Sran ng’ɔ yo atin bofuɛ’n ɔ nin Ɲanmiɛn be afiɛn mantan kpa ekun
“Sɛ e bo e flɛ e Nyanmiɛn’n, ɔ ti kpa.”—JUE. 147:1.
AMUN TƐ KOSAN NGA’M BE SU
?Wafa sɛ yɛ atin bolɛ junman’n ti’n e nin Zoova e afiɛn mantan kpa ekun ɔn?
?Sɛ a ti atin bofuɛ’n, ngue yɛ á yó naan w’a kwla di junman kpa sɔ’n i titi ɔ?
?Sɛ a timan atin bofuɛ’n, ngue yɛ á yó naan w’a kaci i sɔfuɛ ɔ?
1, 2. (a) ?Kɛ be klo sran kun mɔ be bu i akunndan kpɛkun be kɛn i ndɛ’n, i bo gua sɛ? (An nian desɛn klikli’n.) (b) ?Kosan benin mun yɛ like suanlɛ nga wá tɛ́ be su ɔ?
KƐ BE klo sran kun mɔ be bu i akunndan kpɛkun be kɛn i ndɛ’n, be nin sran sɔ’n be afiɛn mantan kpa ekun. I kunngba’n yɛle wafa nga e nin Ɲanmiɛn Zoova e nanti’n. Kɛ e bu i akunndan mɔ e kɛn i ndɛ’n, e nin i e afiɛn mantan kpa ekun. I sɔ yɛ i nun mɔ Davidi ti bua sunianfuɛ’n, ɔ yoli ɔ. Kɔnguɛ sunman’n, ɔ mɛnnin i ɲin su niannin nzraama mun, yɛ ɔ buli e Yifuɛ Ɲanmiɛn i dan m’ɔ ti’n i akunndan. Ɔ maan ɔ seli kɛ: “Kɛ n nian nglo lɔ ninnge bɔ a yili be’n, kɛ n nian anglo nin nzraama bɔ a sieli be lɔ’n, n usa min wun kɛ: ?Wan yɛlɛ sran bɔ maan ɔ wla ko kpɛn i su ɔ? ?Wan yɛlɛ klɔ sran bɔ maan i ndɛ ko lo wɔ sɔ ɔ?” (Jue. 8:4, 5) Kɛ akoto Pɔlu buli wafa nga Zoova yó mɔ Klistfuɛ wie’m bé kɔ́ ɲanmiɛn su’n i akunndan’n, i sɔ’n boli i nuan. Ɔ maan ɔ seli kɛ: “Eee, Nyanmiɛn ti anyanbeunfuɛ o! Ɔ si ngwlɛlɛ o! Ɔ si sa’n kwlakwla kpan!”—Rɔm. 11:17-26, 33.
2 Kɛ é bó jasin fɛ’n, e bu Zoova i akunndan yɛ e kɛn i ndɛ. I sɔ mɔ e yo’n ti’n, e nin i e afiɛn mantan kpa. Atin bofuɛ kpanngban be sieli i nzɔliɛ sɔ. Be waan kɛ mɔ be fa blɛ kpanngban be bo jasin fɛ’n ti’n, be klo Ɲanmiɛn kpa ekun. Sɛ a ti atin bofuɛ annzɛ a su bu i wie yolɛ akunndan’n, like suanlɛ nga ɔ́ wá úka wɔ kpa. Afin ɔ́ wá tɛ kosan nga’m be su: ?Ngue ti yɛ sran ng’ɔ yo atin bofuɛ’n ɔ nin Zoova be afiɛn mantan kpa ekun ɔn? ?Ngue yɛ atin bofuɛ kun yó naan w’a yaciman junman kpa sɔ’n i dilɛ ɔ? ?Ngue yɛ Klistfuɛ kun yó naan w’a kaci atin bofuɛ wie ɔ? Maan e dun mmua tɛ kosan klikli’n su. Yɛle kɛ: ?Ngue ti yɛ sran ng’ɔ yo atin bofuɛ’n ɔ nin Zoova be afiɛn mantan kpa ekun ɔn?
NINNGE NGA TI YƐ SRAN NG’Ɔ YO ATIN BOFUƐ’N Ɔ NIN ƝANMIƐN BE AFIƐN MANTAN KPA EKUN’N
3. ?Kɛ e kan ninnge kpakpa nga Ɲanmiɛn Sielɛ’n wá yó be’n be ndɛ’n, wafa sɛ yɛ i bo gua man e ɔ?
3 Kɛ e kan ninnge kpakpa nga Ɲanmiɛn Sielɛ’n wá yó be’n be ndɛ’n, e nin Zoova e afiɛn mantan kpa ekun. ?Kɛ á bó jasin fɛ’n, Biblu’n nun ndɛ mma onin yɛ a ta be nun kanngan ɔn? Atrɛkpa’n yɛle Jue Mun 37:10, 11 annzɛ Daniɛl 2:44 annzɛ Zan 5:28, 29 annzɛ kusu Sa Nglo Yilɛ 21:3, 4. Kɛ e kanngan ndɛ mma sɔ’m be nun kle sran mun’n, e bɔbɔ e wla kpɛn su kɛ Ɲanmiɛn ti kpa dan, naan “like kpa kwlaa nga be fa man sran’n, ɔ nin like kpa kwlaa nga be nyɛn i’n, be fin” i. Ɔ maan, e fa e wun mɛntɛn i kpa ekun.—Zak 1:17.
4. ?Kɛ é bó jasin’n, ngue yɛ e sie i nzɔliɛ m’ɔ kle kɛ Ɲanmiɛn ti kpa dan ɔn?
4 Kɛ é bó jasin fɛ’n mɔ e wun kɛ sran’m be leman Ɲanmiɛn ninnge mun wie’n, e wun kɛ e liɛ su ti ye. Andɛ sran’m be ti kɛ laa Ninivu lɔfuɛ mun sa, be wunman be ɲrun nin be sin. Be ti kɛ nnɛn mɔ be lɛman sunianfuɛ’n sa. Ɔ maan be wunman be wun fɛ kaan sa. Be nga be waan be ti asɔnunfuɛ bɔbɔ’n, be siman Ɲanmiɛn Ndɛ’n nun kpa. (An kanngan Zonas 4:11 nun.) Sanngɛ e liɛ’n, e timan sɔ wie. Afin kɛ é bó jasin fɛ’n cɛ́ kɔ́’n, e wun i wlɛ kɛ Zoova nian e lika kpa. Yɛle kɛ ɔ kle e like ng’ɔ fata kɛ e si i naan y’a su i’n. (Eza. 65:13) Sanngɛ nán e ngunmin yɛ Zoova nian e lika ɔ. Afin sran kwlakwla nga be di i ninnge’m be yalɛ’n, ɔ yia be kɛ be fa be wun mɛntɛn i naan be wla gua ase. I lɛ’n kle kɛ Zoova ti kpa dan.—Ngl. 22:17.
5. ?Kɛ sa’m be o e su mɔ e kle sran mun Ɲanmiɛn Ndɛ’n, i bo gua sɛ?
5 Kɛ e kle sran mun Ɲanmiɛn Ndɛ’n, i sɔ’n uka e naan y’a kokoman ngboko. I wie yɛle Triza m’ɔ ti titi atin bofuɛ’n i liɛ’n. Kɛ i si nin i nin be yrali’n, i wla’n boli i wun dan. Cɛn kun liɛ’n, i wla m’ɔ boli i wun’n ti’n, jasin fɛ’n i bolɛ w’a yomɛn i fɛ. Sanngɛ, ɔ miɛnnin i ɲin ko kleli ba kanngan nsan be Biblu’n nun like. Ba sɔ’m be si’n yacili be, ɔ tu kpɛnnin. Yɛ be ɲrun kpɛnngbɛn yasua’n kleman be yalɛ aɔwi. Ɔ maan be ɲrɛnnɛn liɛ’n, be kanman. Kɛ Triza fali sa ng’ɔ o i su sunnzunnin ba sɔ’m be liɛ’n, ɔ seli kɛ: ‘Yoo, kannzu min liɛ’n flunman. Kɛ ń klé be like’n, ɔ yo be fɛ saa, yɛ srilɛ o be nuan. Cɛn sɔ nun’n, Zoova maan ba kanngan sɔ’m be cicili min wla.’
6, 7. (a) ?Kɛ e kle sran’m be Biblu’n nun like’n, ye benin yɛ e di ɔ? (b) ?Kɛ e wun wafa nga Ɲanmiɛn maan sran nga e kle i Ɲanmiɛn Ndɛ’n nun like’n kaci i nzuɛn’n, ɔ yo e sɛ?
6 Kɛ e kle sran mun Biblu’n nun ndɛ m’ɔ ti nanwlɛ’n, e lafi Ɲanmiɛn su kpa ekun. Akoto Pɔlu blɛ su’n, Zuifu’m be nantiman like nga be bɔbɔ be kle’n su. Ɔ maan, Pɔlu klɛli be fluwa kɛ: “?Amun bɔ an kle sran wie’m be like’n, amun bɔbɔ an kle-man amun wun wie?” (Rɔm. 2:21) Atin bofuɛ’m be bo jasin fɛ’n kle sran kpanngban yɛ be kle sran kpanngban be Biblu’n nun like. Sanngɛ, kɛ ɔ ko yo naan b’a si like kle kpa’n ti’n, be dun mmua kle be bɔbɔ be wun like. Yɛle kɛ, be dun mmua siesie be wun, be kunndɛ ndɛ nin kosan wie’m be bo’n. Aniaan bla atin bofuɛ kun mɔ be flɛ i Jeni waan: “Blɛ kwlaa nga n kle sran kun i Biblu’n nun like’n, n wun like sɔ’n i wlɛ ekun. Ɔ maan n lafi su kpa ekun.”
7 Kɛ e kle sran’m be Biblu’n nun like mɔ be kaci be nzuɛn’n, e wun i wlɛ kpa ekun kɛ Ɲanmiɛn i ngwlɛlɛ’n leman wunsu. (Eza. 48:17, 18) Ɔ maan e kunndɛ kɛ é fá atin nga Ɲanmiɛn kle e’n su titi. Aniaan bla Adriyana m’ɔ ti atin bofuɛ’n seli kɛ: “Kɛ sran’m be fa be klun klo atin’n, i bo guaman kpa. Sanngɛ kɛ be lo be wun man Zoova’n, be ɲan i su mmlusuɛ be ja nun lɛ.” Aniaan bian atin bofuɛ kun ekun m’ɔ suan Fili’n waan kɛ ɔ wun wafa nga Zoova maan sran kun kaci i nzuɛn’n, i nuan bo i wun dan.
8. ?Kɛ e nin aniaan mun e bo jasin fɛ’n, i bo gua sɛ?
8 Kɛ e nin e niaan mun e bo jasin fɛ’n, i sɔ’n wla e fanngan. (Nya. 13:20) Atin bofuɛ sunman be nin be wiengu be fa blɛ kpanngban be bo jasin fɛ’n likawlɛ. Ɔ maan be kwla ‘wla be wun fanngan’ sa sunman nun. (Rɔm. 1:12; an kanngan Nyanndra Mun 27:17 nun.) Aniaan bla atin bofuɛ kun suan Liza. Ɔ seli kɛ: “Min junman su lɔ’n, sran’m be kunndɛ dunman yɛ be ɲin ci be wiengu. Cɛn kwlakwla be kan sran wun ndɛ tɛ yɛ be ijɔ tɛtɛ. Asa ekun’n, like kwlaa nga be kwla yo naan b’a ɲan sa su’n, yɛ be kunndɛ ɔ. Kɛ a ti Klistfuɛ mɔ a nianman be ayeliɛ’n su’n, be yo wɔ finfin cɛn kunngun. Sanngɛ kɛ min nin aniaan mun e bo jasin fɛ’n, min wun kpaja min. Ɔ maan kɛ n kɔ awlo’n, n wunman kɛ m’an fɛ.”
9. ?Kɛ aniaan kun nin i yi’n annzɛ ɔ nin i wun’n be ti atin bofuɛ’n, wafa sɛ yɛ i bo gua man be ɔ?
9 Kɛ aniaan kun nin i yi’n annzɛ ɔ nin i wun’n be ti atin bofuɛ’n, i sɔ’n uka be maan be aja’n yo ye kpa. (Aku. 4:12) Aniaan bla Mandelɛni nin i wun’n, be yo atin bofuɛ likawlɛ. Ɔ seli kɛ: “Like nga e yoli i jasin bolɛ nun annzɛ Biblu’n nun ndɛ nga e kanngannin mɔ e kwla fa bo jasin fɛ’n, min nin min wun’n e koko su yalɛ. Afuɛ kwlaa nga e yoli atin bofuɛ’n, e afiɛn mantannin kpa.” Triza mɔ e dun mmua kɛnnin i ndɛ’n kusu seli kɛ: “Like nga min nin min wun’n e ko yo naan y’a faman kalɛ’n, yɛ e yo ɔ. Ɔ maan, e kpankpanman sika ti. Sanngɛ e bo jasin fɛ’n likawlɛ, e ko nian sran’m be osu, yɛ e kle be Biblu’n nun like. I sɔ’n uka e maan e afiɛn mantan kpa.”
10. ?Kɛ e dun mmua di Zoova i junman’n mɔ e wun kɛ ɔ jran e sin’n, i bo gua sɛ?
10 Kɛ e dun mmua di Zoova i junman liɛ’n mɔ e wun kɛ ɔ tɛ e srɛlɛ’m be su yɛ ɔ jran e sin’n, e lafi i su kpa ekun. E si kɛ Zoova i sufuɛ’m be kwlakwla be lafi i su. Sanngɛ atin bofuɛ’m be wun i wlɛ kpa ekun kɛ sɛ b’a lafiman Zoova su’n, be su kwlá kaman atin bofuɛ. (An kanngan Matie 6:30-34 nun.) I wie yɛle aniaan kun mɔ be flɛ i Kɛti i liɛ’n. Ɔ nin i yi’n be ti atin bofuɛ, kpɛkun ɔ ti akpasua su nianfuɛ’n i ja nunfuɛ wie. Cɛn kun’n, be seli be kɛ be ko nian asɔnun kun lika. Lika sɔ’n nin be tranwlɛ’n i afiɛn’n ti dɔ nɲɔn nin sin. Be kplinnin su kɛ bé kɔ́. Sanngɛ sɛ be kɔ’n, be su kwlá saman be sin. Afin be loto’n i nun sannzi’n w’a sɔnman. Asa ekun’n, wa nin lemɔcuɛ kun yɛ bé ɲán sika ɔ. I sɔ’n ti’n, Kɛti i akunndan’n wa yoli nɲɔnnɲɔn. Ɔ wunmɛn i wlɛ sɛ ajalɛ kpa yɛ be fali o. I agualiɛ su’n, be srɛli Ɲanmiɛn. Be fa be wun wlɛli i sa nun kɛ ɔ nian be lika. Kɛ be kɔlɛ’n juli’n, aniaan bla kun flɛli be kɛ ɔ́ mán be like kun. Bé nían ɔn, sika yɛ w’a fa blɛ be ɔ. Ɔ ju be sin salɛ sɛsɛsɛ. Kɛti waan: “Kɛ sa kɛ ngalɛ sa to wɔ kpɛ sunman’n, a wun i wlɛ weiin kpa kɛ Zoova o lɛ sakpa naan ɔ nian sran lika.”
11. ?Kannzɛ kekle’n tɔ atin bofuɛ’m be su wie’n, sanngɛ mmlusuɛ benin yɛ be ɲɛn i ɔ?
11 Atin bofuɛ’m be sieli i nzɔliɛ kpɛ sunman kɛ, kɛ be fa be wun mantan Zoova mɔ be di i junman’n kpa’n, be di ye dan. (Mml. 28:2) Sanngɛ, nán kɛ afɛ’n tɔman be su wie ti ɔ. Fɔ’n o be nun, yɛ mɛn’n ti kekle. Ɔ maan wie liɛ’n, be nun wie’m be yaci atin bolɛ junman’n i kan. Kusu’n, blɛ sunman be kwla wun sa ng’ɔ o be su’n i trawlɛ, annzɛ be kwla yo naan sa w’a ɲanman be. ?Ngue yɛ atin bofuɛ kun yó naan w’a yacimɛn i junman kpa sɔ’n i dilɛ ɔ?
NINNGE NGA Á YÓ NAAN W’A YACIMAN ATIN BOLƐ JUNMAN’N
12, 13. (a) ?Sɛ atin bofuɛ kun kwlá dimɛn i dɔ’n, ngue yɛ ɔ fata kɛ ɔ yo ɔ? (b) ?Ngue ti yɛ ɔ ti cinnjin kpa kɛ atin bofuɛ kun kanngan Biblu’n nun, ɔ suan nun like naan ɔ bu i su akunndan ɔn?
12 Atin bofuɛ’m be ɲanman be ti mlɔnmlɔn. Sɛ b’a sieman like kun i yolɛ blɛ’n i kpa’n, be su kwlá yoman. (1 Kor. 14:33, 34, 40) Ɔ maan, sɛ atin bofuɛ kun kwlá dimɛn i dɔ’n, ɔ fata kɛ ɔ bu like ng’ɔ fɛ i blɛ’n yo’n i akunndan kpa nian. (Efɛ. 5:15, 16) Maan ɔ usɛ i wun kɛ: ‘?Dɔ nɲɛ yɛ n fa yiyi min ɲin su ɔ? ?Ngue yɛ ɔ fata kɛ n yaci i yolɛ ɔ? ?Ɔ fata kɛ n kaci min junman dilɛ blɛ’n?’ Ɔ fata kɛ atin bofuɛ’m be fɛ i sɔ kosan’m be usa be wun titi. I liɛ’n, sɛ ɔ fata kɛ be kaci be sa ninnge wie’m be nun’n, bé wún i wlɛ.
13 Atin bofuɛ m’ɔ o sa’n, ɔ fata kɛ ɔ kanngan Biblu’n nun cɛn kwlakwla, ɔ suan nun like kpɛkun ɔ bu i su akunndan. Nanwlɛ, ɔ fata kɛ ɔ niɛn i wun su naan blɛ ng’ɔ sieli i kɛ ɔ́ fá yó like ng’ɔ ti cinnjin kpa’n, w’a fa yoman like uflɛ. (Fil. 1:10) Maan e fa atin bofuɛ kun i sunnzun ase e nian. Ɔ boli jasin fɛ’n lele nnɔsua. Nnɔsua sɔ nun’n, ɔ fata kɛ ɔ siesie i wun naan aɲia’m be bo lɔ’n, w’a kwla tɛ kosan’m be su annzɛ w’a kwla di i junman’n. Sanngɛ kɛ ɔ ju awlo lɔ cɛ’n, ɔ o fluwa nga be klɛ blɛli i’n be kannganlɛ’n su. I sin’n, ɔ sɔ i ɔrdinatɛli’n. Ɔ kɛnngɛn i nun ndɛ nga be klɛ blɛli i ɛntɛnɛti su’n be nun, yɛ ɔ tɛ be su. Kpɛkun ɔ niannian ɛntɛnɛti nun, sɛ b’a ti like nga i waan ɔ́ tó’n i gua’n su o. I bli m’ɔ́ bó i sa’n, dɔ nɲɔn su wa sin, yɛ ɔ nin a boman like suanlɛ’n bo. ?I ayeliɛ sɔ’n i tɛ lika’n yɛle onin? Maan e fa sran ng’ɔ si wanndilɛ akplowa titi’n i sunnzun ase e fa tɛ su. Sɛ i waan ɔ́ yó kpinndinkpindin naan w’a kwla wanndi titi’n, ɔ fata kɛ cɛn kwlaa ɔ di like ng’ɔ kwla mɛn i wunmiɛn’n. Like kunngba’n yɛ ɔ fata kɛ atin bofuɛ’m be yo ɔ. Sɛ be waan bé ká atin bofuɛ titi’n, ɔ fata kɛ be suan Ɲanmiɛn Ndɛ’n i nun like titi.—1 Tim. 4:16.
14, 15. (a) ?Ngue ti yɛ ɔ fataman kɛ atin bofuɛ’m be yo aɲinkplifuɛ ɔ? (b) ?Sɛ kekle’n tɔ atin bofuɛ’m be su’n, ngue yɛ ɔ fataman kɛ be yo ɔ?
14 Atin bofuɛ nga i waan ɔ́ dí aklunjuɛ’n, ɔ fata kɛ ɔ miɛn i ɲin naan w’a yoman aɲinkplifuɛ. Zezi seli i sɔnnzɔnfuɛ mun kɛ be ɲinma’n yo kpa. (Mat. 6:22) Zezi bɔbɔ yoli sɔ naan i ɲin w’a tranman like uflɛ su. Ɔ maan, ɔ seli kɛ: “Solongbi’m be lɛ kunman be la nun, yɛ anunman’m bɔ be tu sin’n be lɛ lawlɛ, sanngɛ m bɔ n kacili Sran’n, n lɛ-man lika bɔ n la nun n de wunmiɛn bɔ kan-an.” (Mat. 8:20) Atin bofuɛ nga be nian Zezi i ayeliɛ’n su’n, be wun i wlɛ kɛ sɛ be lɛ ninnge kpanngban’n, be su ɲanman be ti. Afin ninnge sɔ’m be lika nianlɛ’n fa blɛ.
15 Atin bofuɛ’m be si kɛ be kpa traman be wiengu Klistfuɛ mun. Be wun i wlɛ kɛ Ɲanmiɛn m’ɔ ti aklunyefuɛ dan’n yɛ ɔ mannin be junman’n i wun atin ɔn. Ɔ maan, ɔ fata kɛ be lafi Zoova su naan b’a kwla di be junman’n titi. (2 Kor. 4:7) Kekle’n kwla tɔ be su sɔ. (Jue. 34:20) Sanngɛ kɛ ɔ yo sɔ’n, ɔ fataman kɛ be ka lɛ be yaci be junman i dilɛ. Ɔ fata kɛ be fa ndɛ’n wla Zoova sa nun naan ɔ kle be atin’n. (An kanngan Jue Mun 37:5 nun.) Kɛ be wun wafa nga Ɲanmiɛn nian be lika’n, be fa be wun mɛntɛn i kpa ekun.—Eza. 41:10.
?YƐ SƐ A YO ATIN BOFUƐ WIE’N NIN?
16. ?Sɛ a kunndɛ kɛ á yó atin bofuɛ’n, ngue yɛ ɔ fata kɛ a yo ɔ?
16 Zoova yra atin bofuɛ’m be su kpa. Sɛ a kunndɛ kɛ á yó atin bofuɛ naan Zoova yra ɔ su wie’n, kan kle i. (1 Zan 5:14, 15) Asa ekun’n, kan kle be nga be ti atin bofuɛ’n. Kpɛkun yo ninnge nga mɔ maan á kwlá yó atin bofuɛ’n. I sɔ yɛ Kɛti nin i yi Erika be yoli ɔ. Kɛ be jali’n, be dili junman, be toli loto nin sua kɛ be wiengu mun sa. Be seli kɛ: “E buli i kɛ ninnge sɔ’m bé wá mán e aklunjuɛ sanngɛ e lakali e wun.” Kɛ ɔ́ kɔ́ i ɲrun’n, Kɛti i junman’n wa sacili. Ɔ maan ɔ wa kacili cɛn kunngun atin bofuɛ. I waan: “Kɛ n kacili atin bofuɛ’n, n wa wunnin i wlɛ kɛ jasin fɛ bolɛ junman’n ɔ man aklunjuɛ dan.” Kɛti nin i yi be wa trali aniaan kun m’ɔ nin i yi’n be ti atin bofuɛ’n be janvuɛ. Aniaan sɔ’m be kleli be kɛ sɛ be ɲinma yo kpa naan be kaci atin bofuɛ’n, bé dí ye fanunfanun. ?Ngue yɛ Kɛti nin Erika be yoli ɔ? Be waan: “Ninnge nga e kunndɛ kɛ é yó i Ɲanmiɛn i sulɛ nun’n, e klɛli be e fa tɛli i e flizidɛli’n su. Kpɛkun kɛ e yo be nun kun’n, e sie i nzɔliɛ.” Kɛ ɔ́ kɔ́ i ɲrun’n, be wa kacili atin bofuɛ.
17. ?Ngue ti yɛ ɔ fata kɛ a nian sɛ a kwla yo atin bofuɛ wie’n niɔn?
17 ?Yɛ sɛ a yo atin bofuɛ wie’n nin? Atrɛkpa’n, a se ɔ wun kɛ a kwlá yoman atin bofuɛ kɛ é sé yɛ’n. Sanngɛ bu i akunndan kpa fa wlɛ i srɛlɛ nun. Kpɛkun tu ɔ klun bo jasin fɛ’n i kpa. Sɛ a yo sɔ’n, a nin Zoova be afiɛn mántan kpa. Sɛ a srɛ Zoova’n, atrɛkpa á wún kɛ a kwla yaci ninnge wie’m be yolɛ naan w’a yo atin bofuɛ. Sɛ a kaci atin bofuɛ’n, á dí aklunjuɛ dan. Ɔ maan ninnge nga a yacili be’n, a su buman be like fi. Nanwlɛ, ɔ klun jɔ́ afin á fá ɔ wun mán Ɲanmiɛn kɛ ɔ sie wɔ, kpɛkun á tú ɔ klun úka ɔ wiengu mun. (Mat. 6:33) Asa ekun’n, wɔ akunndan trán Zoova su titi yɛ á kɛ́n i ndɛ kpa trá laa. Ɔ maan, á kló i kpa yɛ i kusu i klun jɔ́.
[Foto, bue 27]
[Foto mun, bue 29]
Be nga be ti atin bofuɛ wakawaka’n, be di aklunjuɛ dan. (An nian ndɛ kpɔlɛ 9 nun.)