?Rezo sosio’m be su saci ɔ wa’n?—Biblu’n nun ndɛ’n kwla uka siɛ nin niɛn mun

Be flɛ dɔɔtrɔ bian kun kɛ Vivɛki Mɛɛfi. Ɔ kannin ndɛ kun zronali kun nun. Ɔ seli kɛ: “Ndɛ kun o lɛ’n, ɔ fata kɛ ɔ yo sran’m be cinnjin kpa. Yɛle kɛ le nɲɔn nun’n, gbanflɛn nin talua’m be wla bo be wun dan. Yɛ sa nga ti yɛ be wun yo be sɔ’n, i dan lika fin rezo sosio mun.”—New York Times, afuɛ 2024, Zuɛn i le 17 su.

?Ngue yɛ siɛ nin niɛn’m be kwla yo naan rezo sosio’m b’a saciman be mma mun-ɔn? Afɔtuɛ wie’m be o Biblu’n nun mɔ be kwla uka be-ɔ.

Ninnge nga siɛ nin niɛn’m be kwla yo’n

Biblu’n nun ndɛ wie mun yɛ:

“Ngwlɛlɛfuɛ’n […] ɔ niɛn i ja kwlaa ng’ɔ tu’n su.”—Ɲanndra Mun 14:15.

Rezo sosio’m be kwla saci ɔ wa’n. I sɔ’n ti’n, nán kpli mɛn i atin kɛ ɔ wɔ rezo sosio’m be su. Kwlaa naan w’a mɛn i atin’n, bu i akunndan. A kwla usa ɔ wun kɛ: ‘?Sɛ n mɛn i atin’n, ɔ su fɛmɛn i blɛ’n i ngba kɔman rezo sosio’m be su? ?Ɔ́ níɛn i wun su naan ɔ nin sran tɛ mun b’a sanman nun? ?Ɔ́ níɛn i wun su naan w’a nianman ninnge tɛtɛ mun?’

Sɛ a klo kɛ á sí ndɛ sɔ’n nun kpa ekun’n, kanngan ndɛ nga’m be nun: “Mon enfant devrait-il utiliser les réseaux sociaux ?” ɔ nin “Protégez votre adolescent des dangers des réseaux sociaux.”

“An fa amun blɛ’n fa yo ninnge nga be ti cinnjin’n.”—Efɛzifuɛ Mun 5:16.

Sɛ w’a man ɔ wa’n i atin kɛ ɔ wɔ rezo sosio’m be su’n, klekle i ninnge nga ɔ le atin yo be rezo sosio’m be su, ɔ nin nga ɔ leman atin yoman be’n. Sɛ ɔ fa ndɛ nga a kan kle i’n su’n, wafa nga i sɔ’n sɛ́sɛ́ i’n, yiyi nun kle i. Sɛ a sie i nzɔliɛ kɛ rezo sosio’m be ti’n, i nzuɛn’n su kaci’n, fa ajalɛ ndɛndɛ. I wie yɛle kɛ a kwla se i kɛ a su mɛnmɛn i atin kɛ ɔ wɔ rezo sosio’m be su le nɲɔn kun. Annzɛ á kpɛ́ blɛ nga a mɛn i atin kɛ ɔ wɔ rezo sosio’m be su’n, i su kan. Annzɛ a kwla fa ajalɛ uflɛ.

Fa video nga be flɛ i Nian ɔ wun su ɛntɛnɛti su yalɛ kokolɛ’n nun uka ɔ wa’n naan ɔ wun sa nga ti yɛ kɛ ɔ kɔ rezo sosio’m be su’n, ɔ fataman kɛ ɔ yo ninnge wie mun’n.

Fa ɔ ɲin sie i ndɛ nga mun be su wie

Biblu’n waan “mɛn’n i awieliɛ blɛ nun’n, lika’n wá yó kekle kpa.” (2 Timote 3:1-5) Blɛ sɔ’n nun kusu yɛ e o-ɔ. Yɛ blɛ kekle sɔ’n nun’n, Biblu’n nun ndɛ’n kwla uka e naan y’a wun e su sa’m be trawlɛ. Ndɛ ablaɔn (20) tra su be kwla uka siɛ nin niɛn nin be mma mun. Be o ndɛ akpasua nga nun.