Maan like nga e kle’n, ɔ yo weinwein naan be wun kɛ ɔ ti nanwlɛ
1 Be nga be si jasin fɛ’n i bo kpa kɛ akoto Pɔlu sa’n, be si kɛ sran m’ɔ “kan ndɛ nanwlɛ-ɔ ɔ kpɛ-mɛn i wun’n” nɛ́n i yɛle sran m’ɔ kanngan Ɲanmiɛn Ndɛ’n ngbɛn’n annzɛ ɔ bo su ngbɛn ɔn. (2 Tim. 2:15) ?Ɔ maan, wafa sɛ yɛ é yíyí Ɲanmiɛn Ndɛ’n nun weinwein naan w’a kan sran’m be awlɛn ɔn?—Yol. 28:23.
2 Maan e kanngan Ɲanmiɛn Ndɛ’n nun trele: Like klikli ng’ɔ fata kɛ e yo’n yɛle kɛ maan e si Biblu’n nun ndɛ’n su fiti naan sran’n ɔ wun kɛ ngwlɛlɛ ndɛ ng’ɔ o nun’n fin Ɲanmiɛn, naan i ɲin yi ndɛ sɔ’n. Sɛ sran’n wun kɛ e lafi Ɲanmiɛn Ndɛ’n su’n, i sɔ’n kwla yo maan kɛ é kánngan nun’n, i kusu ɔ́ fɛ́ i ɲin síe su kpa. (Ebr. 4:12) Sɛ e su koko ndɛ wie su yalɛ naan e waan é fá sran’n i ɲin sie i Biblu’n su’n, e kwla se kɛ: “N wunnin kɛ sɛ e wun akunndan nga Ɲanmiɛn bu i sa sɔ’n su i wlɛ’n, ɔ kwla yo e ye dan. Nian ndɛ nga Ɲanmiɛn Ndɛ’n kan’n.” Blɛ kwlaa nga e ɲɛn i wun atin’n, maan e kanngan Ɲanmiɛn Ndɛ’n nun trele.
3 Like i nɲɔn su m’ɔ fata kɛ e yo’n yɛle ndɛ nga e kanngannin’n i bo tulɛ. Sran wie mun’n, kɛ be kanngan Biblu’n nun ndɛ mma kun mɔ be nin a timɛn i le’n, be kaman lɛ be wunmɛn i bo. Saan é tú i bo kle be naan b’a wun wafa nga ndɛ sɔ’n nin ndɛ nga e kan’n be kɔ likawlɛ’n. (Lik 24:26, 27) I lɛ nun’n, maan e sie ndɛ mma cinnjin’m be nzɔliɛ. Kpɛkun, sɛ e yi kosan kun’n, wafa nga sran’n tɛ́ su’n, é kwlá wún i wlɛ sɛ ɔ wunnin ndɛ’n i bo o.—Nya. 18:15; Yol. 8:30.
4 Maan e jran Ɲanmiɛn Ndɛ’n su e yiyi e ndɛ’n nun: Ajalɛ i nsan su’n yɛle kɛ maan e mian e ɲin e kan sran’n i awlɛn naan ɔ kaci i akunndan bulɛ wafa’n. Kɛ ɔ ko yo naan y’a yo sɔ’n, maan e ukɛ i naan ɔ wun i wlɛ kɛ Biblu’n nun ndɛ mma nga e kanngan nun’n, ɔ wɔ i trele. Sɛ e jran Ɲanmiɛn Ndɛ’n su’n e yiyi e ndɛ nun’n, sran’n kwla wun e ndɛ’n i nanwlɛ ɔ maan ɔ kwla kaci i akunndan bulɛ wafa’n. (Yol. 17:2-4; 19:8) Ajalɛ kun yɛ: Kɛ e ko wie Sa Nglo Yilɛ 21:4 i nun kanngan mɔ e ti i kɛ Ɲanmiɛn fuali kɛ wie’n su tranman lɛ kun’n, wafa nga i sɔ’n yo maan siɛn’n e bu wie’n, e kwla yiyi nun. I sin’n, e kwla usa sran’n kɛ: “?Kɛ mɔ a si kɛ cɛn wie lele’n wie’n su tranman lɛ kun’n, sɛ ɔ awlɛn su sran kun saci’n, wafa sɛ yɛ i sɔ’n kwla uka wɔ ɔ?” Kɛ e fa Biblu’n nun ndɛ’n e wɔ sran’n i trele’n, ɔ wun kɛ Ɲanmiɛn ndɛ’n kwla ukɛ i i nantilɛ’n nun. Kɛ e yiyi Ɲanmiɛn Ndɛ’n nun weiin sɔ mɔ be wun i nanwlɛ’n, ɔ maan be nga be awlɛn ti kpa’n be ba Ɲanmiɛn Zoova m’ɔ lafiman’n m’ɔ ti Ɲanmiɛn sakpa’n i sulɛ.—Zer. 10:10.
[Kosan mun]
1. ?Ngue yɛ ɔ kle kɛ sran kun fa Ɲanmiɛn Ndɛ’n di junman kpa ɔ?
2. ?Ngue yɛ e kwla yo naan sran’m be ɲin w’a yi Ɲanmiɛn Ndɛ’n kpa ɔ?
3. ?Kɛ e ko wie Biblu’n nun ndɛ mma kun nun kanngan’n, wafa sɛ yɛ e kwla uka sran’n naan w’a wun i bo ɔ?
4. ?Ngue yɛ ɔ ti cinnjin kɛ e yo i kasiɛn su naan sran’m b’a wun kɛ like nga e kle be’n, ɔ ti nanwlɛ ɔ?