?Ngue ti yɛ sran sunman be ɲin yiman be awlofuɛ mun-ɔn?

**?NGUE TI YƐ Ɔ TI CINNJIN KƐ AWLO’N NUNFUƐ’M BE ƝIN YI BE WIENGU-Ɔ?**

Kɛ awlo’n nunfuɛ’m be ɲin yi be wiengu’n, i sɔ’n yo maan i yasua-o, i bla-o, i ba mun-o, be kwlaa be wun jɔ be fɔun.

Fluwa kun m’ɔ kan ninnge nso m’ɔ fata kɛ yasua kun nin i yi be yo be naan be aja’n w’a taka kpa’n be ndɛ’n ɔ seli kɛ, kɛ yasua kun nin i yi be ɲin yi be wiengu’n be yi i sɔ liɛ’n i nglo aliɛ ba kwlaa nun, “ninnge kanngan nin ninnge dandan’m be nun.”
Fluwa sifuɛ’m be waan ba nga be ɲin yi be wiengu’n be buman be wun kɛ be nunman sran nun. Asa’n be nin be si nin be nin be afiɛn mantan, yɛ be akunndan sannganman ngbɛnngbɛn.

LIKE NGA A KWLA YO’N

Maan amun nuan sɛ like ng’ɔ fata kɛ amun yo’n su. I klikli’n, wafa nga amun tinuntinun amun kwla kle kɛ amun ɲin yi amun wiengu’n, a nin ɔ awlofuɛ mun amun koko su yalɛ naan amun wun i wlɛ. I sin’n, klɛ like ng’ɔ fata kɛ sran kun yo’n, ɔ nin like ng’ɔ fataman kɛ sran kun yo’n. I sin ekun’n like nga amun tinuntinun amún yó naan i sɔ liɛ’n w’a yo ye’n, amun koko su yalɛ.

“Sran ng’ɔ bo i ɲin ase yo like’n, like ng’ɔ sunnzun kɛ ɔ́ yó’n, ɔ́ yó ye.”—Ɲanndra Mun 21:5.

Aɲinyiɛ’n i nglo yilɛ nun’n ɔ bɔbɔ kle ajalɛ kpa. ?Kɛ ɔ yi annzɛ ɔ wun, annzɛ ɔ mma’m be fɔn’n, a kan be wun ndɛ tɛ? ?Kɛ be kan be klun ndɛ’n, a sri be? ?Kɛ bé kán ndɛ’n, a kpɛ be nuan ndɛ, annzɛ kusu a faman ɔ su sieman be nuan bo?

Like kun mɔ a kwla yo’n: Nán se ɔ wun kɛ ɔ awlofuɛ mun yɛ ɔ fata kɛ be ɲin yi wɔ-ɔ, sanngɛ maan ɔ bɔbɔ ɔ ɲin yi be.

“Nán amun minndɛ kɛ amun wiengu bu amun sran ka naan amun a bu i sran.”—Rɔmunfuɛ Mun 12:10.

Kannzɛ amun nuan sɛman like wie su’n, sanngɛ maan amun ɲin yi amun wiengu. Kɛ amún kán ndɛ klé amun wiengu’n, nán amun ka lɛ se kɛ “ɔ liɛ’n a yoman sa le,” annzɛ “ɔ liɛ’n, blɛ kwlaa nun kɛ a yo sa.” I sɔ kanlɛ’n kwla lo amun wiengu’n i ngasi, kpɛkun ndɛ kaan kaci ndɛ dan.

“Kɛ a tɛ sran su amanniɛn su’n, ɔ guɛ i ya’n i ase, sanngɛ be nuan nun ndɛ ng’ɔ yra fiaan’n, ɔ klɔklɔ ya.”—Ɲanndra Mun 15:1.

LIKE NGA ZOOVA I LALOFUƐ’M BE YO’N

Zoova i Lalofuɛ’m be wla awlobo’n nunfuɛ’m be fanngan kɛ be ɲin yi be wiengu. Be kɛn i sɔ liɛ’n i ndɛ be fluwa mun, nin video nga be yi be’n be nun. Yɛ be yoman ninnge sɔ’m be atɛ kusu.

YASUA NIN BE YI’M BE LIƐ: E ndɛ akpasua nga be flɛ i “Aja’n nin Awlobo” ɔ uka yasua mun nin bla mun naan ...

B’a sie be su be wiengu nuan bo.
B’a tanninman nvlɛ.
B’a yaci ndɛnngan kanlɛ.

(Kɔ jw.org su naan kunndɛ ndɛ akpasua “Aja’n nin Awlobo.”)

SIƐ NIN NIƐN’M BE LIƐ: Ndɛ akpasua “Aja’n nin Awlobo” ɔ kwla uka siɛ nin niɛn mun naan b’a uka be mma mun ...

naan b’a yo aɲinyiɛfuɛ.
naan b’a di awlo’n nun junman wie mun.
naan b’a srɛ like aɲinyiɛ su, naan b’a yo sran kwla.

(Kɔ jw.org su naan kunndɛ ndɛ akpasua “Ba talɛ” nin “Gbanflɛn nin talua’m be talɛ.”)

Nian ndɛ nga be flɛ i “Ninnge nsiɛn m’ɔ fata kɛ ba’m be suan be yolɛ’n” m’ɔ o An Tinnge!, afuɛ 2019, No. 2 nun, ɔ nin ndɛ nga be flɛ i “Afɔtuɛ 12 mɔ be kwla yo awlobo’m be ye’n” i nun. Ɔ o An Tinnge!, afuɛ 2018, No. 2 i bue 8-11 nun.

GBANFLƐN NIN TALUA’M BE LIƐ: Ndɛ akpasua “Gbanflɛn nin talua mun” m’ɔ o jw.org su’n i nun’n, video nin ninnge uflɛ wie mun be kwla uka gbanflɛn nin talua mun ...

naan be nin be si annzɛ be nin annzɛ be niaan mun be nuan w’a sɛ.
naan kɛ be nin be si annzɛ be nin bé kókó mmla nga be kpɛli i awlo’n nun’n i su yalɛ’n, b’a kan ndɛ’n aɲinyiɛ su.
naan be si nin be nin’m b’a kwla lafi be su.

(Kɔ jw.org su naan kunndɛ ndɛ akpasua “Gbanflɛn nin talua mun.”)

Be tuaman sika naan b’a wɔ e ɛntɛnɛti adrɛsi jw.org su. Be su usaman ɔ su ndɛ wie mun, yɛ be su seman wɔ kɛ a dun mmua kaci Zoova i Lalofuɛ.