Siesie amun afiɛn ka: ?Wafa sɛ?

Maan ɔ yo wɔ kɛ Zezi blɛ su’n, a tran Galile lɔ sa. W’a ɔ kpata bo tranlɛ cɛn dilɛ Zerizalɛmun lɔ. Ɔ wiengu Ɲanmiɛn sufuɛ mɔ be fin mmuammua kpa’n, b’a yi klɔ’n sa piɛ. A klo kɛ á mán Zoova i like. Ɔ maan kɛ á kɔ́’n, ɔ boli wo ɔ sa nun. W’a sinsin sran kaka sɔ’m be afiɛn lele w’a ju Ɲanmiɛn i sua’n i wun lɛ. Sran nga be tian lɛ’n, be kwlaman be ka. Be kusu, be klo kɛ bé yí tɛ bé mán Ɲanmiɛn. Siɛn’n, w’a ju kɛ a fa ɔ boli’n man Ɲanmiɛn ɲrun jranfuɛ mun. Kpɛkun o, ɔ wla w’a kpɛn su kɛ ɔ wun ndɛ o ɔ niaan wie klun! ?Sran kaka sɔ’m be nun’n, sɛ ɔ o bue benin su o? ?Sɛ kusu ɔ o klɔ’n nun lɔ lika wie o? A siman. Zezi kle wɔ like ng’ɔ fata kɛ a yo’n. (Kanngan Matie 5:24 nun.) ?Wafa sɛ yɛ a nin ɔ niaan mɔ a loli i ngasi’n, amun kwla siesie amun afiɛn kɛ Zezi fa kannin’n sa-ɔ? Kuku nɲɔn nga be o ja gua lɛ’n be nun’n, kle ajalɛ ng’ɔ ti kpafuɛ’n.

Ɔ FATA KƐ...

• a bu i akunndan nian. Sɛ nán ndɛ ngbɛnngbɛn wie ti yɛ ɔ niaan’n fali ya’n, i liɛ’n a nin i kwla koko ndɛ sɔ’n i su yalɛ.

• a yo naan ɔ niaan’n kaci akunndan ng’ɔ bu’n. Afin a wun i kɛ ɔ fa ya ndɛndɛ annzɛ kusu i ndɛ yoman fɛ wie.

• a sie ɔ su kpa ɔ niaan’n i nuan bo. Yɛ kannzɛ a wunman ndɛ ng’ɔ kan’n i wlɛ kpa’n, sanngɛ ndɛ m’ɔ yo i ya’n ti’n, annzɛ saɛ ba nga like nga a yoli’n ɔ kpɛli’n ti’n, ɔ fata kɛ a tu ɔ klun kpɛtɛ i.

Ɔ FATA KƐ Ɔ NIAAN’N...

• kan like nga a yoli i’n, i ndɛ kle aniaan onga mun naan be nun wie’m be jrɛn i sin.

• ɔ ijɔ wɔ kpa liɛ su. Ɔ yiyi like kwlaa nga a yoli’n m’ɔ loli i ngasi’n i nun kle wɔ naan a se i kɛ ɔ ndɛ yoman fɛ.

• wun i wlɛ kɛ a kannin ɔ wun ase yɛ a trali wɔ awlɛn i ti yɛ w’a ɔ i wun wunlɛ-ɔ, naan ɔ yaci ɔ wun sa cɛ wɔ klun ufue su.

Kɛ é sú Ɲanmiɛn andɛ’n, e faman nnɛn e yiman tɛ kun. ?Kannzɛ ɔ ti sɔ’n, wafa sɛ yɛ Zezi kleli kɛ, kɛ e nin e niaan’n e afiɛn sɛ’n i lɛ nun yɛ Ɲanmiɛn klun jɔ sulɛ nga e su i’n, i su-ɔ?