Zoova i wla w’a fiman Zozɛfu su le

Kɛ Zozɛfu o bisua’n, Faraɔn m’ɔ ti Ezipti famiɛn’n, ɔ cɛnnin laliɛ wie mun. Sran fi kwlá tuman laliɛ sɔ’m be bo. Sanngɛ Faraɔn i sufuɛ kun seli i kɛ Zozɛfu kwla tu i laliɛ’m be bo. Ɔ maan Faraɔn sunmannin sran kɛ be ko flɛ Zozɛfu.

Faraɔn usɛli i kɛ: ‘?A kwla tu min laliɛ’m be bo?’ Zozɛfu seli Faraɔn kɛ: ‘Sran mun bé wá ɲán aliɛ kpanngban Ezipti mɛn’n nun afuɛ nso. I sin’n, awe’n wá kpɛ́n afuɛ nso. Fa sran kun m’ɔ si ngwlɛlɛ’n naan ɔ fa aliɛ nga bé ɲɛ́n i’n i wie sie. I liɛ’n, awe su kunman ɔ sran mun.’ Faraɔn tɛli i su kɛ: ‘Wɔ yɛ ń fá-ɔ! Ezipti mɛn’n nun wa’n, min yɛ n ti famiɛn’n niɔn, kpɛkun wɔ yɛ a ba min sin-ɔn.’ ?Ngue ti yɛ Zozɛfu kwla tuli Faraɔn i laliɛ’m be bo-ɔ? Zoova yɛ ɔ ukɛli i-ɔ.

Afuɛ nso nga fie su ninnge’m be yoli ye’n, Zozɛfu fali aliɛ’n wie sieli. I sin’n, kɛ nga Zozɛfu fa kannin’n sa’n, awe’n kpɛnnin asiɛ wunmuan’n su. Sran mun be fin lika’n kwlaa nun be ba aliɛ tolɛ Zozɛfu sa nun. Kɛ Zozɛfu i si Zakɔbu tili i kɛ aliɛ o Ezipti lɔ’n, ɔ sunmɛnnin i mma mun be nun blu kɛ be wɔ lɔ be ko to aliɛ.

Kɛ Zakɔbu i mma mun be toli Zozɛfu lɔ’n, ɔ ka lɛ wunnin be wlɛ. Sanngɛ Zozɛfu i niaan mun b’a wunmɛn i wlɛ. Be kotoli i bo kɛ nga i kaan nun’n ɔ fa wunnin i laliɛ nun’n sa. Zozɛfu waan ɔ́ nían sɛ i niaan mun b’a kaci-o. I sɔ’n ti’n, ɔ seli be kɛ: ‘Amun ti nvle kpla nianfuɛ. Amun bali lika nga e kpɔfuɛ’m be kwla wlu lɛ’n be nzɔliɛ sielɛ.’ Be tɛli i su kɛ: ‘Cɛcɛ-o! E si wuli e blu-nin-nɲɔn (12), yɛ e fin Kanaan. E nun kun wuli, yɛ kasiɛn’n kali e si wun lɔ.’ Zozɛfu seli be kɛ: ‘Amun fa amun sinma kan’n be bla. I liɛ’n, n kwla lafi ndɛ nga amun kan’n su.’ Kɛ ɔ yoli sɔ’n, be sali be sin be si wun lɔ.

Kɛ aliɛ nga Zakɔbu i mma mun be ko fali’n wieli’n, ɔ sunmannin be Ezipti lɔ ekun. Kɛ bé kɔ́’n, be fali Bɛnzamɛn m’ɔ ti be kasiɛn’n be ɔli. Zozɛfu waan ɔ́ sɛ́ i niaan mun nían. Ɔ fɛli i sika klowa’n wlɛli i Bɛnzamɛn i aliɛ bajɛ’n nun, kpɛkun ɔ seli i niaan mun kɛ be wuali klowa’n. Kɛ Zozɛfu i junman difuɛ mun be wunnin klowa’n Bɛnzamɛn i bajɛ’n nun’n, ɔ boli Zozɛfu i niaan’m be nuan. Be seli Zozɛfu kɛ ɔ yaci Bɛnzamɛn lɛ naan ɔ tu be bɔbɔ be fɔ.

Zozɛfu wunnin i wlɛ kɛ i niaan’m b’a kaci. I sɔ’n ti’n, w’a kwlá trɛmɛn i awlɛn kun. Ɔ sunnin kpa liɛ su naan w’a se be kɛ: ‘Amun niaan Zozɛfu’n, yɛle min! ?Min si te o nguan nun?’ I niaan’m be nuan boli be wun. Sanngɛ ɔ seli be kɛ: ‘Nán amun koko sa nga amun yoli min’n ti. Ɲanmiɛn yoli maan n bali wa naan amun-a wuman. Amun wɔ ndɛndɛ ko fa min si bla.’

Be ko kannin ndɛ fɛ’n kleli be si naan b’a fɛ i b’a wɔ Ezipti. Zozɛfu nin i si mɔ be wunnin be wun w’a cɛ’n, be o likawlɛ siɛn’n.