Marsi i le 1 su yɛ é bó sran’m be yialɛ E wla kpɛnlɛ cɛn aɲia’n i bo ɔ
1. ?Cɛn benin yɛ é bó sran’m be yialɛ bo ɔ? ?Yɛ ngue ti yɛ afuɛ’n liɛ’n, blɛ sɔ’n ti lɔun tra laa liɛ’n nin ɔn?
1 Marsi i le 1 m’ɔ ti Ya cɛn’n, é bó sran’m be yialɛ bo naan be wa tran E wla kpɛn cɛn aɲia’n i bo wie. É yó aɲia sɔ’n Marsi i le 26 su. Ɔ maan blɛ nga é fá yía sran mun’n ɔ́ yó lɔun trá laa liɛ’n. I sɔ’n yó maan é kwlá yía sran kpanngban kpa. I li be nga be tran kan nga asɔnun’n i jasin bolɛ lika’n ti dan kpa’n yɛ i sɔ’n maan é kwlá yía be wie ɔ.
2. ?Ajalɛ benin yɛ asɔnun kpɛnngbɛn’m be kwla fa naan aniaan’m b’a ɲan sran’m be yialɛ fluwa mun ɔn? ?Yɛ ajalɛ benin yɛ be kwla fa naan y’a di jasin bowlɛ wunmuan’n i nun junman ɔn?
2 Junman’n i siesielɛ’n: Asɔnun kpɛnngbɛn bé wá klé wafa ng’ɔ fata kɛ be di jasin bowlɛ’n i nun junman’n. Sɛ ɔ nin fata kɛ e fa sran’m be yialɛ fluwa’n e wlɛ i be nga be nunman lɛ’n be anuan’n i bo’n, bé fɛ́ i wun ajalɛ wie. Asa’n, sɛ e wie jasin’n i bo awloawlo’m be nun naan sran’m be yialɛ fluwa’n i wie te o lɛ’n, e kwla fa cɛcɛ sran mun akpɔ’m be nuan. Junman sunianfuɛ’n ɔ́ fá ajalɛ naan be siesie sran’m be yialɛ fluwa mɔ be klɛklɛli be su’n kan be fa fluwa annzɛ periodiki’m be lɛ’n. I liɛ’n, jasin bofuɛ’m be kwla fa wie. Sanngɛ be su faman fluwa sɔ’n i wunmuan be siesiemɛn i lɛ kpɛ kunngba. Ɔ maan fluwa nga e kwla fa di junman le mɔcuɛ kun nun’n, i li yɛ ɔ fata kɛ e fa ɔ.
3. ?Kɛ é yía sran mun’n, ngue yɛ ɔ fata kɛ ɔ tran e klun ɔn?
3 Ndɛ nga é kán’n: Maan e ijɔ kpe kan. I liɛ’n, é kwlá yía sran kpanngban. Fluwa nga i bue 4 su’n, be kleli ajalɛ kun. E kwla kacikaci i nun ndɛ wie mun naan w’a yo e jasin bowlɛ nun lɔfuɛ’m be fɛ. Ɔ ti su kɛ maan e ijɔ kpe kan, sanngɛ sɛ sran’n nin e koko yalɛ kpa annzɛ ɔ usa kosan’n, e su seman kɛ é kplí é yáci i lɛ naan é kɔ́ e ɲrun. Asa’n, kɛ é yía sran mun Fue cɛn nin mɔnnɛn cɛn’n, sɛ ɔ nin i fata’n, maan e fa Periodiki mun e man be. Marsi i le 2 su’n, like nga é fá e ɲin é síe su’n yɛle sran’m be yialɛ’n, e su boman sran’m be Biblu’n nun like klelɛ bo.
4. ?Ngue ti yɛ ɔ fata kɛ e tu e klun kpa e yia sran mun ɔn?
4 É yrá e nuan kɛ sran kpanngban kpa be wa tran E wla kpɛnlɛ cɛn aɲia’n i bo. Nzra nun ijɔlɛ’n ɔ́ kán sran i wafa nga Zezi ti’n i ndɛ. (1 Kor. 11:26) Wafa nga Zezi i wie’n yo e ye’n, ɔ́ kɛ́n i ndɛ wie. (Rɔm. 6:23) Asa’n, like nga ti yɛ ɔ ti cinnjin kpa kɛ e wla kpɛn i su’n, ɔ́ wá yíyí nun. (Zan 17:3) I kwlaa sɔ’n ti’n maan e tu e klun kpa e yia sran mun!