Marsi i le 17 su yɛ é bó sran’m be yialɛ bo ɔ
1. ?Marsi i le 17 su’n, ngue like yɛ é bó i yolɛ bo ɔ?
1 Afuɛ kwlaa nun’n, E wla kpɛnlɛ cɛn aɲia’n i bo’n, be bo Zezi i wie ndɛ’n su. (1 Kor. 11:26) I sɔ’n ti’n, e kunndɛ kɛ sran uflɛ blɛ i bo naan be ti ajalɛ nga klolɛ su’n, Zoova fali naan b’a yi e ti tɛ’n i su ndɛ’n wie. (Zan 3:16) Afuɛ’n, Fue m’ɔ ti Marsi i le 17 su yɛ é bó sran’m be yialɛ bo ɔ. ?Amun su minndɛ kpa kɛ junman sɔ’n i blɛ’n ju naan amun a di i tɛtɛ kpa?
2. ?Ndɛ benin yɛ é kán naan y’a fa fluwa’n y’a yia sran mun ɔn?
2 Ndɛ nga é kán’n: Nán maan e ijɔ kpanngban. Maan e yo sran’n i like naan e se kɛ: “E bali kɛ é fá fluwa nga é yía ɔ awlofuɛ mun e aɲia cinnjin kpa kun i bo. Afuɛ kwlaa nun’n, e yia sɔ kpɛ kunngba cɛ. Mɛn wunmuan nun’n, é yó aɲia sɔ’n Avrili i le 5 su. Aɲia sɔ’n i bo’n, bé fá Biblu’n bé kán ye nga Zezi i wie’n ti’n, sran’m be kwla ɲɛn i’n, i ndɛ. Asa ekun’n, like nga Zezi su yo i dɔ nga su’n, bé kɛ́n i ndɛ wie. E akpasua’n nun wa’n, dɔ’n nga i su yɛ é yó aɲia’n ɔ nin lika nga é yó’n, be o fluwa nga su. Be tuaman sika aɲia’n i bo.” Fue’n nin Mɔnnɛn’n, sɛ e ɲɛn i wun atin’n, e kwla fa e periodiki mun e nannan fluwa’n su e man sran mun.
3. ?Ngue yɛ é yó naan sran kpanngban b’a tran aɲia’n i bo ɔ?
3 Maan e yia sran kpanngban: Like nga e kunndɛ’n, yɛle kɛ é yía sran kpanngban naan be tran e aɲia sɔ’n i bo. Be nun wie yɛle be nga e kle be Biblu’n nun like’n, ɔ nin be nga be klo Ɲanmiɛn ndɛ’n mɔ e ko nian be osu’n, ɔ nin e osufuɛ mun, ɔ nin be nga e nin be e di junman’n, ɔ nin be nga e nin be e di suklu’n, ɔ nin be nga e nin be o lika kunngba nun’n, ɔ nin sran uflɛ nga e si be’n. Nán maan e wla fi su, maan e yia be. Asɔnun kpɛnngbɛn’m bé klé wafa nga e sa kwla yia e jasin fɛ’n bowlɛ’n. Yialɛ nga e yia sran mun afuɛ kwlaa nun’n, ɔ kaman ngbɛn. I wie yɛle bla kun liɛ’n. Afuɛ sin’n, kɛ ɔ juli e aɲia’n i bo lɔ’n, aniaan nga be sɔ sran’m be nun’n, be nun kun seli i kɛ ɔ bo sran ng’ɔ yiɛli i’n i dunman’n naan ɔ ko flɛ i. Sanngɛ bla’n seli i kɛ nán ɔ kle i wun yalɛ, naan ɔ siman sran fi lɔ. Yɛle kɛ, cɛn kunngba sɔ’n nun’n, kɛ aniaan kun bó jasin fɛ’n awloawlo’m be nun’n, ɔ tɔli i su yɛ ɔ fali fluwa’n ɔ yiɛli i ɔ.
4. ?Ngue ti yɛ ɔ fata kɛ e mian e ɲin e fa sran’m be yialɛ fluwa’n e yia sran mun ɔn?
4 Kɛ é wún i kɛ sran wie w’a ba E wla kpɛnlɛ cɛn aɲia’n i bo lɛ’n, nn atrɛkpa’n yialɛ nga e yiɛli i’n ti ɔ. Kannzɛ bɔbɔ sran fi w’a baman’n, sanngɛ be su kwlá seman kɛ y’a mianman e ɲin y’a diman e junman’n. Fluwa nga é fá yía sran mun’n klé kɛ Zezi ti Famiɛn siɛn’n, naan ɔ kwla. Ɔ maan, maan e mian e ɲin e fa sran’m be yialɛ fluwa’n e yia be. I liɛ’n, sran nga be o e jasin bowlɛ’n nun lɔ’n, ɔ nin e niaan Klistfuɛ’m bé wún i kɛ e ti kpɔlɛ tɛ’n mɔ Ɲanmiɛn maan Zezi yili’n, e bu i like nanndoliɛ kpa. Yɛ i cinnjin kpa’n yɛle kɛ Zoova bɔbɔ ɔ́ wún i sɔ wie.—Kol. 3:15.