Maan e bo jasin fɛ’n i kpa tra laa: Maan e klɛ sran’n i su ndɛ e sie

“Nian ɔ bɔbɔ ɔ wun su ɔ nin ninnge bɔ a kle’n su kpa.” (1 Tim. 4:16) Afɔtuɛ nga Ɲanmiɛn maan akoto Pɔlu mannin Timote lɛ’n, ɔ kle kɛ ɔ fata kɛ e kplin e ɲin naan e si jasin fɛ’n i bo kpa e wɔ e ɲrun titi. Sɛ e sa w’a tɔ jasin bolɛ’n nun o, sɛ blɛ li yɛ y’a yo jasin bofuɛ o, afɔtuɛ sɔ’n ti e kwlaa e liɛ. Kɛ ɔ ko yo naan y’a nanti afɔtuɛ sɔ’n su’n, ndɛ akpasua uflɛ kun wá fíte Ɲanmiɛn Sielɛ Blɛ junman fluwa’n nun. I flɛlɛ’n yɛ: “Maan e bo jasin fɛ’n i kpa tra laa.” Ndɛ akpasua kwlaa nun’n, like ng’ɔ fata kɛ e yo naan e sa w’a tɔ jasin bolɛ’n nun’n, é wá kókó su yalɛ. Ndɛ nga e koko su yalɛ anglo kun nun’n, maan e kwlaa e mian e ɲin naan jasin bolɛ nun’n, e nanti su anglo sɔ’n nun. Kpɛkun sɛ anglo’n wie’n, Junman dilɛ aɲia kun i bo’n, é fá blɛ é kókó i su mmlusuɛ nga e ɲɛnnin i’n su yalɛ. Anglo nga nun’n, like nga é yó’n, yɛle kɛ maan e klɛ sran nga Ɲanmiɛn ndɛ’n lo i’n i su ndɛ e sie.

?Ngue ti yɛ ɔ ti cinnjin ɔn? Nán jasin bolɛ’n ngunmin yɛ ɔ ti junman nga Ɲanmiɛn mannin e’n niɔn. Ɔ fata kɛ e sa e sin e ko nian be nga be sɔli Ɲanmiɛn ndɛ’n nun klanman’n be osu naan e kle be like. Sɛ ɔ ti waka yɛ e tali’n, nn é sé kɛ maan e guɛ i bo nzue titi. (Mat. 28:19, 20; 1 Kor. 3:6-9) I lɛ’n nun’n, ɔ fata kɛ e ko to sran’n ekun. Ndɛ ng’ɔ yoli i cinnjin’n i su yɛ é jrán é kókó yalɛ’n niɔn. Ɔ maan, sɛ sran kun sɔ Ɲanmiɛn ndɛ’n nun klanman’n, ɔ ti cinnjin kɛ e klɛ i su ndɛ e sie.

?Wafa sɛ yɛ é yó i sɔ ɔ?

• Maan biki nin fluwa nga é klɛ́ su’n, be tran e pata’n nun. Maan e siesie ndɛ nga é klɛ́’n sɛsɛsɛ. Nán maan ɔ yo sukusuku. Kɛ e wie i su ndɛ’n i usa cɛ’n, maan e klɛ e sie.

• Maan e klɛ sran’n i dunman’n, nin i telefɔnu nimielo’n, ɔ nin i ɛntɛnɛti adrɛsi’n. ?Kɛ e wunnin i nin i awlobofuɛ mun’n, ngue yɛ e sieli i nzɔliɛ ɔ? Maan e klɛ e sie.

• Yalɛ nga e kokoli’n, maan e klɛ e sie. ?Biblu’n nun ndɛ mma benin yɛ e kanngannin nun ɔn? ?I klun ndɛ benin yɛ ɔ kannin ɔn? ?Fluwa benin yɛ e yacili i i sa nun ɔn? Cɛn’n nin dɔ nga e ko niɛnnin i osu’n, maan e klɛ be wie.

• Maan e klɛ like nga e sunnzun kɛ é yó’n e sie. ?Ndɛ benin yɛ e kunndɛ kɛ e nin sran’n é kókó su yalɛ ɔ? ?Cɛn benin yɛ e seli i kɛ é kó níɛn i osu ekun ɔn?

• Cɛn kwlaa nga e ko niɛn i osu’n, maan e klɛ i su ndɛ. Kannzɛ bɔbɔ e klɛ i su ndɛ kpanngban’n, i sɔ’n timan tɛ.

Anglo nga nun’n, maan e yo nga e nian:

• Kɛ é klɛ́ sran’n i su ndɛ’n, maan e bo i kwlaa su e kle aniaan nga e nin i bo jasin fɛ’n.