Amun kle amun mma’m be like

?Ɔ ɲin w’a blo ɔ wiengu wun le? Zozɛfu i niaan’m be ɲin bloli i wun

Ń WÁ kán be ɲin m’ɔ blo sran wun’n, i ndɛ ń klé ɔ naan a wun i bo. Wie liɛ’n be kan sran wie i wun i ndɛ kpakpa. Be waan ɔ si ngwlɛlɛ, ɔ ti klanman naan ɔ ti sran kpa. ?I sɔ mɔ be kan’n ti’n, i klolɛ’n yoli kekle mannin ɔ?a— Sɛ sran kun i ɲin blo sran kun wun’n, kɛ ɔ yo sɔ ɔ.

Sɛ awlo kun nun’n siɛ’n nin niɛn’n be klo be wa kun tra kun’n, aɲinblɔɛ’n kwla wlu ba sɔ’m be afiɛn. Biblu’n kan awlobo kun mɔ aɲinblɔɛ’n ti’n, sa dan tɔli nun’n i ndɛ. Wafa nga sa sɔ’n sanngannin be awlo’n, é wá fá e ɲin e sie su yɛ é wún afɔtuɛ nga i sɔ’n man e’n.

Zakɔbu i mma’m be blu nin kun su’n yɛle Zozɛfu. Zozɛfu sɔ’n i niaan’m be ɲin cili i. ?A si sa ti’n?— Kɛ mɔ be si Zakɔbu kloli i trali be’n, i ti yɛ be ɲin cili i ɔ. Like kun mɔ Zakɔbu yoli’n yɛle kɛ ɔ kpali tralɛ klanman kpa kun mannin Zozɛfu. Zakɔbu kloli Zozɛfu kpa afin ɔ ‘ti i kpɛnngbɛn nun ba,’ kpɛkun i yɛ ɔ ti i yi m’ɔ klo i kpa’n mɔ be flɛ i Rasɛli’n i wa kpɛnngbɛn’n niɔn.

Biblu’n waan ‘kɛ Zozɛfu i niaan’m be wun kɛ be si klo i tra be’n ti’n be nyin cili i.’ Asa kusu’n, le kun Zozɛfu seli i awlobo nunfuɛ’m be kɛ ɔ cɛnnin laliɛ naan be kwlakwla be kotoli i bo. I si bɔbɔ o nun wie. I sɔ’n ti’n, Biblu’n seli kɛ “i niaan’m be nyin bloli i wun.” I kpa bɔbɔ’n laliɛ sɔ m’ɔ kɛnnin i ndɛ’n ti’n, i si kpɛnnin i su.—Bo Bolɛ 37:1-11.

Kɛ ɔ cɛli kan mɔ Zozɛfu ɲannin afuɛ 17, i niaan’m be ɔli be bua nin be boli’m be kankanlɛ lika mmuammua kpa. Ɔ maan Zakɔbu sunmannin Zozɛfu kɛ ɔ ko nian be osu. ?Kɛ i niaan’m be wunnin i’n, a si like nga be nun sunman lika be kunndɛli kɛ bé yó’n?— Be kunndɛli kɛ bé kún i! Sanngɛ Ribɛni nin Zida b’a kplinman su.

Kɛ aata difuɛ wie’m bé sín lɛ bé kɔ́ Ezipti’n, Zida seli kɛ: “Man e yo i atɛ.” Ɔ maan, be yoli i atɛ. Kɛ ɔ yoli sɔ’n be kunnin boli kun, yɛ be fali Zozɛfu i tralɛ’n be wlɛli i mmoja’n nun. I sin’n, kɛ be fali tralɛ sɔ’n be kleli be si’n, ɔ kpannin seli kɛ: ‘Uuu! Nnɛn wlɛfuɛ wie cɛ yɛ ɔ́ dí Zozɛfu ɔ!’—Bo Bolɛ 37:12-36.

Kɛ ɔ́ kɔ́ i ɲrun’n, Ezipti famiɛn’n wa kloli Zozɛfu i sa kpa. Ɲanmiɛn maan ɔ kwla tuli Ezipti famiɛn’n i laliɛ nɲɔn’m be bo. I sɔ ti yɛ maan ɔ kloli i sa ɔ. Famiɛn’n i laliɛ klikli ng’ɔ cɛnnin nun’n, ɔ wunnin nannin bla nso mɔ be ti mlanmlan kpa’n. I sin’n, ɔ wunnin nannin bla kokloo kainkain nso. Laliɛ’n i nɲɔn su nun’n, ɔ wunnin ble ja kunngba m’ɔ wlɔli dandan nso’n ɔ nin ble ja kun ekun m’ɔ wlɔli kainkain nso’n. Zozɛfu seli kɛ laliɛ nɲɔn sɔ’m be kle kɛ bé ɲán aliɛ bé dí i afuɛ nso kpɛkun awe kpɛ́n afuɛ nso. Ɔ maan Ezipti famiɛn’n fali Zozɛfu sieli mɛn wunmuan’n su naan aliɛ blɛ afuɛ nso nun’n, ɔ tiantian aliɛ nuan. Kɛ ɔ ko yo naan sɛ awe’n kpɛn ɔn, b’a kwla ɲan aliɛ b’a di’n ti.

Kɛ awe’n kpɛnnin’n, Zozɛfu i si nin i niaan mɔ be tran mmuammua kpa’n be wa miannin aliɛ wun. Ɔ maan Zakɔbu sunmannin Zozɛfu i ɲrun kpɛnngbɛn blu’m be kɛ be ɔ Ezipti be ko kunndɛ aliɛ. Be ɔli be ko toli Zozɛfu sanngɛ b’a wunmɛn i wlɛ. I kusu w’a yimɛn i wun nglo w’a kleman be sanngɛ ɔ sali be niannin. Ɔ maan, ɔ wunnin kɛ sa tɛtɛ nga be yoli i’n ɔ yoli be nsisɔ. Kɛ ɔ yoli sɔ’n yɛ ɔ wa yili i wun nglo kleli be ɔ. Naan b’a tɔtɔ be wun nun’n. Ɔ yoli be fɛ lele b’a siman wie se!—Bo bolɛ ndɛ tre 40 lele 45.

?Ngue yɛ Biblu’n nun ndɛ nga kle wɔ be ɲin m’ɔ blo be wiengu wun’n i su ɔ?— Aɲinblɔɛ’n sanngan sran’m be afiɛn. Ɔ kwla yo maan sran kun kunndɛ kɛ ɔ́ yó i bɔbɔ i niaan wie i like tɛ! Kɛ sran’m be ɲin cili Zezi i sɔnnzɔnfuɛ mun’n, wafa nga be yoli be’n, maan e kanngan Sa Nga Be Yoli’n 5:17, 18 nin ndɛ tre 7:54-59 be nun naan e nian.— ?Kɛ a wie ndɛ nga nun kanngan’n, a wun sa ti yɛ ɔ fata kɛ e nian e wun kpa naan e ɲin w’a bloman sran wie wun’n?—

Zozɛfu dili afuɛ 110 naan w’a wu. Ɔ wuli ba yɛ i mma’m be kusu be wuli i anunman kpɛkun be wuli i anunman sian. Kɛ e niɛn i siin’n, e si kɛ Zozɛfu kleli i mma’m be kɛ be klo be wun naan nán be ɲin blo be wiengu wun.—Bo Bolɛ 50:22, 23, 26.

[Ja ngua lɛ ndɛ’n]

Kosan mun:

○ ?Kɛ be se kɛ be ɲin blo be wiengu wun’n, i bo’n yɛle benin?

○ ?Aɲinblɔɛ ti’n, ngue sa yɛ Zozɛfu i niaan’m be yoli i ɔ?

○ ?Ngue ti yɛ Zozɛfu yacili i niaan’m be sa nga be yoli i’n cɛli be ɔ?

○ ?Afɔtuɛ benin yɛ ndɛ sɔ’n man e ɔ?