Maan junman nga Ɲanmiɛn mannin amun’n yo amun cinnjin
1. ?Wafa sɛ yɛ mɛn’n nun sran sunman be bu e jasin fɛ’n bolɛ junman’n niɔn?
1 Satan i mɛn nga nun’n, sran sunman be waan e jasin fɛ’n bolɛ junman’n ti “sinnzin” like. (1 Kor. 1:18-21) Sɛ y’a nianman e wun’n be akunndan tɛ sɔ’n kwla bubu e sa sin, ɔ maan e su kwlá boman jasin fɛ’n i juejue su kun. (Nya. 24:10; Eza. 5:20) ?Zoova i Lalofuɛ mɔ e ti’n, ngue ti yɛ ɔ fata kɛ i sɔ’n yo e cinnjin ɔn?—Eza. 43:10.
2. ?Ngue ti yɛ be kwla se kɛ jasin fɛ’n bolɛ junman’n ti “Nyanmiɛn i jasin fɛ’n” bolɛ’n niɔn?
2 “Nyanmiɛn i jasin fɛ’n”: Akoto Pɔlu seli kɛ i junman’n yɛle “Nyanmiɛn i jasin fɛ’n” bolɛ’n. (Rɔm. 15:15, 16) ?Wafa sɛ yɛ jasin fɛ’n bolɛ junman’n ti “Nyanmiɛn i jasin fɛ’n” bolɛ’n niɔn? Kɛ e fa e wun e wla nun’n, e nin Zoova mɔ “i nzuɛn’n nin klɔ sran liɛ’n ti-man kun” “yɛ e di junman nin-ɔn.” Kpɛkun i sɔ’n manman i dunman’n. (1 Kor. 3:9; 1 Piɛ. 1:15) Zoova i ɲrun’n, e jasin fɛ’n bolɛ junman’n ti i “manmanlɛ like,” ɔ maan ɔ ti e Ɲanmiɛn sulɛ nun like cinnjin kpa kun.—Ebr. 13:15.
3. ?Ngue ti yɛ jasin fɛ’n bolɛ junman’n ti cenjele like kpli ɔ?
3 Jasin fɛ’n bolɛ junman’n ti cenjele like dan kun mɔ sran ngba lemɛn i ɔ. Anzi’m be bɔbɔ, sɛ ɔ ti kɛ be fali junman sɔ’n wlali be sa nun’n, nn ɔ́ yó be fɛ yɛ bé dí i kpa lele kpé nun. (1 Piɛ. 1:12) Sanngɛ klɔ sran mɔ fɔ o be nun mɔ be ‘ti kɛ sɛ sa’n,’ be sa nun yɛ Zoova fali cenjele like kpli sɔ’n wlali ɔ!—2 Kor. 4:7.
4. ?Wafa sɛ yɛ e kwla kle kɛ e jasin fɛ’n bolɛ junman’n ti e cinnjin ɔn?
4 Junman cinnjin kpa ɔ: Kɛ mɔ e cenjele like sɔ’n ti e cinnjin dan’n ti’n, e mɛn dilɛ’n nun’n, e bu e junman’n kɛ “like nga be ti kpa’m” be nun kun sa. (Fil. 1:10) I sɔ’n ti’n, le mɔcuɛ kwlaa nun’n, e fa blɛ e ko bo jasin fɛ’n. Jru bofuɛ nga ɔ nin ɔkɛsi dan kpa kun be di junman’n, sɛ ɔ klo i junman’n kpa’n, balo kwlaa nga bé bó’n, saan ɔ́ síesíe i wun kpa naan w’a ko bo, yɛ ɔ́ míɛn i ɲin naan i sa w’a tɔ i junman’n nun kpa. I wafa kunngba’n, ɔ fata kɛ e siesie e wun naan y’a ko bo jasin fɛ’n. I liɛ’n é kwlá ‘kán ndɛ nanwlɛ’n, e su kpɛ-mɛn i wun,’ yɛ é dí junman naan like nga é klé sran mun’n y’a kwla “kle be” kpa.—2 Tim. 2:15; 4:2.
5. ?Wan yɛ ɔ klo junman nga e di’n niɔn?
5 Nán maan akunndan ciawa nga sran sunman be bu’n, ɔ bubu amun sa sin. Nán amun wla fi su kɛ e jasin bowlɛ lika’n nun lɔ’n sran nga be klo kɛ e ko nian be osu’n be sɔnnin kpa. Sanngɛ nán sran’m be ɲrun dunman yɛ e kunndɛ ɔ. Like nga ɔ ti cinnjin kpa’n, yɛle wafa nga Zoova bu junman nga e mian e ɲin e di’n.—Eza. 52:7.