MAAN BA’M BE SUAN KEKLE JRANLƐ

?KEKLE JRANLƐ’N I BO’N YƐLE BENIN?

Kɛ be se kɛ sran kun jran kekle’n yɛle kɛ, kɛ sa’m be tɔ i su’n i sa sin bubumɛn i ndɛndɛ. Sanngɛ sɛ sa w’a tɔman sran kun su’n, ɔ su kwlá suanman kekle jranlɛ le. Kɛ bakan kun sɔ́nnzɔn nantilɛ’n, ɔ tɔ kpɛ sunman lele naan w’a si nanti. I wafa kunngba’n, kɛ sa’m be tɔ sran kun su’n yɛ ɔ si ninnge wie’m be yo-ɔ.

?NGUE TI YƐ Ɔ TI CINNJIN KƐ BA’M BE JRAN KEKLE-Ɔ?

Kɛ ba kanngan wie’m be yo like m’ɔ yoman kpa’n, annzɛ kɛ sa kekle wie tɔ be su’n, annzɛ kɛ be fɔn mɔ sran wie kɛn i ndɛ’n, be sa sin bubu be. Wie’m be liɛ’n kɛ ɔ ko yo sɔ’n, be kpɛ i kpo be yoman like nga be waan be su yo’n, i kun. Sanngɛ ɔ fata kɛ ba kanngan’m be wun ndɛ wie’m be wlɛ. Yɛle kɛ:

• Nán cɛn ngba yɛ ninnge nga be klo kɛ bé yó’n, bé yó ye-ɔ.—Zaki 3:2.

• Sa kekle wie kwla tɔ be su blɛ wie nun. —Akunndanfuɛ’n 9:11.

• Sɛ be fɔn naan sran w’a kan kleman be’n, be su kwlá kaciman be sa.—Nyanndra Mun 9:9.

Sɛ amun mma’m be suan be su sa’m be ɲrun kekle jranlɛ be kaan nun’n, kɛ bé wá ɲín’n bé wún sa ng’ɔ́ tɔ́ be su’n be trawlɛ.

?WAFA SƐ YƐ AMUN KWLA UKA AN MMA MUN NAAN B’A JRAN KEKLE-Ɔ?

Kɛ ba’m be yo like m’ɔ w’a yoman kpa’n.

NDƐ NGA BIBLU’N KAN’N: “Sran kpa’n, blɛ wie nun ɔ kwla tɔ. Sɛ ɔ tɔ kpɛ nso sɔ bɔbɔ’n, sanngɛ ɔ jaso!”—Nyanndra Mun 24:16.

Sɛ sa ng’ɔ tɔ amun mma’m be su’n, ɔ ti kekle-o, annzɛ ɔ timan kekle-o, amun uka be naan be wun i wlɛ. Wie liɛ’n, sɛ be mannin be junman wie suklu lɔ naan b’a dimɛn i kpa’n, be sa sin kwla bubu be. Ɔ maan be kwla se kɛ: “Min liɛ’n like kwlaa nga n yo’n, ɔ yoman kpa le.” ?I lɛ nun’n, ngue yɛ amun kwla yo-ɔ?

Amun uka amun mma mun naan be wun like nga be kwla yo naan cɛn uflɛ’n b’a kwla di junman kpa’n i wlɛ. Sɛ amun yo sɔ’n, bé wún be su sa’m be trawlɛ, kpɛkun be sa sin su bubuman be kun.

Kɛ amún úka be’n, nán amun kan like ng’ɔ fata kɛ be yo’n i ndɛ kle be. Sanngɛ amun yaci be lɛ naan be kan wafa nga be kwla tra sa sɔ’n, i ndɛ kle amun. I lɛ nun’n, amun kwla usa ba’n kɛ: “?Ngue yɛ a kwla yo naan w’a wun like nga be kle amun suklu lɔ’n, i wlɛ kpa-ɔ?”

Kɛ sa kekle wie tɔ amun mma’m be su’n.

NDƐ NGA BIBLU’N KAN’N: “Amun siman sa ng’ɔ́ ɲán amun ainman’n.”—Zaki 4:14.

Ɔ ju wie’n, sa’m be fu e nun. Sran kun kwla ɲan sika andɛ sanngɛ kɛ aliɛ cɛ́n’n, w’a di yalɛ. Wie liɛ’n sran kun ti juejue andɛ sanngɛ kɛ aliɛ cɛ́n’n, w’a tɔ tukpacɛ. Ɲanmiɛn Ndɛ’n se kɛ: “Wanndilɛ i akatua’n ɔ timan be nga be wun kpɛ’n be liɛ titi, kwlalɛ’n kusu timan safunyrɛn’m be liɛ titi. [...] Afin kɛ blɛ’n fa ti bɔ sa’m be fa ju’n, i su like yɛ be wun i-ɔ.”—Akunndanfuɛ’n 9:11.

E si kɛ amun mian amun ɲin be sasa amun mma mun naan like yaya wie w’a yoman be. Sanngɛ nán cɛn ngba yɛ amun kwla yo naan sa kekle w’a tɔman be su-ɔ.

Wie liɛ’n, be nin be janvuɛ kpa kun be kwla titi nun annzɛ be osufuɛ kun kwla wu. I lɛ nun’n, amun uka amun mma mun naan be jran sa sɔ’m be ɲrun kekle. I liɛ’n, sɛ be yo kaklaka naan be junman’n fi be sa annzɛ sika ndɛ yo kekle be su’n, bé jrán kekle.a

Kɛ be man amun mma’m be afɔtuɛ’n.

NDƐ NGA BIBLU’N KAN’N: “Be man wɔ afɔtuɛ-ɔ, fa ɔ su sie su. [...] I liɛ’n cɛn wie á fá sí ɔ ngwlɛlɛ liɛ.”—Nyanndra Mun 19:20.

Sɛ amun wa kun yo like wie naan sran kun mɛn i afɔtuɛ’n, nɛ́n i tɛ yolɛ ti-ɔ. Sanngɛ ɔ kunndɛ kɛ ɔ́ úkɛ i naan ɔ kaci i sa.

Kɛ amun se amun mma’m be kɛ be sɔ afɔtuɛ nga sran’m be man be’n, i nun klanman’n, amun bue nɲɔn’n be ɲan su ye. Be flɛ bian kun kɛ Jɔnun. Ɔ seli kɛ: “Sɛ bakan kun yo abɔlɛ sa wie naan i si nin i nin be tumɛn i fɔ’n naan be jrɛn i sin’n, ba sɔ’n sáci, yɛ ɔ́ kpɛ́ ndɛ mán be cɛn kwlakwla. Ɔ maan be su yaciman ndɛ siesielɛ le. I sɔ’n yó maan i siɛ-o, i niɛn-o, i ba-o, bé wún be ɲrun.”

?Wafa sɛ yɛ amun kwla uka amun mma mun naan b’a nanti afɔtuɛ nga be man be’n, be su-ɔ? Sɛ sran kun man amun wa kun i afɔtuɛ suklu lɔ annzɛ lika uflɛ’n, nán amun se kɛ sran fi leman atin manman amun wa’n i afɔtuɛ. Sanngɛ amun kwla usa amun wa’n kɛ:

• ?Ngue ti yɛ be mannin wɔ afɔtuɛ sɔ’n niɔn?

• ?Wafa sɛ yɛ a kwla nanti afɔtuɛ sɔ’n su-ɔ?

• ?Cɛn uflɛ’n, sɛ sa nga ti yɛ be mannin wɔ afɔtuɛ’n ju ɔ su ekun’n, ngue yɛ á yó-ɔ?

Nán amun wla fi su kɛ afɔtuɛ nga sran’m be man amun mma mun’n, ɔ yo be ye andɛ. Kpɛkun kɛ bé wá yó kaklaka’n, ɔ́ yó be ye wie.