Jasin fɛ’n bolɛ nun ndɛ mun

◼ Cɛn kunngun atin bolɛ junman’n i wun ajalɛ uflɛ nga anuannzɛ’n fɛli i Avrili 2011 nun’n, ɔ bali nvlɛ kpa République centraficaine lɔ. Sran 791 be dili wie. Dɔ nga be dili’n, ɔ nin fluwa nga be mannin’n, ɔ nin sran nga be niannin be osu’n be ukali su. Sran nga be kleli be Biblu’n nun like’n be trali Avrili 2010 nun liɛ’n. Be yoli sran 6.425. Ɔ ti kɛ be tinuntinun be kleli sran kun i Biblu’n nun like sa.

◼ Tchad lɔ’n, Avrili 2011 nun’n, sran 163 be yoli cɛn kunngun atin bofuɛ. Be nuan nin a juman sɔ le. Ajalɛ nga anuannzɛ’n fɛli i anglo sɔ’n nun’n, ɔ yo jasin bofuɛ kpanngban be fɛ kpa. Afin ɔ ukali be naan b’a kwla uka be jasin fɛ’n bolɛ junman’n su.