?Blɛ benin nun yɛ be klɛli Zezi i su ndɛ’n niɔn?

Ndɛ nga Biblu’n kan’n

Akoto Zan kannin Zezi i su ndɛ ng’ɔ klɛli’n i ndɛ seli kɛ: “Sran ng’ɔ wunnin sa sɔ’n nun’n, yɛ ɔ kɛnnin i ndɛ-ɔ. Ndɛ ng’ɔ kannin’n kusu ti nanwlɛ. Ɔ si kɛ ndɛ ng’ɔ kan’n ti nanwlɛ, yɛ ɔ kannin sa sɔ’m be ndɛ naan amun kusu amun lafi su wie.”—Zan 19:35.

E kwla lafi Zezi i su ndɛ nga Matie nin Marki nin Liki nin Zan be klɛli’n su. Afin kɛ bé klɛ́ ndɛ sɔ’n nn be nga be wunnin sa nga Zezi yoli be’n be nun’n, be nun sunman be ɲin te o su. Fluwa sifuɛ wie’m be waan kɛ be kunnin Zezi m’ɔ dili afuɛ mɔcuɛ cɛ’n, yɛle kɛ afuɛ 41 nun yɛ Matie klɛli Zezi i su ndɛ’n niɔn. Wie’m be liɛ’n be waan kɛ afuɛ sɔ’n sinnin m’ɔ cɛli kan’n yɛ ɔ klɛli-ɔ. Sanngɛ be kwlaa be nuan sɛ su kɛ be wieli Ɲanmiɛn Ndɛ nga be klɛli i Glɛki nun’n i nun fluwa’m be klɛ ka naan afuɛ 100 w’a ju.

Kɛ Zezi bali asiɛ’n su wa’n, be nga be wunnin i, mɔ be wunnin i wulɛ’n nun ɔ nin i nguan cɛnlɛ’n nun’n, be kɛnngɛnnin i su ndɛ nga i akoto nnan’m be klɛli’n nun wie. Yɛ sɛ ɔ ti kɛ i nun ndɛ wie timan su’n, nn be kannin. Be flɛ fluwa sifuɛ dan kun kɛ Flederiki Blusu. Ɔ seli kɛ: “Like ng’ɔ kle kɛ Zezi i su ndɛ nga i akoto’m be klɛli’n ti nanwlɛ’n, i kun yɛle kɛ, kɛ bé kán Zezi i ndɛ’n be seman ngbɛn kɛ: ‘E si kɛ ɔ yoli sɔ.’ Sanngɛ be kan gua su kɛ: ‘Amun bɔbɔ amun si sɔ kpa.’ (Sa Nga Be Yoli’n 2:22).”