Ndɛ ja blu nin nɲɔn nga ti yɛ e bo jasin fɛ’n

?Ngue ti yɛ e bo jasin fɛ’n, mɔ e kle sran’m be Biblu’n nun like ɔ? ?Sran nga be kunndɛ nguan atin’n, be ukalɛ’n yɛ ɔ ti e cinnjin kpa ti ɔ? (Mat. 7:14) Kannzɛ bɔbɔ be ukalɛ’n yɛ ɔ ti ndɛ ja blu nin nɲɔn’n nga é wá kán be ndɛ’n be nun klikli’n, sanngɛ nɛ́n i yɛ ɔ ti like cinnjin kpafuɛ’n niɔn. ?Ɔ maan, ndɛ nga be lɔngɔ su yɛ’n, be nun cinnjin kpafuɛ’n yɛle benin? Kɛ e bo jasin fɛ’n,

1. Ɔ uka sran mun naan b’a ɲan nguan.​—Zan 17:3.

2. E se sa tɛ yofuɛ’n kɛ ɔ kaci i nzuɛn tɛ’n.​—Eze. 3:18, 19.

3. E yo maan Ɲanmiɛn nuan ndɛ nga be kannin’n, ɔ kpɛn su.​—Mat. 24:14.

4. Ɔ yi Ɲanmiɛn i sran kpa m’ɔ ti’n, i nglo. Ɔ maan, sran fi su seman kɛ kwlaa naan Zoova w’a nunnun sa tɛ yofuɛ mun’n, w’a manman be blɛ kɛ be kaci be nzuɛn.​—Yol. 17:30, 31; 1 Tim. 2:3, 4.

5. E uka sran nga Zezi fɛ i mmoja’n toli be’n, naan be si Ɲanmiɛn ndɛ’n.​—Rɔm. 1:14, 15.

6. Ɔ yo maan sɛ sran’m be faman su’n, ɔ ti be bɔbɔ be ndɛ.​—Yol. 20:26, 27.

7. I sɔ’n yó maan e bɔbɔ é fíte nun.​—Eze. 3:19; Rɔm. 10:9, 10.

8. E kle kɛ e klo e wiengu.​—Mat. 22:39.

9. E kle kɛ e ɲin yi Zoova nin i Wa’n.​—Mat. 28:19, 20.

10. Ɔ ti kɛ e su su Ɲanmiɛn sa.​—Ebr. 13:15.

11. E kle kɛ e klo Ɲanmiɛn.​—1 Zan 5:3.

12. Ɔ yo maan Zoova i dunman’n yo sanwun.​—Eza. 43:10-12; Mat. 6:9.

Nanwlɛ, nán ndɛ ngalɛ’m be ngunmin ti yɛ e bo jasin fɛ’n niɔn. Kɛ e bo jasin fɛ’n, e Ɲanmiɛn sulafilɛ’n i bo’n wla ase kpa. Kpɛkun ɔ yo maan e nin Ɲanmiɛn e di junman. (1 Kor. 3:9) Sanngɛ like cinnjin kpafuɛ nga i ti yɛ e bo jasin fɛ’n, yɛle ndɛ ja kasiɛnfuɛ’n. Kannzɛ bɔbɔ sran’m be sɔman e nun’n, sanngɛ jasin fɛ’n i bolɛ’n yo maan Zoova i dunman’n yo sanwun. Kpɛkun ɔ yo maan sɛ sran wie kɛn i wun ndɛ’n, ɔ́ klwá tɛ́ su. (Nya. 27:11) Nanwlɛ, ɔ ti kpa kɛ nán e ‘yaci jasin fɛ’n i bolɛ nin i klelɛ’ le.​—Yol. 5:42.