e yo’n, ɔ man Ɲanmiɛn Zoova kɔmin su.—Rɔm. 12:1.
9. ?Sɛ e sa sin su bubu e’n, ngue yɛ ɔ fata kɛ e yo ɔ?
9 ?Sɛ e sa sin su bubu e’n, ngue yɛ ɔ fata kɛ e yo ɔ? Ɔ fata kɛ jasin fɛ bolɛ junman mɔ Zoova fa mannin e kɛ e di’n, e bu i bo m’ɔ gua kpa’n i akunndan. (An kanngan Rɔmfuɛ Mun 10:13-15 nun.) Ɔ fata kɛ sran’m be lafi Zoova su, yɛ be bo i dunman naan b’a fite nun. ?Sɛ y’a boman jasin fɛ’n, bé yó sɛ naan b’a si i naan b’a lafi i su? I sɔ’n ti’n, maan e tu e klun e bo jasin fɛ’n e yo sran’m be ye titi.
E AYELIƐ KPA’N TI’N SRAN’M BE KUNNDƐ KƐ BÉ SÚ ƝANMIƐN
10. ?E ayeliɛ kpa’n ti’n, ngue yɛ sran wie’m be kunndɛ kɛ bé yó ɔ?
10 Kɛ e tu e klun e di Ɲanmiɛn junman’n, ɔ ti kpa. Sanngɛ, ɔ fata kɛ e nzuɛn’n yo kpa wie. Like nga sran’m be sie i nzɔliɛ mɔ i ti be kunndɛ kɛ bé sú Ɲanmiɛn’n, i kun yɛ ɔ o lɛ. Fluwa kun mɔ Pɔlu klɛli’n i nun’n, ɔ kannin like nga ti yɛ ɔ fata kɛ e nzuɛn’n yo kpa’n i ndɛ. Ɔ seli kɛ: “E klo-man kɛ sran fi kan e junman’n i wun ndɛ, i sɔ’n ti’n, e yo-man sa fi b’ɔ saci sran ti nun-ɔn.” (2 Kor. 6:3) Nanwlɛ, e nuan m’ɔ fiteman tɛtɛ nin e ayeliɛ kpa’n ti’n, sran’m be bu Ɲanmiɛn ndɛ nga e kan’n i ndɛ kpa. Ɔ maan be kunndɛ kɛ bé sú Zoova. (Tit 2:10) Nganniɛn’m be gua e su titi kɛ e nzuɛn mɔ fa Klist liɛ’n ti’n, sran’m be sɔ ndɛ nanwlɛ’n nun klanman.
11. ?Ngue ti yɛ ɔ fata kɛ e bu wafa nga e nzuɛn’n yo sran mun’n, i akunndan ɔn?
11 Y’a wun kɛ e ayeliɛ kpa’n ti’n, sran’m be kwla kunndɛ kɛ bé sú Ɲanmiɛn. ?Yɛ sɛ e ayeliɛ’n timan kpa’n nin? ?Nán fuanlɛ cɛ yɛ é fúan sran mun ɔn? I sɔ’n ti’n, maan ɔ yo awlo lɔ o, junman su lɔ o, suklu lɔ o, maan e nian e wun su kpa. I liɛ’n, e su yoman sa tɛ wie mɔ i ti’n, sran’m be su suman Zoova ɔ. Asa kusu sɛ e ɲinfu e yo sa tɛ’n, Zoova nin e bú mlɔnmlɔn. (Ebr. 10:26, 27) I ti’n, maan e srɛ Zoova yɛ e nian e wun su kpa naan e ayeliɛ’n ti’n, sran wie’m b’a mlinman. Kɛ mɛn’n yó tɛ́ kɔ́’n, “ngbaciɛ ng’ɔ o sran ng’ɔ su Nyanmiɛn nin sran ng’ɔ su-man Nyanmiɛn’n be afiɛn’n,” sran kpa’m bé wún i weiin. (Mal. 3:18) Nanwlɛ, e nzuɛn kpa’n yo sa ye dan. Yɛle kɛ i ti’n, sran’m be nin Ɲanmiɛn be siesie be afiɛn.
12-14. ?Kɛ e wun ɲrɛnnɛn mɔ e tra e awlɛn’n, i bo gua sɛ? Amun fa sa kun be yiyi nun.
12 Pɔlu klɛli Korɛntifuɛ’m be fluwa seli be kɛ jasin fɛ’n ti’n, i kpɔfuɛ’m be kleli i ɲrɛnnɛn, be boli i yɛ be wlɛli i bisua. (An kanngan 2 Korɛntfuɛ Mun 6:4, 5 nun.) Ɲanmiɛn su mɔ e lafi ti’n, sa kwla ɲan e. Kɛ ɔ yo sɔ mɔ e tra e awlɛn’n, be nga be sie i nzɔliɛ’n be nun wie’m be kaci Zoova i Lalofuɛ. I wie yɛle sa kun m’ɔ juli e niaan’m be su sran ble’m be nvle kun mɔ be flɛ i Angola’n i nun lɔ’n. Blɛ wie nun’n, lɔfuɛ’m be nun wie’m be kunndɛli kɛ nán sran fi su Zoova lɔ kun. Ɔ maan cɛn kun mɔ aniaan nɲɔn nin Biblu’n nun like suanfuɛ ablasan bé yó aɲia’n, be ko trali be fiteli gua’n su. Kpɛkun, be yiali sran mun naan be w’a nian be. Nzrafuɛ sɔ’m be ɲrun’n, i bla o, i ba kanngan o, be boli be lele mmoja sonjili be wun. Be waan bé yó be sɔ naan, nán sran’m be sɔ Zoova i Lalofuɛ’m be nun. Sanngɛ, blɛ li yɛ sran’m be wa kunndɛli kɛ Zoova i Lalofuɛ’m be kle be Biblu’n nun like ɔ. Lele nin andɛ’n, aniaan’m be te bo jasin fɛ’n lika sɔ’n nun, yɛ sran sunman be kaci Zoova i sufuɛ. Zoova yaciman aniaan’m be suyralɛ.
13 E niaan’m be ndɛ nga e kɛnnin i icra’n kle kɛ, kɛ e tra e awlɛn e nanti Ɲanmiɛn Ndɛ’n su’n, e wiengu’m be kwla su Ɲanmiɛn wie. Piɛli nin akoto onga’m be blɛ su’n, kɛ ɔ yoli sɔ ɔ. Atrɛkpa be awlɛn tralɛ’n ti’n, sran kpanngban be fali be wun be mantannin Ɲanmiɛn. (Yol. 5:17-29) E kusu, e awlɛn mɔ e tra e su Zoova kpa titi’n ti’n, atrɛkpa’n, e wiengu suklu ba annzɛ junman difuɛ annzɛ e osufuɛ wie’m bé kwlá fá be wun mántan Ɲanmiɛn.
14 E niaan wie’m be yaciman be ɲrun wunlɛ. Blɔfuɛ’m be lɔ nvle nga be flɛ Armeni i su lɔ’n, e niaan kɔe 40 be o bisua, sonja mɔ be waan be diman’n ti. Anglo nga bé bá lɛ’m be nun’n, ɔ cɛman naan b’a wla wie’m be bisua ekun. Sran ble’m be nvle nga be flɛ i Eritre’n i su lɔ’n, Zoova i Lalofuɛ bla nin yasua 55 be o bisua. E niaan sɔ’m be nun wie’m be le afuɛ 60 tra su. Sinua’m be akpasua’n su lɔ’n, be flɛ nvle kun kɛ Corée du Sud. I su lɔ’n, e niaan kɔe 700 be o bisua, sonja mɔ be waan be diman’n ti. I afuɛ 60 yɛ, be tɛ wla aniaan’m be bisua lɔ. Maan e srɛ Ɲanmiɛn e man e niaan sɔ mun titi naan be awlɛn tralɛ’n ti’n, Ɲanmiɛn ɲan ɲrun naan sran wie’m be w’a su i.—Jue. 76:9-11.
15. Wafa nga kɛ e di nanwlɛ sa kwlaa nun’n i bo gua kpa’n, an fa sa kun yiyi nun.
15 Kɛ e di nanwlɛ sa kwlaa nun’n, sran wie’m be kwla kunndɛ kɛ e kle be Ɲanmiɛn Ndɛ’n. (An kanngan 2 Korɛntfuɛ Mun 6:4, 7 nun.) Sa kun m’ɔ juli’n yɛ. Cɛn kun mɔ e niaan bla kun kɔ́ lika’n, ɔ fali loto kun. Loto sɔ’n, sɛ sran kun fu nun naan w’a tuaman loto kpa’n, wie liɛ be siemɛn i nzɔliɛ. Kɛ ɔ fuli m’ɔ kunndɛli kɛ ɔ́ túa loto kpa’n, ɔ wunnin i janvuɛ kun loto nun. I janvuɛ’n seli i kɛ, kɛ m’ɔ kɔman lika mmua’n ti’n, nán maan ɔ tua loto kpa’n. E niaan bla’n seli i kɛ kannzɛ ɔ kɔman mmua’n, sanngɛ ɔ́ túa naan i sɔ yɛ ɔ ti kpa ɔ. I sin kɛ i janvuɛ’n jrali’n, loto nun cinsanfuɛ’n usali e niaan bla’n kɛ: “?A ti Zoova i Lalofuɛ?” Ɔ tɛli i su kɛ ɔ ti i sɔfuɛ naan ngue ti yɛ ɔ usɛ i sɔ ɔ. Bian’n seli i kɛ: “Kɛ a nin ɔ janvuɛ’n bé kán loto kpa tualɛ’n i ndɛ’n, n tili. N seli min klun lɔ kɛ atrɛkpa’n, a ti Zoova i Lalofuɛ. Afin titi’n be nga be tua be loto kpa’n, b’a sɔnman. I sɔfuɛ’m be nun wie yɛle Zoova i Lalofuɛ mun. Be di nanwlɛ sa kwlaa nun.” Kɛ anglo wie’m be sinnin’n, bian’n ɔli aɲia kun bo naan w’a wun e aniaan bla’n. Ɔ ko toli aniaan bla’n. Kpɛkun, ɔ usɛli i sɛ ɔ wun i wlɛ o. I sin’n, bian’n seli i kɛ i yɛ ɔ cisan loto nun mɔ cɛn kun’n, ɔ nin i be kannin loto kpa tualɛ’n i ndɛ’n niɔn. Ɔ sieli aniaan bla’n i nzuɛn kpa’n i nzɔliɛ. I sɔ’n ti’n, ɔ wa kplinnin su kɛ Zoova i Lalofuɛ’m be kle i Biblu’n nun like. Nanwlɛ, kɛ e di nanwlɛ sa kwlaa nun’n, sran’m be bu jasin fɛ’n mɔ e bo’n i nanwlɛ.
MAAN CƐN KWLAA E NZUƐN’N MANMAN ƝANMIƐN
16. ?Ngue ti yɛ ɔ fata kɛ e tra e awlɛn sran’m be wun naan e klo be naan e yo be ye ɔ? Ninnge nga be mɔ be se be wun kɛ be su Ɲanmiɛn’n be kpɛnngbɛn’m be yo’n, amun kan kun ndɛ.
16 Kɛ e tra e awlɛn sran’m be wun mɔ e klo be mɔ e yo be ye’n, ɔ yo maan sran’m be kunndɛ kɛ bé fá be wun mántan Zoova. I wie yɛle kɛ e ayeliɛ kpa’n ti’n, sran wie’m be kunndɛ kɛ bé súan Zoova i su like naan bé sí i sufuɛ mun, ɔ nin ninnge nga i waan ɔ́ yó be’n. Ngbaciɛ dan kpa o Ɲanmiɛn i sufuɛ mun nin be nga be yo be wun kɛ be ti Ɲanmiɛn i sufuɛ’n, be afiɛn. Be nga be yo be wun kɛ be ti Ɲanmiɛn i sufuɛ’n be kpɛnngbɛn mun’n, be kpɛ sran’m be gblɛ be de be sika. Be fa sika sɔ’n be fa to sua dandan, ɔ nin loto nga be le gua kpan’n. Be nun kun liɛ’n, ɔ fali sran’m be sika’n kplannin i alua’n i sua. Kpɛkun, ɔ wlali nun flɔlɔ mannzin naan i nun jɔ klanman. I sɔ’n kle kɛ, kɛ Zezi se kɛ ‘nán an de like fi’n,’ be diman su. (Mat. 10:8) Be yo kɛ Izraɛlifuɛ’m be Ɲanmiɛn ɲrun jranfuɛ mɔ ‘be tannin be kalɛ naan b’a kle Nyanmiɛn i mmla’n,’ be sa. (Mis. 3:11) Kpɛkun gblɛ ngunmin yɛ be kpɛ sran mun ɔn. Nanwlɛ, Ɲanmiɛn sulɛ wafa sɔ’m be kpɛnngbɛn’m be ayeliɛ tɛ’n ti’n, sran’m be kwlá kaciman Ɲanmiɛn i janvuɛ.
17, 18. (a) ?Nzuɛn kpa benin yɛ e kwla yi i nglo naan Zoova w’a ɲan ɲrun ɔn? (b) ?Ngue ti yɛ amun a fua kpa kɛ amún tú amun klun yó sran ye tititi ɔ?
17 Kɛ e kle sran’m be Ɲanmiɛn ndɛ mɔ be wun kɛ e uka e wiengu mun’n, be kunndɛ kɛ bé sú Ɲanmiɛn wie. I wie yɛle angbeti bla kun mɔ i wa’n kplinnin su kɛ ɔ́ súan Biblu’n nun like’n i liɛ’n. Cɛn kun mɔ atin bofuɛ kun bó jasin’n, ɔ boboli angbeti bla kpɛnngbɛn sɔ’n i anuan. Bla’n fiteli yɛ ndɛndɛ kpa’n, ɔ seli i kɛ ndɛ’n timɛn i cinnjin. Naan kɛ aniaan’n bóbó anuan’n, nn w’a fu nglo ɔ su kaci i gbo’n nun lɔ kannin. Aniaan’n seli bla’n kɛ ɔ fata kɛ be ukɛ i, afin ɔ kwla yo i wun like yaya. Aniaan’n kacili bla’n i kannin’n mɛnnin i naan w’a ɔ awlo uflɛ nun. Kɛ bla’n i wa yasua’n tili’n, ɔ yoli i fɛ dan. Ɔ maan ɔ ko kunndɛli aniaan’n, ɔ lɛli i ase. I agualiɛ su’n, ɔ kplinnin su kɛ be kle i Biblu’n nun like.
18 ?Amun a fua kpa kɛ amun su yaciman sran’m be ye yolɛ? Atrɛkpa’n, i sɔ yɛ amun a fua sakpa kɛ amún yó ɔ. Afin kɛ e tu e klun e bo jasin fɛ’n mɔ e fa e nzuɛn kpa nannan su’n, e wun kɛ Zoova ɲan ɲrun. Kpɛkun sran’m be kunndɛ kɛ bé sú i naan bé fíte nun. (An kanngan 1 Korɛntfuɛ Mun 10:31-33 nun.) Asa ekun e kunndɛ kɛ é klé kɛ e klo Ɲanmiɛn nin sran. (Mat. 22:37-39) Sɛ e tu e klun e yo sran ye’n, e klun jɔ́ dan kɛ é sé ye’n. Asa ekun’n, blɛ mɔ sran’m be kwlaa bé wá tú be klun sú e Yifuɛ Zoova naan ɔ ɲan ɲrun titi’n, e kwla lafi su kɛ ɔ́ yó e ɲin su.
[Foto, bue 12]
[Foto mun, bue 14]
Kɛ sran’m be wun amun be lika’n nun’n, jasin fɛ’n yɛ amun su bo kle be lɛ ɔ.
[Foto, bue 16]
Kɛ e mian e ɲin e di junman kekle yɛ e di nanwlɛ’n, sran’m be sie e nzɔliɛ.