Kɛ ɔ fɛ i Avrili i le 2 su’n, é cɛ́cɛ́ sran’m be yialɛ fluwa’n naan b’a ba E wla kpɛnlɛ cɛn aɲia’n i bo
1. ?Afuɛ’n, blɛ benin nun yɛ é cɛ́cɛ́ sran’m be yialɛ fluwa’n niɔn? ?Ngue ti yɛ i sɔ’n ti cinnjin ɔn?
1 Avrili i le 2 m’ɔ́ fá jú i le 17 su’n, é cɛ́cɛ́ sran’m be yialɛ fluwa’n naan be bla E wla kpɛnlɛ cɛn aɲia’n i bo. Afuɛ nuan kun nun’n, aɲia sɔ’n yɛ ɔ ti aɲia cinnjin kpafuɛ’n niɔn. Afuɛ nga be sinnin’m be nun’n, kɛ e yiali sran mun sɔ’n, be nga Ɲanmiɛn ndɛ’n lo be’n, be bali aɲia’n i bo. I wie yɛle kɛ cɛn nga bé yó E wla kpɛnlɛ cɛn aɲia’n, bla kun flɛli be lɔ Betɛli’n. Ɔ seli kɛ: “M bali awlo ɔ nin a cɛman. Ń nían ɔn, sran’m be yialɛ fluwa kun yɛ ɔ o min anuan’n i bo yɛ. Min waan ń kɔ́ wie, sanngɛ n siman dɔ’n.” Fluwa’n i bue nga be klɛli dɔ’n su’n, aniaan’n kleli i. I agualiɛ su’n, bla’n seli kɛ: “Nnɔsua ń kɔ́ amun aɲia’n i bo wie!”
2. ?Wafa sɛ yɛ é fá sran yialɛ fluwa’n é mán ɔn?
2 Wafa nga é yó’n: Blɛ’n w’a sɔnman. I ti’n, nán e ijɔ dan. Maan e yo sran’n i like’n, yɛ e se i kɛ: “Avrili i le 17 m’ɔ ti Mɔnnɛn cɛn’n, é yó aɲia cinnjin kpa kun. Afuɛ nuan kwlaa’n mɛn wunmuan’n nun’n, e yo aɲia sɔ’n. E klo kɛ é yía wɔ nin ɔ awlobofuɛ mun i bo. [Fa fluwa’n mɛn i.] Cɛn sɔ’n ɔ tɔ Zezi i wie cɛn’n su. É tíe ijɔlɛ kun m’ɔ́ klé e like nga e kwla yo naan y’a ɲan e ti kpɔlɛ tɛ’n, i su mmlusuɛ’n. Ijɔlɛ sɔ’n taka Biblu’n su’n. Be tuaman kalɛ naan b’a tie. Aɲia lika’n nin dɔ’n be klɛ fluwa’n su.”
3. ?Wafa sɛ yɛ é yó naan y’a yia sran kaka kpa ɔ?
3 Sɛ amun asɔnun’n i jasin fɛ’n bowlɛ’n cɛnnin’n, asɔnun kpɛnngbɛn’m be kwla se amun kɛ sɛ amun toman sran kun i awlo’n, amun fa fluwa’n wlɛ i anuan’n bo. Nán maan i bue ka gua su. Nán amun wla fi be nga Ɲanmiɛn ndɛ’n lo be mɔ an ko nian be osu’n, nin amun wiengu junman difuɛ annzɛ suklu ba mun, yɛ amun osufuɛ mun. Nán amun wla fi amun sifuɛ wie su. Fue nin Mɔnnɛn cɛn’n, kɛ amún cɛ́cɛ́ fluwa’n, sɛ amún nían naan ɔ ti mɔ amun fa periodiki mun uka su’n, amun fa uka su. Avrili nun’n, sɛ amun kwla yo cɛn kunngun atin bofuɛ naan amun a kwla fa fluwa sɔ’n w’a man sran sunman’n, nanwlɛ, ɔ ti kpa dan!
4. ?Ngue ti yɛ e kunndɛ kɛ be nga be klo kɛ bé súan Zoova silɛ’n, be bla E wla kpɛnlɛ cɛn aɲia’n i bo ɔ?
4 Be nga bé bá aɲia’n i bo’n, Ɲanmiɛn ndɛ nga bé tíe’n, be ɲɛnmɛn i wunsu! Afin klolɛ dan nga Zoova kloli e’n mɔ i ti yɛ ɔ fɛli i wa’n kpɔli e ti’n, bé kɛ́n i ndɛ klé be. (Zan 3:16) Asa’n, ye nga Ɲanmiɛn i Sielɛ’n wá yó sran mun’n, bé kɛ́n i ndɛ klé be wie. (Eza. 65:21-23) Kusu’n, bé sé be kɛ sɛ be klo kɛ bé súan Biblu’n nun like naan bé wún ndɛ uflɛ wie’m be wlɛ kpa ekun’n, be kwla wun aniaan nga be sɔ sran’m be nun’n be wun. É srɛ́ kɛ be nga be klo kɛ bé súan Zoova silɛ’n, be nun kaka be bla E wla kpɛnlɛ cɛn aɲia’n i bo!