Like suanlɛ 14
Zoova i Lalofuɛ’m be ninnge siesielɛ’n
?Wafa sɛ yɛ e blɛ liɛ su Zoova i Lalofuɛ’m be ndɛ’n boli i bo ɔ? (1)
?Wafa sɛ yɛ Zoova i Lalofuɛ’m be yo be aɲia mun ɔn? (2)
?Wafa sɛ yɛ be tua kalɛ nga be bo’n niɔn? (3)
?Wan yɛ ɔ nian be asɔnunfuɛ’m be su ɔ? (4)
?Aɲia dandan mennin yɛ afuɛ kwlaa nun be yo’n niɔn? (5)
?Ngue junman yɛ be di i Zoova i Lalofuɛ wunmuan’m be bo’n i takawlɛ lɔ’n ɔ nin be Betɛli wie’m be nun ɔn? (6)
1. E blɛ liɛ su Zoova i Lalofuɛ’m be ndɛ’n boli i bo afuɛ 1870 nun. I bo bolɛ sɔ nun’n, be flɛ be Biblu’n i nun Like Suanfuɛ mun. Sanngɛ afuɛ 1931 nun’n, be fali Biblu’n nun dunman nga be flɛ i Zoova i Lalofuɛ’n be tɔnnin be wun (Ezai 43:10). I klikli nun’n, anuannzɛ sɔ’n ti kaan sa. Sanngɛ siɛn’n i nun sran’m be ti Lalofuɛ miliɔn kpanngban yɛ be kan Ɲanmiɛn ndɛ’n nvle 230 be nun ɔn.
2. Zoova i Lalofuɛ’m be asɔnun kaka nun’n, le mɔcuɛ kun nun sa’n, be yia kpɛ nsan. Amun nin be kwla yia wie (Ebre Mun 10:24, 25). Ninnge kwlaa nga be kle’n, ɔ taka Biblu’n su. Be srɛ Ɲanmiɛn be fa fiti aɲia sɔ’m be su, kpɔkun be srɛ Ɲanmiɛn ekun be fa guɛ i bo. Aɲia sɔ’m be kwlaa nun’n, be to be “jue” mun (Efɛzfuɛ Mun 5:18, 19). Be tuaman kalɛ’n naan b’a wlu’n, be deman gbogbo nun sika.—Matie 10:8.
3. Asɔnun’m be nun sunman be le aɲia Ɲanmiɛn Sielɛ Blɛ Sua’n nun lɔ. Sua ngbɛn sa yɛ Zoova i Lalofuɛ’m be bɔbɔ be kplannin ɔn. Ɲanmiɛn Sielɛ Blɛ Sua nun lɔ’n, amun su wunman waka sran nin waka nda, ɔ nin i sɔ ninnge wie fi. Kalɛ kwlaa nga be bo’n, sran kun i klunklo sika nga ɔ yi’n, yɛ be fa tua ɔ. Sika guawlɛ’m be o lɛ, ɔ ti be nga be kunndɛ kɛ bé mán be klunklo like’n be liɛ.—2 Korɛntfuɛ Mun 9:7.
4. Asɔnun kwlaa nun’n, asɔnun kpɛnngbɛn’m be o lɛ, be flɛ be ekun kɛ asɔnun sunianfuɛ mun. Be yɛ be fa asɔnun i nun lɔ ninnge klelɛ’n i ti’n niɔn (1 Timote 3:1-7; 5:17). Asɔnunfuɛ’m be lika nianfuɛ’m be uka be (1 Timote 3:8-10, 12, 13). Sanngɛ be kpa traman be wiengu asɔnunfuɛ nga be ka lɛ’n mun (2 Korɛntfuɛ Mun 1:24). Be leman be ngunmin dunman (Matie 23:8-10). Tralɛ nga be wla’n timan ngunmin. Be leman junman nga be di i lɛ’n i ti akatua. Asɔnun kpɛnngbɛn’m be uka asɔnunfuɛ’m be Ɲanmiɛn ninnge mɔ be di i yalɛ’n nun; be nian be lika klolɛ su. Be guagua be awlɛn su nzue, kpɔkun sɛ ndɛ wie yɛ ɔ ɲannin be’n, be man be afɔtuɛ.—Zak 5:14-16; 1 Piɛr 5:2, 3.
5. Zoova i Lalofuɛ’m be le be aɲia dandan kpa afuɛ kwlaa nun. Be asɔnunfuɛ kaka be ti yia lɔ naan b’a ti blake’n, yɛle kɛ Biblu’n nun ninnge klelɛ’n sa. Sɔnnzɔnfuɛ uflɛ nga bé yó be batɛmu’n, aɲia sɔ’m be nun yɛ be yo i ɔ.—Matie 3:13-17; 28:19, 20.
6. Zoova i Lalofuɛ mun be bo’n taka New York lɔ. Asɔnun kpɛnngbɛn akpasua kun nga b’a cɛ Ɲanmiɛn sulɛ nun kpafuɛ’n mɔ be flɛ be E Ɲrun Dinfuɛ’m be Anuannzɛ’n, be o lɔ. Be yɛ be nian asɔnunfuɛ nga be o mɛn wunmuan nun’n be su ɔ. Nvle nga Zoova i Lalofuɛ’m be Betɛli’m be o nun’n, be tra 100; be nga be di junman lɔ mɔ be yi fluwa mun’n, mɔ be fa kɔ nvlenvle’m be su’n, be leman akatua. Lika sɔ’m be nun yɛ be siesie Ɲanmiɛn Sielɛ Blɛ jasin fɛ’n bolɛ i junman nga e di’n niɔn. ?Ngue ti yɛ amun siesieman amun wun naan amun ko nianman i sɔ Betɛli sua nga ɔ mantan amun lɔ’n i nun wie ɔ?