Maan e bo jasin fɛ’n i kpa tra laa: “Be kwlaa nga be nin nguan m’ɔ leman awieliɛ’n fata’n,” maan e uka be naan be kaci Zezi i sɔnnzɔnfuɛ

?NGUE TI YƐ Ɔ TI CINNJIN-ƆN?: Kɛ e kan ndɛ nanwlɛ’n e kle be nga “be nin nguan m’ɔ leman awieliɛ’n fata’n,” ɔ ti kɛ like yɛ y’a luɛ i be awlɛn’n nun sa-ɔ. Zoova yo maan like nga e luali’n, ɔ yo kpa. (Yol 13:48; 1Ko 3:7) Be nga be nanti like nga be suan’n su’n, be su yɛ e fa e ɲin e sie-ɔ. Kɛ e yo sɔ’n, e kle kɛ e nin Zoova yɛ e di junman-ɔn. (1Ko 9:26) Ɔ fata kɛ Biblu’n nun like suanfuɛ’m be wun i wlɛ kɛ, sran nga i waan ɔ́ fíte nun’n, ɔ ti cinnjin kɛ be yo i batɛmun naan ɔ kaci Klisifuɛ. (1Pi 3:21) E uka be naan be kaci Zezi i sɔnnzɔnfuɛ. I yolɛ nun’n, e kle be like naan be kaci be nzuɛn’n, naan be bo jasin fɛ’n, yɛ be kle sran’m be like, kpɛkun be fa be wun man Zoova.—Mt 28:19, 20.

?WAFA SƐ YƐ É YÓ I SƆ-Ɔ?:

• Be nga a kle be Biblu’n nun like’n, kpɛn be wla kɛ, kɛ ɔ ko yo naan b’a “si” Zoova naan kusu Zoova i klun w’a jɔ be wun’n, i ti yɛ a nin be suan like-ɔ.—Zn 17:3

• Uka be naan be wɔ be ɲrun Ɲanmiɛn sulɛ nun. Yɛle kɛ uka be naan be jran sa nga be tanndan be ɲrun’n, be ɲrun kekle. Sa sɔ’m be nun wie yɛle nzuɛn tɛtɛ mun nin janvuɛ tɛ mun.

• Wla be yakpa titi, yɛ wla be fanngan titi. Kɛ be nin a yoman be batɛmun’n, yo i sɔ. Kɛ be ko yo be batɛmun kusu’n, yo i sɔ titi.—Yol 14:22

AN NIAN VIDEO NGA BE FLƐ I KƐ ƝANMIƐN ZOOVA ÚKA-Ɔ. I SIN’N, AN TƐ KOSAN NGA’M BE SU:

• ?Sa benin wie’m be ti yɛ srɛ kwla kun sran kun kɛ ɔ fɛ i wun man Zoova naan be yo i batɛmun-ɔn?

• ?Wafa sɛ yɛ asɔnun kpɛnngbɛn’m be kwla uka Biblu’n nun like suanfuɛ mun naan b’a wɔ be ɲrun Ɲanmiɛn sulɛ nun-ɔn?

• ?Zoova i su like benin yɛ Ezai 41:10 kle e-ɔ?

• ?Kannzɛ bɔbɔ fɔ o e nun’n, nzuɛn kpakpa benin mun yɛ be kwla uka e naan y’a su Zoova kɛ ɔ nin i fata’n sa-ɔ?