Maan e bo jasin fɛ’n i kpa tra laa—Like nga e ko yo naan y’a kwla ko nian sran’n i osu’n

?NGUE TI YƐ Ɔ TI CINNJIN ƆN?

Kɛ e kan ndɛ nanwlɛ’n e kle sran mun’n, ɔ ti kɛ waka yɛ y’a ta sa. Ɔ maan e kunndɛ kɛ é gúa su nzue naan ɔ yo kpa. (1Ko 3:6) Kɛ e to sran kun m’ɔ kle kɛ ndɛ nanwlɛ’n lo i’n, ɔ ti kpa kɛ e usɛ i kosan kun naan e jran su ko niɛn i osu. I liɛ’n, sran’n búɛbúɛ i wun síe yɛ e kusu, kɛ é síesíe e wun naan y’a ko niɛn i osu’n, e su fɛman. Kɛ e sa e sin sran’n i wun lɔ’n, e kwla se i kɛ kosan nga e usɛli i acɛnnin sin’n, i su tɛlɛ yɛ e ba ɔ.

?WAFA SƐ YƐ É YÓ I SƆ Ɔ?

• Kɛ é síesíe e wun naan y’a ko bo jasin fɛ’n awloawlo’m be nun’n, maan e bu kosan nga e kwla fa usa sran mun naan y’a jran su y’a ko nian be osu’n i akunndan. Ɔ kwla yo kosan kun mɔ be tɛli su fluwa nga e su fa man sran mun’n, i nun. Annzɛ kusu e kwla fa kosan sɔ’n fluwa nga e sunnzun kɛ e nin sran’n é súan nun like’n, i nun.

• Kɛ e nin sran ng’ɔ kle kɛ ndɛ nanwlɛ’n lo i’n e wie ijɔ’n, maan e se i kɛ e kunndɛ kɛ é wá níɛn i osu. Kpɛkun kosan nga e buli i akunndan’n, maan e fa usɛ i naan e jran su ko niɛn i osu. Sɛ ɔ su lomɛn sran’n i ngasi’n, e kwla klɛ i nimielo’n ɔ nin ndɛ uflɛ ng’ɔ kwla uka e naan y’a si i tranwlɛ’n.

• Sɛ e seli sran’n kɛ é kó níɛn i osu cɛn ɔ nin dɔ trelele kun su’n, maan e yo i sɔ sakpa.—Mt 5:37