Sielɛ Blɛ’n i nganniɛn n° 36

Afuɛ akpi blɛ uflɛ’n — Blɛ ɲrun like minnin yɛ anún ɲɛ́n i ɔ ?

Afuɛ akpi blɛ uflɛ’n — Blɛ uflɛ kun balɛ ɔ ?

AFUƐ 1999 nun desenblu i le 31 su’n kɔnguɛ nbluniɛn nun’n, afuɛ afuɛ ya kpɔlɛ kpɔlɛ i ablaɔn su’n wieli.a Blɛ sɔ nun’n lika’n sanngannin dan. Sanngɛ kusu i nun’n, be kpɛli ninnge uflɛ’m be ba, yɛ ayre yolɛ nun’n, be ɔli be ɲrun, sran’m be jasin bo klelɛ i wafa wafa’m b’a truli, kpɔkun sika i ndɛndɛ ɲanlɛ w’a bali mɛn nun. I sɔ’n ti afuɛ akpi blɛ uflɛ’n ti sran’m be cennjele, afin be bui kɛ lika’n káci naan ɔ́ yó kpa. Blɛ sɔ nun’n, alɛ, yalɛ, e tranwlɛ’n i abɔlɛ yolɛ nin tukpaciɛ’m bé wíe ?

Sran wie’m be bui sɔ. Sanngɛ afuɛ akpi blɛ uflɛ’n kwlá mán ngaciɛ i su mmlusuɛ sakpa — ngaciɛ nga be kwlá mán amun nin amun osufuɛ’m be fɔunndi tranlɛ ? Amun bu mɛn nun sa nga be ɲan e’n be nun kunngun be sin be nian.

Lika sacilɛ

Nvle nga be le sika’m “ be yo lika’n i abɔlɛ kpɔkun be saci bo mun maan be ɲan’an bo kun. ” Sɛ b’a yaci’ɛ i sɔ yolɛ’n, “ tranwlɛ lika’n sáci tɛ kpa. ” — “ Avenir de l’environnement mondial — 2000 ”, Programme des Nations unies pour l’environnement.

Tukpaciɛ

“ Kɛ é jú afuɛ 2020 nun’n, nvle yalɛfuɛ’m be su’n, tukpaciɛ nga be kwlá saman’n, sran blu su’n be kún sran nso. Sɛ be fa sunnzun andɛ wie’n, ɔ ju’ɛ i nun. ” — “ Un monde accablé par la maladie ”, Harvard University Press, 1996 (angl.).

Fluwa sifuɛ wie’m be wan “ kɛ é jú afuɛ 2010 nun’n, Nvle 23 nga [Sida’n] w’a tru be su tɛtɛ kpafuɛ’n, be nun’n, sran miliɔn 66 bé wú. ” — “ Face au sida : la situation dans les pays en développement ”, rapport conjoint de la Commission européenne et de la Banque mondiale.

Yalɛ

“ Sran ko ju miliar 1 nin miliɔn 3 gua su be cɛn kun aliɛ sa’n ju’a ba blu kun, kpɔkun sran ko ju miliar 1 be kwlá ɲanman be nuan nun aliɛ kan. ” — “ Rapport mondial sur le développement humain 1999 ”, rapport du Programme des Nations unies pour le développement.

Alɛ

“ Sa kekleekle nga bé yó i [klɔ klɔ’m] be su’n, be nin a wun’ɛn i wunsu le. Aniɛn aniɛn, akpasua akpasua, nin asɔnun’m [be wun nun bubulɛ mun], [...] i sɔ sa kekleekle yɛ afuɛ ablaɔn nin nnun nga bé bá lɛ nun’n, [...] bé fá alɛ’n bá ɔ [...], yɛ bé kún afuɛ kwlaa nun sran ko ju akpi akpi ya ɔ. ” — “ À l’aube d’un nouveau monde : la sécurité des États-Unis au XXI e siècle ” (angl.), Commission américaine d’étude sur la sécurité nationale au XXI e siècle.

Afuɛ akpi blɛ uflɛ’n ti, sran’m be tru, be wun bli be, ɔ ti kɛ be wun’an lika sacilɛ, tukpaciɛ, yalɛ, nin alɛ mɔ be tru lika nun be tra laa’n sa. Be ɲin kpli yolɛ, be wiengu mɔ be lafiɛ’ɛ su’n, nin awuɛn yolɛ y’ɔ nin ninnge sɔ mun ba ɔ. Fluwa dandan nin ninnge yilɛ i wun ngwlɛlɛ silɛ annzɛ politiki yolɛ be kwlá kaci’a nzuɛn sɔ mun.

Afuɛ Akpi Blɛn Ng’ɔ́ Yó Klɔ Sran’m Be Ye’n

Laa fluwa klɛfuɛ kun wan yoo : “ Klɔ sran’n i nguan’n nunmɛn i sa nun. Ajalɛ ng’ɔ tu’n, ɔ finmɛn i. ” (Zeremi 10:23). Nán kɛ ngwlɛlɛ’n ngunmin yɛ klɔ sran lemɛn i naan w’a sie asiɛ’n su sran mun ɔn, sanngɛ kusu b’a mɛnmɛn i atin k’ɔ yo i sɔ. Sran ng’ɔ yili e’n, Zoova Ɲanmiɛn, kunngba cɛ y’ɔ le atin nin i wun ngwlɛlɛ naan w’a yi klɔ sran’m be ɲrɛnnɛn nun ɔn. — Rɔmfuɛ Mun 11:33-36 ; Sa Nglo Yilɛ 4:11.

Sanngɛ blɛ mennin nun ɔn ? I wafa sɛ y’ɔ́ yóe sɔ ɔ ? Nzɔliɛ nga be kle kɛ e mantan “ blɛ kasiɛn ” i awieliɛ’n i wun koko’n be leman nvialiɛ. An tike an Biblu’n su naan an kanngan 2 Timote 3:1-5 nun. Sran’m be nzuɛn nga be fɛ i “ lika i kekle yolɛ ” blɛ nun’n, ɔ yiyi nun kle e. Matie 24:3-14 nin Lik 21:10, 11 be kan “ blɛ kasiɛn ” i ndɛ wie. Sanngɛ blɛ sɔ nun’n, like nga be ɲin tɛ i jrɛiin’n, m’ɔ kɛn i ndɛ’n, yɛle sa nga mɔ k’ɔ fɛ i afuɛ 1914 nun be bali’n : asiɛ’n su alɛ dan mun, tukpaciɛ mun, ɔ nin asiɛ wunmuan’n su aliɛ mɔ be ɲɛnmɛn i’n.

Ɔ cɛ kan “ blɛ kasiɛn’n ” wíe. Daniɛl 2:44 wan yoo : “ Ɲanmiɛn m’ɔ o nglo lɔ’n ɔ́ síe famiɛn diwlɛ kun m’ɔ su saciman le’n [...] Ɔ́ núnnún [asiɛ’n] su famiɛn diwlɛ kun nga mun, kpɔkun i bɔbɔ ɔ́ ká lɛ tititi. ” I sɔ’n ti be dun mmua kɛnnin i kɛ Ɲanmiɛn wá táka awa kun naan ɔ́ síe asiɛ’n. Sa Nglo Yilɛ 20:4 kɛnnin i kɛ, awa sɔ’n síe asiɛ’n afuɛ lele akpi — afuɛ akpi blɛ kun ! Amun bu ninnge nga klɔ sran wunmuan’m bé ɲɛ́n i afuɛ akpi blɛ klanman sɔ nun’n, be nun kunngun’m be angunndan be nian :

Sika ndɛ’n. “ Sɛ min sran’m be kplan sua’n, bé trán be nun, sɛ be ta viɲi’n, bé dí i su mma. Be su kplanman sua be yaci manman sran wie kɛ ɔ tran nun. Be su taman waka be yaci manman sran uflɛ kɛ ɔ di i su mma. ” — Ezai 65:21, 22.

Aunkpinndiɛ. “ I blɛ sɔ nun’n, aɲinsifuɛ’m bé wún ase, kpɔkun sutrefuɛ’m bé tí sa. Blɛ sɔ nun’n, bubuwafuɛ’m bé tú kpɛ́n kɛ flete mun sa. Yɛ aklunjuɛ’n ti, bobofuɛ’m bé kpán. ” “ Kpɔkun klɔ sran wie fi su seman kɛ : ‘ N kpinndinman. ’ ” — Ezai 33:24 ; 35:5, 6, Traduction du monde nouveau.

E tranwlɛ nun. Ɲanmiɛn “ núnnún be nga be saci asiɛ’n. ” — Sa Nglo Yilɛ 11:18.

Sran’m be afiɛn ndɛ mun. “ Be sú yóman sa tɛ min oka’n su ; afin asiɛ’n wunmuan’n su klɔ sran’m bé sí Zoova lelele. ” — Ezai 11:9 NW.

Sran kpanngban’m be lafi Biblu’n nun ndɛ ngalɛ’m be su, kpɔkun maan be wla boman be wun be ɲrun lɔ sa nga wá bá’n ti. I sɔ’n ti, sɛ sa to be’n, be kwla mian be ɲin be kpli be bɔbɔ be ti. Wafa sɛ yɛ Biblu’n kwla kle amun atin’n amun nguan cɛn nun ɔn ?

Like silɛ’n ng’ɔ man nguan’n !

Fluwa dandan silɛ’n ɔ nin ninnge’m be yilɛ’n i wun ngwlɛlɛ silɛ’n, cɛn wie ɔ kwla bo e nuan! Sanngɛ klɔ sran’m be like silɛ’n w’a manman sran kpanngban’m be aunjuɛ nin fɔunndi. Like silɛ kunngba cɛ ng’ɔ́ yó i sɔ like’n, be kɛn i ndɛ Biblu’n nun, Zan 17:3 nun, be klɛ kɛ : “ Kɛ be se kɛ be ɲán anannganman nguan’n, i bo’n yɛle kɛ be sí wɔ mɔ ɔ kunngba cɛ yɛ a ti Ɲanmiɛn’n nin Zezu Klist mɔ a sunmɛnnin i’n. ”

Like silɛ sɔ’n o Biblu’n nun. Sran kpanngban’m be kan Biblu’n i ndɛ sɔ, sanngɛ be nga be bɔbɔ be kanngan nun’n b’a sɔnman. Yɛ amun li ? Nanwlɛ ti kpa, Biblu’n nun kannganlɛ ti junman kekle kpa. Sanngɛ be ɲɛn’ɛn i wunsu like. Fluwa kunngba cɛ nga “ Ɲanmiɛn fɛ i nun ndɛ kwlaa mannin sran mun kɛ be klɛ’n, be fa kle like, be fa tu fɔ, be fa kle sran mun lele be wun nanwlɛ’n, be fa kle sa nga be yo ɔ, ɔ ti kpa’n ”, yɛle Biblu’n — 2 Timote 3:16.

I sɔ’n ti amún yó sɛ yɛ amún sí Biblu’n nun ninnge mun ɔn ? Ngue ti yɛ amun kplinman su kɛ Zoova i Lalofuɛ’m be uka amun ɔn ? Be to sran kpanngban’m be bɔbɔ be awlo’m be nun be ko kle be like, be demɛn i ti sika. Sɛ bé úka amun i sɔ yolɛ nun’n, bé fá fluwa fanunfanun nga be nian Biblu’n nun yɛ be klɛli’n, fluwa kɛ Ngue like yɛ Ɲanmiɛn Kpli kunndɛ kɛ e yo ɔ ? sa. Biblu’n su kosan nga amun usa’n, ɔ sɔ su yɛiin kle amun, kosan kɛ: Wan yɛle Ɲanmiɛn Kpli ? Ngue like yɛ Ɲanmiɛn wan ɔ́ yóe asiɛ’n su ɔ ? Ngue yɛle Ɲanmiɛn i Sielɛ Blɛ’n ? Wafa sɛ yɛ Biblu’n kwla yo amun awlobo tranlɛ’n i ye ɔ ?

Sɛ amun klo kɛ Zoova i Lalofuɛ kun to amun awlo lɔ’n, amun kwla klɛklɛ ngua wa fluwa sin’n su. Be kwla kan Ɲanmiɛn afuɛ akpi Sielɛ Blɛ’n i nun ndɛ wie ekun be kle amun !

□ N klo kɛ be blɛ min fluwa’n Ngue like yɛ Ɲanmiɛn Kpli kunndɛ kɛ e yo ɔ ?

□ Amun to min awlo lɔ, Biblu’n nun ninnge suanlɛ’n ti

[Ja ngua lɛ ndɛ’n]