Siɛ nin niɛn mun, amun uka ba mun naan be lafi Ɲanmiɛn nin Biblu’n nun ndɛ’n su kpa

1-2. ?Sɛ ba kun usa Ɲanmiɛn annzɛ Biblu’n nun ndɛ’n i su kosan’n, ngue yɛ ɔ fata kɛ i si nin i nin be yo-ɔ?

SRAN kpanngban be wun kɛ ba talɛ’n leman ba. I sɔ’n ti’n, siɛ nin niɛn mun, é yó amun mo nin amun ɲin mɔ amun mian be uka ba mun naan b’a lafi Ɲanmiɛn su’n. (Mml. 6:​6, 7) Kɛ ba’m bé ɲín’n, be kwla usa Biblu’n nun like mɔ be kleli be’n i su ndɛ wie mun. I wie yɛle kɛ, be kwla usa sa nga ti yɛ Biblu’n se e kɛ nán e yo ninnge wie mun’n.

² I bo bolɛ nun’n kosan nga ba’m be usa’n ti’n, srɛ kwla kun amun. Amun kwla se amun wun kɛ ɔ lafiman ndɛ nga Biblu’n kan’n su kpa kun. Sanngɛ kɛ ba’m bé ɲín’n, ɔ fata kɛ be usa kosan naan b’a wun ninnge wie’m be wlɛ. Yɛ i sɔ’n úka be naan b’a lafi Biblu’n nun ndɛ’n su kpa. (1 Kor. 13:11) Ɔ maan nán srɛ kun amun. Kɛ be usa kosan’n, amun uka be naan be bu akunndan wɔ mmua. I liɛ’n bé kwlá láfi Ɲanmiɛn nin Biblu’n nun ndɛ’n su kpa.

3. ?Ngue yɛ é wá kɛ́n i ndɛ like suanlɛ nga nun-ɔn?

³ Like suanlɛ nga nun’n, é wá wún like nga siɛ nin niɛn’m be kwla yo naan ba’m b’a lafi Ɲanmiɛn nin Biblu’n nun ndɛ’n su kpa’n. Asa’n é wá wún wafa nga be kwla uka be naan b’a wun i wlɛ kɛ Biblu’n nun mmla’m be su falɛ’n ti kpa man be’n. Kpɛkun é wá wún wafa nga be kwla uka be naan b’a kan like nga be suan’n i ndɛ b’a kle sran uflɛ’n. Asa’n é wá wún kɛ, kɛ ba’m be usa kosan’n ɔ ti kpa. Kpɛkun é kán like nga be nin be kwla yo naan b’a kan Biblu’n nun ndɛ’n b’a kle be’n i ndɛ.

AMUN UKA AMUN WA’N NAAN Ɔ LAFI ƝANMIƐN NIN BIBLU’N NUN NDƐ’N SU KPA

4. ?Kosan benin yɛ bakan kun kwla fa usɛ i wun-ɔn? ?Yɛ ngue ti-ɔ?

⁴ Siɛ nin niɛn’m be wun i wlɛ kɛ, nán kɛ be lafi Ɲanmiɛn su’n ti yɛ be mma’m bé láfi i su wie-ɔ. Amun nin Ɲanmiɛn sulafilɛ’n finman amun nin klun. I kunngba’n yɛle amun mma’m be liɛ’n. Kɛ bakan kun ɲín’n, ɔ kwla usɛ i wun kɛ: ‘?Ngue yɛ ɔ kle kɛ Ɲanmiɛn o lɛ sakpa-ɔ? ?Ndɛ nga Biblu’n kan’n ti nanwlɛ sakpa?’ Biblu’n bɔbɔ wla e fanngan kɛ e fa ‘ngwlɛlɛ nga e si i’n,’ e yo e wun sa ye, yɛ e ‘bu sa kwlaa sin e nian.’ (Rɔm. 12:1; 1 Tes. 5:21) ?I lɛ nun’n, wafa sɛ yɛ amun kwla uka amun mma mun naan b’a lafi Ɲanmiɛn nin Biblu’n nun ndɛ’n su kpa-ɔ?

5. ?Ngue yɛ siɛ nin niɛn’m be kwla yo naan be mma’m b’a lafi Biblu’n nun ndɛ’n su kpa-ɔ? (Rɔmunfuɛ Mun 12:2)

⁵ Amun uka amun wa’n naan ɔ wun kɛ ndɛ nga Biblu’n kan’n ti nanwlɛ. (An kanngan Rɔmunfuɛ Mun 12:2 nun.) Sɛ amun wa’n usa kosan wie mun’n, amun ukɛ i naan ɔ wɔ jw.org su, annzɛ ɔ fa Zoova i Lalofuɛ’m be like kunndɛlɛ fluwa, naan ɔ kunndɛ wafa nga be tɛ kosan sɔ’m be su’n. Sɛ ɔ fa fluwa sɔ’n naan ɔ kunndɛ ndɛ akpasua nga be flɛ i “Biblu’n” i ndɛ ja ng’ɔ suan “Ɔ fin Ɲanmiɛn’n,” ɔ́ sí like nga ti yɛ e kwla lafi su kɛ Biblu’n timan kɛ fluwa onga’m be sa, naan ɔ “ti Ɲanmiɛn i ndɛ’n.” (1 Tes. 2:13) Asa’n ɔ kwla kunndɛ laa Asiri klɔ nga be flɛ i Ninivu’n i su like e fluwa’m be nun. Biblu’n i su like suanfuɛ wie’m be buli i kɛ Ninivu klɔ’n timan klɔ jrɛiin kun. Sanngɛ kɛ afuɛ 1850 sinnin’n, be nga be fufu asiɛ’n be kunndɛ laa ninnge mun’n, be wunnin Ninivu klɔ nvuɛn’n. I sɔ’n kle kɛ ndɛ nga Biblu’n kan’n ti nanwlɛ. (Sof. 2:​13-15) Sɛ ɔ kunndɛ kɛ ɔ́ sí wafa nga Ninivu klɔ’n i nunnunlɛ’n i su ndɛ nga Biblu’n kannin’n kpɛnnin su’n, ɔ kwla nian afuɛ 2021, Novanblu Sasafuɛ Tranwlɛ’n i ndɛ akpasua ng’ɔ suan “?Amun si sɔ?” nun. Amun uka amun wa’n naan ɔ fa ndɛ ng’ɔ o e fluwa’m be nun’n sunnzun ndɛ nga fluwa uflɛ wie mɔ be kwla lafi be su’n be kan’n. I sɔ’n úkɛ i naan w’a wun i wlɛ kɛ, ndɛ nga Biblu’n kan’n ti nanwlɛ.

6. ?Wafa sɛ yɛ siɛ nin niɛn’m be kwla uka be mma mun naan b’a wun kɛ ndɛ nga Biblu’n kan’n ti nanwlɛ-ɔ? An fa sa kun yiyi nun. (An nian foto’n wie.)

⁶ Amun uka ba’n naan ɔ bu akunndan. Siɛ nin niɛn mun, amun kwla fa ajalɛ wie mun naan amun a kwla kan Biblu’n nin Ɲanmiɛn be ndɛ b’a kle amun wa’n. I wie yɛle kɛ amun nin i be kwla kɔ lalafuɛ ninnge’m be siewlɛ kun nun, annzɛ Betɛli lɔ, annzɛ lika uflɛ. Kɛ amun kɔ lika sɔ’m be nun’n, amun kwla kle i like. I wie yɛle kɛ sɛ amun o lalafuɛ ninnge’m be siewlɛ kun nun, annzɛ amun su niɛn i ajulisu mannzin wie su’n, amun nin i be kwla koko sa wie mɔ be juli laa’n, ɔ nin laa ninnge wie mɔ Biblu’n kan be ndɛ’n be su yalɛ. I liɛ’n, ɔ́ láfi Biblu’n nun ndɛ’n su kpa. Amun kwla se amun wa’n kɛ Ɲanmiɛn i dunman’n klɛ yɛbuɛ kun mɔ be wunnin i laa Moabu klɔ’n su’n i su. Yɔbuɛ sɔ’n o lɛ w’a di afuɛ 3.000. Be fa sieli i Aflansi lɔ lalafuɛ ninnge’m be siewlɛ kun nun. Asa’n aniaan’m be niannin yɔbuɛ sɔ’n su be yoli uflɛ kun, yɛ be fa sieli i anuannzɛ’n i bo bia m’ɔ o Wɔɔwiki lɔ’n su. Amun kwla kɔ lɔ be ko nian. Ndɛ ng’ɔ klɛ yɔbuɛ sɔ’n su’n kle kɛ Moabu famiɛn m’ɔ suan Mesa’n, ɔ jasoli Izraɛli nvle’n i wun. I sɔ kusu yɛ Biblu’n kan-ɔn. (2 Fam. 3:​4, 5) Sɛ amun wa’n i bɔbɔ wun ninnge nga be kle kɛ ndɛ nga Biblu’n kan’n ti nanwlɛ’n, ɔ́ láfi Ɲanmiɛn su kpa.—An nian 2 Be Ɲoliɛ 9:6.

7-8. (1) ?Ngue yɛ ninnge nglanmannglanman wafa kwlaa nga e wun be’n be kle e-ɔ? An kan be nun kun i ndɛ. (An nian foto’n wie.) (2) ?Kosan benin yɛ amun kwla usa amun wa’n naan w’a lafi su kpa kɛ Ɲanmiɛn yɛ ɔ yili ninnge mun-ɔn?

⁷ Amun uka amun wa’n naan ɔ bu ninnge nga Zoova yili be’n be su akunndan. Kɛ amun nin ba’n bé kɔ́ lika’n, amun fɛ i ɲin sie i wafa nga ninnge nga Zoova yili be’n be fa ti’n be su. Amun ukɛ i naan ɔ wun i wlɛ kɛ, saan sran kun m’ɔ si ngwlɛlɛ kpa’n yɛ ɔ yili ninnge sɔ mun-ɔn. I wie yɛle kɛ ninnge wie’m be o lɛ’n, wafa nga be ti’n ɔ fa be wun. I wie yɛle nzraama kwle wie mun, ɔ nin nzue nun buke’n i kongloman’n, ɔ nin waka nɲa mun, ɔ nin ijre wafa kun mɔ be flɛ i kɛ Tuunesɔlu’n. Siansifuɛ’m be suannin ninnge sɔ’m be su like lele. Be flɛ be nun kun kɛ Nikola Fameli. Ɔ seli kɛ, kɛ a suan ninnge kɛ ngalɛ’n sa’m be su like’n, a wun kɛ be wafa’n ti kun. Siansifuɛ’m be flɛ i sɔ liɛ’n kɛ Fibonaci.a

⁸ Atrɛkpa’n suklu lɔ’n, bé klé amun wa’n i ninnge wie mɔ be wafa’n ti kun-ɔn. I wie yɛle waka’m be liɛ’n. Waka kwlaa le bo, ɔ le afiɛn, kpɛkun ɔ le sama, kpɛkun i nɲa’m be o i sa mma’m be su. Ninnge kpanngban wie mun ekun be wafa’n ti sɔ wie. ?Wan yɛ ɔ yili ninnge nglanmannglanman sɔ mun-ɔn? Sɛ amun wa’n bu ninnge sɔ mɔ e wun be’n be su akunndan’n, ɔ́ láfi su kɛ Ɲanmiɛn yɛ ɔ yili ninnge mun sakpa-ɔ. (Ebr. 3:4) Kɛ amun wa’n ɲín’n, ɔ fata kɛ amun ukɛ i naan ɔ wun like nga ti yɛ ɔ ti cinnjin kɛ ɔ fa Ɲanmiɛn i mmla’m be su’n i wlɛ. I lɛ nun’n, amun kwla usɛ i kɛ: ‘?Sɛ Ɲanmiɛn yɛ ɔ yili e’n, nn nɛ́n i yɛ ɔ si like ng’ɔ fata kɛ e yo naan y’a di aklunjɔɛ’n niɔn?’ I sin’n amun kwla se i kɛ afɔtuɛ nga Ɲanmiɛn man e’n ɔ o Biblu’n nun.

NASA, ESA, and the Hubble Heritage (STScl/AURA)-ESA/Hubble Collaboration

AMUN UKA AMUN WA’N NAAN Ɔ WUN KƐ ƝANMIƐN I MMLA’M BE SU FALƐ’N TI KPA

9. ?Ngue ti yɛ ba kun kwla usa Biblu’n nun mmla’m be su kosan-ɔn?

⁹ Ɔ ju wie’n, ba’n kwla usa kosan wie m’ɔ kle kɛ ɔ wunman sa nga ti yɛ Biblu’n se kɛ be yo sa wie mun annzɛ nán be yo be’n i wlɛ’n. Sɛ ɔ ti sɔ’n, amun kunndɛ sa nga ti yɛ ɔ usa kosan sɔ’n i bo. ?Ɔ lafiman su kɛ Biblu’n nun mmla sɔ’n ti kpa ti-ɔ? ?Annzɛ kusu’n kɛ be usɛ i kosan’n ɔ siman su tɛ ti-ɔ? I kwlaa yoli-o, amun kwla uka amun wa’n naan w’a wun i wlɛ kɛ Ɲanmiɛn i mmla’m be su falɛ’n ti kpa. I lɛ nun’n, amun kwla fa fluwa A kwla di aklunjɔɛ tititi! ukɛ i.b

10. ?Wafa sɛ yɛ amun kwla uka amun wa’n naan ɔ nin Zoova be afiɛn w’a mantan kpa-ɔ?

¹⁰ Amun uka amun wa’n naan ɔ miɛn i ɲin naan ɔ nin Zoova be afiɛn mantan kpa. Kɛ amun nin ba’n bé súan fluwa A kwla di aklunjɔɛ tititi! i nun like’n, kɛ ɔ ko yo naan w’a kɛn i klun ndɛ’n, amun usɛ i kosan nga be o fluwa sɔ’n nun’n. Yɛ amun koko desɛn nin foto nga be o fluwa’n nun’n be su yalɛ. (Ɲan. 20:5) I wie yɛle kɛ, like suanlɛ 8 kle kɛ Zoova ti kɛ e janvuɛ kpa kun sa. Ɔ man e afɔtuɛ kpakpa mun naan y’a kwla sasa e wun. Sɛ amun nin i be koko 1 Zan 5:3 i su yalɛ’n, amun kwla usɛ i kɛ: “?Kɛ e si kɛ Zoova ti e janvuɛ kpa’n, wafa sɛ yɛ ɔ fata kɛ e bu ndɛ ng’ɔ kan kle e’n niɔn?” Ɔ kwla yo e kɛ kosan sɔ’n timan cinnjin sa. Sanngɛ ɔ kwla uka ba’n naan w’a wun i wlɛ kɛ, kɛ mɔ Zoova klo e’n i ti yɛ ɔ man e mmla-ɔ.—Eza. 48:​17, 18.

11. ?Wafa sɛ yɛ amun kwla uka amun wa’n naan w’a wun kɛ Biblu’n nun mmla’m be su falɛ’n ti kpa-ɔ? (Ɲanndra Mun 2:​10, 11)

¹¹ Kɛ e fa Zoova i mmla’m be su’n i su ye nga e ɲɛn i’n, amun nin ba’n be koko su yalɛ. Kɛ amún kánngan Biblu’n nun likawlɛ’n, annzɛ amún fá amun ɲin síe i fluwa Maan e nian Ɲanmiɛn Ndɛ’n nun cɛn kwlaa i nun ndɛ’n su’n, amun kan wafa nga Biblu’n nun ndɛ’n i su falɛ’n ukali amun awlobo’n i ndɛ. I wie yɛle kɛ amun kwla kan sa nga ti yɛ ɔ ti cinnjin kɛ e di junman kekle, yɛ e yo nanwlɛfuɛ’n i ndɛ. (Ebr. 13:18) Asa’n amun kwla ukɛ i naan ɔ wun kɛ Biblu’n nun mmla’m be sasa e tukpacɛ wie’m be lika, yɛ be yo maan e wla gua ase. (Ɲan. 14:​29, 30) Sɛ amun wa’n wun i wlɛ kɛ Ɲanmiɛn i mmla’n i su falɛ’n ti kpa dan’n, ɔ́ míɛn i ɲin naan w’a fa su titi.—An kanngan Ɲanndra Mun 2:​10, 11 nun.

12. ?Ngue yɛ siɛ kun yo naan i wa’n w’a wun i wlɛ kɛ Biblu’n nun mmla’m be ti kpa-ɔ?

¹² Be flɛ aniaan kun kɛ Sitɛvu. Ɔ tran Aflansi lɔ. Be flɛ i wa m’ɔ le afuɛ 16 kɛ Etanin. Ɔ nin i yi be ukali be wa kan sɔ’n naan w’a wun kɛ klolɛ mɔ Zoova klo e’n, i ti yɛ ɔ kpɛ mmla man e-ɔ. Kɛ ɔ́ kán wafa nga be ukɛli i’n i ndɛ’n, ɔ seli kɛ: “Wie liɛ’n e usɛ i kɛ: ‘?Ngue ti yɛ Zoova kunndɛ kɛ e fa mmla nga su-ɔ? ?Wafa sɛ yɛ i sɔ’n kle kɛ ɔ klo e-ɔ? ?Sɛ e nantimɛn i mmla sɔ’n su’n, wafa sɛ yɛ i bo’n gúa-ɔ?’” Kɛ be nin Etanin be kokoli i sɔ yalɛ’n, i sɔ’n ukɛli i naan w’a lafi su kpa kɛ i bɔbɔ i kpa yolɛ ti yɛ Zoova kpɛli mmla-ɔ. Sitɛvu kan guali su kɛ: “Like nga e klo’n yɛle kɛ Etanin wun i wlɛ kɛ Zoova i ngwlɛlɛ liɛ’n ti kpa tra klɔ sran’m be liɛ’n lele.”

13. ?Wafa sɛ yɛ siɛ nin niɛn’m be kwla kle be mma’m be like naan b’a nian Biblu’n nun mmla’m be su b’a nanti-ɔ? An fa sa kun yiyi nun.

¹³ Amun uka amun wa’n naan ɔ wun wafa ng’ɔ kwla fa Biblu’n nun mmla’m be su’n. Wienun-ɔn, b’a man amun wa’n i junman suklu lɔ kɛ ɔ kanngan fluwa kun nun. Yɛ be nga be kan be ndɛ fluwa’n nun’n, be kunndɛ bla nin bian sukusuku yɛ be yo sa kekleekle mun. Kpɛkun wafa nga be kan be ndɛ’n, ɔ ti kɛ be ayeliɛ sɔ’n timan tɛ sɔ liɛ sa, naan e kwla nian su wie. I lɛ nun’n, amun kwla usa amun wa’n wafa nga Zoova bu be nga be yo sɔ’n. (Ɲan. 22:​24, 25; 1 Kor. 15:33; Fip. 4:8) I sɔ’n kwla ukɛ i naan kɛ bé kókó fluwa sɔ’n i nun ndɛ’n i su yalɛ suklu lɔ’n, w’a kwla bo jasin fɛ’n w’a kle i like klefuɛ’n nin i wiengu suklu ba mun.

AMUN UKA AMUN WA’N NAAN Ɔ KAN LIKE NG’Ɔ SUAN’N I NDƐ KLE SRAN UFLƐ

14. (1) ?Ndɛ benin yɛ kɛ ɔ yo naan gbanflɛn annzɛ talua kun m’ɔ ti Klisifuɛ’n ɔ kle kɛ ɔ lafiman su wie’n, ɔ kwla yo kekle mɛn i-ɔ? (2) ?Yɛ ngue ti-ɔ?

¹⁴ Ɔ ju wie’n, kɛ ɔ ko yo naan gbanflɛn annzɛ talua nga be ti Klisifuɛ’n b’a kan like nga be suan’n i ndɛ b’a kle sran uflɛ’n, ɔ ti kekle man be. I wie yɛle kɛ, sɛ suklu lɔ’n be su kle be kɛ klɔ sran fin ndo’n, kɛ ɔ yo naan be kle kɛ be bumɛn i sɔ wie’n, srɛ kwla kun be. Afin be like klefuɛ’n kwla se be kɛ ɔ ti sa kun m’ɔ juli sakpasakpa-ɔ, naan be kwlá siman su akplowa. ?I lɛ nun’n, siɛ nin niɛn mun, wafa sɛ yɛ amun kwla uka amun wa’n naan w’a lafi su kpa kɛ like nga amun kle i’n, yɛ ɔ ti nanwlɛ-ɔ?

15. ?Ngue yɛ ɔ kwla uka gbanflɛn annzɛ talua kun naan w’a lafi Biblu’n nun ndɛ m’ɔ si i’n i su kpa-ɔ?

¹⁵ Amun uka amun wa’n naan ɔ lafi like ng’ɔ suan’n i su kpa. Nán amun wa’n se kɛ, kɛ m’ɔ lafi su kɛ Ɲanmiɛn yɛ ɔ yili like kwlaa ti’n, ɲannzuɛn kún i. (2 Tim. 1:8) Afin siansifuɛ sunman bɔbɔ be lafi su kɛ ninnge’m b’a boman nun sa ngbɛn. Siansifuɛ sɔ’m be lafi su kɛ sran kun m’ɔ si ngwlɛlɛ kpa’n yɛ ɔ yili ninnge tɛkɛtɛkɛ kwlaa nga be o mɛn nun’n niɔn. Be lafiman su kɛ klɔ sran fi ndo, kɛ nga be fa kle i suklu lɔ’n sa. Like kun ekun m’ɔ kwla uka ba’n naan w’a lafi Ɲanmiɛn ndɛ’n su kpa’n, yɛle kɛ maan ɔ wun sa nga ti yɛ i wiengu Klisifuɛ’m be lafi su kɛ Ɲanmiɛn yɛ ɔ yili ninnge mun’n i wlɛ.c

16. ?Wafa sɛ yɛ siɛ nin niɛn’m be kwla uka be wa’n naan w’a kwla kan sa nga ti yɛ ɔ lafi su kɛ Ɲanmiɛn o lɛ’n, i ndɛ w’a kle i wiengu mun-ɔn? (1 Piɛli 3:15) (An nian foto’n wie.)

¹⁶ Amun uka amun wa’n naan ɔ kan sa nga ti yɛ ɔ lafi su kɛ Ɲanmiɛn o lɛ’n, i ndɛ kle sran uflɛ. (An kanngan 1 Piɛli 3:15 nun.) Amun kwla fa ba’n i ɲin sie i jw.org su ndɛ nga be kle kɛ Ɲanmiɛn yɛ ɔ yili ninnge kwlakwla’n be su. I wie yɛle video nga be flɛ i kɛ Lafi su kɛ Ɲanmiɛn o lɛ, ɔ nin video nga be flɛ i kɛ ?Ɲanmiɛn o lɛ sakpa? Kpɛkun wafa nga ɔ kwla yiyi ndɛ’n nun kle i wiengu mun naan b’a wun i wlɛ kɛ Ɲanmiɛn yɛ ɔ yili ninnge kwlaa’n, amun koko su yalɛ. Amun se i kɛ ɔ nunman nun kɛ ɔ nin i wiengu’m be si akplowa lele. Yɛ sɛ sran kun kunndɛ kɛ ɔ́ sí ndɛ’n nun’n, maan wafa nga ɔ́ yíyí nun klé i’n i wlɛ wunlɛ yo pɔpɔ. Wienun-ɔn, i janvuɛ kun se i kɛ: “N nin-a wunman Ɲanmiɛn le. Min liɛ’n like nga n wun i’n yɛ n lafi su-ɔ.” Ɔ kwla tɛ i su kɛ: “Maan e se kɛ a su nanti bo ble kun nun, kpɛkun w’a fite gbo kun su. ?Á sé sɛ? ?Gbo’n bɔbɔ yɛ ɔ kpɛli i wun annzɛ sran yɛ ɔ kpɛli-ɔ? I kunngba’n yɛle ninnge nga be o nglo lɔ nin asiɛ’n su’n. Saan sran kun yɛ ɔ yili be-ɔ.”

17. ?Wafa sɛ yɛ siɛ nin niɛn’m be kwla uka be wa’n naan sɛ ɔ ɲan jasin fɛ bolɛ’n i wun atin’n w’a sisimɛn i bo-ɔ? An yiyi nun.

¹⁷ Amun uka amun wa’n naan sɛ ɔ ɲan jasin fɛ i bolɛ’n i wun atin’n w’a sisimɛn i bo. (Rɔm. 10:10) Wafa nga sran kun miɛn i ɲin naan w’a kan Ɲanmiɛn ndɛ w’a kle i wiengu mun’n, ɔ ti kɛ sran kun m’ɔ su suan gitaa bolɛ sa. I bo bolɛ nun’n ɔ su simɛn i bo. Sanngɛ kɛ ɔ́ kɔ́ i ɲrun’n nn i sa’n blí nun kpa. I wafa kunngba’n kɛ gbanflɛn kun annzɛ talua kun bó jasin fɛ’n i bolɛ bo’n, ɔ kwla kan ndɛ kanngan wie mun. I wie yɛle kɛ, ɔ kwla se i wiengu suklu ba kun kɛ: “Blɛ sunman’n siansifuɛ’m be nian wafa nga ninnge kɛ waka nin nnɛn mun sa’n, be fa ti’n su be yi ninnge wie mun. ?A si sɔ? Maan n kle wɔ video kun.” I sin’n video nga be o video akpasua nga be flɛ i kɛ “?Sran kun yɛ ɔ yili-ɔ?” nun’n, ɔ kwla bo be nun kun kle i. Kpɛkun ɔ kwla se i kɛ: “Kɛ siansifuɛ’m be nian ninnge nga be o lɛ’n su be yi like uflɛ’n, sran’m be yo be mo. ?Yɛ sran ng’ɔ dun mmua yili ninnge sɔ mun’n nin? ?Nɛ́n i yɛ ɔ nin mo yolɛ fata kpa-ɔ?” Sɛ ba’n niɛn i sɔ ajalɛ’n su’n, atrɛkpa’n i wiengu suklu ba’n kwla kunndɛ kɛ ɔ́ sí Zoova i su ndɛ kpa.

AMUN UKA AMUN WA’N I TITI NAAN Ɔ LAFI ƝANMIƐN NIN BIBLU’N NUN NDƐ’N SU

18. ?Wafa sɛ yɛ siɛ nin niɛn’m be kwla uka be wa’n i titi naan w’a lafi Ɲanmiɛn nin Biblu’n nun ndɛ’n su-ɔ?

¹⁸ Mɛn nga e o nun yɛ’n nun’n, sran’m be dan lika be lafiman Zoova su. (2 Piɛ. 3:3) I sɔ’n ti’n, siɛ nin niɛn mun, kɛ amún klé amún wa’n i Biblu’n nun like kɔ́’n, amun wlɛ i fanngan naan ɔ suan ninnge nga be kwla yo naan w’a lafi Ɲanmiɛn su kpa’n be su like. Amun fɛ i ɲin sie i ninnge nga Ɲanmiɛn yili be’n be su naan ɔ bu akunndan. Amun ukɛ i naan ɔ fɛ i ɲin sie i Biblu’n nun ndɛ nga be su kpɛn su andɛ’n be su. Yɛ ng’ɔ ti cinnjin trɛ i ngba’n, amun nin i be srɛ Ɲanmiɛn, yɛ amun srɛ Ɲanmiɛn be mɛn i. Sɛ amun yo sɔ’n, Zoova yrá amun ɲin mɔ amun mian naan amun wa’n w’a lafi i su’n i su.—2 Ɲol. 15:7.