?Ngue ti yɛ Zoova i Lalofuɛ’m be kacili ninnge wie mɔ be lafi su’n niɔn?

Like kwlaa nga e lafi su’n taka Biblu’n su. I sɔ’n ti’n kɛ é wún Biblu’n nun ndɛ’m be wlɛ é kɔ́’n, e kaci ninnge wie mɔ e lafi be su’n.a

I sɔ mɔ e yo’n nin ndɛ ng’ɔ o Ɲanndra Mun 4:18 nun’n be kɔ likawlɛ. Ɔ se kɛ: “Sran kpa’m be atin’n, ɔ ti kɛ lika m’ɔ kpaja nglɛmun nun, m’ɔ kpaja kɔ i ɲrun lele lika’n fa titi weiin’n sa.” Kɛ lika’n kpája kɔ́’n, nn é wún lika’n i wlɛ kpa. I wafa kunngba’n blɛblɛblɛ Zoova yo maan i sufuɛ’m be wun i nuan ndɛ’n i wlɛ blɛ ng’ɔ nin i fata’n nun. (1 Piɛli 1:10-12) Kɛ nga Biblu’n dun mmua fa kannin’n sa’n Ɲanmiɛn su yo sɔ kpa “blɛ’n i awieliɛ” nga nun.—Daniɛli 12:4.

Kɛ é wún Ɲanmiɛn Ndɛ’n i wlɛ é kɔ́’n, mɔ é káci ninnge nga e lafi be su’n, ɔ fataman kɛ i sɔ’n bo e nuan annzɛ ɔ sanngan e akunndan. Laa’n Ɲanmiɛn i sufuɛ’m b’a wunmɛn i ndɛ wie’m be wlɛ. Ɔ maan ɔ fata kɛ be kaci akunndan nga be bu’n.

• Moizi kunndɛli kɛ ɔ́ dé Izraɛlifuɛ mun. Sanngɛ ɔ dili afuɛ 40 ka naan Ɲanmiɛn w’a mɛn i atin kɛ ɔ yo sɔ.—Sa Nga Be Yoli’n 7:23-25, 30, 35.

• Akoto’m b’a wunman Mesi i wie’n nin i cɛnlɛ’n be su ndɛ nga Ɲanmiɛn nuan ijɔfuɛ’m be kannin’n be wlɛ.—Ezai 53:8-12; Matie 16:21-23.

• Klisifuɛ klikli wie’m b’a wunman blɛ nga “Zoova i cɛn’n” jú’n i wlɛ.—2 Tesalonikifuɛ Mun 2:1, 2.

Kɛ ɔ́ kɔ́ i ɲrun’n, Ɲanmiɛn maan be wunnin ninnge’m be wlɛ. E lafi su kɛ Ɲanmiɛn yó i sɔ kunngba’n man e andɛ.—Zaki 1:5.