Maan e kunndɛ Zoova i manmanlɛ’n i wun blɛ kpa ekun
1. ?Ajalɛ uflɛuflɛ benin yɛ ɔ́ wá úka e naan y’a ‘manman Zoova’ kpa ekun ɔn?
1 Marsi anglo ng’ɔ sinnin lɛ’n nun’n, e boli ajalɛ uflɛuflɛ kun i su dilɛ bo. Yɛle kɛ Marsi nin Avrili kwlaa nun’n, jasin bofuɛ’m be kwla di dɔ 30 cɛn kunngun atin bolɛ junman’n nun. Kpɛkun anglo nga akpasua sunianfuɛ’n bá asɔnun’n i osu nianlɛ’n i nun’n, be kwla yo i kunngba’n wie. Sɛ le mɔcuɛ ngunmin kun’n bo i bo anglo kun i awieliɛ’n naan ɔ wie anglo uflɛ nun’n, jasin bofuɛ nga be kunndɛ kɛ bé dí dɔ 30, be kwla fa anglo sɔ’m be nun kun be yo cɛn kunngun atin bofuɛ. Blɛ sɔ’n nun’n, aɲia nga akpasua sunianfuɛ’n nin titi atin bofuɛ mun nin ngunmin atin bofuɛ’m bé yó’n, be kwla trɛn i bo lele i awieliɛ. I kwlaa sɔ’n kle kɛ sɛ e kwlá diman dɔ 50 bɔbɔ’n, sanngɛ e te le ‘Zoova i manmanlɛ’n’ i wun atin. Yɛle kɛ afuɛ nuan kun nun’n, e kwla di dɔ 30 cɛn kunngun atin bolɛ junman’n nun, sɔ lele kpɛ nnan!—Jue. 109:30; 119:171.
2. ?Ngue ti yɛ cɛn kunngun atin bofuɛ’m bé wá dí aklunjuɛ le mɔcuɛ ngunmin kun’n nun ɔn?
2 Le mɔcuɛ ngunmin kun’n nun: Ajalɛ uflɛuflɛ nga anuannzɛ’n w’a fɛ i yɛ’n, ɔ́ wá yó maan jasin bofuɛ kpanngban kpa bé kwlá yó cɛn kunngun atin bofuɛ blɛ mɔ akpasua sunianfuɛ’n bá asɔnun’n i osu nianlɛ’n i nun. Kpɛkun be nin i bé wlá be wun fanngan jasin fɛ’n i bolɛ nun. (Rɔm. 1:11, 12) Aniaan nga be di junman Kisie cɛn lele Ya cɛn’n, be kwla se akpasua sunianfuɛ’n kɛ be kunndɛ kɛ be nin i bé bó jasin fɛ’n Fue cɛn annzɛ Mɔnnɛn cɛn. Cɛn kunngun atin bofuɛ kpanngban be kwla se be junman su min’n kɛ ɔ man be cɛn kun. I liɛ’n be nin akpasua sunianfuɛ’n bé kwlá bó jasin fɛ’n likawlɛ. Asa kusu’n, akpasua sunianfuɛ’n nin titi atin bofuɛ mun, yɛ ngunmin atin bofuɛ’m be aɲia’n ɔ́ wá wlá cɛn kunngun atin bofuɛ’m be fanngan kpa. Afin bé trɛ́n i bo wie.
3. ?Ngue ti yɛ E wla kpɛnlɛ cɛn’n i blɛ’n ti cɛn kunngun atin bolɛ junman’n i dilɛ blɛ kpa ɔ?
3 Marsi nin Avrili nun: Be nga laa be fali anglo kun be yoli cɛn kunngun atin bofuɛ E wla kpɛnlɛ cɛn’n i blɛ’n nun’n m’ɔ be dili dɔ 30, siɛn’n be kwla fa anglo nɲɔn be “manman Ɲanmiɛn.” (Ebr. 13:15) Marsi nin Avrili anglo’n nun’n, cɛn kunngun atin bolɛ junman’n i dilɛ su yoman kekle. Afin afuɛ nuan kwlaa nun’n, e fa blɛ sɔ’n e yia sran mun aklunjuɛ su E wla kpɛnlɛ aɲia’n i bo. Asa kusu’n kɛ mɔ blɛ sɔ’n nun’n, aniaan’m be uka be jasin bolɛ junman’n su’n ti’n, e nin e niaan kpanngban kpa e kwla bo jasin likawlɛ. Kɛ E wla kpɛnlɛ aɲia’n ko wie’n, e ko nian be nga be bɛli i bo’n be osu, kpɛkun e wla be fanngan kɛ be bla nzra nun ijɔlɛ ngunmin kun’n i bo wie. ?Amun awlɛn’n sú amun bo naan amun a di cɛn kunngun atin bolɛ junman’n blɛ sɔ’n nun?—Lik 6:45.