Maan e lafi Ɲanmiɛn su e nanti

Ka naan Rɔmu sonja’m b’a bo sin b’a yia Zerizalɛmu klɔ’n naan i sin b’a utu i’n, akoto Pɔlu klɛli Klistfuɛ’m be fluwa. Ɔ seli be kɛ, kɛ mɔ be ti Klist i sonja kpa mun ti’n, maan be si kɛ bé wún ɲrɛnnɛn. Naan ɔ fataman kɛ pɔɔ nun tranlɛ’n, ɔ nin be klun klo ninnge’m be yolɛ’n yɛ ɔ yo be cinnjin ɔn. (2 Tim. 2:3, 4) Kɛ mɔ ɲrɛnnɛn su wa tɔ mɛn tɛ nga su ti’n, ɔ ti cinnjin kɛ e lafi Ɲanmiɛn su kpa naan e ɲin w’a kwla trɛn i sulɛ’n su titi. (2 Kor. 4:18; 5:7) Amun nian video Marchons par la foi, non par la vue. (An wɔ jw.org/fr su. An tin PUBLICATIONS su. I sin’n, an tin VIDEO su.) Kɛ amún nían’n, wafa nga aɲanbeun ninnge’m be klolɛ’n kacili kɛ aya sa m’ɔ trali Naamu nin Abitali mɔ i ti’n be wuli’n, amun bu i akunndan. I sin’n, amun tɛ kosan yɛ’m be su.

(1) ?Klistfuɛ klikli’m be blɛ su’n, ngue yɛle ‘Tete Like [...] ng’ɔ o Nyanmiɛn lika nun’n’? ?Ajalɛ benin yɛ ɔ yoli cinnjin kɛ Klistfuɛ nga be o Zerizalɛmu lɔ’n be fa ɔ? (Mat. 24:15, 16) (2) ?Ngue ti yɛ ɔ fata kɛ be lafi Ɲanmiɛn su kpa naan b’a kwla jaso klɔ sɔ’n su ɔ? (3) ?Ngue yɛ ɔ fata kɛ be tra be awlɛn be yo naan b’a kwla fin klɔ’n nun b’a fite ɔ? (4) ?Ngue ti yɛ Naamu nin Abitali be sisili be bo ɔ? (Mat. 24:17, 18) (5) ?Kɛ Rasɛli fín Zerizalɛmu klɔ’n nun fíte’n, sa uflɛ benin yɛ ɔ tɛnndɛnnin i ɲrun ɔn? (Mat. 10:34-37; Mar. 10:29, 30) (6) ?Zoova i su m’ɔ fata kɛ e lafi’n, nin e wla m’ɔ fata kɛ e fa guɛ i su’n, i su ajalɛ kpa benin yɛ Etani kleli ɔ? (7) ?Ngue yɛ ɔ yoli kekle mannin Klistfuɛ mun Pela lɔ ɔ? (8) ?Wafa sɛ blɛblɛblɛ Naamu nin Abitali be yacili Ɲanmiɛn i su lafilɛ ɔ? (9) ?Wafa sɛ yɛ Zoova niannin Klistfuɛ nga be o Pela lɔ’n, be lika ɔ? (Mat. 6:33; 1 Tim. 6:6-8) (10) ?Blɛ kekle nga nun’n, wafa sɛ yɛ e kwla nian Abraamu nin Sara be ajalɛ’n su ɔ? (Ebr. 11:8-10) (11) ?Ngue ti yɛ Naamu nin Abitali be buli i kɛ be kwla sa be sin Zerizalɛmu lɔ ɔ? ?Ngue ti yɛ akunndan sɔ mɔ be buli’n, ɔ timan kpa ɔ? (Lik 21:21) (12) ?Kɛ Naamu nin Abitali be juli Zerizalɛmu lɔ’n, wafa sɛ yɛ klɔ’n w’a yo ɔ? (13) ?Ka naan mɛn’n i awieliɛ’n wá jú’n, ngue ti yɛ dɔ nga su’n, ɔ fata kɛ e mian e ɲin e wla e Ɲanmiɛn su lafilɛ’n i bo ase kpa ɔ?—Lik 17:31, 32; 21:34-36.

Sran ng’ɔ lafi Ɲanmiɛn su nanti’n, (1) ɔ fɛ i wla gua ndɛ nga Zoova kan’n su, (2) like kwlaa ng’ɔ́ yó nun’n, ɔ nanti ndɛ nga Zoova kan’n su, yɛ (3) ɔ kle kɛ ɔ klo Zoova i sulɛ tra aɲanbeun ninnge mun. Maan e fua kpa kɛ, é láfi Ɲanmiɛn su é nánti titi. Yɛ maan e lafi su kɛ: “Mɛn’n [...] wíe, sanngɛ sran ng’ɔ yo Nyanmiɛn klun sa’n, ɔ́ ká lɛ tititi.”—1 Zan 2:17.