?Wan yɛle atin bofuɛ’n?

“Atin bofuɛ’n” yɛle sran ng’ɔ bo atin mɔ sran uflɛ fa su’n. Zezi ti kɛ atin bofuɛ kun sa. Afin Ɲanmiɛn sunmɛnnin i asiɛ’n su wa naan ɔ fɛ i blɛ’n kwlaa bo jasin fɛ’n, naan sran’m be wun nguan’n i atin’n. (Matie 20:28) Andɛ’n, Zezi i sɔnnzɔnfuɛ’m be yo sɔ wie. Be fa blɛ kpanngban be kle sran’m be like naan be ‘kaci Zezi i sɔnnzɔnfuɛ.’ (Matie 28:19, 20) Be nga be kwla yo atin bofuɛ’n, be yo atin bofuɛ.

Atin bofuɛ’n bo jasin fɛ’n blɛ kwlaa nun. Zoova i Lalofuɛ kwlaa ti jasin fɛ’n bofuɛ. Sanngɛ be nun wie’m be siesie be wun naan b’a bo jasin fɛ’n anglo kwlaa nun b’a di dɔ 70. Be ti titi atin bofuɛ. Kɛ ɔ ko yo naan b’a kwla yo i sɔ’n, be mian be ɲin naan be bɔbɔ be junman liɛ’n w’a faman be blɛ wunmuan’n. Be fa be nun wie kɛ be yo ngunmin atin bofuɛ lika nga be le jasin bofuɛ’m be awuliɛ lɔ’n. Be liɛ’n, anglo kwlaa nun’n, be di dɔ 130. Sɛ be klo’n, be kwla di dɔ sɔ’n tra su. Be lafi su kɛ Zoova nían be lika, i ti be kunndɛman ninnge kpanngban. (Matie 6:31-33; 1 Timote 6:6-8) Be nga be kwlá boman jasin fɛ’n blɛ kwlaa nun’n, be kwla yo cɛn kunngun atin bofuɛ. Be liɛ’n, anglo kun nun’n, be bo jasin fɛ’n be di dɔ 30 annzɛ 50.

Atin bofuɛ’n klo Ɲanmiɛn nin sran. Kɛ Zezi sa’n, e wun i kɛ andɛ’n, sran kpanngban be wla w’a bo be wun, afin be siman like nga Ɲanmiɛn kunndɛ kɛ ɔ́ yó’n. (Mark 6:34) Sanngɛ Zoova i Lalofuɛ’m be liɛ’n, be si like nga ɔ kwla cici be wla ikisa naan b’a lafi su kɛ e ɲrun lɔ’n yó kpa’n. Atin bofuɛ’n klo be i wiengu. I ti’n, ɔ wlɛ i wun ase kan Ɲanmiɛn ndɛ’n kle sran kwlaa. (Matie 22:39; 1 Tɛsalonikfuɛ Mun 2:8) I sɔ’n yo maan i Ɲanmiɛn sulafilɛ’n i bo’n wla ase kpa, yɛ ɔ nin Ɲanmiɛn be afiɛn’n mantan kpa, kpɛkun ɔ di aklunjuɛ dan.​—Sa Nga Be Yoli’n 20:35.

• ?Sɛ be waan a kan atin bofuɛ’n i ndɛ’n, á sé sɛ?

• ?Ngue yɛ ɔ su atin bofuɛ’m be bo mɔ be di blɛ kwlaa nun junman’n niɔn?