Maan e si sran’m be Biblu’n nun like kle kpa
1. ?Ngue yɛ ɔ fata kɛ jasin bofuɛ nga be kle sran’m be Biblu’n nun like’n be yo ɔ?
1 Zoova bɔbɔ yɛ maan sran’m ‘be bɛ i sin’ be wa su i ɔ. (Zan 6:44) Kannzɛ bɔbɔ ɔ ti sɔ’n, sanngɛ ɔ ti cinnjin kɛ jasin bofuɛ’m be mian be ɲin be uka Biblu’n nun like suanfuɛ mun naan be fa be wun mantan be Si m’ɔ o ɲanmiɛn su lɔ’n. (Zak 4:8) I sɔ’n ti’n, ɔ fata kɛ be dun mmua siesie be wun kpa. Ndɛ kpɔlɛ’m be nun kannganlɛ nin kosan nga be klɛli’n be usalɛ ngunmin’n, ɔ kwlá yoman naan like suanfuɛ kun w’a wun Biblu’n i nun ndɛ’n i wlɛ naan w’a fɛ i wun w’a man Zoova.
2. ?Ngue yɛ ɔ fata kɛ jasin bofuɛ kun yo naan w’a si like kle kpa ɔ?
2 Sɛ jasin bofuɛ’m be kunndɛ kɛ bé sí like kle kpa’n, ɔ fata kɛ be uka Biblu’n nun like suanfuɛ mun like nsan nun. (1) Maan be yo naan be wun Biblu’n i nun ndɛ’n i wlɛ, (2) maan be uka be naan be lafi ndɛ nga Biblu’n kan’n su, yɛ (3) maan be kle be wafa nga be kwla nanti ndɛ nga Biblu’n kan’n su. (Zan 3:16; 17:3; Zak 2:26) Nanwlɛ i sɔ yolɛ’n fa blɛ kpanngban. Sanngɛ sɛ like suanfuɛ’n yia ninnge sɔ’m be nuan kunngunngun’n yɛ ɔ nin Zoova be afiɛn mántán kpa ɔ. Ɔ maan, ɔ́ kwlá fɛ́ i wun mán Zoova.
3. ?Ngue ti yɛ sran ng’ɔ si like kle’n ɔ usa like suanfuɛ’n i kosan naan ɔ kɛn i klun ndɛ ɔ?
3 Maan like suanfuɛ’n kɛn i klun ndɛ: Sɛ e waan é wún i wlɛ sɛ like suanfuɛ’n wun ndɛ’n i wlɛ naan ɔ fa su’n, nán maan e ngunmin e ijɔ sa trilili. Sanngɛ maan e usɛ i kosan naan ɔ kɛn i klun ndɛ. (Zak 1:19) Maan e usa i kɛ: ‘?Like nga Biblu’n kle’n, ɔ wun i wlɛ? ?Sɛ be se i kɛ nán ɔ nian fluwa’n nun naan i bɔbɔ yiyi ndɛ’n nun’n, ɔ́ kwlá yíyí nun? ?Ɔ bu like ng’ɔ suan’n i sɛ? ?Ɔ lafi su kɛ like nga Biblu’n kle’n ti nanwlɛ?’ (1 Tɛs. 2:13) ?Ɔ wun i wlɛ kɛ like m’ɔ suan’n ti’n, ɔ fata kɛ ɔ kaci i nzuɛn’n? (Kol. 3:10) Sɛ e waan é sí kosan ngalɛ’m be su tɛlɛ’n, maan e usa like suanfuɛ’n i kosan naan ɔ kɛn i klun ndɛ. Kpɛkun maan e sie e su i nuan bo.—Mat. 16:13-16.
4. ?Sɛ Biblu’n nun like suanfuɛ’n wunman like nga e kle i’n i wlɛ kpa’n, annzɛ sɛ ɔ nantiman su’n, ngue yɛ ɔ fata kɛ e yo ɔ?
4 Wie liɛ’n, kɛ ɔ yo naan sran kun kaci i akunndan bulɛ wafa’n annzɛ ɔ wla nzuɛn tɛ wie ase’n, i sɔ’n kwla fa blɛ kpanngban. (2 Kor. 10:5) Wienun ɔn, like suanfuɛ’n lafiman like nga Biblu’n kle’n su, annzɛ kusu ɔ nantiman su. Sɛ ɔ ti sɔ’n, maan e tra e awlɛn e kle i like lele naan Ɲanmiɛn Ndɛ’n wluwlu i wun, naan kusu Ɲanmiɛn i wawɛ’n ukɛ i. (1 Kor. 3:6, 7; Ebr. 4:12) Sɛ like suanfuɛ’n wunman ndɛ wie wlɛ kpa’n, annzɛ sɛ ɔ nantiman Biblu’n i nun ndɛ wie su’n, nán maan e se i kɛ saan fii ɔ ka lɛ kaci. Sanngɛ maan e koko ndɛ uflɛ su yalɛ. Sɛ e tra e awlɛn e ukɛ i klolɛ su’n, kɛ ɔ́ kɔ́ i ɲrun’n, ɔ kwla fa ajalɛ ng’ɔ ti kpa’n.