Zoova nin i nvle’n be ti’n, Ɛstɛli bɔbɔ i nguan’n w’a lomɛn i

Kɛ Ɛstɛli kplí Zoova nin i nvle’n be ti’n, ɔ yoli yakpafuɛ, kpɛkun w’a bumɛn i ngunmin i wun akunndan.

8:3-5, 9

• Ɛstɛli nin Mardose be liɛ’n b’a fite nun. Sanngɛ mmla nga Aman kpɛli i kɛ be nunnun Zuifu’m be ngba’n, sran’m b’a fa sinsin nvle’n i lika kwlaa nun.

• Ɛstɛli fɛli i nguan sieli wie nuan ekun. Yɛle kɛ famiɛn’n w’a yiɛmɛn i, sanngɛ ɔ ko wunnin i wun. Ɔ sunnin i nvle’n nunfuɛ’m be ti, kpɛkun ɔ srɛli famiɛn’n kɛ ɔ nunnun mmla tɛ sɔ’n.

• Mmla nga famiɛn’n i sa ti nzɔliɛ o su’n, be kwlá kacimɛn i. I sɔ’n ti’n, famiɛn’n mannin Ɛstɛli nin Mardose be atin kɛ be kpɛ mmla uflɛ.

Zoova maan i nvle’n nunfuɛ’m be kwlali dan kpa

8:10-14, 17

• Be wa klɛli fluwa uflɛ. Fluwa sɔ’n man Zuifu’m be atin kɛ be kpli be ti.

• Nnɛn kpanngɔ fufuɛ’m be fali fluwa’n sinsinnin nvle’n i lika kwlakwla, yɛ Zuifu’m be buabuali be wun sieli.

• Sran kaka be wunnin i kɛ Ɲanmiɛn jin Zuifu’m be sin. I ti’n, be wa kacili Zuifu.