?Amún yó cɛn kunngun atin bofuɛ?
1. ?Ngue ti yɛ E wla kpɛnlɛ cɛn’n i blɛ’n ti jasin bolɛ blɛ kpa ɔ?
1 E wla kpɛnlɛ cɛn’n i blɛ’n ti blɛ kpa mɔ e kwla bo jasin fɛ’n i kpa tra laa ɔ. Zoova i sran klolɛ dan’n mɔ i ti ɔ fɛli i Wa’n kpɔli e ti’n, blɛ sɔ’n nun’n, e bu su akunndan. (Zan 3:16) Nanwlɛ, ajalɛ sɔ mɔ Zoova fali’n ti’n, e si’a wie se. I sɔ’n ti’n, e kunndɛ kpa kɛ é kán Zoova ɔ nin sa ng’ɔ su yo man klɔ sran mun’n, be ndɛ é klé sran mun. (Eza. 12:4, 5; Lik 6:45) Asa’n, blɛ ngunmin kun sɔ’n nun’n, e tu e klun e yia e osufuɛ mun nin e jasin bowlɛ’n nunfuɛ mun naan be tran E wla kpɛnlɛ cɛn aɲia’n i bo wie. I sin’n, be nga be trannin aɲia sɔ’n i bo’n, e mian e ɲin e uka be. ?Amun kunndɛman kɛ amún yó cɛn kunngun atin bofuɛ naan amun a bo jasin’n i kpa ekun Marsi nin Avrili yɛ Mɛ anglo’n nun?
2. ?Ngue ti yɛ Marsi anglo’n nin atin bolɛ junman’n i dilɛ’n fata kpa ɔ?
2 Maan Marsi anglo’n yo i liɛ ngunmin kun: Marsi anglo’n nin cɛn kunngun atin bolɛ junman’n fata kpa. Be nga bé yó cɛn kunngun atin bofuɛ blɛ sɔ’n nun’n, sɛ be klo’n be kwla di dɔ 30 annzɛ dɔ 50. Asa’n, sɛ akpasua sunianfuɛ’n nian asɔnun’n i osu Marsi anglo’n nun’n, aɲia ng’ɔ nin titi atin bofuɛ nin ngunmin atin bofuɛ’m bé yó’n, bé kwlá trɛ́n i bo lele i awieliɛ. Afuɛ’n liɛ’n, é yó E wla kpɛnlɛ cɛn aɲia’n Jɔlɛ cɛn, afuɛ 2013 Marsi anglo’n i le 26 su. Blɛ nga é fá yía sran mun’n, ɔ́ trá titi liɛ’n, afin é bó i bo Marsi anglo’n i le 1 su. Asa kusu’n, Marsi anglo’n le Fue cɛn nnun nin Mɔnnɛn cɛn nnun. Ɔ maan, amun bu i akunndan be nian naan sɛ amun kwla tu amun klun be bo jasin’n i kpa Marsi anglo’n nun o.
3. ?Wafa sɛ yɛ e kwla siesie e wun naan y’a bo jasin fɛ’n i kpa ekun ɔn?
3 Amun siesie amun wun ikisa: Ajalɛ ng’ɔ fata kɛ amun fa naan amun a kwla yo atin bofuɛ’n, dɔ nga su yɛ ɔ fata kɛ amun bu be akunndan ɔn. Ɔ ti cinnjin kɛ awlobo’n i nunfuɛ’m be ti be wun aniɛn. Ɔ maan kɛ amún sú Ɲanmiɛn awlo lɔ nnɔsua nun’n, amun koko ninnge nga amun fa sieli amun ɲrun kɛ amún yó’n, be su yalɛ naan amun fa be wun ajalɛ. (Nya. 15:22) Sɛ kusu amun kwlá yoman cɛn kunngun atin bofuɛ’n, nán maan amun sa sin bubu amun. Amun kwla siesie amun wun naan amun a uka dɔ nga amun di i jasin bolɛ nun’n i su. Asa’n amun kwla fa cɛn uflɛ kun ekun fa uka cɛn nga amun fa bo jasin fɛ’n titi’n i su.
4. ?Sɛ Marsi nin Avrili yɛ Mɛ anglo’n nun’n, e bo jasin fɛ’n i kpa’n, mmlusuɛ benin yɛ é ɲɛ́n i ɔ?
4 Sɛ Marsi nin Avrili yɛ Mɛ anglo nun’n, e bo jasin fɛ’n i kpa’n, e aklunjuɛ’n yó dan. Afin be nga be su Zoova’n mɔ be cɛ sran like’n be di aklunjuɛ. (Zan 4:34; Yol. 20:35) Like ng’ɔ ti cinnjin kpafuɛ’n yɛle kɛ e klun mɔ e tu e su Zoova’n ti’n, i klun jɔ́ e wun.—Nya. 27:11.