?Ń yó sɛ naan m’an kaci Ɲanmiɛn i janvuɛ?

Ndɛ nga Biblu’n kan’n

Sɛ a kunndɛ kɛ á káci Ɲanmiɛn i janvuɛ’n, ɔ fata kɛ a suɛn i su like kpa yɛ a yo ninnge ng’ɔ klo be’n. Sɛ a yo sɔ’n, “ɔ́ fɛ́ i wun mántan” wɔ. (Zaki 4:8) Biblu’n waan “ɔ nin e nun wie fi nunman mmua.”—Sa Nga Be Yoli’n 17:27.

• Ninnge ng’ɔ fata kɛ a yo be’n

• Ɲanmiɛn i silɛ’n i su ndɛ wie m’ɔ timan su’n

Ninnge ng’ɔ fata kɛ a yo be’n

Kanngan Biblu’n nun

• Biblu’n se kɛ: “Ndɛ kwlaa ng’ɔ o Ɲanmiɛn Ndɛ’n nun’n, Ɲanmiɛn yɛ maan be klɛli-ɔ.”—2 Timote 3:16.

• Ndɛ sɔ’n kle kɛ: Ɲanmiɛn yɛ maan be klɛli Biblu’n niɔn. Ɔ fɛli i akunndan’n wlali sran wie’m be ti nun yɛ be klɛli-ɔ. Fluwa cinnjin sɔ’n nun’n, Ɲanmiɛn kannin like ng’ɔ sunnzun i klɔ sran’m be lika’n i ndɛ. Asa’n, ɔ kannin i sran wafa ng’ɔ ti’n i ndɛ wie. I wie yɛle kɛ ɔ klo sran, ɔ yo sa nuan su sɛsɛ, yɛ ɔ si aunnvɔɛ.—Ezipti Lɔ Tulɛ 34:6; Mmla’n 32:4.

• Like ng’ɔ fata kɛ a yo’n: Kanngan Biblu’n nun cɛn kwlakwla. (Zozie 1:8) Kɛ á kánngan nun’n, bu su akunndan. Usa ɔ wun kɛ: ‘?Ngue yɛ ndɛ sɔ’n kle min Ɲanmiɛn su-ɔ?’—Jue Mun 77:12.

  Sɛ a klo’n, a kwla kanngan Zeremin 29:11 nun. Kpɛkun usa ɔ wun kɛ: ‘?Ɲanmiɛn kunndɛ kɛ min liɛ yo sɛ? ?Ɔ kunndɛ kɛ n fɛ annzɛ n di aklunjɔɛ? ?Ɲanmiɛn kunndɛ kɛ ɔ́ klé min nun, annzɛ ɔ kunndɛ kɛ min liɛ yo ye?’

Fa ɔ ɲin sie i ninnge nga Ɲanmiɛn yili be’n be su

• Biblu’n se kɛ: “Ninnge nga [Ɲanmiɛn] yili be’n be ti’n, sran’m be kwla si i nzuɛn’n.”—Rɔmunfuɛ Mun 1:20.

• Ndɛ sɔ’n kle kɛ: Sɛ sran kun yi mannzin kun m’ɔ uka sran’m be kpa’n, i sɔ’n kle kɛ ɔ si ngwlɛlɛ kpa. I wafa kunngba’n, ninnge nga Ɲanmiɛn yili be mɔ e ɲin ta be’n, be kle e sran wafa ng’ɔ ti’n. I wie yɛle kɛ wafa nga e ti nun miɛn’n fa di junman’n, ɔ kle e kɛ Ɲanmiɛn si ngwlɛlɛ dan. Asa’n, wafa nga wia’n nin nzraama wie mun be kpaja’n, ɔ kle e kɛ Ɲanmiɛn i tinmin’n cɛnnin.—Jue Mun 104:24; Ezai 40:26.

• Like ng’ɔ fata kɛ a yo’n: Fa ɔ ɲin sie i ninnge nga Ɲanmiɛn yili be’n be su kpa. Kɛ á yó sɔ’n, usa ɔ wun kɛ: ‘?Ninnge nglanmannglanman nga Ɲanmiɛn yili be lɛ’n, ngue yɛ be kle min i bɔbɔ su-ɔ?’a Sanngɛ ninnge nga Ɲanmiɛn yili be’n be kwlá kleman e ninnge ngba Ɲanmiɛn su. I sɔ’n ti yɛ Biblu’n wo lɛ’n niɔn.

Fa Ɲanmiɛn i dunman’n flɛ i

• Biblu’n se kɛ: “Ń sɛ́sɛ́ i afin ɔ si min dunman’n. Ɔ́ flɛ́ min, yɛ ń tɛ́ i su.”—Jue Mun 91:14, 15.

• Ndɛ sɔ’n kle kɛ: Ɲanmiɛn mɔ i dunman’n yɛle Zoova’n, ɔ fɛ i ɲin sie i be nga be si i dunman’n mɔ be fɛ i dunman sɔ’n be flɛ i aɲinyiɛ su’n be su kpa.b (Jue Mun 83:18; Malasi 3:16) Ɲanmiɛn seli kɛ: “N ti Zoova. Min dunman’n yɛ ɔ o lɛ-ɔ.” (Ezai 42:8) Sɛ Ɲanmiɛn boli i dunman’n kleli e’n, ɔ kle kɛ ɔ kunndɛ kɛ e si i.

• Like ng’ɔ fata kɛ a yo’n: Kɛ á kán ndɛ klé Zoova annzɛ á kɛ́n i ndɛ klé sran kun’n, bo i dunman Zoova’n.

Srɛ Zoova

• Biblu’n se kɛ: “Zoova o be kwlaa nga be kpan flɛ i’n be wun koko.”—Jue Mun 145:18.

• Ndɛ sɔ’n kle kɛ: Be nga be lafi Zoova su mɔ be srɛ i’n, ɔ fɛ i wun mantan be. Ɲanmiɛn srɛlɛ’n, ɔ o Ɲanmiɛn i sulɛ’n nun wie. Yɛ kɛ e srɛ i’n, e kle kɛ e ɲin yi i dan.

• Like ng’ɔ fata kɛ a yo’n: Srɛ Ɲanmiɛn titi. (1 Tesalonikifuɛ Mun 5:17) Kan ɔ su sa’n ɔ nin wafa nga ɔ wun yo wɔ’n, i ndɛ kle i.—Jue Mun 62:8.c

Lafi Ɲanmiɛn su

• Biblu’n se kɛ: “Sran ng’ɔ lafiman Ɲanmiɛn su’n, Ɲanmiɛn klun jɔmɛn i wun mlɔnmlɔn.”—Ebre Mun 11:6.

• Ndɛ sɔ’n kle kɛ: Sɛ e waan e nin Ɲanmiɛn e afiɛn mantan’n, ɔ fata kɛ e lafi i su. Biblu’n kle kɛ, kɛ be se kɛ be lafi Ɲanmiɛn su’n, nɛ́n i yɛle kɛ be lafi su kɛ ɔ o lɛ ngbɛn’n. Sanngɛ ɔ fata kɛ e fa e wla kwlaa e guɛ i su wie. Kpɛkun e lafi nda ng’ɔ tali be’n ɔ nin i mmla’m be su. ?Sɛ e lafiman sran kun su’n, e kwla trɛ i janvuɛ?

• Like ng’ɔ fata kɛ a yo’n: Sɛ ɔ waan á láfi Ɲanmiɛn su kpa’n, ɔ fata kɛ a si i kpa. (Rɔmunfuɛ Mun 10:17) Ɔ maan suan Biblu’n nun like naan w’a si i kpa, naan w’a lafi i bɔbɔ nin i mmla’m be su wie. Zoova i Lalofuɛ’m be kwla uka wɔ naan w’a suan Biblu’n nun like.d

Yo ninnge nga Ɲanmiɛn klo be’n

• Biblu’n se kɛ: “Ɲanmiɛn i klolɛ’n yɛle kɛ e fɛ i mmla’m be su.”—1 Zan 5:3.

• Ndɛ sɔ’n kle kɛ: Be nga be klo Zoova’n, be mian be ɲin be fɛ i mmla’m be su. Zoova kusu fɛ i wun mantan be.

• Like ng’ɔ fata kɛ a yo’n: Kɛ á súan Biblu’n nun like’n, sie like nga Ɲanmiɛn klo i’n ɔ nin ng’ɔ klomɛn i’n be nzɔliɛ. Usa ɔ wun kɛ: ‘?Like benin yɛ ɔ fata kɛ n yaci i yolɛ naan min Yifuɛ’n i klun w’a jɔ min wun-ɔn?’—1 Tesalonikifuɛ Mun 4:1.

Sɛ a fa Ɲanmiɛn i mmla’m be su’n, á dí aklunjɔɛ

• Biblu’n se kɛ: “Amun sa Zoova be nian naan amun wun kɛ ɔ ti kpa.”—Jue Mun 34:8.

• Ndɛ sɔ’n kle kɛ: Ɲanmiɛn kunndɛ kɛ a sɛ i nian naan a wun kɛ ɔ ti kpa. Kɛ ɔ bɔbɔ á wún kɛ Ɲanmiɛn klo wɔ naan ɔ uka wɔ’n, á fá ɔ wun mɛ́ntɛn i kpa trá laa’n.

• Like ng’ɔ fata kɛ a yo’n: Sɛ a kanngan Biblu’n nun’n, fɛ i nun ndɛ’n su. I liɛ’n, á ɲán su ye. (Ezai 48:17, 18) Asa’n, be nga Ɲanmiɛn fanngan nun’n, be wlali be nzuɛn tɛ wie’m be ase mɔ be nin be awlofuɛ’m be di aklunjɔɛ’n, fa ɔ ɲin sie be su.e

Ɲanmiɛn i silɛ’n i su ndɛ wie mɔ be timan su’n

Sran wie’m be waan: E kwlá siman Ɲanmiɛn, afin sran fi kwlá simɛn i.

Ndɛ ng’ɔ ti nanwlɛ’n: Ɲanmiɛn i su ndɛ wie’m be o lɛ’n, be wlɛ wunlɛ kwla yo kekle kan. Ɔ nin i sɛ ngba’n e kwla si Ɲanmiɛn. Afin Biblu’n se kɛ ɔ ti cinnjin kɛ e si Ɲanmiɛn naan y’a kwla ɲan nguan m’ɔ leman awieliɛ’n. (Zan 17:3) Biblu’n kan Ɲanmiɛn nin i klun sa’n ɔ nin i mmla’m be ndɛ. Yɛ e kwla wun ndɛ sɔ mɔ Biblu’n kan’n, be wlɛ. (Ezai 45:18, 19; 1 Timote 2:4) Kɛ nga e dun mmua kannin’n sa’n, Biblu’n bo Ɲanmiɛn i dunman kle e. (Jue Mun 83:18) Ɔ maan e kwla si Ɲanmiɛn kpɛkun e kaci i janvuɛ.—Zaki 4:8.