?NGUE YƐ Ɔ KWLA YO MAAN SRAN KPƆLƐ’N WIE-Ɔ?

2 | Nán tu ɔ klunngbɔ

Ndɛ nga Biblu’n kan’n:

“Sɛ sran yo amun tɛ’n, nán amun yo i wie. […] Sɛ amun ɲɛn i wun atin’n, amun yo like kwlaa nga amun kwla yo’n, naan amun nin sran kwlaa be tran klanman. Nán amun tu amun klunngbɔ, […] afin be klɛli i kɛ: ‘“Min yɛ n tu klunngbɔ-ɔ. Min yɛ ń túa be kalɛ-ɔ.” Ndɛ nga Zoova kan’n yɛ ɔ o lɛ-ɔ.’”—RƆMUNFUƐ MUN 12:17-19

Like nga ndɛ sɔ’n kle e’n:

Kɛ sran kun yo e like’n e kwla fɛ i wun ya sanngɛ Ɲanmiɛn kloman kɛ e tu e klunngbɔ. I kpa bɔbɔ’n, ɔ wla e fanngan kɛ e tra e awlɛn afin ɔ cɛ kan’n ɔ́ núnnún sa tɛ’n kwlaa.—Jue Mun 37:7, 10.

Like nga a kwla yo’n:

Kɛ klɔ sran mɔ fɔ o be nun’n be tu be klunngbɔ’n, ɔ yo maan sran kaka be kpɔ be wiengu mun. I ti’n sɛ sran wie lo ɔ ngasi annzɛ ɔ yo ɔ like uflɛ wie’n, nán tu ɔ klunngbɔ. Tra ɔ awlɛn yɛ tɛ i su amanniɛn su. Ɔ ju wie’n, sɛ w’a tɛman su’n ɔ ti kpa. (Nyanndra Mun 19:11) Wie liɛ kusu’n, a kwla kan sa ng’ɔ juli’n i ndɛ. Sɛ be yo ɔ like yaya wie’n, a kwla ko kan kle polisie mun annzɛ awa’n i janunfuɛ mun, annzɛ kusu a kwla yaci cɛ.

Klunngbɔ tulɛ’n yoman sa fi ye

?Yɛ sɛ a wunman wafa nga a kwla siesie ndɛ’n amanniɛn su’n nin? ?Annzɛ kusu a yoli like kwlaa nga a kwla yo naan w’a siesie sa sɔ’n sanngɛ w’a yoman ye’n nin? Nán tu ɔ klunngbɔ. Ɔ timɛn i ti’n ndɛ’n yó tɛ tra laa’n. Sanngɛ sɛ w’a tuman ɔ klunngbɔ’n ɔ́ yó maan sran uflɛ su kpɔmɛn i wiengu. A kwla lafi wafa nga Ɲanmiɛn siesie sa mun’n su. “Fa ɔ wla’n guɛ i su, yɛ ɔ́ yó ng’ɔ nin wɔ fata’n ɔ́ mán wɔ.”—Jue Mun 37:3-5.

Sran kun i su ndɛ—ADRIANIN

Ɔ yacili klunngbɔ tulɛ’n

I nun mɔ Adrianin ti gbanflɛn kan’n, ɔ yo nzaje sa mun yɛ sɛ sran kun yo i like’n saan ɔ́ yí mɛ́n i. Ɔ seli kɛ: “Kpɛ sunman’n e nin sran mun e toto e wun tui. Yɛ wie liɛ’n tui mma’m be bo min. Ɔ maan kpɛ sunman’n sɛ a wun min mɔ n la lɛ’n nin min wun mmoja’n á sé kɛ m’an wu.”

Kɛ Adrianin ɲannin afuɛ blu-nin-nsiɛn’n yɛ ɔ boli Biblu’n nun like suanlɛ bo-ɔ. Ɔ kan guali su kɛ: “Kɛ ń súan Biblu’n nun like’n ń kɔ́’n n ma wunnin i wlɛ kɛ ɔ fata kɛ n kaci min nzuɛn’n.” Ɔ wunnin i wlɛ kɛ ɔ fata kɛ ɔ wla sran kpɔlɛ’n nin nzaje sa’m be yolɛ’n be ase. Ndɛ ng’ɔ o Rɔmunfuɛ Mun 12:17-19 nun’n ukɛli i kpa naan w’a wla klunngbɔ tulɛ’n i ase. Ɔ seli kɛ: “N ma lafili su kɛ Zoova wá núnnún klunwi sa’m be kwlaa blɛ ng’ɔ sieli’n su. Blɛblɛblɛ n yacili nzaje sa’m be yolɛ.”

Cɛn kun kɔnguɛ’n, gbanflɛn wie mɔ laa be nin Adrianin be di utre’n, be tɔli i su. Yɛ be su kpɛn’n kpɛnnin i su kɛ: “Bla maan e tu!” Adrianin dili nanwlɛ kɛ: “N klun lɔ n kunndɛli kɛ e nin i é tú.” Sanngɛ Adrianin w’a tɛmɛn i su. Ɔ srɛli Zoova, kpɛkun ɔ jasoli be wun lɛ.

Adrianin kan gua su kɛ: “Kɛ lika cɛnnin’n, e nin be su kpɛn sɔ’n e yiali. Sanngɛ blɛ sɔ nun’n i kunngba yɛ ɔ wo-ɔ. Kɛ n wunnin i min awlɛn’n beli min klun yɛ ɔ yo n kɛ e nin i e ko tu sa. Sanngɛ n srɛli Zoova kɛ ɔ uka min naan n tra min awlɛn. N buli i kɛ i kusu wá kúnndɛ kɛ e tu, sanngɛ kɛ ɔ wunngeli min wun lɛ’n ɔ seli n kɛ: ‘Yaci sa nga n yoli wɔ anunman’n cɛ min. N klo kɛ ń yó kɛ wɔ sa. N klo kɛ ń súan Biblu’n nun like wie.’ Nanwlɛ, kɛ n kwla trali min awlɛn’n ɔ yoli min fɛ dan! I sɔ’n mɔ n yoli ti’n n ma boli i Biblu’n nun like klelɛ bo.”