Les merveilles de la création révèlent la gloire de Dieu
Sran kpanngban be klo ninnge nga Ɲanmiɛn yili be’n, be nianlɛ. Sanngɛ nán be ngba yɛ be si kɛ ninnge sɔ’m be nianlɛ’n ti’n, be kwla si e Yifuɛ Dan’n i nzuɛn’n niɔn. (Rɔm. 1:20) Laa kpa’n, Davidi suannin Zoova i su like Ɲanmiɛn Ndɛ’n nun. Sanngɛ ninnge nga Ɲanmiɛn yili be’n be nianlɛ’n ti’n, ɔ ti kɛ ɔ wunnin Ɲanmiɛn bɔbɔ sa. Ɔ maan ɔ fɛli i wun mɛntɛnnin i. (Jue. 8:4, 5) Flimu nga be flɛ i Les merveilles de la création révèlent la gloire de Dieu, ɔ́ úka e mma mun nin be nga e kle be Ɲanmiɛn Ndɛ’n, naan be fa be ɲin sie i ninnge nga Zoova yili be’n, be nun wie’m be su kpa. Asa ekun’n, ɔ́ úka be naan b’a wun e Yifuɛ’n Dan’n i sran’n i wafa ng’ɔ ti’n i wlɛ, naan be nin i be afiɛn w’a sɛ. Sɛ amun wie flimu sɔ’n i nian’n, amun tɛ kosan nga’m be lɔngɔ su yɛ’n, be su.
(1) ?Kɛ e wun wafa nga ninnge nga be o ɲanmiɛn su lɔ’n be ti siesiewa sɛsɛsɛ’n, ɔ nin be wafa mɔ be ti’n, e ɲin m’ɔ yi Zoova’n ɔ́ yó sɛ? (Eza. 40:26) (2) ?Kɛ e nian wafa nga nzue’n fa ti’n, ngue yɛ ɔ kle e Ɲanmiɛn su ɔ? (Ngl. 14:7) (3) ?Ngue ti yɛ wafa nga asiɛ’n fa ti’n, ɔ nin wafa nga ɔ nin wia’n be afiɛn’n ti nun’n, be kle e kɛ Zoova si ngwlɛlɛ ɔ? (4) ?Anglo ba’n i junman liɛ’n yɛle benin? (Jue. 89:38) (5) ?Kɛ ɔ ko yo naan mɛn nun tranlɛ’n w’a yo fɛ’n, wafa sɛ yɛ Zoova yili klɔ sran mun ɔn? (6) ?Ngue yɛle ADN? (Jue. 139:16) (7) ?Like benin ti yɛ klɔ sran’m be timan kɛ ninnge onga nga Zoova yili be’n, be sa ɔ? (Bob. 1:26) (8) ?Ngue yɛ ɔ wun blibli wɔ kɛ á yó i mɛn klanman’n nun ɔn?
Bonus: (9) ?Sɛ like kun ti ɔkwlɛ annzɛ ɔ ti ble’n annzɛ ɔ ti wafa uflɛ’n, ɔ fin ngue? (10) ?Ɔ yo sɛ yɛ nzue’n fin waka’m be bo olui’n nun lele ju be ti su lɔ? (11) ?Junman benin yɛ nzue’n di i e kplo’n nun ɔn? (12) ?Wafa nga nannin anunman’m be yo nannin’m be ye’n, amun wunnin i wafa uflɛ wie flimu nun? (13) ?Kɛ nnɛn wafawafa wie’m be tran likawlɛ’n, ngue yɛ ɔ o be ti nun mɔ maan be yoman be wiengu abɔlɛ’n niɔn? (14) ?Flimu nun’n, ngue yɛ be flɛ i “angle d’or” niɔn? ?I wunsu like benin yɛ ɔ o ninnge nga Ɲanmiɛn yili be’n, be nun ɔn?
Ninnge nga Zoova yili be’n, “an nian” be kpa: Zezi seli e kɛ e “nian anunman’m bɔ be tu sin’n” ɔ nin “waka nnyrɛ bɔ be o blo lɔ’n [be kpa].” (Mat. 6:26, 28) Sɛ e yo sɔ’n, é láfi e Yifuɛ’n i su dan kpa trá laa’n. Kpɛkun é wún i kɛ Zoova i ngwlɛlɛ’n cɛnnin. Yɛ é wún ekun kɛ ɔ le tinmin naan ɔ kwla de i sran mun naan kusu ɔ klo be kpa liɛ su. Nán maan ninnge nga be o mɛn nun’n, be yo naan e kaci sran m’ɔ ɲɛnmɛn i ti ɔ. Sanngɛ maan e fa blɛ e nian ninnge ɲɛnmɛn nga Zoova yili be’n naan like nga be kle e Ɲanmiɛn su’n, e bu i akunndan.—Jue. 19:2.