E wla kpɛnlɛ cɛn’n i blɛ nun’n, e kwla uka e jasin fɛ’n bolɛ’n su kpa
1. ?Ngue ti yɛ ɔ fata kɛ Marsi nin Avrili nin Mɛ nun’n, e bo jasin fɛ’n kpa tra laa’n niɔn?
1 ?Marsi nin Avrili nin Mɛ anglo nga bé bá lɛ’n nun’n, amun kwla bo jasin fɛ’n kpa tra laa’n? Afin blɛ sɔ nun’n, suklu ba mun ɔ nin junman difuɛ wie’m be lo wunmiɛn. Kɛ ɔ́ fɛ́ i Avrili i le 2 su’n, é wá yía be nga Ɲanmiɛn ndɛ’n lo be’n, naan e ngba e tran E wla kpɛnlɛ cɛn aɲia’n i bo Avrili i le 17 su. I sin’n, é kó nían be nga be bali’n be osu, naan be konvi tran Ɲanmiɛn ndɛ’n su titi. Kpɛkun le mɔcuɛ ng’ɔ́ bó i bo Avrili i le 25 su’n, é yía be ekun kɛ be wa tie ijɔlɛ ngunmin kun’n. I kwlaa sɔ’n ti’n, Marsi nin Avrili nin Mɛ nun’n, maan e bo jasin fɛ’n kpa tra laa’n.
2. ?Junman benin yɛ amun kwla di naan amun a bo jasin fɛ’n kpa b’a tra laa ɔ?
2 Cɛn kunngun atin bolɛ’n: Like kun mɔ e kwla yo naan y’a uka e jasin fɛ’n bolɛ’n su’n yɛle cɛn kunngun atin bolɛ junman’n i dilɛ. Kɛ ɔ́ yó naan i sɔ’n w’a yo ye’n, maan e dun mmua bu i akunndan sie naan e siesie e wun, afin e ti ɲanlɛ’n ti kekle. (Nya. 21:5) I wie yɛle kɛ atrɛkpa’n, e yo ninnge wie mun cɛn kwlakwla. Sɛ ninnge sɔ’m be timan cinnjin sɔ liɛ’n, e kwla sie be blɛ uflɛ nun. (Fil. 1:9-11) E kwla bo su kle aniaan wie mun asɔnun’n nun lɔ kɛ e waan é dí cɛn kunngun atin bolɛ junman. Atrɛkpa’n, sɛ be kusu be kwla fa ajalɛ kunngba’n wie o.
3. ?Ajalɛ benin yɛ awlobofuɛ’m be kwla fa naan b’a bo jasin fɛ’n b’a tra laa ɔ?
3 Cɛn nga amún sú Ɲanmiɛn awlo lɔ’n, amun nin amun awlobofuɛ mun amun koko Ɲanmiɛn junman nga amun kunndɛ kɛ amún dí’n, i su yalɛ. (Nya. 15:22) Sɛ awlobofuɛ’m be ukauka be wun’n, be nun wie’m be kwla di cɛn kunngun atin bolɛ junman’n anglo kun annzɛ anglo kpanngban. ?Yɛ sɛ amun nun wie fi kwlá diman junman sɔ’n wie’n nin? Sɛ ɔ ti sɔ’n, amun kwla bu like uflɛ nga amun kwla yo’n, i akunndan. Ɔ kwla yo nnɔsua nun jasin fɛ’n bolɛ annzɛ dɔ nga amun fa bo jasin fɛ’n Fue nin Mɔnnɛn cɛn’n, amun kwla uka su.
4. ?E wla kpɛnlɛ cɛn’n i blɛ nun’n, sɛ e bo jasin fɛ’n kpa tra laa’n, ye benin yɛ é dí ɔ?
4 Kɛ e su Zoova mɔ e mian e ɲin e yo i sɔ’n, i wla fiman su. (Ebr. 6:10) Kɛ e yo like e man Zoova mɔ e cɛ e wiengu like’n, nanwlɛ e di aklunjuɛ dan. (1 Nyo. 29:9; Yol. 20:35) Sɛ E wla kpɛnlɛ cɛn’n i blɛ nun e ɲɛn i wun atin’n, maan e bo jasin fɛ’n kpa tra laa’n naan aklunjuɛ nga be ɲɛn i nun’n, y’a di wie. Naan kusu y’a ɲɛn i su ye dan.