Kosan’m be su tɛlɛ
◼ ?Ngue su yɛ é jrán naan y’a fa e fluwa mun y’a man sran kun ɔn?
Like cinnjin kpafuɛ’n yɛ: ?Ndɛ’n lo sran’n annzɛ ɔ lomɛn i? Sɛ sran sɔ’n kle kɛ ɔ kunndɛ kɛ ɔ́ kánngan e fluwa’m be nun’n, e kwla fa periodiki nɲɔn, annzɛ fluwa pɛplɛpɛ kun annzɛ kusu Biblu’n i akua uflɛ wie e mɛn i. Kannzɛ sran sɔ’n leman sika annzɛ kusu sika nga ɔ mannin’n ti kaan’n, e li maan e fa fluwa’n e mɛn i. (Zɔb 34:19; Ngl. 22:17) Sanngɛ be nga be kloman kɛ bé kánngan e fluwa kpakpa sɔ’m be nun’n, nán e man be wie.—Mat. 7:6.
?Wafa sɛ yɛ e kwla wun i wlɛ kɛ nanwlɛ ndɛ’n lo sran kun ɔn? Sran nga nanwlɛ ndɛ’n lo i’n, ɔ kunndɛ kɛ e nin i e koko yalɛ. Kɛ é íjɔ’n ɔ sie i su, kɛ e usɛ i kosan’n, ɔ tɛ su yɛ ɔ kɛn i klun ndɛ. I sɔ’n kle kɛ i ɲin o yalɛ nga e su koko’n i su. Sɛ e kanngan Biblu’n nun naan ɔ nian nun wie’n, i sɔ’n kle kɛ ɔ bu Ɲanmiɛn Ndɛ’n i like cinnjin. Ɔ ju wie’n, e kwla usa sran’n kɛ ɔ kunndɛ kɛ ɔ́ kánngan fluwa nga e waan é fá mɛ́n i’n nun. I sɔ’n kwla uka e. Ɔ fata kɛ jasin bofuɛ’m be fa ngwlɛlɛ naan b’a wun be nga e fluwa’m be nun kannganlɛ’n lo be’n, be wlɛ. Sɛ ɔ ti akpɔ wie nuan yɛ e su bo jasin fɛ’n, ɔ nin i fataman kɛ e fa e fluwa mun e man sran kwlaa nga ɔ́ sín’n. ?Sran’n kánngan e fluwa’m be nun annzɛ ɔ su kannganman nun? Sɛ e wunmɛn i wlɛ’n, maan e fa e fluwa nɲa annzɛ sran’m be yialɛ fluwa’n e mɛn i.
Ɔ nin i fataman kɛ jasin bofuɛ kun bu i kɛ, kɛ mɔ i klunklo like nga ɔ man’n, ɔ sɔnnin’n ti’n, ɔ́ fá fluwa kaka. Sɛ i klunklo like nga ɔ man’n ɔ sɔnnin annzɛ w’a sɔnman o, fluwa nga ɔ nian siin m’ɔ kwla fa man sran mun’n, yɛ ɔ fata kɛ ɔ fa ɔ. E klunklo like nga e man’n ɔ timan e fluwa’m be gua, sanngɛ e fa suan mɛn wunmuan’n nun jasin fɛ’n bolɛ junman wafa kwlaa nga e di’n i bo. Kannzɛ bɔbɔ e le wie o, annzɛ e leman wie o, sanngɛ sɛ e si ye’n, é tú e klun é mán e klunklo like é fá súan e Ɲanmiɛn Sielɛ junman’n i bo. (Mar. 12:41-44; 2 Kor. 9:7) Asa ekun’n, i sɔ’n yó maan fluwa nga e sa miɛn i wun sakpa’n yɛ é fá ɔ. Ɔ maan e su yoman naan sika nga be fa yi fluwa’n ɔ saci ngbɛn.
[Ndɛ kwle, bue 2]
Ɔ fata kɛ jasin bofuɛ’m be fa ngwlɛlɛ naan b’a wun be nga e fluwa’m be nun kannganlɛ’n lo be’n, be wlɛ.