Maan e bo jasin fɛ’n i kpa tra laa: Maan e kle like suanfuɛ mun wafa nga be kwla siesie be wun’n

?NGUE TI YƐ Ɔ TI CINNJIN-ƆN? Kɛ be nga e kle be Biblu’n nun like’n be siesie be wun’n, be kwla wun like nga e kle be’n i wlɛ ndɛndɛ kpɛkun be wla fiman su. Kɛ bé wún ndɛ’m be wlɛ mɔ be wla fiman su’n, nn bé kɔ́ be ɲrun Ɲanmiɛn sulɛ’n nun. Kɛ be ko yo be batɛmun’n, ɔ fata kɛ be siesie be wun ka naan b’a wɔ aɲia’m be bo ɔ nin jasin fɛ bolɛ. Sɛ be yo sɔ’n, i sɔ’n úka be naan ‘b’a tran b’a minndɛ.’ (Mt 25:13) Sɛ be si wafa ng’ɔ fata kɛ be suan like’n, naan be suan like kpa titi’n, i sɔ’n yó be ye tititi. Ɔ maan i bo bolɛ nun’n, ɔ fata kɛ e uka like suanfuɛ mun naan be wun siesielɛ’n kaci be nzuɛn.

?WAFA SƐ YƐ É YÓ I SƆ-Ɔ?

• 

  Maan e kle like suanfuɛ’n i ajalɛ kpa. (Rɔ 2:21) Kɛ é síesíe e wun naan y’a ko kle sran’n i like’n, maan e bu i akunndan. (km 11/15 3) Wafa nga e jajali ndɛ’m be bo e fluwa liɛ nun’n maan e fa kle i.

• 

  Wlɛ i fanngan naan ɔ siesie i wun. Kɛ like klelɛ’n ko taka’n, kle i kɛ i wun siesielɛ’n wo Biblu’n nun like suanlɛ’n nun wie. Kpɛkun kan i su ye ng’ɔ́ ɲɛ́n i’n i ndɛ kle i. Ajalɛ trele ng’ɔ kwla fa su naan w’a ɲan blɛ w’a siesie i wun’n, kle i. Jasin bofuɛ wie mun’n, kɛ be nin like suanfuɛ’n bé súan like’n be fa be fluwa liɛ’n mɔ be jajali i nun ndɛ’m be bo’n, be mɛn i. I liɛ’n, like suanfuɛ’n ɔ́ wún i wlɛ kɛ sɛ ɔ siesie i wun’n, ɔ́ ɲán su ye. Sɛ ɔ siesie i wun’n, yo i mo.

• Kle i wafa ng’ɔ kwla siesie i wun’n. Jasin bofuɛ wie’m be liɛ’n, kpɛ klikli nga bé klé sran kun i Biblu’n nun like’n, be fa blɛ wunmuan’n, be kle i wafa ng’ɔ kwla siesie i wun’n.