?Mma tolɛ sika su’n ti tɛ?

Ndɛ nga Biblu’n kan’n

Kannzɛ Biblu’n kanman mma tolɛ sika su i ndɛ trele sa’n, sanngɛ i nun ndɛ’m be uka e naan y’a si wafa nga Ɲanmiɛn bu i sɔ liɛ’n. Yɛle kɛ Ɲanmiɛn ɲrun’n, mma tolɛ sika su’n ti tɛ.—Efɛzifuɛ Mun 5:17.a

• Mma tolɛ sika su’n kwla yo maan sran kun yo aɲinkplifuɛ. Ɲanmiɛn kusu klomɛn i sɔ ayeliɛ’n. (1 Korɛntifuɛ Mun 6:9, 10; Efɛzifuɛ Mun 5:3, 5) Be nga be to mma sika su’n, be kunndɛ kɛ be wiengu’m be sika’n fi be sa naan bé fá. Biblu’n kusu se e kɛ nán e ɲin blo sran like su.—Ezipti Lɔ Tulɛ 20:17; Rɔmunfuɛ Mun 7:7; 13:9, 10.

• Kannzɛ sika nga sran kun fa to mma’n ti kaan sɛ’n, sanngɛ ɔ kwla yo maan ɔ klo sika dan.—1 Timote 6:9, 10.

• Kpɛ sunman’n be nga be to mma sika su’n, be yi wunnzue, yɛ be le ninnge wie mɔ be fa be wla’n be gua be su-ɔ. Ɲanmiɛn ɲrun’n, i sɔ liɛ’n ti amuin sɔlɛ. Kusu nn Ɲanmiɛn kloman amuin sɔlɛ’n.—Ezai 65:11.

• Biblu’n wla e fanngan kɛ nán e yo kɛ sran wie mɔ be kunndɛman kɛ bé dí junman mɔ kusu be kunndɛ kɛ bé ɲán sika’n be sa. Sanngɛ ɔ wla e fanngan kɛ e di junman kekle kpa. (Akunndanfuɛ’n 2:24; Efɛzifuɛ Mun 4:28) Be nga be nian ndɛ sɔ’n su nanti’n be kwla “di aliɛ nga be bɔbɔ be ɲɛn i’n.”—2 Tesalonikifuɛ Mun 3:10, 12.

• Mma tolɛ sika su’n kwla yo maan e fa e wun sunnzun e wiengu mun. Kusu nn Biblu’n tannin e i sɔ yolɛ’n.—Galasifuɛ Mun 5:26.