Like suanlɛ’n i su afɔtuɛ wie mun

?É yó sɛ naan y’a si Biblu’n nun ndɛ mma nga b’a yiyi be nun wafa uflɛ’n?

Blɛ nga e o nun yɛ’n ti i liɛ ngunmin. Afin Zoova su tike e ɲin kpa naan e wun i nuan Ndɛ’n i wlɛ kpa tra laa’n. (Dan. 12:4) Sanngɛ kɛ ɔ ko yo naan y’a si Biblu’n nun ndɛ nga b’a yiyi be nun uflɛ’n be kwlaa’n, ɔ kwla yo kekle man e. ?Nin yɛ e kwla wun Biblu’n nun ndɛ mma sɔ mun ɔ nin wafa nga be yiyili be nun uflɛ’n niɔn?

• Fluwa Index des publications Watch Tower, i ndɛ akpasua nga be flɛ i kɛ “Éclaircissements doctrinaux” kwla uka e. Kɛ afuɛ’m bé sín’n, Biblu’n nun ndɛ nga be yiyili be nun wafa uflɛ’n, be kwlaa be o ndɛ akpasua sɔ’n nun. Sɛ a kɔ Watchtower Library su annzɛ ƐNTƐNƐTI SU FLUWA SIEWLƐ Watchtower^™ blɔfuɛ nun liɛ’n su’n, lika nga be kunndɛ ninnge mun lɛ’n, klɛ lɛ kɛ “Compréhensions affinées.” (Klɛ i nin nzɔliɛ nga “”)

• Zoova i Lalofuɛ’m be like kunndɛlɛ fluwa nun liɛ’n, ndɛ’m b’a sɔnman. Kunndɛ akpasua nga be flɛ i kɛ “Zoova i Lalofuɛ mun.” I sin’n, nian kan be klɛli i kɛ “Like nga e lafi su’n.” Kpɛkun kunndɛ ndɛ ce “Like nga e lafi su’n i nun yiyilɛ.”

É wlá ɔ fanngan kɛ kɛ ɔ ngunmin á súan Biblu’n nun like’n, a fa ɔ ɲin sie i ndɛ kun mɔ anuannzɛ’n yiyili nun uflɛ koko nun wa’n su. Kpɛkun kunndɛ Biblu’n nun ndɛ mma nga be jrannin su naan b’a yiyi nun uflɛ’n.