Maan e ‘kle sran’m be like maan be wun i wlɛ’
‘Kan Ɲanmiɛn ndɛ’n jran su kpa kle sran mun maan be wun i wlɛ. Sran ng’ɔ yo sa’n ijɔ i, wla be fanngan, tra wɔ awlɛn kpa kle be.’—2 TIM. 4:2.
1. ?Ngue yɛ Zezi seli i sɔnnzɔnfuɛ mun kɛ be yo ɔ? ?Yɛ ajalɛ benin yɛ ɔ kleli ɔ?
KƐ ZEZI bali asiɛ’n su wa’n, ɔ yoli sran sunman be juejue. Yɛ i sɔ’n boli sran’m be nuan kpa. Sanngɛ ɔ nin i sɔ’n ngba’n, kɛ bé kán Zezi i ndɛ’n, b’a flɛmɛn i ayre yofuɛ, annzɛ atrɛ yifuɛ. Cɛcɛ. Be flɛli i like klefuɛ. (Mar. 10:17; Zan 1:38) Ɲanmiɛn Sielɛ’n i jasin fɛ’n bolɛ’n junman’n yɛ ɔ yoli ninnge nga Zezi yoli’n be nun cinnjinfuɛ’n niɔn. Andɛ kusu, junman sɔ’n ti i sɔnnzɔnfuɛ’m be cinnjin wie. Zezi seli Klistfuɛ’m be kɛ be yo maan sran’m be kaci i sɔnnzɔnfuɛ. Yɛle kɛ like kwlaa nga ɔ fa kleli be’n, be kusu be kle be maan be fa su.—Mat. 28:19, 20.
2. ?Sɛ e waan é dí e jasin fɛ’n bolɛ junman’n i kpa’n, ngue yɛ ɔ fata kɛ e yo ɔ?
2 Sɛ e kunndɛ kɛ é úka sran mun kpa naan be kaci Zezi i sɔnnzɔnfuɛ’n, ɔ fata kɛ titi’n, e yo maan e like klelɛ wafa’n yo kpa wɔ i ɲrun. Akoto Pɔlu kleli kɛ i sɔ yolɛ’n ti cinnjin kpa. Fluwa ng’ɔ klɛli ko mannin Timote m’ɔ nin i boli jasin fɛ’n likawlɛ’n i nun’n, ɔ yili i sɔ’n i nglo. Ɔ seli kɛ: ‘Nian ɔ bɔbɔ ɔ wun su ɔ nin ninnge mɔ a kle’n su kpa, afin sɛ a yo sɔ tititi’n, á dé ɔ bɔbɔ nin be nga be ti ɔ ndɛ’n.’ (1 Tim. 4:16) Like klelɛ nga Pɔlu kɛn i ndɛ’n, nɛ́n i yɛle like mɔ e si i mɔ e kan kle sran uflɛ’n. Klistfuɛ ng’ɔ si jasin fɛ’n bolɛ junman’n di’n, yɛle ng’ɔ yo maan Biblu’n nun ndɛ’m be kan sran’m be awlɛn’n, kpɛkun i sɔ’n su be bo maan be kaci be mɛn dilɛ wafa’n. E kwla se kɛ i sɔ yolɛ’n ti kɛ ajuin sa. ?Ɔ maan, kɛ é bó Ɲanmiɛn Sielɛ’n i jasin fɛ’n é klé sran mun’n, wafa sɛ yɛ e kwla ‘kle be like naan b’a wun i wlɛ’ ɔ?—2 Tim. 4:2.
Maan e nian e ninnge nga e kle’n su kpa
3, 4. (a) ?Wafa sɛ yɛ e kwla ‘kle sran’m be like naan b’a wun i wlɛ’ ɔ? (b) ?Wafa sɛ yɛ Ɲanmiɛn junman dilɛ suklu’n uka e naan y’a yo like klefuɛ kpa ɔ?
3 Sran like klelɛ’n ti kɛ ajuin dilɛ sa. Fluwa kun m’ɔ tutu ndɛ’m be bo’n seli kɛ “ajuin dilɛ’n” ti “like kun mɔ, ka naan b’a kwla yo’n, be suan, yɛ be yo i titi naan be sa’n w’a tɔ i yolɛ’n nun’n. Kpɛkun be fa be ɲin sie su.” Sɛ e kunndɛ kɛ jasin fɛ’n bolɛ nun’n, é yó like klefuɛ kpa’n, ɔ fata kɛ e bu ninnge nsan sɔ’m be ngba be akunndan. Like suanlɛ’n nin Ɲanmiɛn i srɛlɛ’n be ngunmin yɛ be kwla uka e naan ndɛ nga é kán’n, y’a wun i wlɛ ɔ. (An kanngan Jue Mun 119:27, 34 nun.) Wafa nga jasin bofuɛ nga be sa w’a tɔ jasin fɛ’n bolɛ nun’n, be kle sran’m be like’n, sɛ e fa e ɲin sie su’n, naan e sɔnnzɔn be’n, é kwlá yó kɛ be sa wie. Asa ekun sɛ like nga e suan’n, e mian e ɲin e yo i titi’n, i sɔ’n ɔ́ úka e naan e like klelɛ’n w’a yo kpa w’a ɔ i ɲrun.—Lik 6:40; 1 Tim. 4:13-15.
4 Zoova yɛ ɔ ti e Like Klefuɛ Dan’n niɔn. I anuannzɛ ng’ɔ o asiɛ’n su wa’n yɛ ɔ fa kle i sufuɛ nga be o asiɛ’n su wa’n be wafa nga be kwla di jasin fɛ’n bolɛ junman’n kpa ɔ. (Eza. 30:20, 21) I sɔ’n ti’n, le mɔcuɛ kwlaa nun’n, be yo Ɲanmiɛn junman dilɛ suklu asɔnun’m be kwlaa be nun. Suklu sɔ’n uka suklu ba mun naan b’a kwla yo Ɲanmiɛn Sielɛ jasin bofuɛ mɔ be sa w’a tɔ be junman’n i dilɛ nun’n. Fluwa nga be di be nun junman suklu sɔ nun’n, be nun cinnjinfuɛ’n yɛle Biblu’n. Zoova i Ndɛ’n kle e like ng’ɔ fata kɛ e kle sran mun’n. I kpa’n bɔbɔ’n, like klelɛ’n i wafa ng’ɔ nin i fata m’ɔ ba nvlɛ’n, yɛ ɔ kle e ɔ. Ɲanmiɛn junman dilɛ suklu’n kpɛn e wla titi kɛ sɛ like nga e kle’n taka Ɲanmiɛn Ndɛ’n su, naan e si kosan usa, naan like nga e kle’n i wlɛ wunlɛ’n ti pɔpɔ, yɛ sɛ e klo sran mun’n, yɛ é káci like klefuɛ kpa ɔ. Maan e fa e ɲin sie i ninnge sɔ’m be su kunngunngun e nian. I sin’n é wá wún wafa nga e kwla yo naan y’a kan like suanfuɛ’n i awlɛn’n.
Maan like nga e kle’n taka Ɲanmiɛn Ndɛ’n su
5. ?Ngue su yɛ ɔ fata kɛ like nga e kle’n ɔ taka ɔ? ?Yɛ ngue ti ɔ?
5 Zezi yɛ ɔ yoli klɔ sran’m be kwlaa be nun like klefuɛ dan’n niɔn. Like ng’ɔ kleli’n taka Ɲanmiɛn Ndɛ’n su. (Mat. 21:13; Zan 6:45; 8:17) W’a kpɛmɛn i bɔbɔ i klun w’a kanman ndɛ. Sanngɛ sran ng’ɔ sunmɛnnin i’n i ndɛ’n yɛ ɔ kannin ɔn. (Zan 7:16-18) Ɔ fata kɛ e fɛ i ajalɛ’n su. I sɔ’n ti kannzɛ maan ɔ yo awloawlo’m be nun jasin fɛ’n bolɛ’n nun o annzɛ sran’m be Biblu’n nun like klelɛ nun o, ɔ fata kɛ ndɛ nga é kán’n, ɔ taka Ɲanmiɛn Ndɛ’n su. (2 Tim. 3:16, 17) I li maan e si ndɛ nun yiyi ngwlɛlɛ su sɛ, sanngɛ be kwlá ɲanman ta sran’m be su kɛ Ɲanmiɛn Ndɛ’n sa. Biblu’n le ta. Ɔ maan, ajalɛ kpa nga e klo kɛ é fá úka like suanfuɛ’n naan ɔ wun ndɛ’n i wlɛ’n, yɛle kɛ e fɛ i su like nga Ɲanmiɛn Ndɛ’n kan’n e mɛn i maan ɔ kanngan nun.—An kanngan Ebre Mun 4:12 nun.
6. ?Wafa sɛ yɛ like klefuɛ’n kwla yo naan like suanfuɛ’n w’a wun like ng’ɔ suan’n i wlɛ sakpa ɔ?
6 I sɔ’n kleman kɛ ɔ nin i fataman kɛ Klistfuɛ kun siesie i wun naan w’a ko kle sran’m be Biblu’n nun like. I kpa’n bɔbɔ’n, Biblu’n nun ndɛ mma nga be klɛklɛli be’n, be nun ng’ɔ nin i fata kɛ like suanlɛ nun’n, like klefuɛ’n bɔbɔ annzɛ like suanfuɛ’n kanngan nun’n, ɔ fata kɛ like klefuɛ’n dun mmua bu i akunndan sie. Blɛ sunman nun’n, ɔ nin i fata kɛ Biblu’n nun ndɛ mma nga ninnge nga e lafi be su’n be taka su’n, yɛ e kanngan be nun ɔn. Asa ekun’n ɔ ti cinnjin kɛ e uka like suanfuɛ’n naan Biblu’n nun ndɛ mma ng’ɔ kanngan be nun’n, ɔ wun be kwlaa be wlɛ.—1 Kor. 14:8, 9.
Maan e si kosan usa
7. ?Ngue ti yɛ kɛ é klé sran’m be like’n, be kosan usalɛ’n ti ajalɛ kpa kun ɔn?
7 Kɛ like klefuɛ’n si kosan usa’n, i sɔ’n yo maan like suanfuɛ’n bu akunndan. Kpɔkun i sɔ liɛ’n uka like klefuɛ’n naan w’a kan like suanfuɛ’n i awlɛn’n. Ɔ maan, kɛ e bɔbɔ e yiyi Biblu’n nun ndɛ mma’m be nun kle like suanfuɛ’n, ɔ flunman kɛ e se i naan ɔ yiyi be nun kle e. Blɛ wie nun’n, ɔ nin i fata kɛ e usa like suanfuɛ’n i kosan wie mun naan w’a kwla wun ndɛ’m be wlɛ kpa. Kɛ sran’m be like klelɛ nun e usa be kosan’n, i sɔ’n yo maan like nga ti yɛ ndɛ wie ti sa ti sa’n, be wun i wlɛ, kpɛkun be bɔbɔ be lafi ndɛ sɔ’n su.—Mat. 17:24-26; Lik 10:36, 37.
8. ?Wafa sɛ yɛ e kwla wun like ng’ɔ o like suanfuɛ’n i awlɛn’n nun’n i wlɛ ɔ?
8 Biblu’n i akua nga e fa kle sran’m be like’n be nun’n, be usa kosan kpɛkun be tɛ su. Be nga e kle be like’n, be nun sunman be kwla nian ndɛ kpɔlɛ nga be usɛ i su kosan’n nun naan kosan’n i su tɛlɛ nga be klɛli i ndɛ kpɔlɛ sɔ nun’n, b’a fa tɛ su. Sanngɛ sɛ like klefuɛ kun waan ɔ́ kán like suanfuɛ’n i awlɛn’n, kosan’n i su tɛlɛ ng’ɔ ti su’n, nɛ́n i su yɛ ɔ́ jrán ɔn. Wienun ɔn, bla nin bian kunndɛlɛ sukusuku i su ndɛ nga Biblu’n kan’n, like suanfuɛ kun kwla yiyi nun weinwein kpa. (1 Kor. 6:18) Sanngɛ sɛ amanniɛn su e usa like suanfuɛ’n i kosan ng’ɔ kwla yo naan w’a kɛn i klun ndɛ’n, é wún like ng’ɔ suan’n i su akunndan ng’ɔ bu’n i wlɛ. Ɔ maan, like klefuɛ’n kwla usa kɛ: “?Ngue ti yɛ Biblu’n se be nga be nin a jaman be wun’n be kɛ nán be si sua ɔ? ?A bu Ɲanmiɛn i mmla sɔ’n sɛ? ?A bu i kɛ sɛ e nian Ɲanmiɛn i mmla’m be su e nanti’n, e kwla ɲan su mmlusuɛ?” Kosan kɛ ngalɛ sa’n, be su tɛlɛ’n kwla yi like ng’ɔ o like suanfuɛ’n i awlɛn nun’n i nglo.—An kanngan Matie 16:13-17 nun.
Maan like nga e kle’n i wlɛ wunlɛ’n yo pɔpɔ
9. ?Kɛ é kán Biblu’n nun ndɛ mun é klé sran mun’n, ngue yɛ ɔ fataman kɛ e wla fi su ɔ?
9 Ndɛ nanwlɛ nga be o Ɲanmiɛn Ndɛ’n nun’n be nun sunman be wlɛ wunlɛ’n ti pɔpɔ. Sanngɛ wie liɛ’n, ninnge nga be kleli sran mun Ɲanmiɛn sulɛ ng’ɔ timan su’n be nun’n, ɔ kwla sanngan be nga e kle be Biblu’n nun like’n be akunndan’n. Like ng’ɔ fata kɛ e mɔ e ti like klefuɛ e yo’n, yɛle kɛ e yo maan Biblu’n nun ndɛ’m be wlɛ wunlɛ’n yo pɔpɔ. Kɛ be nga be si like kle’n bé klé like’n, like nga be kle’n ti su, ɔ ti weiin, kpɛkun i wlɛ wunlɛ’n ti pɔpɔ. Sɛ e fɛ i sɔ ajalɛ kunngba’n, ndɛ nanwlɛ nga e kle’n i wlɛ wunlɛ’n yó pɔpɔ. Nán maan e fa ndɛ nga be timan cinnjin’n e wla like nga e su kle’n nun. Biblu’n nun ndɛ mma nga e kanngan nun’n, nɛ́n i nun ndɛ’m be ngba yɛ ɔ fata kɛ e yiyi nun ɔn. Ndɛ ng’ɔ yiyi like nga e su suan’n i nun’n, i su yɛ ɔ fata kɛ e fa e ɲin sie ɔ. Kɛ like suanfuɛ’n wún ninnge’m be wlɛ kɔ́ i ɲrun’n, Biblu’n nun ndɛ nga be wlɛ wunlɛ’n ti kekle’n, ɔ́ wún be wlɛ wie.—Ebr. 5:13, 14.
10. ?Ngue su yɛ e jran naan y’a wun lika nga é súan like é jú’n niɔn?
10 ?Kɛ e kɔ sran’m be like klelɛ’n, ndɛ tre nɲɛ annzɛ ndɛ kpɔlɛ nɲɛ yɛ ɔ fata kɛ e suan nun like ɔ? Ɔ fata kɛ e fa akunndan naan y’a wun i sɔ liɛ’n i wlɛ. Ɔ le like suanfuɛ kun annzɛ like klefuɛ kun nin i su sa. Yɛ ɔ le sran kun nin like ng’ɔ kwla yo annzɛ ɔ kwlá yoman’n. Sanngɛ maan titi’n, ɔ tran e akunndan nun kɛ like nga e mɔ e ti like klefuɛ’n e kunndɛ’n, yɛle kɛ é úka like suanfuɛ’n naan i Ɲanmiɛn sulafilɛ’n taka kpa. Ɔ maan, e mɛn i blɛ naan ndɛ nanwlɛ ng’ɔ o Ɲanmiɛn Ndɛ’n nun’n, w’a kwla kanngan nun, naan w’a wun i wlɛ, naan w’a fa su. Like suanlɛ kun nun’n, lika nga like suanfuɛ’n kwla wun ninnge’m be wlɛ ju lɛ’n, maan e jran lɛ. Sanngɛ maan e wɔ e ɲrun like suanlɛ’n nun titi. Kɛ like suanfuɛ’n ko wun like kun wlɛ’n, nn e su kle i uflɛ.—Kol. 2:6, 7.
11. ?Like klelɛ nun’n, afɔtuɛ benin yɛ akoto Pɔlu i ajalɛ’n man e ɔ?
11 Kɛ akoto Pɔlu bó jasin fɛ’n klé be nga be nin a timɛn i le’n, ɔ yoli maan i ndɛ ng’ɔ kannin’n i wlɛ wunlɛ’n yoli pɔpɔ. Pɔlu si fluwa kpa, sanngɛ kɛ ɔ́ kán ndɛ’n, ɔ kɛn i wafa kun mɔ sran nga be siman fluwa bɔbɔ’n be kwla wun i wlɛ’n. (An kanngan 1 Korɛntfuɛ Mun 2:1, 2 nun.) Ɲanmiɛn Ndɛ’n i wlɛ wunlɛ’n m’ɔ ti pɔpɔ’n, ɔ yo maan be nga be klo nanwlɛ’n be kunndɛ kɛ bé súan nun like. Ɔ timan cinnjin kɛ sran kun yo fluwa sifuɛ dan naan w’a wun Biblu’n nun ndɛ’m be wlɛ.—Mat. 11:25; Yol. 4:13; 1 Kor. 1:26, 27.
Maan e uka like suanfuɛ mun naan be wun kɛ like nga be suan’n ti kpa
12, 13. ?Ngue yɛ ɔ fata kɛ ɔ su like suanfuɛ’n i bo naan ɔ nanti like ng’ɔ suan’n su ɔ? An fa sunnzun ase kun yiyi nun.
12 Sɛ e kunndɛ kɛ like suanfuɛ’n yo like ng’ɔ suan’n i nuan su sa’n, ɔ fata kɛ like nga e kle’n ɔ kɛn i awlɛn’n. Like nga like suanfuɛ’n suan’n, wafa nga ɔ ti i liɛ’n su’n, nin wafa nga ɔ kwla ɲan su mmlusuɛ’n, ɔ fata kɛ ɔ wun i wlɛ. Asa ekun’n, sɛ ɔ nian mmla nga be o Ɲanmiɛn Ndɛ’n nun’n be su nanti’n, wafa nga i mɛn dilɛ’n yó kpa kɔ́ i ɲrun’n, maan ɔ wun i wlɛ wie.—Eza. 48:17, 18.
13 Wienun ɔn, e su koko ndɛ ng’ɔ o Ebre Mun 10:24, 25 nun’n i su yalɛ. Ndɛ sɔ’n wla Klistfuɛ’m be fanngan kɛ be yia naan be fa Biblu’n nun ndɛ’m be wla be wun fanngan, yɛ be klo be wun. Sɛ like suanfuɛ’n nin a ɔman aɲia’m be bo le’n, e kwla yiyi wafa nga e yo aɲia mun’n, ɔ nin ndɛ nga bé wá kán be lɔ’n, i nun kpe kan e kle i. E kwla se i kɛ aɲia’m be bo kɔlɛ’n, ɔ o e Ɲanmiɛn sulɛ’n nun wie, naan kɛ e bɔbɔ e kɔ aɲia’m be bo’n, e ɲan su mmlusuɛ. I sin’n, e kwla yia like suanfuɛ’n aɲia’m be bo. Ɔ fata kɛ like suanfuɛ’n i ɲin m’ɔ klo kɛ ɔ́ yí Zoova’n, yɛ ɔ su i bo naan w’a nanti Ɲanmiɛn Ndɛ’n nun mmla’m be su ɔ. Nán ɔ yo kɛ ɔ́ kúnndɛ kɛ sran ng’ɔ kle i like’n i klun jɔ i wun ti ɔ.—Gal. 6:4, 5.
14, 15. (a) ?Ngue yɛ Biblu’n nun like suanfuɛ kun kwla suɛn i Zoova su ɔ? (b) ?Wafa sɛ yɛ sran’n i wafa nga Ɲanmiɛn ti’n, i silɛ’n kwla yo Biblu’n nun like suanfuɛ’n i ye ɔ?
14 Kɛ like suanfuɛ kun suan Biblu’n nun like, m’ɔ nanti i nun mmla’m be su’n, mmlusuɛ ng’ɔ ɲan be’n, be nun cinnjin kun yɛle kɛ ɔ si Zoova, kpɛkun ɔ klo Zoova kɛ be fa klo be wiengu sa. (Eza. 42:8) Zoova ti Siɛ kun m’ɔ klo i mma mun ɔn. I yɛ ɔ ti Like Yifuɛ’n niɔn, yɛ like kwlaa ti i liɛ. Asa ekun’n, ɔ yi i sran’n i wafa ng’ɔ ti’n, nin ninnge ng’ɔ kwla yo be’n be nglo kle be nga be klo i mɔ be su i’n. (An kanngan Ezipt Lɔ Tulɛ 34:6, 7 nun.) Kɛ ɔ ka kan Moizi wá kó fá Izraɛlifuɛ mun Ezipti mɛn’n nun lɔ fíte’n, Zoova yili i wun nglo kleli i. Ɔ seli i kɛ: ‘Min ti Ɲanmiɛn mɔ n wo lɛ titi.’ (Tul. 3:13-15) Ndɛ sɔ’n kle kɛ nvle nga Zoova fɛli i dunman sieli i nunfuɛ’m be su’n, like kwlaa ng’ɔ fata kɛ ɔ yo naan nda ng’ɔ tali be’n b’a kpɛn su’n, ɔ́ yó. Ɔ maan, Zoova yili sran’n i wafawafa ng’ɔ kwla yo’n, i nglo kleli Izraɛlifuɛ mun. Ɔ yoli be Defuɛ, ɔ yoli Alɛ Kunfuɛ, nin be Like Manfuɛ, nin kasiɛ’m be Nuan Yiafuɛ, ɔ nin sran’n i wafa uflɛ wie mun ekun.—Tul. 15:2, 3; 16:2-5; Zoz. 23:14.
15 Zoova su yiman atrɛ kleman be nga e kle be like mun kɛ ng’ɔ yoli i Moizi ɲrun’n sa. Sanngɛ kɛ be nga e kle be like’n be Ɲanmiɛn sulafilɛ’n yó dan kɔ́ i ɲrun’n, mɔ bé bú like nga be suan’n i like cinnjin kɔ́’n, mɔ bé nían su bé nánti’n, atrɛkpa’n bé wún i wlɛ kɛ ɔ fata kɛ be lafi Zoova su. Afin i yɛ ɔ́ yó maan bé yó yakpa, yɛ bé sí ngwlɛlɛ, yɛ ɔ́ klé be atin ng’ɔ fata kɛ be nanti su’n niɔn. Kɛ bé yó i sɔ’n, be kusu bé wún kɛ Zoova ti Afɔtuɛ Manfuɛ mɔ be kwla lafi i su, yɛ ɔ ti be Sasafuɛ, nin Like Manfuɛ m’ɔ nian be lika mɔ i sa timan tankaan ɔn.—Jue. 55:23; 63:8; Nya. 3:5, 6.
Ɔ ti cinnjin kɛ e klo sran mun
16. ?Ngue ti yɛ nán like klelɛ’n i nun ajuin dilɛ’n yɛ ɔ ti like cinnjin ng’ɔ kwla yo naan y’a yo like klefuɛ kpa ɔ?
16 Sɛ e bu e wun kɛ e timan like klefuɛ kpa kɛ nga e kunndɛ kɛ é yó’n sa’n, nán maan i sɔ’n bubu e sa sin. Like nga andɛ mɛn wunmuan’n nun e kle sran mun’n, Zoova nin Zezi be nian su. (Yol. 1:7, 8; Ngl. 14:6) E ɲin nga e mian’n, be kwla ra su naan ndɛ nga e kan’n w’a yo be nga be awlɛn’n ti kpa’n be ye kɛ nga e kunndɛ’n sa. (Zan 6:44) Klolɛ mɔ like klefuɛ kun fa klo sran’n, ɔ kan sran’m be awlɛn’n kpa tra like klelɛ’n i nun ajuin dilɛ kwlaa. Akoto Pɔlu wunnin i wlɛ kɛ ɔ ti cinnjin kɛ e klo be nga e kle be like’n. Yɛ ɔ yili i sɔ’n i nglo.—An kanngan 1 Tɛsalonikfuɛ Mun 2:7, 8 nun.
17. ?Wafa sɛ yɛ e kwla kle kɛ Biblu’n nun like suanfuɛ’m be ndɛ lo e be tinuntinun ɔn?
17 Sɛ e fa blɛ naan e si Biblu’n nun like suanfuɛ mun be tinuntinun’n, é klé kɛ be ndɛ lo e. Kɛ e nin be é kókó Ɲanmiɛn Ndɛ’n i nun mmla’m be su yalɛ’n, ɔ́ yó maan é sí sa ng’ɔ o be su’n. E kwla sie i nzɔliɛ kɛ ninnge nga ɔ suannin be Biblu’n nun’n, ɔ su nian be nun wie’m be su nanti. Atrɛkpa kusu’n, ɔ nin i fata kɛ e yo maan ɔ wun ninnge wie’m be wlɛ kpa ekun. Sɛ e uka like suanfuɛ’n naan ɔ wun i wlɛ’n kɛ Biblu’n nun ndɛ’m be ti kpa be mɛn i’n, klolɛ su, e kwla ukɛ i naan w’a kaci Zezi i sɔnnzɔnfuɛ sakpa.
18. ?Ngue ti yɛ ɔ ti cinnjin kɛ e nin like suanfuɛ’n e srɛ Ɲanmiɛn yɛ e bo i dunman srɛlɛ’n nun ɔn?
18 Ninnge’m be nun cinnjin kpa ng’ɔ fata kɛ e yo’n, yɛle kɛ maan e nin like suanfuɛ’n e srɛ Ɲanmiɛn likawlɛ. Yɛ Ɲanmiɛn srɛlɛ nun’n, maan e bo like suanfuɛ’n i dunman. Sɛ e yo sɔ’n, ɔ́ wún i wlɛ kɛ e kunndɛ kɛ ɔ si i Yifuɛ’n kpa, naan ɔ fɛ i wun mɛntɛn i, naan Ɲanmiɛn kle i like ng’ɔ fata kɛ ɔ yo’n. (An kanngan Jue Mun 25:4, 5 nun.) Kɛ e srɛ Zoova kɛ ɔ uka like suanfuɛ’n maan ɔ miɛn i ɲin nanti like ng’ɔ suan’n su’n, i sɔ’n úka like suanfuɛ’n maan ɔ́ wún kɛ ɔ ti cinnjin kɛ ‘Ɲanmiɛn ndɛ nga ɔ ti’n, ɔ lafi su.’ (Zak 1:22) Asa ekun’n, kɛ like suanfuɛ’n tíe e Ɲanmiɛn srɛlɛ m’ɔ fin e awlɛn’n nun’n, i kusu ɔ́ súan Ɲanmiɛn i srɛlɛ wie. Nanwlɛ, kɛ e uka Biblu’n nun like suanfuɛ kun m’ɔ nin Zoova be afiɛn’n sɛ kpa’n, i sɔ’n man aklunjuɛ dan.
19. ?Ngue yɛ é wá wún i like suanlɛ ng’ɔ́ bá lɛ’n nun ɔn?
19 Asiɛ wunmuan su’n, Zoova i Lalofuɛ akpinngbin nsiɛn nin sin tra su be wla be wun ase be ‘kle sran’m be like maan be wun i wlɛ.’ Be kunndɛ kɛ bé úka be nga be awlɛn’n ti kpa’n naan like kwlaa nga Zezi kleli’n, be fa su. I sɔ’n wla e fanngan dan. ?Wafa sɛ yɛ jasin fɛ’n nga e bo’n ba nvlɛ ɔ? Like suanlɛ ng’ɔ́ bá lɛ’n nun’n, é wá tɛ́ kosan sɔ’n su.
?Amun wla kwla kpɛn su?
• ?Ngue ti yɛ ɔ ti cinnjin kɛ Klistfuɛ’m be yo maan sran’m ‘be wun like nga be kle’n i wlɛ’ ɔ?
• ?Ninnge benin mun yɛ e kwla yo naan like nga e kle’n w’a yo sran’m be ye dan ɔn?
• ?Like klelɛ nun’n, ngue yɛ ɔ kwla kan sran’m be awlɛn’n kpa tra like klelɛ’n i nun ajuin dilɛ kwlaa ɔ?
[Foto, bue 13]
?Amun di Ɲanmiɛn junman dilɛ suklu’n nun junman wie?
[Foto, bue 15]
?Ngue ti yɛ ɔ ti cinnjin kɛ e se like suanfuɛ’n naan ɔ kanngan ndɛ mun Biblu’n nun ɔn?
[Foto, bue 16]
Maan e nin like suanfuɛ’n e srɛ Ɲanmiɛn yɛ e bo i dunman srɛlɛ’n nun.